2
1 Sima heꞌua notouko pinogutu-Nya telangit,
tejuniaa ane jojoo teisinya.
2 Watu teeleo sanu epepituaꞌonya teꞌAlataꞌala notouko tepokarajaaong-Nya,
karna heꞌua Siia nengondok eieleo heꞌua.
3 Lamai heꞌua binarakai-Nya teeleo epepituaꞌonya ane pinaꞌajari-Nya teeleo heꞌua mapacing,
karna eieleo heꞌua teꞌAlataꞌala nengondoko.
Siia notouko tepokarajaaong-Nya nogutu telangit,
tejuniaa ane jojoo teisinya.
Tetuturong SiꞌAdam Ane SiHawa EiJoꞌong NuꞌEden
4 Eini tetuturong watu telangit ane tejuniaa pinogutu.
Watu teSiopua Alataꞌala nogutu telangit ane tejuniaa,
5 jiompo umai tetudaong sanu neumbuk ane jiompo umai tetudaong eijuniaa,
karna teSiopu jiompo nonyaua teujang ane jiompo umai tetoo mokarajaa tetana heꞌua.
6 Tapi teogo nesuvung lamai eiangkop nutana ane nenjoui eibaboknya.
7 Lamai heꞌua teSiopu Alataꞌala nongala tetana,
pinogutu-Nya sotoo temanusia.
Lamai heꞌua sinubaa eilulu nuenge numanusia jaok netuvu temanusia heꞌua.
8 Lamai heꞌua teSiopu Alataꞌala nogutu tejoꞌong eiꞌEden eisabata nutimur,
ane nonuju nomoia eiriꞌua temanusia sanu pinogutu-Nya heꞌua.
9 TeSiopu Alataꞌala netuvua jojoo nengangayaongb tepuu sanu magaya,
sanu nohasila tevua-vua sanu mombosi noꞌinang.
Eitatanga nujoꞌong netuvu sompuung sanu mombee teꞌotutuvu seende-endenya,
ane sompuung sanu mombee tepoꞌotoi sima sanu mombosi ane sanu majaat.
10 Umai tebangkalang sanu maanjul lamai teꞌEden,
nenjoui tejoꞌong heꞌua.
Eisabata nuꞌEden tebangkalang heꞌua najari apampanga.
11 Sanu pabibia tetopenya tePison.
Tebangkalang heꞌua maanjul nomaliti teTana nuHawila.
Ampi heꞌua umai tebulaan.
12 Tebulaan ampi heꞌua tebulaan sanu tulen,
ane umai valii tedamag sanu mombongi,
ane tevatu-vatu sanu masuli tinope tekrisopras.
13 Tebangkalang sanu ororuaaꞌonya tinope teGihon.
Teogonya maanjul nomaliti teTana nuKush.
14 Tebangkalang sanu ototoluaꞌonya tinope teTigris ane maanjul eisabata nutimur nuꞌAsyur.
Tebangkalang sanu aapataꞌonya tinope teꞌEvrat.
15 Lamai heꞌua teSiopu Alataꞌala nongembea temanusia heꞌua eiJoꞌong nuꞌEden antau siia mokarajaa ane momarentai tejoꞌong heꞌua.
16 TeSiopu Alataꞌala nomarenta eimanusia heꞌua,
“Siꞌoo maala menginang tevua-vua lamai jojoo tepuu eijoꞌong eini.
17 Tapi siꞌoo jio maala menginang tevua lamai tepuu sanu mombee tepoꞌotoi sima sanu mombosi ane sanu majaat.
Ane siꞌoo menginangnya,
siꞌoo tantu maate eieleo heꞌua.”
18 Lamai heꞌua teSiopu Alataꞌala nonjarita,
“Jio mombosi temanusia metuvu boi sotoo.
Siaꞌu mogutu sotoo tetagu sanu mapaas ane maala mondului siia.”
19 Lamai heꞌua teSiopu Alataꞌala nongala tetana ane nogutu jojoo nengangayaong tebinaatang nubaowan ane temamanuk eiolong.
Jojoo inomuna nuꞌAlataꞌala umaꞌo eimanusia heꞌua antau moꞌotoi tetope tesapa sanu vinenaꞌonya eisiira.
Heꞌua teꞌasal pabibia tebinaatang nubaowan ane temamanuk eiolong naꞌaala tetope-tope niira.
20 Sima heꞌua temanusia heꞌua nonopei jojoo tepetuvuong,
temamanuk eiolongnya ane tebinaatang-binaatang nubaowan sanu ntaninya.
Tapi jio umai sambaang sanu mapaas ane maala mondului siia.
21 Karna heꞌua teSiopu Alataꞌala nogutu temanusia moꞌoturu mororok.
Watu ulengi siia moꞌoturu,
teSiopu Alataꞌala nongala sobua teusuk lamai teꞌalae numanusia heꞌua,
lamai heꞌua inimpotaꞌo-Nya telaabnya nepake teisi.
22 Lamai teusuk sanu inala-Nya lamai temanusia heꞌua teSiopu Alataꞌala nogutu sotoo tebengkel.
Lamai heꞌua inomung-Nya umaꞌo eilangkai heꞌua.
23 Watu heꞌua nonjarita telangkai heꞌua,
“Eini siia,
tetoo sanu sima siaꞌu.
Tevuꞌunya lamai tevuꞌuꞌu,
ane teisinya lamai teisiꞌu.
Utopea siia tebengkel,
c karna siia inala lamai telangkai.”
24 Heꞌua tesabanya tetoo langkai nolinjoꞌi siamanya ane siinanya,
ane nosolibok concoono silapinya,
lamai heꞌua rotoo najari sotoo.
25 Telangkai ane tebengkel heꞌua nelalau,
tapi siira jio nesili.