SiꞌAbram Ilevai NuꞌAlataꞌala
12
1 TeSiopua nonjarita eisiꞌAbram,
“Linjoꞌimo tetanamu,
terururusmu ane tevonua niamamu,
lamai heꞌua naꞌomob eitana sanu Utujua eisiꞌoo.
2 Siaꞌu mombee eisiꞌoo tebija sanu mabari ane siira majari tebangsa sanu mooge.
Siaꞌu mombarakai siꞌoo ane Siaꞌu mogutu tetoo-too eipaio-paio moꞌotoi tetope niꞌoo,
jaok siꞌoo mombarakai tetoo-too ntaninya.
3 Siaꞌu mombarakai tetoo-too sanu mombarakai siꞌoo
ane mongutuk tetoo-too sanu mongutuk siꞌoo.
Lamai siꞌoo
Siaꞌu mombarakai jojoo tesuku eijuniaa.”
4-5 Teꞌumur niꞌAbram 75 ntoung watu siia nolinjoꞌi teKota nuHaran,
sima sanu pinarentaa nuSiopu eisiia.
SiꞌAbram umaꞌo eiTana nuKanaꞌan concoono siSarai silapinya,
ane siLot teponungaonya,
ane jojoo tesagara ane tevotuang-votuang sanu naala niira eiHaran.
Watu siira najaok eiTana nuKanaꞌan,
6 SiꞌAbram nelampai tetana heꞌua jaok tepuu sanu mooge eiMore,
heꞌua tepongganeong eiKota nuSikhem.
Watu heꞌua tetoo-too nuKanaꞌan ulengi nomoia eitana heꞌua.
7 TeSiopu najaok eisiꞌAbram ane nonjarita eisiia,
“Einimo tetana sanu Uveena eibijamu.”
Karna heꞌua siꞌAbram nogutu teporampunong tepombee eiriꞌua antau monyomba teSiopu sanu najaok eisiia.
8 Touk heꞌua siia nonarusa tepelampanya umaꞌo eiselatan,
eibubuut eisabata nutimur eiKota nuBetel,
ane nongulea tetenda eiolot nuKota nuBetel ane nuKota nuꞌAi.
TeBetel eisabata nubarat ane teꞌAi eisabata nutimur.
Valii eiriꞌua siia nogutu teporampunong tepombee ane nonyomba teSiopu.
9 Lamai heꞌua siia nonarusaonye tepelampaongnya lamai selibok pomoiaong umaꞌo eipomoiaong ntaninya jaok siira najaok eiselatan eiTana nuKanaꞌan.
SiꞌAbram EiTana NuMesir
10 Watu heꞌua eiTana nuKanaꞌan umai teorok.
Jadi siꞌAbram umanyau eiTana nuMesir,
antau momoia ampi heꞌua karna teꞌabalaan teorok heꞌua masesa tutuu.
11 Watu siia sedeꞌipo nentama eiTana nuMesir,
siia nonjarita eisiSarai silapinya,
“Siaꞌu moꞌotoi siꞌoo tebengkel sanu magaya.
12 Ane tetoo-too nuMesir meꞌitamu,
siira monjarita,
‘Heꞌua telapinya.’
Lamai heꞌua siaꞌu nopatei ane siꞌoo nopatuvaya netuvu.
13 Jaritaa boi siꞌoo tetuaiꞌu antau siaꞌu nopatuvaya netuvu ane siira monggauka sanu mombosi eisiaꞌu karna siꞌoo.”
14 Heꞌuamo sanu najari.
Watu siꞌAbram najaok eiTana nuMesir,
tetoo-too nuMesir neꞌita siSarai heꞌua nagaya tutuu.
15 Lasiatoo tetoo sanu apangka nupuang neꞌita siia ane nongulara eipuang iamaꞌo nagaya tebengkel heꞌua.
Karna heꞌua siia inomung eivonua nupuang.
16 Karna siSarai,
tepuang nogugauk sanu mombosi eisiꞌAbram ane nombeena eisiia tevotuang-votuang,
lasiambaang tedomba,
tebembe,
tesapi,
tekeledai ane teꞌunta.
17 Tapi teSiopu nonjaoka tepees-pees sanu majaat eipuang ane eitoo-too eilalong nuvonuanya karna tepuang nongala siSarai,
telapi niꞌAbram.
18 Lamai heꞌua tepuang noleva siꞌAbram ane nonjarita eisiia,
“Siꞌoo nonggaukaꞌomo teꞌasasala eisiaꞌu!
Siꞌoo kanaboi mongulara eisiaꞌu siia telapimu.
19 Jio mombosi siꞌoo malampoa monjaritaa siia tetuaimu ane nomatuvaya siaꞌu nongalanya najari telapiꞌu!
Eini siia,
silapimu.
Alamo ane naꞌomo!”
20 Lamai heꞌua tepuang nomarentaa lasiatoo tetoonya,
ane siira nongomung siꞌAbram lamai tetana heꞌua concoono silapinya ane jojoo tesasagaranya.