27
पौलुस के रोम पइठाल गेलक
1 जखन इटा तय करल गेलक कि हामरे के पानी जाहाज लेक इटली देस जायेक आहे, तो पौलुस के आर आरो दोसर कैदी गिला के समराट केर पालटन जुलियुस नामेक सरदार केर हाथे जिमा देल गेलक। 2 हामरे एकटा पानी जाहाज मेहेन चापली, जे अद्रमुतियुस सहर केर रहे, उ जाहाज टा आसिया राइज केर समुन्दर धार जावइया रहे, उटाके खोइल कहन जाय लागली। हामरेक संगे अरिस्तर्खुस नामेक एकटा लोग रहे, जे मकिदुनिया राइजेक थिस्सलुनीके सहर केर बसीन्दा रहे। 3 दोसर दिन हामरे सैदा सहर मेहेन पहँचोली। हुँआ जुलियुस पौलुस केर उपरे दया करलक आर उके उकर संगी साथी गिलाक पासे जायेक अनुमति देलक, ताकि उकर दोरकारेक जिनिस गिला के पूरा करुन। 4 हुँआ लेक हामरे जाहाज के खोलली, समुन्दर केर हवा आघु बाटे लेक आत रहे, सेतेहें हामरे साइप्रस टापू केर ओलत मेहेन होय कहन चलली। 5 आर किलिकिया आर पंफूलिया राइज पासेक समुन्दर लेक होय कहन गेली आर लूसिया राइज केर मूरा नामेक जायगा मेहेन नाभली। 6 हुँआ सिकन्दरिया सहर लेक इटली देस जावइया जाहाज के जुलियुस पालक, तखन ऊ हामरे के उ जाहाज टाय चापाय देलक।
7 जखन हामरे कोयो दिन तक धीरे-धीरे आघु बाढ़त के गेली, तो बेजाइन कोस्टोय कनिदुस सहर पासे पहँचोली, काहेकि हवा आघु बाटे बाढ़े नाइ देत रहे, सेतेहें हामरे सलमोने सहर पास लेक होय कहन क्रेते टापू केर ओलत मेहेन गेली। 8 आर हामरे बेजाइन कोस्टोये क्रेते टापू केर धारे-धारे जाहाज के पार करत के ‘बढ़ीयाँ बाँचेक बन्दरगाह’ नामेक जायगाय पहँचोली, जे लसया सहर पासे रहे। 9 इ रकम बेजाइन दिन बित गेलक आर उपास केर दिन टाउ बीत चुइक रहे। काहेकि उ समय मौसम ठीक नाई रहेक चलते जाहाज के आघु बाढ़ायेक टाउ खातरा रहे, सेतेहें पौलुस सउब लोग के चेताय कहन कहलक, 10 "ए भाइ सउब, मोके एसन लागो तेहे कि जाहाजे पानी डहर लेक चलेक बेजाइन कोस्टो आर खातरा आहे। केबल सामान आर जाहाज केरे नाही बल्कि हामरेक जीव टाकेरो नास होय पारे।" 11 किन्तु पालटन गिलाक सारदार टा पौलुस केर सलाह के जाहाज चालाइया आर जाहाज मालिक केर काथा लेक बेसी मानलक। 12 आर उ बन्दरगाह टा जाड़ मास बितायेक तेहें बढ़ियाँ नाई रहे, सेतेहें ढेइर झनेक राय होलक कि कोनो रकम हुआँ लेक जाहाज के खोइल कहन फिनिक्स सहर मेहेन पहँचोती आर जाड़ मास टा बिताबिक। इटा तो क्रेते केर बन्दरगाह हेके। इकर दूरा दखिन-पछिम आर उत्तर-पछिम दिसाय खुलेला।
समुन्दर मेहेन हवा बसात
13 जखन दखिन बाटेक हवा धीरे-धीरे बहे लागलक, तो जेसन उमने चाहत रहयँ, ओसने पूरा होलक। सेखन जाहाज चालाइया गिला लंगर के उठालयँ आर क्रेते टापू केर धारे-धारे जाय लागली। 14 किन्तु थोड़ेक देरी बादे उतर-पूरुब दिसा लेक बेजाइन आँटे हवा बसात आलक आर गोटा टापूवे बहे लागल आर जाहाजे टकरालक। 15 उ बेजाइन आँटे हवा बसात केर चलते हामरे जाहाज के घुराय नाई पारली सेतेहें उके हवा केर दिसाय जाय देली आर जाहाज संगे बोहाते चइल गेली। 16 तखन हामरे काउदा नामेक छोटे टापू केर ओलत मेहेन बोहाते-बोहाते बेजाइन मोसकिले जाहाज केर छोटे छोटे लाउका गिला के समढ़ाय पारली। 17 आर लाउका गिला के उपर उठाल बादे जाहाज के मजगूत करेक तेहें आघुक हिस्सा के हेंठ लेक उपर तक डोराय बाँइध देलयँ। आर सुरतिस नामेक दलदली बालीये थासाँयेक डर रहे, सेतेहें उपरेक पाल गिला के नाभाली (ताकि जाहाज धिरे धिरे जाउक) आर हावा संगे बोहाते चलते गेली। 18 दोसर दिन जखन हामरे के जाहाज मेहेन हवा बसात टा उलट पुलट कइर देलक, सेखन उमन जाहाज केर लादल माल गिला के समुन्दरे फेंके लागलयँ। 19 आर तीसर दिन निजेक हाथ लेक जाहाज केर डोरा आर आरो जिनिस गिला के फेंकलयँ। 20 आर बेजाइन दिन तक सूरज आर तरीगन गिलाउ नाइ देखालयँ आर हवा बसात चलतेइ रहे, आखिर मेहेन हामरेक बाँचेक आसराउ सिरालक।
21 जहाज मेहेन ढेइर दिन तक केउ कोनो नाई खाय रहयँ। तखन पौलुस उमनेक मइधे ठाड़ होय कहन कहलक, "ए भाइ सउब, जदि तोहरे मोर सलाह के मानता आर क्रेते टापू लेक नाइ निकलोती होले एसन बिपइत लेक बाँचल रोहती आर कोनो हानि नाई होतक। 22 एखनो मोयँ तोहरे लेक अरजी करतँ कि सांहास करा, काहेकि तोहरे लेक केकरो जीव टा नास नाई होई, केबल जाहाज टाकेर होई। 23 काहेकि मोयँ परमेसर केर अदमी हेकँ आर उकर सेबा-सुसार करँला, ओहे परमेसर केर एकटा सरग दूत आइज राइते मोर पासे आय कहन कहलक, 24 ‘ए पौलुस, ना डाराव, तोके समराट पासे पाक्का ठाड़ होयेक आहे। देख, तोर उपरे दया कइर कहन जाहाज मेहेन जतिक लोग तोर संगे जा तहयँ उमनो कोउ परमेसर रइखा करी।’ 25 सेतेहें तोहरे सांहास करा, काहेकि मोयँ परमेसर माहान बिसास करँला, जेसन ऊ मोके कइह आहे ओसनेइ होई। 26 किन्तु हामरे कोनो टापूवे जड़ूर फाँइस जाबिक।"
जहाज टुटेक
27 चोउदवाँ राइते हामरे जहाजे अद्रिया समुन्दर मेहेन थसरात-बजरात के बोहात रही, तखन आधा राइते लाउका चालाइया गिला के एसन लागलक कि हामरे कोनो टापू धारे पहँचोतिहि। 28 आर जखन डोरा डूबालयँ, तो उमने बीस पुरसा गाड़हा पालयँ। आर थोड़ेक धूर आघु जाय कहन आरो डोरा के डुबालयँ, तो पोन्दरो पुरसा पालयँ। 29 इ डरे कि काहाँउ पाखनाय ना बजड़ाउक कइह कहन उमन जाहाज केर पेछुवे चाइरटा लंगर के डूबालयँ आर बिहान होयेक आसरा देखत रहयँ। 30 किन्तु लाउका चालाइया गिला जाहाज लेक पारायेक खोजत रहयँ, सेतेहें जाहाज केर आघु बाटेक लंगर डुबायेक बाहनाय लाउका के समुन्दर मेहेन नाभाय देलयँ। 31 सेखन पौलुस पालटन गिलाक सरदार आर पालटन गिला के कहलक, "जदि इमन जाहाज मेहेन नाई रहबयँ होले तोहरउ बाँचे नाई पारबा।" 32 तखन पालटन गिला डोरा काइट कहन लाउका के समुन्दरे गिराय देलयँ। 33 बिहान होयेक लेक पहिले पौलुस सउब लोग गिला के कोनो खायेक तेहें अरजी करलक। आरो ऊ कहलक, "आइज तोहरे चौदह दिन आसरा देखत के भुखे रहला आर कोनो नाई खाला। 34 सेतेहें मोयँ तोहरे के अरजी करोतँ, आपन जीव बाँचायेक तेहें तनिक कोनो खाय लेवा, काहेकि तोहरे लेक केकरो कोनो हानी नाई होई।" 35 एसन कइह कहन ऊ रोटी लेलक आर सउब केर सामने परमेसर के धन्यवाद देलक आर खेंचा कइर कहन खाय लागलक। 36 तखन सउब झन सांहास कइर कहन खाय लागलयँ। 37 जहाज माहने हामरे सउब मिलाय कहन दूइ सअ छेयतर झन रही। 38 जखन उमन पेट भोइर खालयँ, तो गोहोम के समुन्दर मेहेन फेंइक कहन जाहाज के हुल्का करे लागली। 39 बिहान होल बादे उमन देस के चिनहे नाई पारलयँ, किन्तु उमन एकटा बाला केर धारी जायगा के देखे पालयँ। उमने बिचार करलयँ कि जदि होय पारे होले जाहाज के हियाँइ ठाड़ करबिक। 40 उमन लंगर केर डोरा गिला के काइट कहन पानीये गिराय देलयँ, आर सेखने लाउका चालाइया गिला बान्धल के खोइल देलयँ आर हवा डहरे पाल के उठाय कहन भूँई धार बाटे चइल देलयँ। 41 किन्तु जहाज दूइटा समुन्दर केर जोड़नाही मेहेन जाय कहन फाँइस गेलक आर जाहाजेक आघुक हिस्सा टा बाली मेहेन एसन फाँइस गेलक, न जाहाज टा टस न मस तनिको हिलबो नाइ करत रहे आर पानी केर हिलकोरा केर चलते जाहाज केर पेछु बाटे टूटे लागलक। 42 तखन पालटन गिला सलाह करलयँ कि कैदी गिला के माइर मोराय देबिक ताकि उमन केउ पोंहइर कहन ना पाराय जाउन। 43 किन्तु पालटन गिला केर सरदार टा पौलुस के बाँचाय खोजलक, सेतेहें उमन के एसन ना करबा कइह कहन कहलक आर उमन के हुकूम देलक, जे गिला पोंहरे पारबा उमन पहिले पोंहइर कहन धार बाटे पार होय जावा। 44 आर जतिक बाँचल आहा उमन पाटरा गिलाय आर जाहाज केर टुटल दोसर कोनो सामान गिला लेक पार होय जावा । इ रकम सउब लोग गिला समुन्दर लेक बाहिर बेस निहार बाहराली।