Tepejanjiong NuꞌAlataꞌala Concoono siꞌAbram
15
1 Touk heꞌua,
siꞌAbram nonarima tepeꞌita ane neꞌeepe teSiopua nonjarita eisiia,
“Inyaa mobule siꞌAbram,
Siaꞌu tedabangmu ane mongompoti siꞌoo lamai tesilaka,
ane mombeena eisiꞌoo tepombee sanu mooge tutuu.”
2 Tapi siꞌAbram nonyimbat,
“TeSiopu Alataꞌala,
jio ogunanya Siꞌoo mombee tepombee sanu mooge tutuu eisiaꞌu.
Karna siaꞌu jio ounga.
Ane siaꞌu maate,
sanu monarima tebudelu boi tevotuangu siꞌElieser,
tetoo nuDamsyik.
3 Siꞌoo jio mombeena teunga eisiaꞌu,
jadi boi sotoo tevotuangu sanu jamo monarima tebudelu.”
4 Tapi teSiopu nonjaritaonye eisiꞌAbram sima eini,
“Jio tevotuangmu sanu monarima tebudelmu,
tapi teunga langkaimu mboto,
siiamo sanu monarima tebudelmu.”
5 Lamai heꞌua teSiopu nongomung siꞌAbram nesuvung ane nonjarita eisiia,
“Siligaꞌomo telangit,
ane soꞌarai morekeng tevituong-vituong.
Jamo siꞌoo umai tebija teꞌabarinya sima tevituong-vituong heꞌua.”
6 SiꞌAbram nomarcaya eiSiopu,
ane karna heꞌua teSiopu nonganggap siia sima tetoo sanu mondolong.
7 Lamai heꞌua teSiopu nonjaritaonye eisiia,
“Siaꞌumo teSiopu,
sanu nomimpino siꞌoo mesuvung lamai teꞌUr,
tepomoiaong nutoo-too nuBabilonia,
b antau mombeena tetana eini eisiꞌoo majari tetanamu.”
8 Tapi siꞌAbram noꞌutanya,
“Oie,
boSiopu Alataꞌala iamaꞌo siaꞌu maala moꞌotoi tetana heꞌua majari tetanaꞌu?”
9 Nonyimbat teSiopu,
“Alaaꞌomo Siaꞌu sambaang tesapi siinanya,
sambaang tebembe siinanya ane sambaang tedomba siamanya,
jojoo teꞌumurnya 3 ntoung.
Alaaꞌomo valii sambaang tetogou ane sambaang teunga numerpati.”
10 Lamai heꞌua siꞌAbram nongomung tebinaatang-binaatang heꞌua eiꞌAlataꞌala.
Tesapi,
tebembe ane tedomba heꞌua jojoo binatanya najari robata,
ane sabata-sabata inembeaꞌonya pinopotolo mojijir rorua.
Tapi temamanuk heꞌua jio binatanya.
11 Lamai heꞌua tebinaatang-binaatang sanu maate sinompoi nuꞌaloaga-aloaga,
tapi siꞌAbram nombugonya.
12 Watu teeleo manaꞌaro nosondok,
siꞌAbram neteꞌoturu nororok.
Tedoromang nonyalibumbung siia ane siia nobule tutuu.
13 TeSiopu nonjarita eisiia,
“Siꞌoo kanaboi moꞌotoi,
tebijamu matantu majari tetoo-too sanu mokurang ane momoia eitana ntaninya.
Siira majari tevotuang ampi heꞌua ane masesa mokarajaa apagatus ntoung teendenya.
14 Tapi tebangsa sanu momajujut tebijamu majari tevotuang heꞌua Uhukum.
Lamai heꞌua watu tebijamu molinjoꞌi tetana heꞌua,
siira mongomung mabari teharta.
15 Siꞌoo mboto majaok teꞌumur sanu melenda.
Siꞌoo maate masanang,
lamai heꞌua notanona.
16 Notouk tebija sanu aapataꞌonya,
tebijamu metencile eiriꞌini eiTana nuKanaꞌan.
Siaꞌu jiompo mombugo tetoo-too nuꞌAmori sanu nomoia eiriꞌini eꞌeini,
karna jiompo magana tegauk-gauk niira sanu majaat jaok Siaꞌu mehukum siira.”
17 Lamai heꞌua teeleo mondoungo,
initamo nesuvung sobua tedapo-dapo sanu oobol ane teꞌobor sanu nevaa,
c lamai heꞌua nalabat eiolot nuꞌanes sanu binata heꞌua.
18 Watu heꞌua valii teSiopu nogutu tepejanjiong concoono siꞌAbram.
TeSiopu nonjarita,
“Siaꞌu nojanji mombeena eibijamu teTana nuKanaꞌan eini,
nompamula lamai teonto nuTana nuMesir jaok tebangkalang sanu mooge sanu tinope teBangkalang nuꞌEvrat.
19 Heꞌua tetana nutoo-too nuKeni,
nuKenas,
nuKadmon,
20 nuHet,
nuPeris,
nuRevaim,
21 nuꞌAmori,
nuKanaꞌan,
nuGirgasi ane nuYebusi.”