प्रेरित गिला केर काम
1
परिचय
1-2 ए सिरिमान थियुफिलुस, मोयँ पहिले एकटा किताब लिख रहँa, उटा मेहेन ईसु मसीह केर काम आर सिछा केर बारे लिखलँ, जे सुरु लेक उकर सरग उठायेक दिन तक करलक। सरग उठाल लेक पहिले ईसु आपन चुनल प्रेरितb गिला के परमेसर केर पबित्र आत्मा केर दाराए आग्यां देलक। 3 ईसु कुरुस उपरे मिरतु केर दुख ऊठाल बादे उमनेक संगे निजे के जीयंत होयेक ढेइरे पाका साबूत देखालक। ऊ चालिस दिन तक उमनेक संगे देखा होते रहलक आर परमेसर केर राइज केर बारे काथा करते रहलक। 4 आर एक दिन ईसु जखन प्रेरित गिला संगे रहे, सेखन ऊ उमन के ई आग्यां देलक, "तोहरे बाप परमेसर केर करल वादा के जे पबित्र आत्मा केर बारे कइह रहे, सेटा के जब ले नाई पाबा, तब ले यरुसलेम नगर के ना छोड़बा। ई काथा केर चरचा तोहरे पहिलेइ मोर लेक सुइन चुइक आहा। 5 काहेकि योहन तो पानियेc बपतिस्मा देलक, किन्तु थोड़ेक दिन केर बादे तोहरे पबित्र आत्मा लेक बपतिस्मा पाबा।"
ईसु सरग मेहेन उठाल गेलक
6 एक दिन जखन प्रेरित गिला ईसु केर संगे रहयँ सेखन उमने उके पुछलयँ, "ए परभु, का तोयँ एहे समये इसराएली गिला के फिन राइज टा घुराय देबे?" 7 ईसु उमने के कहलक, "कोबे, कखन आर का होई, सेटा के बाप परमेसर आपन अधिकारे राइख आहे, तोहरे के इटा जानेक काम ना लागे। 8 किन्तु जखन पबित्र आत्मा तोहरेक उपरे आई तखन तोहरे सामर्थ पाबा, आर यरुसलेम आर गोटा यहूदिया आर सामरिया आर धरती केर कोना-कोना तक मोर बारे गोवाही देबा।" 9 इटा कहल बादे ईसु उमनेक देखत-देखत के उपर उठाल गेलक, आर बादेइर टाय ओलत होय गेलक। 10 जखन उके उपर उठाल जात रहे तखन उमने आकास बाटे देखत रहयँ, सेखन आचकाय दुई टा बेटा छुवा चारका लुगा पिन्धोल उमनेक पासे आय कहन ठाड़ होलयँ, 11 आर उमने के कहलयँ, "ए गलील केर अदमी सउब, तोहरे काहे ठाड़ होय कहन आकास बाटे देखो ताहा? एहे ईसु जेके तोहरेक पास लेक सरग उठाल गेलक, जे निहार तोहरे उके सरग बाटे जात के देखला, ओहे निहारे एक दिन फिन आई।"
मत्तियाह के यहूदा केर पद पायेक
12 तेकर बादे उमने जैतुन नामेक पाहाड़ लेक यरुसलेम घुरलयँ, जे यरुसलेम लेक करीबन आधा कोस दूर आहे।d 13 यरुसलेम पहँइच कहन जाहाँ उमन रहत रहयँ ताहाँ उपरेक कोठरी माहान गेलयँ। उमनेक नाम पतरस, योहन, याकूब, अन्द्रियास, फिलिपुस, थोमा, बरतुल्मै, मत्ती आर हलफई केर बेटा याकूब आर सिमोन जेलोतेसe आर याकूब केर बेटा यहूदा रहे। 14 इमनेक संगे थोड़ेक बेटी छुवाउ रहयँ आर ईसु केर माँय मरियम आर उकर भाइ गिलाउ रहयँ। सउब एक मन होय कहन लागातार प्राथना माहान लागल रहयँ।
15 उखोने एक दिन जखन करीबन एक सअ बीस झन बिसासी गिला जामा रहयँ, सेखन पतरस ठाड़ होय कहन कहे लागलक, 16 "ए भाइ सउब, धरम सास्तर मेहेन यहूदा केर बारे लिखल टा पूरा होयेक दोरकार रहे, ऊ जे गिला ईसु के धोरे खोजत रहयँ उमन के लेगाय कहन धरुवालक। काहेकि पबित्र आत्मा टा राजा दाऊद केर दाराए ढेइर पहिले यहूदा केर बारे कइह रहे। 17 यहूदा तो हामरेक मइधे एक झन रहे, हामरेक निहारे उहो परभु केर सेबा काम करत रहे।" 18 (यहूदा ईसु के धरुवायेक तेहें जे पयसा पाय रहे, सेटा लेक ऊ एक टा खेत किनलक, ओहे खेते मूड़ गाइड़ कहन गिरलक आर उकर पेट टा फाइट कहन सउब पोटा बाहराय गेलक। 19 ई काथा टाके यरुसलेम केर सउब रहइया जाइन गेलयँ आर ऊ खेत टा केर नाम उमनेक भासाय 'हकलदमा', यानि 'लहू केर खेत' पइड़ गेलक।)
20 पतरस कहलक, "भजन संहिता केर किताबे लिखल आहे कि
'उकर घर उजइड़ जाउक,
आर उटाय केउ बासा ना करुन' f
आरो इटाउ लिखल आहे कि
'उकर पद टाके केउ दोसर ले लेउन।' g
21-22 सेतेहें यहूदा केर पद के लेक तेहें एक झन के चुनेक दोरकार आहे ताकि ऊ हामरेक संगे ईसु मसीह केर जी उठेक गोहा बनूक। हामरे एसन अदमी के चुनबिक जे सुरु खोन लेक सउब दिन हामरेक संगे आहे, जखन तक ईसु हामरेक मांझे आत-जात रहे, यानि जे अदमी टा योहन बपतिस्मा देवइया लेक ईसु मसीह के सरग उठाल गेलक सेइ दिन तक हामरेक संगे आहे।" 23 तखन उमने यूसुफ के जे बर-सबा कहात रहे, जेकर दोसर नाम यूसतुस रहे आर मत्तियाह के, इमन दुइयो झन के ठाड़ करलयँ। 24 आर प्राथना करलयँ, "ए परभु, तोयँ तो सउब केर मन के जानिसला, इटा देखाइन कि ई दुइयो झन मइधे तोयँ केके चुनले, 25 ताकि ऊ इ सेबा आर प्रेरित केर पद लेउक, जोन पद टाके यहूदा छोइड़ कहन आपन जायगाय चइल गेलक।" 26 तखन उमने ऊ दुइयो झन केर नामे चुटका डाललयँ आर चुटका मत्तियाह केर नामे बाहरालक। एबार मत्तियाह ऊ गारो टा प्रेरित गिला संगे गनाल गेलक।