SiꞌAbram Ane SiLot Neꞌaꞌantaong
13
1 SiꞌAbram nolinjoꞌi teTana nuMesir ane umaꞌo tumoloi,
eiwilaya nuselatan eiTana nuKanaꞌan concoono silapinya,
jojoo tevotuangnya ane tesagaranya.
SiLot nonuut valii.
2 SiꞌAbram nakaya tutuu.
Siia umai mabari tepetuvuong,
teperak ane tebulaan.
3 Lamai heꞌua siia umaꞌo lamai teselatan eiTana nuKanaꞌan nesoo eipomoiaong mai pomoiaong jaok moꞌosuk teKampung nuBetel.
Siia najaok eitana eiolot nuBetel ane eiꞌAi,
eipaio siia luulu nongulea tetenda
4 ane luulu nogutu teporampunong tepombee.
Eiriꞌua siia nonyombaonye teSiopu.a
5 SiLot,
sanu nelampa concoono siꞌAbram,
umai valii tedomba-domba,
tebembe-bembe,
tesapi-sapi ane tetenda-tenda.
6 Eitana heꞌua jiongo nagana tegugusnya karna terekenong nupetuvuong-petuvuong niira mabari,
jaok siira rotoo jiongo maala momoia concoono eiriꞌua.
7 Karna heꞌua najari tebabantaonong eiolot tetopomiara-topomiara tepetuvuong niꞌAbram ane tetopomiara-topomiara tepetuvuong niꞌLot.
(Watu heꞌua tetoo-too nuKanaꞌan ane tetoo-too nuPeris ulengi nomoia eitana heꞌua.)
8 Karna heꞌua siꞌAbram nonjarita eisiLot,
“Jio mombosi siꞌita mebabantaong,
ane jio mombosi tetopomiara-topomiaramu ane tetopomiara-topomiaraꞌu mebabantaong,
karna siꞌita eini sorurus.
9 Karna heꞌua aginyamo siꞌita meꞌaꞌantaong.
Pilei tetana sanu seilumu.
Ane siꞌoo umaꞌo eisabata nuꞌoigi,
siaꞌu umaꞌo eisabata nuꞌoanong.
Ane siꞌoo umaꞌo eisabata nuꞌoanong,
siaꞌu umaꞌo eisabata nuꞌoigi.”
10 SiLot nongongontong ane initanya jojoo tetana eiLembok nuYordan,
jaok teKota nuSoar nabari teogonya,
sima teJoꞌong nuSiopub ane sima teTana nuMesir.
(Sima heꞌua tetana eiLembok nuYordan jijiompo teSiopu noruaa tekota-kota teSodom ane teGomora.)
11 Ponouꞌongnya siLot nomile jojoo tetana eiLembok nuYordan,
lamai heꞌua nelengkat umaꞌo eitimur.
Lamai heꞌua rotoo heꞌua neꞌaꞌantaong.
12 SiꞌAbram nomoia eiTana nuKanaꞌan,
ane siLot nongulea tetenda eiolot tekota-kota eilembok moꞌosuk teKota nuSodom.
13 Tetoo-too eiKota nuSodom heꞌua majaat tutuu ane odosa eiSiopu.
SiꞌAbram Nombalik EiHebron
14 Touk siLot neteꞌanta lamai siꞌAbram,
teSiopu nonjarita eisiꞌAbram,
“Lamai tepeꞌoroong niꞌoo,
sisiligi eiꞌutara,
eiselatan,
eitimur ane eibarat.
15 Jojoo tetana sanu inita niꞌoo heꞌua Uveena eisiꞌoo ane eibijamu antau majari tetana niꞌemiu seende-endenya.
16 Siaꞌu mombeena eisiꞌoo tebija sanu mabari tutuu,
jaok jio umai sotoo sanu maala morekeng siira.
Sima sotoo jio maala morekeng teavu eitana,
jio umai sotoo sanu maala morekeng tebijamu.
17 Mompamula lamai eꞌeini,
lampaimo jojoo tetana eini,
karna Siaꞌu mombeenaꞌomo tetana eini eisiꞌoo.”
18 Touk heꞌua siꞌAbram nombalika tetendanya lamai heꞌua nomoia moꞌosuk eipuu-puu sanu mooge eiMamre moꞌosuk eiKampung nuHebron.
Eiriꞌua siia nogutu teporampunong tepombee eiSiopu.