Tepejanjiong NuꞌAlataꞌala Concoono SiNuh
9
1 TeꞌAlataꞌala nombarakai siNuh ane teunga-unganya ane nonjarita,
“Poꞌounga pomoꞌupu ane poniang mabari,
ane buꞌei tejuniaa.
2 Jojoo tebinaatang nubaowan,
jojoo temamanuk eiolong,
ane jojoo tebau eidagat mobule eisiꞌemiu.
Siira jojoo eilalong nukuasamu.
3 Jojoo sanu netuvu ane nengkening heꞌua maala majari sanu noꞌinang niꞌemiu.
Luulu Siaꞌu nombee boi sanu monobulung majari sanu noꞌinang.
Tapi eꞌeini jojoo majari sanu noꞌinang niꞌemiu.
4 Boi sangaya sanu jio maala siꞌemiu menginang,
heꞌuamo teꞌanes sanu ulengi araanya,
karna tenyaa umai eilalong nuraanya.
5 Siaꞌu mohukum maate jojoo tetoo ane tebinaatang sanu mepate temanusia.
6 Temanusia pinogutu sima terupaꞌU.
Karna heꞌua,
sisee-see mepate temanusia,
siia nopatei valii numanusia.
7 Siꞌemiu kanaboi poꞌounga pomoꞌupu ane poniang mabari antau tebija niꞌemiu mombuꞌei tejuniaa.”
8 Lamai heꞌua teꞌAlataꞌala nonjarita eisiNuh ane teunga-unganya,
9 “Eꞌeini Siaꞌu mogutu tepejanjiong concoono siꞌemiu ane tebijamu,
10 ane concoono jojoo sanu meambok,
heꞌua temamanuk,
tepetuvuong-petuvuong ane jojoo tebinaatang nubaowan,
jojoo sanu nesuvung lamai tepayangan heꞌua concoono siꞌemiu.
11 Eini tepejanjiongU concoono siꞌemiu:
Siaꞌu nojanji jojoo temanusia ane tebinaatang jiongo umai nobinasaaꞌonye lamai teogo buntul.
Jiongo umai momuntulonye jaok mopoꞌorua tejuniaa eini.
12 Simamo eini tetanda pejanjiongU concoono siꞌemiu ane tejanjiꞌU concoono jojoo sanu neambok ane jojoo tebija niꞌemiu seende-endenya:
13 Siaꞌu mongembea tepulagianU eiruꞌong majari tetanda nupejanjiongU concoono tejuniaa.
14 Watu Siaꞌu mongompoti telangit mepake teruꞌong lamai heꞌua tepulagian nembuꞌa,
15 Siaꞌu molambot tepejanjiongU concoono siꞌemiu ane concoono jojoo sanu meambok heꞌua.
Teogo buntul jiongo mombinasaaꞌonye jojoo sanu meambok.
16 Watu tepulagian membuꞌa eiruꞌong,
Siaꞌu meꞌita tepulagian heꞌua ane molambot tepejanjiongU sanu jio monouk heꞌua concoono jojoo sanu meambok eijuniaa.”
17 Lamai heꞌua teꞌAlataꞌala nonjaritaonye eisiNuh,
“Heꞌua tetanda nupejanjiongU sanu pinogutuꞌU concoono jojoo sanu meambok eijuniaa.”
SiNuh Ane Teunga-unganya
18 Teunga-unga niNuh sanu nesuvung lamai tepayangan heꞌua siSem,
siHam ane siYavet.
SiHam heꞌua tesiama niKanaꞌan.
19 Tolutoo teunga niNuh heꞌua najari tetosiaꞌang jojoo nutoo sanu nomoia eipapaio eijuniaa.
20 SiNuh heꞌua sotoo tetopejoꞌong,
ane siia sanu pabibia nonuda teꞌanggur eijoꞌong.
21 Touk siNuh nenginung teꞌanggurnya,
siia najari neilu.
Ilapasaꞌonya jojoo tepakeannya touk heꞌua noꞌoturu siia nelalau eilalong nutendanya.
22 Watu siHam,
heꞌua siama niKanaꞌan,
neꞌita siamanya nelalau,
siia nesuvung ane nongulara tegauk heꞌua eisiaꞌa-siaꞌanya sanu rotoo heꞌua.
23 Lamai heꞌua siSem ane siYavet nongala sabala tenaus ane nonyampoya eidodompal niira.
Siira nelampa teteꞌe nentama umaꞌo tetenda heꞌua ane nonyauni siama niira nepake tenaus heꞌua.
Siira jio nonyilig telio-lio niira antau jio meꞌita siama niira sanu nelalau heꞌua.
24 Watu siNuh jiongo neilu ane inotoinyamo tesapa sanu ginauka nuunga pomabusong heꞌua eisiia,
25 siia nonjarita,
“Kinutuk siKanaꞌan!
Siia majari tevotuang sanu tinumboy nusiaꞌa-siaꞌanya.
26 Pujimo teSiopu,
a teꞌAlataꞌala niSem!
SiKanaꞌan majari tevotuang niSem.
27 Siaꞌu nomongi teꞌAlataꞌala mepeꞌebilay tepomoiaong niYavet.
Patuvaya tebijanya nomoia concoono tebija niSem.
Tapi patuvaya siKanaꞌan majari tevotuang niYavet.”