SiꞌAbram Nongeva Apatoo Tepuang Antau Nombebasa SiLot
14
1 Vavalii seeleo apatoo tepuang nongeva limatoo tepuang.
Apatoo tepuang heꞌua siꞌAmravel,
tePuang nuTana nuBabilonia,
a siꞌAriokh,
tePuang nuKota nuꞌElasar,
siKedorlaomer,
tePuang nuKota nuꞌElam,
ane siTideal,
tePuang nuKota nuGoyim.
2 Siira noparaang nongeva limatoo tepuang ntaninya.
Tepuang-puang heꞌua siBera,
tePuang nuKota nuSodom,
siBirsya,
tePuang nuKota nuGomora,
siSyinab,
tePuang nuKota nuꞌAdma,
siSemeber,
tePuang nuKota nuSeboim ane tepuang lamai teKota nuBela,
tekota sanu tinope valii teSoar.
3-4 Limatoo tepuang heꞌua nosituruk ane nongincona tetantara niira eiLembok nuSidim,
sanu eleo eini tinope teDagat nuOsing.
Teendenya sompulu rontoung siira pinarentaa nuPuang siKedorlaomer,
tapi eintoung sanu sompulu totolu,
siira nongeva siia.
5 Eitoung sompulu aapat,
siKedorlaomer ane tolutoo tepuang ntaninya najaok concoono tetantara niira ane nondaaga tetoo-too nuRevaim eiKota nuꞌAsyterot-Karnaim,
tetoo-too nuSusim eiKota nuHam,
tetoo-too nuꞌEmim eiKota nuSyawe-Kiryataim,
6 ane tetoo-too nuHori eibubuut sanu tinope teSeir,
jaok teꞌEl-Paran eipipit nutana sanu jio pinomoiai nutoo.
7 Touk heꞌua tepuang-puang ane tetantara-tantara heꞌua negois ane netencile eiKota nuꞌEn-Mispat sanu eleo eini tinope teKadesh.
Siira nonguasai tetana nutoo-too nuꞌAmalek ane nondaaga tetoo-too nuꞌAmori sanu nomoia eiKota nuHaseson-Tamar.
8 Lamai heꞌua tepuang-puang lamai teSodom,
teGomora,
teꞌAdma,
teSeboim ane teBela (tinope valii teSoar) nonjijir tetantara niira eiLembok nuSidim lamai heꞌua noparaang
9 nongeva siKedorlaomer,
tePuang nuꞌElam,
siTideal,
tePuang nuGoyim,
siꞌAmravel,
tePuang nuBabilonia,
ane siꞌAriokh,
tePuang nuꞌElasar.
Limatoo tepuang nongeva apatoo.
10 Telembok heꞌua umai mabari tebumbun nuꞌaspal,
ane watu tepuang-puang lamai teSodom ane teGomora nelinjok lamai poparaanong,
siira nanavu eilalong nubumbun-bumbun heꞌua.
Tetoo-too sanu ulengi netuvu nelinjok umaꞌo eibuut.
11 Apatoo tepuang sanu nondaag,
nongala jojoo tesagara concoono sanu noꞌinang eiSodom ane eiGomora,
lamai heꞌua nelampamo.
12 SiLot,
teponungao niꞌAbram valii inomung niira concoono jojoo tesagaranya,
karna siia nomoia eiKota nuSodom.
13 Tapi umai sotoo sanu maala nelinjok lamai tetantara numusu najaok nongulara jojoo sanu najari heꞌua eisiꞌAbram,
tetoo nuꞌIbrani heꞌua.
Eiwatu heꞌua siꞌAbram nomoia moꞌosuk tepuu-puu sanu mooge niMamre,
tetoo nuꞌAmori.
SiMamre heꞌua umai terururus,
siꞌEskol ane siꞌAner.
Siira tolutoo nogutumo tepejanjiong concoono siꞌAbram.
Ane noparaang,
siira mondulu.
14 Watu siꞌAbram neꞌeepe teponungaonya iraꞌop ane ilinjoka numusu,
ininconaꞌonya 318 too tevotuangnya sanu mapande moparaang.
Siira pinoguungaa eitenda-tenda niꞌAbram.
Lamai heꞌua siira nolilivur apatoo tepuang heꞌua jaok eiKota nuDan.
15 Eiriꞌua siꞌAbram nongatur tetoo-toonya selibok-selibok,
lamai heꞌua nongeva temusu watu nondoung ane nondaag siira.
Siia nolilivur siira jaok eiKota nuHoba eisabata nuꞌutara eiKota nuDamsyik.
16 SiꞌAbram nongala vavalii tesasagara sanu inagoi,
valii siLot,
teponungaonya heꞌua,
concoono tesasagaranya,
ane tebebengkel ane tetoo-too sanu tinaana ntaninya.
SiMelkisedek Nombarakai SiꞌAbram
17 Notouk nondaag tePuang siKedorlaomer ane tolutoo tepuang sanu concoono siia,
siꞌAbram netencile.
Watu heꞌua tePuang nuSodom umaꞌo molabot siia eiLembok nuSyawe sanu tinope valii teLembok nuPuang.
18 SiMelkisedek,
tePuang nuSalemb sanu valii teꞌimam nuꞌAlataꞌala Sanu Tututuu Mabaraka,
nongomung teroti ane teꞌanggur eisiꞌAbram.c
19 Lamai heꞌua siia nombarakai siꞌAbram ane nonjarita,
“Siaꞌu nomongi teꞌAlataꞌala Sanu Tututuu Mabaraka,
sanu nonjariaꞌomo tejuniaa ane telangit,
nombarakai siꞌAbram!
20 Pujimo teꞌAlataꞌala Sanu Tututuu Mabaraka,
sanu nonulung siꞌoo nondaag temusumu.”
Touk heꞌua siꞌAbram notilal jojoo tesagara sanu inagoinya heꞌua majari sompulu tilalong,
heꞌuapa vineenaꞌonya setilalong eisiMelkisedek.
21 Lamai heꞌua tePuang nuSodom nonjarita eisiꞌAbram,
“Alamo tesasagara sanu inagoi heꞌua,
tapi tencileaꞌomo eisiaꞌu jojoo tetooꞌu sanu inagoi heꞌua.”
22 Tapi siꞌAbram nonyimbat eiPuang nuSodom heꞌua,
“Siaꞌu nojanji sinabii nuSiopu,
d teꞌAlataꞌala Sanu Tututuu Mabaraka,
sanu nonjariaꞌomo tejuniaa ane telangit,
23 siaꞌu jio nongala tesapa-sapa lamai tesagaramu,
maampo boi salae telamor atau songkolo teluit nusandal.
e Sima heꞌua siꞌoo jio maala monjarita,
‘Siaꞌumo sanu nogutu siꞌAbram najari nakaya.’
24 Siaꞌu jio seilu mongala tesapa-sapa majari tesasagaraꞌu mboto.
Siaꞌu boi seilu monarima tesapa sanu ininango nutoo-tooꞌu.
Tapi patuvayamo tetagu-taguꞌu sanu nonulung siaꞌu,
heꞌua siꞌAner,
siꞌEskol ane siMamre,
nongala tetilal niira lamai sanu inagoi heꞌua.”