TeꞌAlataꞌala Nongulit Nojanjia Sotoo Teunga Langkai EisiꞌAbraham
18
1 TeSiopua najaok eisiꞌAbraham moꞌosuk tepuu-puu sanu mooge eiponyombaong eiMamre.
Watu heꞌua teeleo moondak tutuu,
ane siꞌAbraham pepees nongodung eibamba nutendanya.
2 Lamai heꞌua siia nongengkata tevaꞌinya,
siia neꞌita,
tolutoo neꞌoro ampi heꞌua.
SiꞌAbraham selengaan nelinjok nolabot siira.
Siia noposuncul moongko eisiira
3 ane nonjarita,
“BoManggeꞌu,
ane siꞌoo masanang teambok eisiaꞌu,
inyaa nolabata tetendaꞌu.
Pesoopo luulu.
4 Patuvaya teogo sedeꞌi noala antau monambas tepaa numangge-mangge.
Simangge-mangge maala mengondok eiangkop nupuu eini.
5 Patuvaya siaꞌu mongala songkolo teroti,
antau simangge-mangge moꞌuigonye.
Heꞌuapa simangge-mangge maalamo monarusa tepelampa.
Karna simangge-mangge najaoko eipomoiaong nuvotuangmu eini.”
Siira nonyimbat,
“Oie.
Gauka sima inular niꞌoo.”
6 Lolongkang siꞌAbraham nentama eilalong nutenda ane nonjarita eisiSara,
“Poꞌolongkang,
noala rompululiter telabu sanu mombosi,
ane pogutu teroti sanu mololi.”
7 Lamai heꞌua siia nelinjok eipeinconong nubinaatang,
pinileinya sambaang teunga nusapi sanu teꞌanesnya moluga ane mombosi,
heꞌuapa vineenaꞌonya eivotuangnya,
sanu molongkang nogabu.
8 Notouk heꞌua siꞌAbraham nongala tesusu,
tesusu sanu moꞌodos ane teꞌanes sanu pinogabu heꞌua,
heꞌuapa inembeaꞌonya eitolo nutamu-tamunya.
b Pepees siira nenginang,
siꞌAbraham neꞌoro moꞌosuk siira eiangkop nupuu heꞌua.
9 Lamai heꞌua siira noꞌutanya,
“Eipaio siSara telapimu?”
SiꞌAbraham nonyimbat,
“Ampiee,
eilalong nutenda.”
10 Sotoo lamai siira nonjarita,
“Tetoung totoloi siaꞌu metencileonye.
Watu heꞌua siSara telapimu maꞌaala teunga langkai.”
Watu heꞌua siSara pepees noꞌinepea eibamba nutenda,
eiteꞌe nutamu-tamu heꞌua.
11 SiꞌAbraham ane siSara neisimo tutuu,
ane siSara jiongo tinindang nuraa.
12 Watu heꞌua siSara nengisi eilalong nuamboknya ane nonjarita,
“Siaꞌu neisimo ane nalante sima eini,
jio masipato ulengi seilu mosigalot concoono telapiꞌu.
c Telapiꞌu neisimo valii.”
13 Heꞌuapa teSiopu noꞌutanya eisiꞌAbraham,
“Neteꞌuya siSara nengisi ane nonjarita siia jio moguungaa teunga eiwatu siia neisimo?
14 TeSiopu maala monggauka jojoo.
Tetoung totoloi Siaꞌu metencile eiriꞌini.
Watu heꞌua siSara moguungaa sotoo teunga langkai.”
15 SiSara nobule,
karna heꞌua siia nalampoa,
ane nonjarita,
“Siaꞌu jio nengisi.”
Tapi teSiopu nonyimbat,
“Siꞌoo tutuu nengisi eikokua.”
SiꞌAbraham Nomongi EiSiopu Inyaa Momate Tetoo-too NuSodom
16 Touk heꞌua nelengkato tolutoo tetamu heꞌua inantara niꞌAbraham.
Heꞌuapa siira najaok eipomoiaong eipaio siira maala nopotiro teSodom.
17 TeSiopu nonjarita eilalong nuambok,
“Siaꞌu jio seilu nonyoyoka lamai siꞌAbraham tesapa sanu Ugauka.
18 Tebijanya majari tebangsa sanu mabari ane okuasa.
Lamai siia,
jojoo tebangsa eijuniaa Ubarakai.
19 Siia pinileiꞌU antau momatuju teunga-unganya ane tebijanya monuruꞌi Siaꞌu ane monggauka tesapa sanu mondolong ane maꞌadil.
Ane heꞌua nogauka niira,
jojoo tejanjiꞌU eisiꞌAbraham Uganai.”
20 Ancunaꞌonya teSiopu nonjarita eisiꞌAbraham,
“Siaꞌu neꞌeepemo mabari terait sima tetoo-too nuKota nuSodom ane nuKota nuGomora.
Tedosa-dosa niira majaat tutuu.
21 Karna heꞌua Siaꞌu menyau umaꞌo nomaresa jojoo terait sanu Uepe heꞌua tutuu atau jio.”
22 Lamai heꞌua rotoo tetamu heꞌua umaꞌo monunggai teSodom,
tapi siꞌAbraham ulengi neꞌoro eitolo nuSiopu.
23 SiꞌAbraham nongosuꞌi teSiopu ane noꞌutanya,
“Siꞌoo momate tetoo-too sanu mondolong concoono tetoo-too sanu majaat?
24 Ane umai limampulutoo sanu mondolong eilalong nukota heꞌua,
jojoo tetoo eikota heꞌua boSiopu nopoꞌorua?
TeSiopu seilu mongampuninya antau limampulutoo heꞌua masalamat?
25 Inyaa tetoo-too sanu mondolong heꞌua nopatei concoono sanu majaat.
Inyaa boSiopu!
Karna,
ane teSiopu monggaukaꞌonya,
tetoo-too sanu mondolong nohukum concoono sanu majaat.
Jio maala tetopongadili nujuniaa monggauka sanu jio maꞌadil!”
26 TeSiopu nonjarita,
“Ane Ujaok limampulutoo sanu mondolong eiSodom,
Siaꞌu mongampuni siira jojoo eikota heꞌua karna limampulutoo heꞌua.”
27 SiꞌAbraham nonjaritaonye,
“Ampuni teꞌababaraniꞌu monjarita eini,
boSiopu.
Siaꞌu eini boi temanusia,
ane jio ohaak monjaritaa tesapa-sapa.
28 Tapi laboi boi umai apampulu limatoo sanu mondolong,
jio limampulu.
TeSiopu mopoꞌorua jojoo tekota heꞌua boi nokurang limatoo?”
TeSiopu nonjarita,
“Ane eiriꞌua Ujaok apampulu limatoo sanu mondolong,
tekota heꞌua jio Upoꞌorua.”
29 SiꞌAbraham noꞌutanyaonye,
“Iamaꞌo ane boi apampulutoo sanu mondolong?”
TeSiopu nonyimbat,
“Ane umai apampulutoo heꞌua jio Upoꞌorua.”
30 SiꞌAbraham nonjarita,
“Ane siaꞌu monjaritaonye,
inyaa mongoungkul,
boSiopu.
Iamaꞌo ane boi tolumpulutoo sanu mondolong?”
TeSiopu nonyimbat,
“Ane Ujaok tolumpulutoo,
jio Upoꞌorua.”
31 SiꞌAbraham nonjarita,
“Ampuni teꞌababaraniꞌu monjarita eini,
boSiopu.
Ane boi rompulutoo sanu mondolong?”
TeSiopu nonyimbat,
“Ane Ujaok rompulutoo,
tekota heꞌua jio Upoꞌorua.”
32 Ponouꞌongnya siꞌAbraham nonjarita,
“Inyaa mongoungkul boSiopu siaꞌu monjarita boi sangkaningonye.
Iamaꞌo ane boi sompulutoo sanu mondolong?”