SiHagar Ane SiꞌIsmael
16
1 SiSarai,
telapi niꞌAbram,
jiompo naꞌaala teunga.
Tapi siSarai umai sotoo tevotuang lamai teMesir,
sotoo terandaa tetopenya siHagar.
2 SiSarai nonjarita eisiꞌAbram,
“TeSiopua jiompo mombeena siaꞌu moguungaa teunga.
Karna heꞌua,
mombosi siꞌoo moꞌoturu concoono tevotuangu eini.
Laboi siaꞌu maꞌaala teunga lamai siia.”
SiꞌAbram nonuruꞌi teꞌusul niSarai.
3 Lamai heꞌua siSarai nombeena siHagar eisiꞌAbram antau majari tesaruenya.
Watu heꞌua siꞌAbram sompuluntoungo nomoia eiTana nuKanaꞌan.
4 SiꞌAbram noꞌoturu concoono siHagar,
heꞌuapa tebengkel heꞌua nolumalo.
Tapi watu inotoi niHagar siia nolumalo,
siia maangka eisiSarai.
5 Lamai heꞌua siSarai nonjarita eisiꞌAbram,
“Tepegatu sanu irasaiꞌu teꞌasasalamu.
Siaꞌu nombeenamo siHagar tevotuangu eisiꞌoo,
ane watu inotoimo siia nolumalomo,
siia maangka eisiaꞌu.
Patuvaya teSiopu monantua sisee masala,
siꞌoo atau siaꞌu.”
6 SiꞌAbram nonyimbat,
“Siia tevotuangmu ane siꞌoo okuasa eisiia.
Pogugauk eisiia sima teꞌeseseilumu.”
Lamai heꞌua siSarai mepeꞌesesa siHagar,
jaok siia nelinjok nolinjoꞌinya.
7 Lamai heꞌua temalaekat nuSiopu nonjaoꞌi siHagar eiꞌosuk tebumbunb eitana sanu jio pinomoiai nutoo,
eijalang sanu nopake umaꞌo eiSyur.
8 Temalaekat heꞌua noꞌutanya,
“Hagar,
tevotuang niSarai,
siꞌoo lamai paio ane umaꞌo eipaio?”
SiHagar nonyimbat,
“Siaꞌu nelinjok lamai siSarai,
tetoo sanu nonguasai siaꞌu.”
9 Temalaekat heꞌua nonjarita,
“Petencile eisiia ane monuruk teparentanya.”
10 Temalaekat heꞌua nonjaritaonye,
“Siaꞌu mombenii siꞌoo mabari tebija,
jaok jio umai sotoo maala morekeng siira.
11 Siꞌoo nolumalo ane moguunga
teunga langkai.
Topei siia siꞌIsmael,
c
karna teSiopu neꞌeepemo iamaꞌo siꞌoo masesa.
12 Tapi teungamu heꞌua metuvu sima tekeledai sanu meila.
Siia mongeva jojoo tetoo,
ane jojoo tetoo mongeva siia.
Eipomoiaongnya siia mongeva jojoo terurusnya.”
13 SiHagar nonjarita eilalong nuamboknya,
“Tutuu siaꞌu neꞌitamo teꞌAlataꞌala sanu nongingitai siaꞌu.”
Lamai heꞌua siia nonope teSiopu sanu nonjarita eisiia,
“Siꞌoomo El-Roi.”d
14 Karna heꞌua tebumbun heꞌua tinope “teBumbun nuLahai-Roi.”
e Tebumbun heꞌua eiolot nuKadesh ane nuBered.