Teꞌajajaat Numanusia
6
1 Watu temanusia nompamula nontiang nabari eipaio-paio eijuniaa,
ane teunga-unga bengkel pinoguungaa,
2 temalaekat-malaekat nuꞌAlataꞌalaa neꞌita tebengkel-bengkel heꞌua magaya.
Lamai heꞌua siira nolapi tebengkel-bengkel sanu seilu niira.
3 Lamai heꞌua teSiopub nonjaritamo,
“Siaꞌu jio mombeena temanusia metuvu seende-endenya,
karna siira boi temanusia sanu kanaboi maate.
Lamai nyapoeini teꞌumur niira jio melabi lamai 120 ntoung.”
4 Eiwatu heꞌua,
ane valii otouknya,
umai tetoo-too nuraksasa eijuniaa.
Siira tebija nubengkel numanusia sanu nolapi concoono temalaekat-malaekat nuꞌAlataꞌala.
c Tetoo-too nuraksasa heꞌua tetoo-too sanu malangkai luulumai ane mabari tutuu tetoo moꞌotoi sima tegauk niira.
5 TeSiopu neꞌita tetoo-too eijuniaa majaat tutuu.
Siia neꞌita valii jojoo tepikiran niira kalepu majaat.
6 Karna heꞌua teꞌAlataꞌala nonosol nonjariaꞌomo temanusia eijuniaa.
Moondong tutuu teambok-Nya.
7 Karna heꞌua Siia nonjarita,
“Siaꞌu mombinasaa jaok jiongo umai eijuniaa temanusia sanu pinogutuꞌU heꞌua ane tepetuvuong-petuvuong ane tebinaatang-binaatang nubaowan ntaninya ane temamanuk eiolong karna Siaꞌu nonosol nonjariaꞌomo siira.”
8 Tapi siNuh nopaꞌasanang teambok nuSiopu.
Tetuturong TeNabi SiNuh
9 Eini tetuturong niNuh ane tebijanya.
SiNuh tetoo sanu mondolong ane siia sotoo-tooanaꞌonya sanu jio osala eiwatu heꞌua.
Siia netuvu netataguong concoono teꞌAlataꞌala.
10 SiNuh noꞌounga tolutoo telangkai eini tetope-tope niira siSem,
siHam ane siYavet.
11 Tapi jojoo tetoo ntaninya eijuniaa majaat eilalong pongita nuꞌAlataꞌala,
ane teꞌajajaat umai eipaio-paio.
12 TeꞌAlataꞌala nonyilig tejuniaa ane Siia neꞌita teꞌajajaat karna jojoo temanusia majaat otutuvunya.
13 Jadi teꞌAlataꞌala nonjarita eisiNuh,
“Siaꞌu nonantuaꞌomo untuk mombinasaa jojoo sanu neambok eijuniaa,
karna tejuniaa nobuꞌe nuꞌajajaat numanusia.
Otutuuaꞌonya Siaꞌu mopoꞌoropu siira ane tejuniaa eini.
14 Pogutu siꞌemiu songkolo tepayangan sanu mooge lamai teꞌayu govir.
Pogutu tekamar-kamar eilalongnya.
Lampisi mepake teꞌaspal eilalong ane eiteꞌenya.
15 Pogutu tepayangan heꞌua 300 nciꞌu elelendanya,
50 nciꞌu tebilaynya,
ane 30 nciꞌu teꞌapapangkatnya.
16 Pogutu teatok nupayangan heꞌua,
ane patuvaya senciꞌu eiolot nuatok ane tevombong-vombongnya.
Pogutu tepayangan heꞌua toluuncur ane ulea sobua tevombong nubamba eisoripinya.
17 Poꞌinepea!
Siaꞌu monjaoka teogo buntul untuk mombinasaa jojoo tebinaatang ane temanusia sanu neambok eijuniaa.
Jojoo eijuniaa maate.
18 Tapi concoono siꞌoo,
Siaꞌu seilu mogutu tepejanjiong.
Mentama eilalong nupayangan heꞌua concoono silapimu,
teunga-ungamu ane telapi-lapi niira.
19 Siꞌemiu kanaboi mongomung umaꞌo eilalong nupayangan sapaar lamai jojoo tebinaatang antau siira masalamat concoono siꞌemiu.
20 Sambaang siamanya ane sambaang siinanya lamai jojoo nengangayaongd temamanuk,
tepetuvuong ane tebinaatang nubaowan ntaninya kanaboi majaok eisiꞌoo.
Omungo umaꞌo eilalong nupayangan heꞌua antau siira jio nobinasaa.
21 Siꞌoo mongala jojoo nengangayaong sanu noꞌinang niꞌoo ane sanu noꞌinang nubinaatang-binaatang heꞌua ane mongembea eilalong nupayangan.”
22 SiNuh nonggauka jojoo sanu noparentaa nuꞌAlataꞌala eisiia.