Tepamulaongnya
Tetuturong Iamaꞌo TeꞌAlataꞌala Nogutu Telangit, Tejuniaa Ane Teisinya
1
1 Watu pabibia,
watu teꞌAlataꞌala manaꞌaro nogutu tejuniaa ane telangit,
2 tejuniaa jiompo orupanya ane jio osapa-sapa.
Tedoromang nongimpoti tedagat sanu mooge,
ane teꞌAlus nuꞌAlataꞌala lalayang eibabok nuogo.
3 TeꞌAlataꞌala nonjarita,
“Pajarimo terava!”
Lamai heꞌua najari terava.
4 TeꞌAlataꞌala neꞌita terava heꞌua mombosi.
Lamai heꞌua inantaaꞌo-Nya terava heꞌua lamai tedoromang.
5 TeꞌAlataꞌala nonopei terava heꞌua “teEleonya,”
ane tedoromang heꞌua “teNdoung.”
Umaimo teeleo ane umaimo tendoung,
heꞌua teeleo sanu pabibia.
6 Lamai heꞌua teꞌAlataꞌala nonjarita,
“Pajarimo teolong eitatanga nuogo antau motilal teogo heꞌua najari rorua.”
7 Sima heꞌua teꞌAlataꞌala nogutu teolong sanu nongantaa teogo sanu umai eiangkop nuolong lamai teogo sanu eibaboknya.
Lamai heꞌua najarimo sima heꞌua.
8 Teolong heꞌua tinopei-Nya “teLangit.”
Umaimo teeleo ane umaimo tendoung,
heꞌua teeleo sanu ororuaaꞌonya.
9 Lamai heꞌua teꞌAlataꞌala nonjarita,
“Pajarimo teogo sanu umai eiangkop nulangit maanjul umaꞌo noꞌoselibok,
antau tetana sanu moꞌogal noꞌita.”
Lamai heꞌua najarimo sima heꞌua.
10 TeꞌAlataꞌala nonopei tetana sanu moꞌogal heꞌua “teBaowan” ane tepeinconong nuogo heꞌua tinopei-Nya “teDagat.”
TeꞌAlataꞌala neꞌita sanu pinaꞌajari-Nya heꞌua mombosi.
11 TeꞌAlataꞌala nonjarita,
“Pajarimo jojoo sanu netuvu eitana,
heꞌua nengangayaonga tetutudaong sanu ovuꞌu-vuꞌu ane nengangayaong tepuu-puu sanu mevua tevua-vua sanu ovuꞌu.”
Lamai heꞌua najarimo sima heꞌua.
12 Lamai tetana netuvumo nengangayaong tetutudaong sanu ovuꞌu-vuꞌu ane nengangayaong tepuu-puu sanu mevua tevua-vua sanu ovuꞌu.
TeꞌAlataꞌala neꞌita sanu pinaꞌajari-Nya heꞌua mombosi.
13 Umaimo teeleo ane umaimo tendoung,
heꞌua teeleo sanu ototoluaꞌonya.
14-15 Lamai heꞌua teꞌAlataꞌala nonjarita,
“Pajarimo sanu marava eilangit antau moravai tejuniaa ane mongantaa teeleo lamai tendoung.
Sanu marava heꞌua najari tetanda,
antau tetoo moꞌotoi morekeng teeleo,
tetoung,
ane teeleo mooge nuꞌagama.”
Lamai heꞌua najarimo sima heꞌua.
16 Sima heꞌua teꞌAlataꞌala nogutu rorua sanu marava ane sanu mooge.
Sanu melabi mooge heꞌua teboas nueleo sanu marava watu teeleonya,
ane sanu melabi medeꞌi heꞌua tevulang sanu marava watu tendoungnya.
Pinogutu-Nya valii tevituong-vituong.
17 TeꞌAlataꞌala nongembea sanu marava heꞌua eilangit antau moravai tejuniaa,
18 untuk moravai teeleonya ane tendoungnya,
ane nongantaa terava lamai tendoung.
TeꞌAlataꞌala neꞌita sanu pinaꞌajari-Nya heꞌua mombosi.
19 Umaimo teeleo ane umaimo tendoung,
heꞌua teeleo sanu aapataꞌonya.
20 Lamai heꞌua teꞌAlataꞌala nonjarita,
“Pajarimo eilalong nuogo seꞌelolon nabari nengangayaong sanu neambok,
ane eiolongnya paꞌajari tebinaatang-binaatang sanu oꞌapi meleak.”
21 Lamai heꞌua teꞌAlataꞌala nogutu tebinaatang-binaatang sanu mooge tutuu eidagat,
ane jojoo nengangayaong tebinaatang sanu netuvu eilalong nuogo,
ane jojoo nengangayaong temamanuk sanu meleak.
TeꞌAlataꞌala neꞌita sanu pinaꞌajari-Nya heꞌua mombosi.
22 TeꞌAlataꞌala nombarakai jojoo tebinaatang heꞌua ane nonjarita,
“Poꞌounga ane poniang mabari ane buꞌei teogo eidagat ane valii temamanuk poniang mabari eijuniaa.”
23 Umaimo teeleo ane umaimo tendoung,
heꞌua teeleo sanu olelimaaꞌonya.
24 Lamai heꞌua teꞌAlataꞌala nonjarita,
“Pajarimo nengangayaong tebinaatang eibaowan,
heꞌuamo tepetuvuong-petuvuong,
ane tebinaatang-binaatang nubaowan ntaninya.”
Lamai heꞌua najarimo sima heꞌua.
25 Sima heꞌua teꞌAlataꞌala nogutu jojoo nengangayaong tepetuvuong ane jojoo nengangayaong tebinaatang nubaowan ntaninya.
TeꞌAlataꞌala neꞌita sanu pinaꞌajari-Nya heꞌua mombosi.
26 Lamai heꞌua teꞌAlataꞌala nonjarita,
“Siꞌita mogutu temanusia majari sima terupa Niꞌita mboto antau siira selilio siꞌita.
Siira monguasai tebau-bau eidagat ane temamanuk eiolongnya ane tepetuvuong ane jojoo tebinaatang nubaowan ntaninya.”
27 Sima heꞌua teꞌAlataꞌala nogutu temanusia monuruk terupa-Nya,
ane pinogutu-Nya siira sima Siia mboto.
Pinogutu-Nya siira telangkai ane tebengkel.
28 Lamai heꞌua binarakai-Nya siira ane nonjarita,
“Poꞌounga pomoꞌupu ane poniang mabari,
ane buꞌei tejuniaa ane momarenta tebau-bau eidagat ane temamanuk eiolongnya ane jojoo tebinaatang eibaowan.”
29 “Siaꞌu nombee eisiꞌemiu jojoo nengangayaong tetudaong eipapaio eijuniaa sanu mevua tevuꞌu-vuꞌu ane jojoo tepuu sanu mevua tevua-vua sanu ovuꞌu majari sanu noꞌinang niꞌemiu.
30 Tapi eijojoo temamanuk eiolongnya,
eijojoo tepetuvuong,
ane eijojoo tebinaatang nubaowan ntaninya,
eijojoo sanu meambok,
Uvenii tegugus ane tetudaong oroong majari sanu noꞌinang niira.”
Lamai heꞌua najarimo sima heꞌua.
31 TeꞌAlataꞌala neꞌita jojoo sanu pinogutu-Nya mombosi tutuu.
Umaimo teeleo ane umaimo tendoung,
heꞌua teeleo sanu oononaꞌonya.