2
बिसासी गिलाक उपरे पबित्र आत्मा नाभलक
1 जखन पेन्तिकुस्त परब केर दिन पहँचोलक सेखन सउब बिसासी गिला एक ताहाँ जामा होय रहयँ। 2 तखन आचकाय आकास लेक डोबल आँटे हावा-बासात निहार आवाज होलक। आर ऊ आवाज लेक गोटा घर टा गुंइज गेलक जाहाँ उमन बोइसल रहयँ। 3 उमन सउब देखलयँ कि आइग केर समान कोनो जिनिस आलक आर जीभ केर रुपे छिनइग कहन हरेक झन केर उपरे आय कहन रुइक गेलक। 4 आर जोतना हुआँ रहयँ उमन सउब परमेसर केर पवित्र आत्मा लेक भोइर गेलयँ आर आत्मा टा जेके जेसन कहेक सक्ति देलक ओसनेइ दोसर-दोसर भासा मेहेन कहे लागलयँ।
5 उखोने यरुसलेम मेहेन भिनु-भिनु देस लेक आल परमेसर के मानोइया बेजाइन यहुदी भक्त गिला रहत रहयँ। 6 जखन उमनेक कहेक आवाज टाके सुनलयँ तखन बेजाइन लोग जामा होलयँ आर सुइन कहन अचमबित होय गेलयँ, काहेकि उमन जेटा कहत रहयँ सेटा के सउब लोग गिला आपन निजेक भासा मेहेन सुने पात रहयँ। 7 आर सउब अचमबित होय कहन कहे लागलयँ, "का ई लोग गिला गलील राइज केर ना लागयँ! 8 तेऊ उमने जेटा कहतयँ सेटा के हामरे सउब का निहार आपन निजेक भासाय सुनोतिहि? 9 हामरे तो पारथी, मेदी आर एलामी लोग हेकी, आर मेसोपोटामिया, यहुदिया, कप्पुदूकिया, पुन्तुस, एसिया, 10 फ्रुगिया, पंफुलिया आर मिसर देस केर हेकी आर कुरेनी केर आस-पासेक लिबिया देस केर लोग हेकी। आर रोम नगर केर रहोइया हेकी, 11 यानी यहुदी आर यहुदी धरम के मानोइया लोग गिला आर क्रेती आर अरबी लोग गिला हेकी। किन्तु हामरे सउब आपन-आपन भासा मेहेन इमन लेक परमेसर केर बोड़े-बोड़े अचम्भा काम केर बारे कहत के सुनोतिही।" 12 आर उमन सउब भकुवाय गेलयँ आर अचमबित होय कहन आपस मेहेन पुछा-पुछी होय लागलयँ, “इकर मतलब का हेके?” 13 किन्तु भीड़ केर थोड़ेक लोग गिला ठाठा कइर कहन कहलयँ, "ई लोग गिला पी कहन मातल आहयँ।"
पतरस केर परचार
14 तखन पतरस ईसु मसीह केर गारो टा प्रेरित गिला संग ठाड़ होलक आर डोबल आँटे कहे लागलक, “ए यहूदी गिला आर यरुसलेम केर सउब रहोइया गिला तोहरे इटा के जानेक तेहें मोर काथा के धेयान लेक सुना। 15 जेसन तोहरे सोंचो ताहा कि ई लोग गिला निसा मेहेन आहयँ, इमन निसा मेहेन नेखोयँ, काहेकि एखन तो बासियामे पहर होय आहे। 16 एखन जे तोहरे सुनो ताहा इकर बारे जोएल भबिस्यबक्ता पहिलेइ कइह आहे।
17 'परमेसर कहेला, आखरी समय माहान एसन होई,
मोयँ निजेक आत्मा के सउब मानुस केर उपरे उझइल देमूँ।
तोहरेक बेटा-बेटी भबिस्यबानी करबयँ,
तोहरेक जुवान गिला दर्सन देखबयँ,
आर तोहरेक बुढा़ गिला सोपन देखबयँ।
18 ऊ समय मेहेन मोयँ आपन धांगर-धांगरिन उपरोउ निजेक आत्मा के उझइल देमूँ,
उमन भबिस्यबानी करबयँ।
19 मोयँ आकास मेहेन अचम्बित काम करमूँ,
आर धरती उपरे अचम्भा केर चिन्हा देखामूँ,
यानि लोहू, आइग आर धुँगा केर बादइर देखामूँ।
20 परभु केर बोडे़ महिमा केर दिन आयेक लेक पहिले
बेरा टा आंधार होय जाई,
आर चाँद टा लहू निहार लाल होय जाई।
21 आर जे परभु लेक दया केर तेहें बिनती करी,
उकरे उद्धार होई।'a
22 सेतेहें ए इसराइली गिला ई काथा के धेयान लेक सुना, ईसु नासरी एकटा एसन मानुस रहे, जेकर दाराए परमेसर बेजाइन बोड़े-बोड़े अचम्भा काम आर चिन्हा सउब देखाय कहन साबित करलक, कि ईसु मसीह के परमेसर बाटे लेक पइठाल जाय रहे, ई काथा गिला के तोहरे सउब जानाला। 23 ओहे ईसु के परमेसर केर पहिलेक ठहराल जोजना आर गेयान केर मोताबिक तोहरेक हाथे धोराल गेलक आर तोहरे उके दुस्ट लोगb केर दाराए कुरुस मेहेन चेढ़ाय कहन मोराला। 24 किन्तु परमेसर उके मिरतु केर दरद लेक छोड़ाय कहन फिन जिन्दा करलक, काहेकि उके मिरतु आपन जाले राखे नाई पारलक।
25 राजा दाऊद ईसु केर बारे कहेला-
'मोयँ परभु के सउब दिन मोर पासे देखे पावँला,
काहेकि ऊ मोर दहिना बाटे आहे ताकि मोयँ हिले नाई पारँका।
26 एहे चलते मोर मन रीझे परमेसर केर प्रसंसा करेला,
मोर गात टाउ उकर उपरे आसरा करी,
27 काहेकि तोयँ मोर प्रान टाके मोरल मुरदा गाड़हाय नाई छोड़बे,
आर ना तो आपन पबित्र अदमी के सड़े देबे।
28 तोयँ मोके जीबन केर डहर देखाय देले,
तोयँ मोके आपन पासे रिझे भरपूर कइर देबे।'c
29 ए भाइ बहिन गिला, मोयँ तोहरे के जोर दे कहन कहे पारँ कि हामरेक पुरखा दाऊद राजा मोइर गेलक आर उके तोपल गेलक, उकर मुरदा गाड़हा टा आइजो तक हामरेक हियाँ आहले आहे। 30 दाऊद राजा भबिस्यबक्ता रहे, सेतेहें ऊ जानत रहे कि परमेसर किरिया खाय कहन उके बचन दे रहे, 'मोयँ तोर वंस लेकेइ एक झन के तोर राइजगद्दी माहान बोइसामूँ।' 31 सेतेहें भबिस्य मेहेन जे घटना होइया आहे सेटा के पहिलेइ जाइन कहन दाऊद मसीह केर जी उठेक बारे भबिस्यबानी करलक कि उकर प्रान टाके मोरल मुरदा गाड़हाय छोड़ल नाई जाई आर उकर गात टा मोरल बादे नाई सड़ी। 32 एहे ईसु के परमेसर मोरल लेको जिन्दा करलक, इकर हामरे सउब गोहा हेकी। 33 एबार उके परमेसर केर दहिना हाथेक सउब लेक उम्दा पद देल गेलक। आर जोन पबित्र आत्मा के बाप परमेसर देक वादा कइर रहे, सेटा के पाय कहन हामरेक उपरे ऊ पबित्र आत्मा के उझइल देलक, जेके तोहरे एखन देखो ताहा आर सुनबो करोताहा। 34 काहेकि दाऊद तो खुद सरग माहने नाई चेघलक, तेउ ऊ कहेला,
'परभु परमेसर मोर परभु मसीह के कहलक,
"मोर दहिना बाटे बोइस,
35 जखन तक मोयँ तोर दुस्मन गिला के पुरा-पुरी तोर अधिने गोड़ धारे नाई कइर देमूँ।"'d
36 "सेतेहें इसराइल केर सउब लोग गिला जाइन लेउन कि परमेसर एहे ईसु के जेके तोहरे सउब क्रूस उपरे चेढ़ाय कहन मोराय देला, उके परभु आर मसीह ठहराय देलक।"
37 पतरस केर काथा के सुनोइया लोगेक मने इ काथा टा गइड़ गेलक आर लोग गिला पतरस आर दोसर प्रेरित गिला के पुछलयँ, “ए भाइ सउब, एबार हामरे का करब?" 38 तखन पतरस उमन के जबाब देलक, “तोहरे मन बदला आर निजेक पाप के छोइड़ कहन परमेसर बाटे घुइर आवा आर ईसु मसीह केर नामे बपतिस्मा लेवा, तोबे गानी परमेसर तोहरेक पाप के छमा करी आर पबित्र आत्मा केर दान देई। 39 काहेकि परमेसर केर वादा तोहरेक आर तोहरेक छुवा-पुता गिलाक तेहें आर जे धूर-धूर मेहेन रहयँला, यानी ऊ सउब लोग गिलाक तेहें हेके, जे गिला के हामरेक परभु परमेसर आपन पासे डाकी।"
40 पतरस उमन के आरो ढेइर रकम केर काथा कइह कहन बुझाय कहन चेतालक आर उमन के अरजी करलक कि "तोहरे ई कुटील पीढ़ी उपरे जे दन्ड आइ सेटा लेक बाँचा।" 41 आर जे गिला उकर काथा के सुइन कहन मानलयँ, उमन बपतिस्मा लेलयँ आर ओहे दिन करिबन तीन हजार लोग गिला बिसासी गिला संग मेइस गेलयँ।
सउब बिसासी गिला मिल-जुइल कहन रहत रहयँ
42 आर उमन प्रेरित गिला लेक सिछा पायेक, संगति राखेक, "परभु-भोज" करेक आर प्राथना करेक माहनेइ लागल रहलयँ। 43 प्रेरित गिलाक दाराय बेजाइन चमत्कार केर काम आर चिन्हा सउब देखाल जात रहे, सेतेहें सउब लोगेक जीवे डर सामाय गेलक। 44 आर सउब बिसासी गिला मिल-जुइल कहन रहत रहयँ आर उमनेक धन-सम्पति गिलाउ सउब साझा मेहेन रहत रहे। 45 उमन निजेक धन-सम्पति आर सामान गिला के बेंइच कहन उमनेक मइधे जेकर जेसन दोरकार पड़त रहे ओसनेइ उमन बाँइट देत रहयँ। 46 आर उमने रोजेइ यरुसलेम मन्दिर मेहेन जामा होत रहयँ आर सउब घरे-घर "परभु-भोज" करत रहयँ आर खुसी मेहेन सीधा मने खावा-दावा करत रहयँ। 47 आर उमन परमेसर केर इस्तुति करत रहयँ आर सउब लोग गिला उमन लेक खुस रहयँ। जे गिला बिसास कइर कहन उद्धार पात रहयँ, उमने के परभु बिसासी गिला संगे मेसाले जात रहे।