Tebuntul Noolemo
8
1 TeꞌAlataꞌala jio nongelingani siNuh ane jojoo tebinaatang sanu concoono siia eilalong nupayangan heꞌua.
Lamai heꞌua teꞌAlataꞌala nonjaoka tebarat nonyumpar eijuniaa jaok teogo heꞌua nompamulamo noole.
2 Jojoo teogo lamai eiangkop nujuniaa inimpoti-Nya ane teogo lamai telangit dinonaꞌo-Nya.
Teujang inondokaꞌo-Nya.
3 Teogo tatarus noole.
Touk 150 eleo teogo jiongo mooge sima luulu.
4 Eitanggal sompulu pepitu vulang pepitu,
tepayangan heꞌua netetaang eibabok nuBuut nuꞌArarat.
5 Teogo tatarus noole ane eitanggal sobua,
vulang sompulu tepuncung-puncung nubuut nompamulamo inita.
6 Touk apampulueleo,
siNuh nomboꞌaa tejandela sanu pinogutunya eipayangan heꞌua.
7 Siia nolapasa sambaang teꞌaloaga.
Teꞌaloaga heꞌua tatarus neleak menekai umaꞌo jaok teogo buntul heꞌua noole.
8 Lamai heꞌua siNuh nolapasa sambaang temerpati antau moꞌotoi teogo heꞌua noolemo atau jiompo.
9 Tapi temerpati heꞌua jio naꞌajaok tepesompoong karna teogo ulengi nongimpoti jojoo tetana eijuniaa.
Karna heꞌua siia netencile umaꞌo eilalong nupayangan.
SiNuh nonjujua telimanya lamai heꞌua inomungnya nentama.
10 SiNuh netaangonye pitueleo,
lamai heꞌua ilapasaꞌonye temerpati heꞌua lamai tepayangan.
11 Watu beimbengi temerpati heꞌua netencile umaꞌo eisiia nongomung salae teroong nusaitun sanu paꞌali tinindu eilalong nungunjunya.
Karna heꞌua siNuh moꞌotoi teogo noolemo.
12 Touk netaangonye pitueleo,
siia nolapasaꞌonye temerpati heꞌua.
Tapi temerpati heꞌua jiongo netencile eisiia.
13 Eiwatu heꞌua teꞌumur niNuh 601 ntoung.
Watu eitanggal sobua,
vulang sobua,
tetana eijuniaa noꞌogalo.
SiNuh nomboꞌaa teatok nupayangan heꞌua ane siia nonyilig papalit ane neꞌita tetana noꞌogalo.
14 Eitanggal rompulu pepitu,
vulang rorua,
tejuniaa noꞌogalo tutuu.
15 Lamai heꞌua teꞌAlataꞌala nonjarita eisiNuh,
16 “Pesuvungo lamai tepayangan heꞌua concoono silapimu,
teunga-ungamu ane telapi-lapi niira.
17 Suvuna lamai tepayangan jojoo temamanuk,
tepetuvuong ane tebinaatang nubaowan ntaninya antau siira meunga ane moniang mabari ane mombuꞌei tejuniaa.”
18 Lamai heꞌua siNuh nesuvung lamai tepayangan heꞌua concoono telapinya,
teunga-unganya ane telapi-lapi niira.
19 Jojoo temamanuk ane tebinaatang nubaowan nesuvung lamai tepayangan heꞌua sangaya mai sangaya.
SiNuh Nombee Tepombee EiꞌAlataꞌala
20 Lamai heꞌua siNuh nogutumo teporampunong tepombee untuk teSiopu.
a Inalanya lasiambaang lamai jojoo nengangayaongb temamanuk ane tepetuvuong sanu jio mepali,
lamai heꞌua sinambaleaꞌonya ane vineenaꞌonya simamo tepombee sanu irampuni eibabok nuporampunong heꞌua.
21 Teboo sanu mombongi lamai tepombee heꞌua mopaꞌasanang teambok nuSiopu,
ane Siia nonjarita eilalong nuambok,
“Siaꞌu jiongo mongutuk tejuniaa eini karna tegauk numanusia.
Siaꞌu moꞌotoi lamai eiwatu siira ulengi molumbi,
tepikiran numanusia heꞌua majaat.
Siaꞌu jiongo mombinasaaꞌonye jojoo sanu meambok simamo sanu paꞌali ginaukaꞌU eini.
22 Eꞌendenya tejuniaa eini,
kalepu umai tewatu teponuda ane umai tewatu tepelolu,
tewatu mojolo ane tewatu moondak,
tewatu tesilo ane tewatu moujang,
teeleonya ane tendoungnya.”