4
पतरस आर योहन के बोड़े सभा माहने लेगालयँ
1 जखन पतरस आर योहन लोग गिला के सीखात रहयँ तखन याजक, मन्दिर केर सिपाही गिलाक सरदार आर सदूकीa गिला उमनेक ताहाँ आलयँ। 2 उमन बेजाइन खिंसाय जाय रहयँ काहेकि पतरस आर योहन लोग गिला के सीखात रहयँ कि ईसु मसीह मोरलक आर फिन बाँइच उठलक, जेटा लेक इटा साबित होयला कि सउब लोग मोरल लेक बाँइच उठबयँ। 3 ऊ दुइयो झन के धोइर कहन हाजत मेहेन दोसर दिन तक राखलयँ काहेकि उ दिन साँझ होय चुइक रहे। 4 किन्तु बचन सुनइया बेजाइन लोग गिला बिसास करलयँ आर बिसास करइया बेटा छुवा केर संख्या बाइढ़ कहन पाँच हाजार होय गेलक।
5 दोसर दिन उमनेक सरदार आर पंच आर यहुदी गिलाक सास्तर ग्यानी गिला यरुसलेम माहने जामा होलयँ। 6 आर हुँआ महायाजक हन्ना आर दोसर महायाजक कैफा, योहन्ना, आर सिकन्दर आर महायाजक केर खानदान केर सउब लोग गिलाउ रहयँ। 7 उमन ऊ दुइयो झन के माझे ठाड़ कइर कहन पुछे लागलयँ, "तोहरे कोन सक्ति लेक आर केकर नाम लेक इ काम टाके कइर आहा?"
8 तखन पतरस पबित्र आत्मा लेक भोइर कहन कहे लागलक, 9 "ए लोगेक सरदार आर पंच गिला, ई लाँगड़ा लोग टा केर संगे भालाई करल जाय आहे। आर तोहरे हामरे के पुछोताहा कि ऊ का निहार बेस होलक। 10 एबार तोहरे आर गोटा इसराइल केर लोग गिला जाइन लेवा कि नासरत सहर केर ईसु मसीह केर नाम लेक ई लोग टा बेस होय कहन तोहरेक मांझे ठाड़ आहे। ओहे ईसु के तोहरे कुरूस मेहेन चेढ़ाय कहन मोराय देला आर परमेसर उके मोरल लेक जिन्दा कइर घुरालक। 11 ई
'ओहे पाखना केर सामान हेके, जेटा के तोहरे राजमिस्त्री गिला बेकामा जाइन कहन फेंइक देला,
किन्तु ओहे टाई घर केर कोनाक तेहें आसली पाखना बइन गेलक।'b
12 कोनो दोसर लोग केर दाराए उद्धार नेखे, काहेकि सरग केर हेंठे मानुस केर मांझे उद्धार पायेक तेहें आरो कोनो दोसर नाम नाई देल जायहे जेटा लेक हामरे सउब उद्धार पाबिक।"
13 जखन सभा केर लोग गिला पतरस आर योहन केर हिम्मइत देखलयँ आर इटा जानलयँ कि ई दुइयो झन अनपढ़ मामुली लोग हेकयँ तो ऊ लोग गिला भकुवाय गेलयँ। आर समझलयँ कि इमन ईसु संगे रहयँ सेइ चलते एतिक हिम्मइते कहे लाइग आहयँ। 14 किन्तु उमनेक संगे लाँगड़ा लेक बेस होल लोग टाके ठाड़ होल देइख कहन सभा केर लोग गिला कोनो कोहे नाई पारलयँ। 15 सेतेहें ऊ दुइयो झन के सभा घर लेक बाहराय कहन उमने आपस माहने सलाह करलयँ। 16 “हामरे इमन संगे का करबिक? काहेकि यरुसलेम केर सउब लोग गिला जाइन गेलयँ कि इमन एकटा चमत्कार काम कइर आहयँ आर इटा के हामरे इन्कार करे नाई पारब। 17 किन्तु ई काथा टा आरो लोग ताहाँ ना पसरुकका, हामरे उ दुइयो झन के डाइक कहन डारुवाबिक कि ईसु केर नाम लेक आरो केकोउ ना सिखाबा।”
18 तखन उमन उ दुइयो झन के आरो डाइक आनलयँ आर धमकालयँ, कि आरो तोहरे ईसु केर नाम लेक केकोउ कोनो ना कहबा आर ना सिखाबा। 19 किन्तु पतरस आर योहन उमन के कइह घुरालयँ, “तोहरेइ बिचार करा, का परमेसर केर नजइरे इटा उचित हेके कि परमेसर लेक बेसी तोहरेक हुकूम के मानबिक? 20 इटा तो मोसकिल आहे, जेटा हामरे देइख-सुइन आही सेटा के केकोउ नाई कइह देबिक।
21 सभा केर लोग गिला फिन उमन के डरुवाय-धमकाय कहन छोइड़ देलयँ। उमन दन्ड देक केर कोनो मोका नाई पालयँ, काहेकि जे अचम्भा काम होय रहे सेटाक तेहें भीड़ केर सउब लोग गिला परमेसर केर बड़ाई करत रहयँ। 22 जोन लोग टा चमत्कार काम लेक बेस होय रहे ऊ चालीस बछर लेक बेसी उमइर केर रहे।
बिसासी गिलाक प्राथना
23 हुआँ लेक छुटल बादे पतरस आर योहन आपन संगी गिलाक ताहाँ गेलयँ आर जेटा माहायाजक आर बुजुर्ग पंचो गिला उमन के कइह रहयँ सेटा सउब के कइह देलयँ। 24 ई काथा टाके सुइन कहन सउब बिसासी गिला एक मन होलयँ आर परमेसर लेक आँटे गुइल कइर कहन प्राथना करलयँ, "ए परभु, सरग आर धरती आर समुन्दर आर जे कोनो उकर माहने आहे ऊ सउब के बनाइया मालिक तोहें हेकिस। 25 तोहें पबित्र आत्मा केर दाराए निजेक दास आर हामरेक पुरखा राजा दाऊद केर मुँह लेक कहले-
'संसार केर सउब जाइत केर लोग गिला काहे एतिक खिंसे गुइल करयँला?
आर बेकार केर गुटू करयँला?
26 परभु परमेसर आर उकर पइठाल मसीह केर बिरोध मेहेन, धरती केर सउब राजा ठाड़ होलयँ,
आर हाकीम गिला एके संगे जामा होलयँ।'c
27 सही मेहेन राजा हेरोदेस आर राइजपाल पुन्तियुस पिलातुसो, अनजाइत गिला संग आर इसराइल केर लोग गिला संग इ सहर मेहेन जामा होलयँ। फिन उमन तोर पबित्र सेबक ईसु केर बिरोध करलयँ जेके तोयँ अभिसेक करले। 28 उमन ओहे टाइ करलयँ जेटा तोर सक्ति आर मनेक हिंछा पहिल लेक ठहराल जाय रहे कि एसने होई। 29 एबार ए परभु, उमनेक धमकी के देखिन आर तोर धांगर के एसन बरदान देहिन कि तोर बचन के बेजाइन सहास कइर कहन सुनाय पारीका। 30 आर चंगाई करेक तेहें तोयँ निजेक हाथ के बाढ़ाइन ताकि चिन्हा आर अचम्भा केर काम तोर पबित्र सेबक ईसु केर नाम लेक करल जाउक।" 31 जखन उमन प्राथना कइर सिरालयँ तखन उ जायगा टा जाहाँ उमन जामा होय रहयँ, भूईंडोल रकम काँइप गेलक। आर उमने सउब पबित्र आत्मा लेक भोइर गेलयँ आर निडर होय कहन परमेसर केर बचन के सुनाय लागलयँ।
बिसासी गिला निजेक धन समपति के बाँटत रहयँ
32 मन्डली केर बिसासी गिलाक मन आर हिरदय एक रहे, आर केउ निजेक समपति के आपन नाई सोंचत रहयँ, सउब जिनिस के संगिया मानत रहयँ। 33 आर प्रेरित गिला डोबल सक्ति पाय कहन परभु ईसु केर मोरल लेक जी उठेक गोवाही देत रहयँ आर उमनेक उपरे प्रभु केर बेजाइन किरपा रहे। 34 उमनेक मइधे केकरो कोनो घटी नाई रहे काहेकि जेकर पासे घर आर जमीन रहे उके बेंइच-बेंइच कहन बेंचल दाम के आइन कहन प्रेरित गिलाक हाथे जिमा देत रहयँ। 35 आर जेकर जेसन दोरकार होत रहे, उकरे मोताबिक सउब के बाँइट देत रहयँ। 36 आर कुप्रुस टापु केर एकटा युसूफ नामेक लेबी गोतरेक अदमी रहे, उकर दोसर नाम प्रेरित गिला बरनबा यानि "बढ़ावा देवइया" राइख रहयँ। 37 उकर पासे थोडे़क जमीन रहे, उटा के बेंइच कहन उटाक दाम के प्रेरित गिला केर हाथे जिमा देलक।