Temanusia Nogutu Tedosa
3
1 Tesaa mapande heꞌuapa tebinaatang-binaatang nubaowan ntaninya sanu pinogutu nuSiopua Alataꞌala.
Tesaa heꞌua noꞌutanya eibengkel heꞌua,
“Tutuu teꞌAlataꞌala nolarang siꞌemiu menginang tevua-vua lamai jojoo tepuu eijoꞌong eini?”
2 Tebengkel nonyimbat eisaa heꞌua,
“Siꞌami maala menginang tevua-vua lamai jojoo tepuu nuꞌayu eilalong nujoꞌong eini.
3 Tapi sima tevua lamai tepuu nuꞌayu sanu eitanga-tanga nujoꞌong,
teꞌAlataꞌala nonjarita,
‘Inyaa siꞌemiu menginang atau monggama tevua heꞌua,
antau siꞌemiu jio maate.’ ”
4 Tesaa heꞌua nonyimbat eibengkel heꞌua,
“Heꞌua jio tutuu.
Siꞌemiu jio maate.
5 Siia nonjarita heꞌua karna siia moꞌotoi,
watu tevua noꞌinang niꞌemiu,
tepikiran niꞌemiu neteboꞌa,
ane siꞌemiu majari selilio sima teꞌAlataꞌala ane moꞌotoi tesapa sanu mombosi ane tesapa sanu majaat.”
6 Tebengkel heꞌua meꞌita tevua nupuu heꞌua magaya ane mombosi noꞌinang.
Ane tevua heꞌua noꞌinang,
tevua heꞌua mogutu tetoo manoto.
Karna heꞌua siia seilu.
Lamai heꞌua siia nelolu tevua heꞌua ane ininangnya ane vinenaꞌonya sanggaat eisilapinya sanu concoono siia ane silapinya nenginang valii.
7 Watu siira nenginang tevua heꞌua,
tepikiran niira neteboꞌa ane siira moꞌotoi siira nelalau.
Lamai heꞌua siira nonjaong teroong nuꞌarab antau pinongompota tetotoloong.
8 Beimbengi heꞌua siira neꞌeepe teSiopu Alataꞌala lalampa eilalong nujoꞌong.
Lamai heꞌua siira rotoo nencoyok eiolot nupuu-puu nuꞌayu antau jio noꞌita nuSiopu.
9 Tapi teSiopu Alataꞌala noleva telangkai heꞌua,
“Eipaio siꞌoo?”
10 Telangkai heꞌua nonyimbat,
“Siaꞌu neꞌeepe Siꞌoo eijoꞌong.
Siaꞌu nobule karna siaꞌu nelalau ane siaꞌu nencoyok.”
11 TeSiopu Alataꞌala noꞌutanya,
“Sisee nongulara siꞌoo nelalau?
Siꞌoo nenginang tevua sanu Ularang heꞌua?”
12 Telangkai heꞌua nonyimbat,
“Tebengkel sanu vineena Niꞌoo monagui siaꞌu heꞌua nombeena tevua heꞌua eisiaꞌu lamai heꞌua ininangu.”
13 TeSiopu Alataꞌala noꞌutanya eibengkel heꞌua,
“Neteꞌuya ginaukaꞌomo niꞌoo heꞌua?”
Tebengkel nonyimbat,
“Siaꞌu inakali nusaa,
lamai heꞌua siaꞌu nenginang tevua heꞌua.”
TeꞌAlataꞌala Nohukum Tesaa, Tebengkel Ane Telangkai
14 Lamai heꞌua teSiopu Alataꞌala nonjarita eisaa heꞌua,
“Karna siꞌoo nonggaukaꞌomo heꞌua,
siꞌoo nohukum,
heꞌuapa jojoo tepetuvuong ane tebinaatang nubaowan ntaninya,
siꞌoo sanu monanggung tekutuk eini.
Mompamulamo nyapoeini siꞌoo mendoyor mepake teꞌompongmu,
ane menginang teavu eꞌendenya nuꞌotuvumu.
15 Siaꞌu mogutu siꞌoo ane tebengkel heꞌua mengkengkelesong.
Tebijanya ane tebija niꞌoo mengkengkelesong valii.
Tebijanya mopoꞌorua tevaꞌimu ane siꞌoo monutuk teꞌintidnya.”
16 Lamai heꞌua teSiopu nonjarita eibengkel heꞌua,
“Siaꞌu montiana tutuu mepees watu siꞌoo iꞌompong ane eiwatu siꞌoo moguunga.
Maampo sima heꞌua siꞌoo ulengi osareya concoono silapimu ane siꞌoo monuruk eisiia.”
17 Lamai heꞌua nonjarita teSiopu Alataꞌala eilangkai heꞌua,
“Siꞌoo nonuruꞌi silapimu ane nenginang tevua sanu Ularang noꞌinang niꞌoo.
Karna tegaukmu,
kinutuk tetana heꞌua.
Siꞌoo kanaboi mokarajaa movoat eꞌendenya nuꞌotuvumu antau tetana eini maꞌaala tehasilnya sanu noꞌinang niꞌoo.
18 Nengangayaongc tegugus orui sanu meumbuk eitana,
ane tutudaong sanu metuvu eitana niꞌoo majari sanu noꞌinang niꞌemiu.
19 Siꞌoo mandasa mokarajaa ane mosoyoꞌot antau siꞌoo maala menginang,
jaok siꞌoo metencile umaꞌo eitana.
Karna lamai tetana siꞌoo pinaꞌajari ane siꞌoo majari tetana vavalii.”
20 SiꞌAdam nonopei silapinya,
siHawa,
d karna tebengkel heꞌua majari siina jojoo numanusia sanu metuvu.
21 Lamai heꞌua tebaju niꞌAdam ane silapinya pinogutu nuSiopu Alataꞌala lamai teꞌuli nubinaatang,
lamai heꞌua pinake niira.
SiꞌAdam Ane SiHawa Binugo Lamai TeJoꞌong NuꞌEden
22 Lamai heꞌua teSiopu Alataꞌala nonjarita,
“Eꞌeini temanusia heꞌua najarimo selilio siꞌita ane moꞌotoi sanu mombosi ane sanu majaat.
Karna heꞌua,
paraluu nojagai antau siia jio mongala ane menginang tevua sanu mombenii teꞌotutuvu,
ane siia metuvu seende-endenya.”
23 Lamai heꞌua teSiopu Alataꞌala nombugo temanusia lamai teJoꞌong nuꞌEden ane nonuju mongurus tetana.
Tetana sanu pinake nuꞌAlataꞌala nogutu siia.
24 Touk nombugo siira,
teSiopu Alataꞌala nomarentaa temalaekat-malaekat tinope tekerub,
ane nongembea samata teꞌiabut oapi sanu meendog eipapaio untuk monjagai tejalang umaꞌo eipuu sanu mombenii teꞌotutuvu heꞌua.
Temalaekat-malaekat ane teꞌiabut inembeaꞌo-Nya eisabata nutimur nujoꞌong heꞌua.