Teogo Nomuntul
7
1 Lamai heꞌua teSiopua nonjarita eisiNuh,
“Siaꞌu neꞌita siꞌoo sotoo-tooanaꞌonya sanu mondolong lamai jojoo tetoo sanu netuvu eleo eini.
Karna heꞌua,
pentamamo umaꞌo eilalong nupayangan heꞌua concoono telapimu,
teunga-ungamu ane tetomodait-tomodaitmu.
2-3 Omung valii pitupaar lamai jojoo nengangayaongb temamanuk eiolong ane tepetuvuong sanu jio mepali,
tapi lamai sanu mepali,
boi sapaar lamai jojoo nengangayaong.
Gauka heꞌua antau lamai jojoo nengangayaong tebinaatang umai sanu masalamat lamai amateong ane ulengi maala mebija eijuniaa.
4 Karna pitueleopo Siaꞌu monyaua teujang eijuniaa teendenya apampulumbengi apampulueleo.
Temanusia ane tebinaatang-binaatang sanu Upogutu heꞌua nobinasaa.”
5 Lamai heꞌua siNuh nonggauka jojoo sanu pinarentaa nuSiopu eisiia.
6 Teꞌumur niNuh 600 ntoung watu teogo nomuntul eijuniaa.
7 SiNuh concoono silapinya ane teunga-unganya ane telapi-lapi niira,
nentama eilalong nupayangan heꞌua untuk mopaꞌasalamat teꞌalae niira lamai tebuntul.
8-9 Sapaar,
siamanya ane siinanya lamai jojoo nengangayaong temamanuk,
tebinaatang sanu jio mepali,
tebinaatang sanu mepali ane tebinaatang nubaowan ntaninya,
nentamamo umaꞌo eilalong nupayangan heꞌua concoono siNuh,
sima sanu pinarentaa nuꞌAlataꞌala eisiNuh.
10 Pitueleopo lamai heꞌua tebuntul najaoko eijuniaa.
11 Watu teꞌumur niNuh 600 ntoung,
eitanggal sompulu pepitu,
vulang rorua,
tejuniaa nebesek jaok jojoo teogo eilalong nesuvung,
ane teogo lamai telangit sima teogo nubangkalang sanu mooge nanavu jaok tejuniaa,
12 ane teujang sanu morombak najaok eꞌendenya apampulumbengi apampulueleo.
13 Eieleo heꞌua valii,
siNuh ane silapinya nentamamo umaꞌo eilalong nupayangan heꞌua concoono tolutoo teunganya siSem,
siHam ane siYavet concoono telapi-lapi niira.
14 Concoono siira nentama jojoo nengangayaong tepetuvuong,
jojoo nengangayaong tebinaatang nubaowan ntaninya ane jojoo nengangayaong temamanuk.
15 Sapaar lamai jojoo nengangayaong tebinaatang sanu netuvu nentamamo umaꞌo eilalong nupayangan concoono siNuh.
16 Sanu najaok mentama heꞌua sambaang siamanya ane sambaang siinanya lamai jojoo nengangayaong tebinaatang ane temamanuk sanu netuvu sima sanu pinarentaa nuꞌAlataꞌala eisiia.
Touk jojoo nentamamo,
teSiopu nevombonaꞌomo tevombong nubamba nupayangan.
17 Tebuntul heꞌua nontiang eꞌendenya apampulueleo,
ane teogo mooge ane nongengkatnya jaok tepayangan heꞌua maala melantap.
18 Teogo heꞌua nontiang mooge ane tepayangan heꞌua lalantap eibabok nuogo.
19 Teogo heꞌua tatarus nontiang mooge jaok jojoo tebuut sanu mapangkat heꞌua iloupi nuogo.
20 Teogo tatarus nontiang mooge jaok sompulu limanciꞌu eibabok nubuut.
21 Jojoo sanu neambok eijuniaa maate.
Temamanuk,
tepetuvuong-petuvuong ane tebinaatang-binaatang nubaowan ntaninya ane temanusia valii naate.
22 Naate jojoo sanu neambok ane netuvu eibaowan.
23 Jojoo sanu neambok eijuniaa ginonua nuꞌAlataꞌala.
Heꞌua temanusia,
tepetuvuong-petuvuong,
tebinaatang-binaatang nubaowan ntaninya ane temamanuk.
Sanu jio maate boi siNuh ane siira concoono siia eilalong nupayangan heꞌua.
24 Teogo heꞌua jio noole eꞌendenya 150 eleo.