SiKain Ane SiHabel
4
1 Lamai heꞌua siꞌAdam noꞌoturu concoono siHawa,
silapinya,
ane tebengkel heꞌua nolumalo.
Siia noguungaaꞌomo teunga langkai ane nonjarita,
“Siaꞌu naꞌaala sotoo teunga langkai karna teSiopua nonuluni.”
Lamai heꞌua tinopeinya teunga heꞌua siKain.b
2 Lamai heꞌua siHawa noguungaaꞌonye sotoo teunga langkai,
tetopenya siHabel.
SiHabel najari tetopomiara tedomba-domba ane tebembe-bembe,
tapi siKain najari tetopejoꞌong.
3 Vavalii seeleo siKain nongala setilalong lamai tehasil nujoꞌongnya vineena tepombee eiSiopu.
4 Lamai heꞌua siHabel nongala lasiambaang teunga nudomba sanu pabibia sinambalenya,
lamai heꞌua vineenaꞌonya tetilalong sanu mabari telongu eiSiopu.
TeSiopu nasanang eisiHabel ane tepombeenya,
5 tapi jio nasanang eisiKain ane tepombeenya.
Karna heꞌua siKain najari nongoungkul tutuu ane telionya mbumbungut.
6 Lamai heꞌua teSiopu nonjarita eisiKain,
“Inyaa siꞌoo mongoungkul.
Inyaa teliomu mbumbungut.
7 Ane siꞌoo mogutu mombosi pasti teliomu jio mbumbungut.
Tapi ane siꞌoo monggauka sanu majaat,
lamai heꞌua tedosa metaang untuk mentama umaꞌo eilalong nuambokmu.
Tedosa seilu monguasai siꞌoo,
tapi siꞌoo kanaboi mondaaginya.”
8 Lamai ampi heꞌua siKain nonjarita eisiHabel,
tetuainya,
“Maemo siꞌita umaꞌo tejoꞌong.”
Lamai heꞌua siira najaoko,
siKain nonyaraang,
ane nepate tetuainya.
9 Lamai heꞌua teSiopu noꞌutanya eisiKain,
“Eipaio siHabel,
tetuaimu?”
SiKain nonyimbat,
“Siaꞌu jio uotoi.
Siaꞌu jio tetoponjaga tetuaiꞌu.”
10 Lamai heꞌua teSiopu nonjarita,
“Siꞌoo nonggaukaꞌomo sanu majaat.
Teraa nutuaimu neroroa eiSiaꞌu lamai tetana,
sima tesuara sanu neroroa momongi tepesava.
11 Siꞌoo nomatemo tetuaimu ane teraanya naanjul eitana.
Karna heꞌua eꞌeini Siaꞌu nongutuk siꞌoo jaok tetana jiongo mohasila sanu noꞌinang eisiꞌoo.
12 Ane siꞌoo monudai,
tetana heꞌua jio umai mohasila tesapa-sapa.
Siꞌoo majari tetopongalalampa sanu jio umai tepomoiaong eijuniaa.”
13 Lamai heꞌua siKain nonjarita eiSiopu,
“Tehukuman heꞌua novoat tutuu,
siaꞌu jio maala monarimanya.
14 Eleo eini Siꞌoo nombugo siaꞌu lamai tetana sanu kinarajaa eini,
naavaro lamai Siꞌoo.
Siaꞌu majari tetopongalalampa sanu jio umai tepomoiaong eijuniaa,
ane siaꞌu nopatei sisee-see sanu metepojaok siaꞌu.”
15 Tapi teSiopu nonjarita,
“Jio.
Ane sotoo momate siꞌoo,
Siaꞌu mesavaaꞌonya ane tehukumannya pitungkaning movoat lamai tehukuman niꞌoo.”
Lamai heꞌua teSiopu nongembe tetanda eisiKain antau sisee-see sanu metepojaok siia jio momatenya.
16 Lamai heꞌua siKain umaꞌo lamai eitolo nuSiopu ane nomoia eitana sanu tinope teNod,
sanu tebatuanya tetana nupongalalampaong,
eisabata nutimur nuꞌEden.
Tebija NiKain
17 Lamai heꞌua siKain noꞌoturu concoono silapinya ane siia nolumalo.
Lamai heꞌua siira naꞌaala teunga langkai sanu tinopei siHenokh.
Touk heꞌua siKain nongoroa selibok tekota ane tinopeinya tekota heꞌua teHenokh monuruk tetope nuunganya.
18 SiHenokh heꞌua siama niꞌIrad.
SiꞌIrad siama niMehuyael.
SiMehuyael siama niMetusael.
SiMetusael siama niLamekh.
19 SiLamekh heꞌua alapi rotoo,
siꞌAda ane siSila.
20 SiꞌAda noguungaa siYabal,
ane tebija niYabal tetoo-too sanu nomoia eilalong nutenda ane nomiara tepetuvuong-petuvuong.
21 Tetuainya sanu tinope siYubal ane siia tetoo sanu pabibia sanu notambak tekacapi ane tesuling.
22 SiSila noguungaa siTubal-Kain,
ane siia tetoo sanu pabibia sanu nogutu jojoo nengangayaongc teparkakas lamai tetambaga ane tepue.
Tetuainya bengkel niTubal-Kain sanu tinope siNaꞌama.
23 SiLamekh nonjarita eirotoo telapinya,
“Ada ane Sila,
poꞌinepea tesuaraꞌu.
Hee lapi-lapiꞌu,
poꞌinepea tejaritaꞌu eini.
Siaꞌu nomate sotoo telangkai karna siia nonibas siaꞌu nepake teꞌiabut.
Siaꞌu nomate siia karna siia nombobog siaꞌu.
24 Ane sotoo momate siKain,
tehukumannya pitungkaning movoat heꞌuapa tehukuman niKain.
Tapi,
ane sotoo momate siaꞌu,
tehukumannya pitumpulu pitungkaning movoat heꞌuapa tehukuman niKain.”
SiSet Ane Teunganya, SiꞌEnos Pinoguungaa
25 SiꞌAdam noꞌoturu concoono telapinya lamai heꞌua siia noguungaa teunga langkai.
Nonjarita siHawa,
“TeꞌAlataꞌala nombenii siaꞌu teunga langkai simamo pombolos niHabel,
sanu pinateimo niKain.”
Karna heꞌua siHawa nonopei siia siSet.d
26 SiSet ounga langkai ane nonopei siia siꞌEnos.
Watu heꞌua tetoo-too nompamulamo nepake tetope nuSiopu watu monyomba teꞌAlataꞌala.