3
पतरस लाँगड़ा भिखमाँगा के बेस करलक
1 एक दिन पतरस आर योहन तीन बजे दिने प्राथना केर समये मन्दिर जात रहयँ। 2 सेइ समये लोग गिला एकटा जनम केर लाँगड़ा अदमी के आनत रहयँ, उके रोजेइ मंदिर केर "सुन्दर" नामेक फाटक ताहाँ बोइसाय देत रहयँ, ताकि ऊ मन्दिर माहने आवा-जाही करइया लोग लेक भीख माँगुक। 3 जखन पतरस आर योहन के मंदिर मेहेन ढुकोत के देखलक तो ऊ लाँगड़ा टा उमन लेको भीख माँगलक। 4 तखन पतरस योहन संगे उके थिथाय कहन देखलक आर कहलक "हामरेक बाटे देखिन।" 5 सेखन लाँगड़ा अदमी टा उमन लेक कोनो पायेक आसराय उमन बाटे देखे लागलक। 6 तखन पतरस कहलक, "सोना आर चाँदी तो मोर पासे नेखे, किन्तु जेटा मोर पासे आहे सेटा केइ तोके दे तहँ। तोयँ नासरत सहर केर ईसु मसीह a केर नामे उइठ कहन चलिन।" 7 आर पतरस उकर दहिना हाथ के धोइर कहन उके उठालक, तखन तुरंत उकर गोड़े ताकत आय गेलक। 8 लाँगड़ा टा कुदले उठलक आर ठाड़ होय कहन चले-भुले लागलक आर चइल कहन, डेगते-डेगते परमेसर केर इस्तुति करत के उमनेक संगे मंदिर माहान गेलक। 9 तखन सउब लोग गिला उके चलत के परमेसर केर इस्तुति करत के देखलयँ। 10 लोग गिला उके चिन्हलयँ कि ई ओहे भीख माँगा लाँगड़ा टा हेके जे मन्दिर केर "सुन्दर" नामेक फाटक पासे बोइस कहन भीख माँगत रहे। इ घटना टा जेटा उकर संगे होय रहे, उके देइख कहन सउब लोग गिला अचम्भा आर भाकुवाय गेलयँ।
पतरस परचार करे लागलक
11 लाँगड़ा अदमी टा बेस होल बादे जखन पतरस आर योहन के धोरल रहे, तखन सउब लोग गिला अचम्भा करत के उके देखेक तेहें उ बारान्डाय कुदले आलयँ जेटा "सुलेमान केर बारान्डा" कहायला। 12 इटा देइख कहन पतरस लोग गिला के कहलक, “ए इसराइल केर लोग गिला, ई मानुस के देइख कहन तोहरे काहे अचम्बित होताहा? आर हामरे के इ निहार काहे देखो ताहा, जेसन हामरेइ इके आपन सक्ति आर भक्ति लेक चलेक-भूलेक लाइख बनाय देली? 13 हामरेक पुरखा अब्राहम, इसाहक आर याकूब केर परमेसर आपन सेबक ईसु केर महिमा कइर आहे। तोहरे तो एहे ईसु के मोरायेक तेहें पिलातुस केर हाथे धोरुवाय देला आर जखन पिलातुस ईसु के छोइड़ देक बिचार कइर रहे, तो तोहरे सउब उकर पासे ईसु के मुकइर देला। 14 तोहरे ईसु के जे पबित्र आर धरमी रहे सेके नाई मानला, बरन्चो एकटा खूनी अदमी के तोहरेक तेहें छोड़ेक माँग करला। 15 इ रकम तोहरे जीबन केर सोता के माइर मोराला, किन्तु उके बाप परमेसर मोरल लेको जिन्दा करलक। हामरे सउब इटा केर गोहा हेकी। 16 ईसु केर नामे बिसास केर दाराए ई लाँगड़ा टाके बेस करल गेलक, जेके तोहरे देखोताहा आर जानबो कराला। एहे ईसु नामे बिसास केर दाराए इ अदमी टा तोहरेक पासे एकदम भला-चांगा ठाड़ आहे।
17 ए भाइ बहिन सउब, ए बार मोयँ जानँला कि इ काम टाके तोहरे आर तोहरेक धरमगुरु गिला जाइन-बुइझ कहन नाई कइर आहा। 18 किन्तु परमेसर जेसन आपन सउब भबिस्यबक्ता गिला केर दाराए पहिलेइ कइह दे रहे, कि उकर मसीह के दुख उठाय होई, उके ऊ ओसनेइ पूरा करलक। 19 सेइतेहें आपन-आपन पाप के छोइड़ कहन परमेसर बाटे घुइर आवा, ताकि तोहरेक पाप मेटाल जाउक आर तोहरे सउब के परभु बाटे लेक आत्मा केर सान्ति पावाउक, 20 आर परमेसर आपन मसीह यानि ईसु के पइठाउक, जेके ऊ पहिल लेकेइ तोहरेक तेहें ठहराय आहे। 21 ईसु मसीह के सरग माहने उ खोन तक रहे होई जखन तक परमेसर सउब काथा केर सुधार नाई कइर लेइ। उ समयइ केर बारे परमेसर निजेक चुनल भबिस्यबक्ता गिला लेक कहुवाय रहे। 22 जेसन कि मूसा कइह रहे, 'परभु तोहरेक परमेसर तोहरेक भाइ गिलाक मइधे, तोर खातिर मोर निहार एकटा भबिस्यबक्ता के ठाड़ करी। ऊ तोहरे के जेटाइ कही उ सउब काथा के मानबा। 23 किन्तु जे केउ उ भबिस्बक्ता केर काथा नाई मानबयँ, उमन के आपन लोगेक मांझे नस्टो करल जाई।'b
24 एहे रकमे सामूएल भबिस्यबक्ता आर उकर बादे जोतना भबिस्यबक्ता गिला आलयँ उ सउब एहे समय केर बारे भबिस्यबानी कइर आहयँ। 25 आर तोहरे तो ओहे लोग गिला हेका जेकर माझे भबिस्यबक्ता गिलाक काथा टा पूरा होलक आर तोहरेइ परमेसर केर करल वादा केर भागिदार हेका। काहेकि परमेसर अब्राहम के कइह रहे, 'तोर वंस केर दाराय गोटा धरती केर सउब लोग गिला आसिरबाद पाबयँ।'c 26 जखन परमेसर निजेक सेबक ईसु के ठाड़ करलक तखन सउब लेक पहिल उके तोहरेक पासे पइठालक, ताकि तोहरे के पाप डहर लेक छोड़ाय कहन आसिरबाद देउक।