लुका केर लिखल सुसामाचार
1
परिचय
1 ए सिरीमान थियुफिलुसa ईसु मसीह केर जीवनी के एखन तक बेजाइन लोग गिला लिखलयँ। 2 उकर लेक जुड़ल निजेक देखल घटना गिला केर हाल के चेला गिला आर सुसामाचार परचार करइया गिला केर दाराय हामरेक ताहाँ पहँचोलक। 3 सेटा के मोकोउ उचित बुझालक कि ऊ सउब घटना गिला केर पूरा हाल-सामाचार सुरु लेक आखरी तक बेस निहार छान बिन कइर कहन तोर खातिर क्रम अनुसार लिखम। 4 ताकि जे मते सिच्छा तोके मिल आहे, ऊ सच्चाई केर बिसास टा मजबूत होवुक।
योहन केर जनमेक घोसना
5 ऊ समय जखन यहूदिया देसे हेरोदेस केर राइज चलत रहे, सेखन जकरिया नामेक एकटा यहूदी याजक रहे। ऊ मंदिरे सेबा करइया अबियाह नामेक दल केर सदस्य रहे। उकर घरइया इलिसिबा जे हारुनb बंस केर रहे। 6 उमन दुइयो झन धरमी रहयँ, आर परमेसरc केर आग्यां आर नियम गिला के मानत रहयँ। 7 तेऊ उमनेक एको टा छुवा-पुता नाइ रहयँ, काहेकि इलिसिबा बांझी रहे, आर उमने दुइयो झन ढेइरे बुढ़ाय जाय रहयँ।
8 एक दिन जकरिया आपन पारी केर मोताबिक परमेसर केर मंदिर माहने सेबा-सुसार करत रहे। 9 ओहे दिन मंदिर माहने परमेसर केर सामने धूना-धूप जलायेक तेहें उकर नामे चिठी निकलोलक। 10 नियम केर मोताबिक धूना-धूप जलायेक समय दोसर लोग गिला बाहिरे प्राथना करत रहयँ। 11 जकरिया मंदिर माहने रहे, सेखन आचानक बेदीd केर दहिना बाटे परभु केर एक टा सरग दूतe उके दिस्तार देलक। 12 जकरिया उके देइख कहन बेजाइन डारालक। 13 लेकिन सरग दूत टा उके कहलक, “ए जकरिया ना डाराबे, मोयँ तोके एक टा बेस खबर देक तेहें आय आहों, परमेसर तोर बिनती सुनलक। देख, तोर घरइया इलिसिबा लेक एक टा बेटा छुवा जनम लेइ। तोयँ उकर नाम योहनf राखबे। 14 उकर जनम लेले तोहरे दुइयो झन के बेजाइन खुसी होई, आर दोसर लोग गिला कोउ। 15 काहेकि ऊ परभु केर नजइर माहने बोड़े लोग बनी, ऊ दाखरसg आर मोद कबोउ नाइ पीयी। ऊ आपन मांय केर गात लेकेइ पबित्र आत्माh केर सक्ति लेक भरल-पूरल रही। 16 ऊ इसराइली लोग गिला लेक ढेइर के उकर परभु परमेसर बाटे घुराय कहन आनी। 17 उकर माहने पुरखा समय केर भबिस्यबानी करइया एलियाह केर समान आत्मा आर सक्ति रही आर उकर आयेक मसीहi लेक पहिले होइ। ऊ लोग गिला के मसीह केर आयेक तेहें तेयार करी। ऊ मांय-बाप केर कठोर मन के आपन छुवा बाटे घुराय देई, आर आग्यां नाइ मानइया लोग गिला के धरमी लोग निहार बुध्दि देई आर लोग गिला के मसीह केर तेहें तेयार करी।”
18 जकरिया सरग दूत के पुछलक, “इटा का रकम होई? हामरे तो मोयँ आर मोर घरइया दुइयो झन बुढ़ाय गेली।” 19 तखन सरग दूत उके कहलक, “मोयँ जिबराइल हेकँ। मोयँ परमेसर केर पासे ठाड़ रहँला। तोके ई सुसामाचारj सुनायेक तेहें परमेसरे मोके पइठाय आहे। 20 तोयँ मोर काथा के बिसास नाइ करले, सेइ तेहें तोयँ ऊ छुवा जनमेक तक गुंगाइ रहबे। मोर बचन आबइसो ठहराल समय माहने पूरा होई।” 21 आर सउब लोग जकरिया केर बाहिर आयेक आसरा देखत रहयँ। उमने के ताजुब लागत रहे कि जकरिया के मंदिर माहने एतिक देरी काहे हो तेहे। 22 जखन जकरिया निकलोलक तो काथा कहे नाइ पारलक। सउब लोग उकर इसारा टाय बुझलयँ कि उके मंदिर माहने कोनो दरसन पाय हे। 23 जखन जकरिया केर सेबा करेक दिन पूरा होलक तेकर बादे ऊ आपन घर घुइर आलक।
24 ई घटना होल बादे उकर जनी इलिसिबा भारी गात होलक आर ऊ निजे के पाँच महीना तक लुकाय राखलक। 25 ऊ कहत रहे कि, “परमेसर मोर ऊपरे दया कइर कहन मोर बाँझी होयेक अपमान टाके दूर करलक।”
ईसु केर जनमेक घोसना
26 जखन इलिसिबा केर भारी गात होल छह महीना होय रहे, तखन परमेसर जिबराइल सरग दूत के गलील प्रदेस केर नासरत नगर माहने मरियम नामेक एक टा डिंड़ा बेटी छुवा ताहाँ पइठालक। 27 ऊ मरियम केर मंगनीk युसुफ नाम केर बेटा छुवा संग होय रहे, जे दाऊद राजा केर बंस लेक रहे। 28 जिबराइल सरग दूत मरियम ताहाँ आय कहन कहलक, “परनाम! परमेसर केर किरपा तोर ऊपरे आहे आर ऊ तोर संगे आहे।” 29 ई काथा के सुइन कहन मरियम दोमे डारालक, आर सोंचे लागलक, इकर का मतलब होय पारेला। 30 सरग दूत उके कहलक, “मरियम ना डाराबे, काहेकि परमेसर केर किरपा तोर ऊपरे होलक। 31 देख तोयँ भारी गात होबे, आर एक टा बेटा छुवा के जनम देबे, तोयँ उकर नाम ईसु राखबे। 32 ऊ सउब लेक बोड़े आर परभु परमेसर केर बेटा कहाई। परभु उके उकर पुरखा दाऊद राजा केर राइजगद्दी देई। 33 ऊ सउब दिनेक तेहें इसराइल माहने राइज करी। उकर राइज केर अन्त कबोउ नाइ होई।” 34 मरियम सरग दूत के पुछलक, “किन्तु ई का निहार होई? मोयँ तो डिड़ांइ आहों।” 35 सरग दूत जबाब देलक, “तोर ऊपरे पबित्र आत्मा नाभीl आर परमेसर केर सक्ति तोके छांहिर करी,m सेइ तेहें तोर बेटा पबित्र होई आर ऊ परमेसर केर बेटा कहाई। 36 आर देख तोर गोतिया इलिसिबा, जेके लोग बाँझी कहत रहयँ, उकर बुढ़ी समय माहने भारी गात होल छह महिना होय आहे। 37 काहेकि परमेसर केर तेहें कोनो काम असम्भव नेखे।” 38 मरियम कहलक, “देख मोयँ परमेसर केर धांगरिन हेकँ, ऊ जेसन चाहेला ओसने मोर संगे होवुक।” तखन सरग दूत उकर ताहाँ लेक चइल गेलक।
मरियम केर इलिसिबा संग भेंट
39 थोड़ेक दिन केर बादे मरियम तुरते यहूदा देस केर पाहाड़ी नगर माहने गेलक। 40 आर जकरिया केर घर जाय कहन इलिसिबा संगे भेंट करलक। 41 मरियम केर परनाम सुनत केइ इलिसिबा केर पेटे छुवा हाड़बड़ालक आर ऊ पबित्र आत्माय भोइर गेलक। 42 आर रिझे इलिसिबा मरियम के आंटे कहलक, “परमेसर सउब बेटी छुवा गिला लेक बेसी तोर ऊपरे दया कइर आहे। तोर पेटेक छुवा धन्य हेके। 43 इटा मोर तेहें कतना सुन्दर भाग्य केर काथा हेके कि मोर परभु केर मांय मोर संगे भेंटायेक तेहें आलक। 44 जेसने तोयँ मोके परनाम करले तेसने मोर पेटे छुवा रीझे हाड़बड़ालक। 45 तोयँ धन्य हेकिस, काहेकि तोयँ बिसास करले कि परमेसर जेसने कहलक ओसने होई।”
मरियम केर इस्तुति गीत
46 मरियम कहलक,
“मोर मन परमेसर केर प्रसंसा करेला,
47 मोर आत्मा टा उद्धारकर्त्ताn माहने आनन्दित होयला।
48 दया कइर आहे परभु मोर एसन गरीब धांगरिन ऊपरे,
एबार लेक मोके धन्य कहबयँ सउब जुगेक लोगरे।
49 ऊ सर्ब सक्तिमान परमेसर केर नाम पबित्र आहे,
ऊ मोर तेहें बोड़े-बोड़े भालाई केर काम कइर आहे।
50 उकर दया आपन भक्तो गिलाक तेहें जुग-जुग तक बनल रहेला।
51 उकर हाँथेक बल, घमन्डी गिला केर घमंड के चूर कइर देला।
52 परमेसर सक्तिसाली राजा के राइजगद्दी लेक गिराय देलक
आर गरीब गिला के ऊँचा उठालक।
53 ऊ भूखल के बेस जिनिस दे कहन भूख के मेटालक,
आर धनिमान गिला के छुछा हाँथ घुराय देलक।
54 परमेसर आपन सेबक इसराइल के मदद करलक,
ऊ आपन वादा करल काथा के इयाद करलक।
55 हामरेक पुरखा अब्राहम आर उकर सान्तान संगे वादा करलक ऊ,
हमेसा उमनेक ऊपरे दया करते रही ऊ।”
56 मरियम करीब तीन महीना तक इलिसिबा संगे रहलक आर आपन घर घुइर गेलक।
योहन बपतिस्मा देवइया केर जनम
57 इलिसिबा केर छुवा जनमायेक समय पूरा होलक आर ऊ एक टा छुवा के जनम देलक। 58 ई खबरटा आसे-पासे आर गोतिया घर गिलाय गोटाय परचार होय गेलक कि परभु उकर ऊपरे का निहार दोम बेसी दया करलक आर सउब लोग बेजाइन खुसी होलयँ। 59 जखन छुवा आठ दिन केर होलक तो सउब उकर खातनाo केर तेहें आलयँ। आर छुवा केर नाम उकर बापेक नामेई जकरिया राखे लागलयँ। 60 किन्तु इलिसिबा उमन के कहलक, “नाहीं, इकर नाम योहन राखल जाई।” 61 तखन सउब भकुवाय गेलयँ आर कहे लागलयँ, “एसन नाम तो तोर खानदान माहने केकरो नेखे।” 62 सेखन उमने उकर बाप के इसारा माहने पुछलयँ। 63 उकर बाप इसारा माहनेइ लिखेक खातिर सिलेट माँगलक आर लिखलक कि “उकर नाम योहन हेके।” इटा माहने सउब लोग ताजुब होलयँ। 64 आर जकरिया तुरते काथा कहे सुरु करलक आर परमेसर केर प्रसंसाउ करे लागलक। 65 आर आस-पास केर रहइया केर ऊपरे डर सामाय गेलक आर ई घटना केर खबर यहूदा देस केर पाहाड़ी इलाका माहने गोटाय परचार होय गेलक। 66 ई घटना टाके जेइ सुनत रहयँ, सेइ आपन मन माहने सोचत रहयँ कि ई छुवा केसन भाभेक बनी, काहेकि परभु केर हाँथ उकर ऊपरे रहे।
जकरिया केर इस्तुति-गीत
67 ऊ छुवा केर बाप जकरिया पबित्र आत्माय भोइर गेलक आर भविष्यवाणी करे लागलक। 68 इसराइल केर परभु परमेसर केर इस्तुति होवुक, काहेकि ऊ आपन लोग गिला केर ऊपरे दया कइर कहन उमने के छुटकारा करलक। 69 आर आपन सेबक दाऊद केर खानदान लेक हामरेक तेहें एक टा सक्तिसाली उद्धारकर्त्ताp के पइठालक। 70 जेसन ढेइर पहिल लेकेइ होते आ तेहें, परमेसर आपन पबित्र भक्त भबिस्यबक्ता केर दाराय कइह रहे। 71 कि जे हामरे संगे छि छि-थु थू करयँला सेइ दुसमन लेक छोड़ाई। 72 परमेसर हामरेक बाप-दादा केर ऊपरे दया कइर के आपन करल पबित्र वादा के इयाद करलक। 73 आर ऊ जे हामरेक बाप अब्राहम संगे किरिया खाय रहे। 74-75 ऊ किरपा कइर कहन हामरेक दुसमन लेक हामरे के आजाद करी, ताकि हामरे पबित्र आर धार्मिकताq माहने परमेसर केर बिना डर-भये जीबन भोइर सेबा करे पारीका। 76 आर ए छुवा, तोयँ महान परमेसर केर भबिस्यबक्ता कहाबे, काहेकि तोयँ मसीह केर तेहें डहर तेयार करबे। 77 तोयँ उकर लोग गिला के कइह देबे कि आपन पाप लेक छमा केर दाराय का रकम उद्धार पाबयँ। 78 ई सउब एहे तेहें होई कि हामरेक परमेसर बेजाइन दयालु हेके, हामरेक ऊपरे सरग लेक बिहान केर इंजोत होयेक वाला आहे। 79 जे मते आँधार आर मिरतु केर छांहिरेr रहइया के आलो मिलुक आर सान्ति केर डहर हामरे के देखाउक। 80 छुवा बाढ़ते गेलक आर आत्मा माहने मजबूत होते गेलक, आर जखन बोड़े होलक तो इसराइली केर मांझे लोग गिला के सेबा करेक लेक पहिले सुनसान बने रहलक।