Tesuna Tetanda Nupejanjiong NuꞌAlataꞌala Concoono SiꞌAbraham
17
1 Watu teꞌumur niꞌAbram 99 ntoung,
teSiopua najaok eisiꞌAbram ane nonjarita,
“Siaꞌu teꞌAlataꞌala Sanu Tututuu Mabaraka,
turuꞌi teparentaꞌU ane kalepu gauka teꞌeseseiluꞌU.
2 Siaꞌu mogutu tepejanjiong concoono siꞌoo,
ane Siaꞌu mombenii eisiꞌoo mabari tebija.”
3 Lamai heꞌua siꞌAbram noposuncul nonyomba,
ane teꞌAlataꞌala nonjaritaonye eisiia,
4 “Eini tepejanjiongU concoono siꞌoo.
Siꞌoo majari tesiama nubangsa sanu mabari.
5 Karna heꞌua tetopemu jiongo siꞌAbram,
b tapi siꞌAbraham,
c karna siꞌoo Upaꞌatataap majari tesiama nubangsa sanu mabari.
6 Siaꞌu mombee eisiꞌoo mabari tutuu tebija jaok siira majari tebangsa-bangsa ane lasiatoo tebija niꞌoo majari tepuang-puang.
7 Siaꞌu mogutu tepejanjiong concoono siꞌoo ane tebijamu totoloimai ane tepejanjiong heꞌua seende-endenya.
Siaꞌu majari teꞌAlataꞌalamu ane teꞌAlataꞌala nubijamu.
8 Uvenii eisiꞌoo ane eibijamu tetana eini sanu pinomoiai niꞌoo sima tetoo sanu mokurang.
Jojoo teTana nuKanaꞌan Uveena majari tetanamu jaok seende-endenya,
ane Siaꞌu majari teꞌAlataꞌala niira.”
9 TeꞌAlataꞌala nonjaritaonye eisiꞌAbraham,
“Siꞌoo kanaboi nonuruꞌi tepejanjiongU,
siꞌoo ane tebijamu totoloimai.
10 Simamo eini tepejanjiong eiolot Niaꞌu ane niꞌemiu ane nubijamu,
sanu kanaboi noturuꞌi niꞌemiu:
sosotoo telangkai eiolot niꞌemiu kanaboi nosuna.
11 Teꞌuli nutotoloong niꞌemiu kanaboi nosampil.
Heꞌua majari tetanda nupejanjiong eiolot Siaꞌu ane siꞌemiu.
12 Mompamula eꞌeini jaok tebijamu totoloimai,
teunga langkai sanu teꞌumurnya oalueleo kanaboi nosuna.
Heꞌua jojoo telangkai niꞌemiu,
sanu pinoguungaa eivonuamu,
ane sanu inoli lamai tetoo mokurang nepake tedoi,
tapi jio tebijamu.
13 Tetoo sanu pinoguungaa eivonuamu ane tetoo sanu inolimu nepake tedoi kanaboi nosuna.
Heꞌua tetanda eiꞌalae niꞌemiu sanu monujua tepejanjiongU concoono siꞌemiu seende-endenya.
14 Telangkai sanu jio nosuna,
sanu jio nosampil teꞌuli nutotoloongnya,
jiongo noanggap tetooꞌU karna siia jiongo nonuruꞌi tepejanjiongU.”
15 TeꞌAlataꞌala nonjaritaonye eisiꞌAbraham,
“SiSarai telapimu,
tetopenya jiongo notope niꞌoo siSarai tapi siSara,
d heꞌua tetopenya.
16 Siaꞌu mombarakainya ane lamai siia valii Siaꞌu mombeena eisiꞌoo sotoo teunga langkai.
Siaꞌu mombarakainya,
jaok siia majari siina nubangsa-bangsa.
Tepuang-puang nopoguungaa lamai tebijanya.”
17 Lamai heꞌua noposuncul siꞌAbraham ane nengisi ane noꞌutanya eilalong nuamboknya,
“Iamaꞌo telangkai sanu teꞌumurnya 100 ntoung maala maꞌaala teunga?
Iamaꞌo siSara maala moꞌounga watu teꞌumurnya 90 ntoung?”
18 Lamai heꞌua siꞌAbraham nonjarita eiꞌAlataꞌala,
“Aginyamo siꞌIsmael sanu nobarakai Niꞌoo!”
19 Tapi teꞌAlataꞌala nonjarita,
“Jio,
tapi siSaramo,
telapimu sanu moguungaa teunga langkai eisiꞌoo,
ane siꞌoo monopei siia siꞌIshak.
e Siaꞌu mogutu tepejanjiongU concoono siia ane tebijanya jaok seende-endenya.
20 Sima siꞌIsmael,
Siaꞌu noꞌinepeaꞌomo tepomongiongmu.
Siaꞌu mombarakai siia.
Siaꞌu mombenii eisiia tebija sanu mabari tutuu.
Siia majari tesiama sompulu rotoo tepuang,
ane Siaꞌu mopaꞌajari siia tebangsa sanu mooge.
21 Tapi tepejanjiongU Upogutu concoono siꞌIshak,
sanu nopoguungaa niSara eisiꞌoo eitoung sanu totoloi eiwatu sima eini valii.”
22 Touk nonjarita eisiꞌAbraham,
teꞌAlataꞌala neteengkat nolinjoꞌimo siꞌAbraham.
23 Eieleo heꞌua siꞌAbraham noleva siꞌIsmael,
teunganya,
ane jojoo tetoo sanu pinoguungaa eivonuanya,
valii jojoo tevotuang sanu inolinya nepake tedoi,
jojoo telangkai sanu concoono siia.
Heꞌuapa siia nonyampil teꞌuli nutotoloong niira,
sima sanu jinaritaaꞌomo nuꞌAlataꞌala eisiia.
24 Teꞌumur niꞌAbraham 99 ntoung watu sinampil teꞌuli nutotoloongnya.
25 Teꞌumur niꞌIsmael,
teunganya,
13 ntoung watu sinampil teꞌuli nutotoloongnya.
26 Eieleo heꞌua siꞌAbraham ane siꞌIsmael,
teunganya,
sinuna.
27 Jojoo telangkai sanu concoono siꞌAbraham,
sanu pinoguungaa eivonuanya,
ane sanu inoli lamai tetoo sanu mokurang nepake tedoi,
sinuna concoono siia valii.