5
हनन्याह आर सफीरा केर चलाकी
1 किन्तु हनन्याह नामेक एकटा लोग रहे, ऊ आपन घरइया सफीरा संगे थोडे़क जमीन के बेंचलयँ। 2 आर जमीन बेंचल थोड़ेक पयसा राइख कहन बाकी पयसा के प्रेरित गिलाक हाथे जिमा देलक इ काथा टाके उकर घरइयाउ जानत रहे। 3 किन्तु पतरस हनन्याह के कहलक, "ए हनन्याह, सैतान तोर मने ई काथा टा काहे डाललोक कि तोयँ परमेसर केर पबित्र आत्मा लेक मिछा काथा कहिन आर जमीन केर बेंचल पयसा के निजेक तेहें थोड़ेक राइख लेहिन? 4 का बेंचेक लेक पहिल जमीन टा तोर नाई रहे? आर का बेंचल बादोउ पयसा टाके राखेक अधिकार तोके नाई रहे? तोयँ एसन बिचार काहे करले? तोयँ मानुस लेक नाहीं बल्कि परमेसर लेक मिछा काथा कइह आहिस।" 5 ई काथा के सुनत केई हनन्याह भुँइये गिर गेलक आर मोइर गेलक। ई काथा के सउब सुनोइया गिलाक भितरे बेजाइन डर सामाय गेलक। 6 तखन जुवान गिला आय कहन उके कफन लुगाय ढाँइप देलयँ आर बाहिर लेगाय कहन तोइप देलयँ।
7 करीबन तीन घन्टा केर बादे उकर घरइया टा भीतर ढुकलक, उके ई घटना टा केर बारे पाता नाई रहे। 8 पतरस उके पुछलक, “मोके कइह दे, का तोहरे जमीन टाके एतनेइ दामे बेंइच रहा?” सफीरा कहलक, “हँ, एतने मेहेन।” 9 तखन पतरस उके कहलक, "तोहरे दुइयो मिल कहन परमेसर केर पबित्र आत्मा के बिड़ेक तेहें एसन काहे बिचार करला? देख तोर अदमी के तोपइया दुरा पासेइ ठाड़ आहयँ आर उमन तोकोउ बाहिर बोइह बाहराबयँ।" 10 तखन ऊ तुरंत पतरस केर गोड़े गिरलक आर मोइर गेलक। जखन जुवान गिला भीतर आलयँ तो उमने उकोउ मोरल पालयँ आर बोइह बाहराय कहन उकर अदमी पासे उके तोइप देलयँ। 11 इ सउब घटना केर बारे सुइन कहन गोटा मन्डली माहान आर सउब सुनोइया माहान बेजाइन डर सामाय गेलक।
प्रेरित गिला लोग के बेस करलयँ
12 प्रेरित गिला बेजाइन चमत्कार चिन्हा आर अचम्भा केर काम लोगेक मांझे देखात रहयँ। आर सउब बिसासी गिला सुलेमान केर बारान्डाय एक संगे जामा होत रहयँ। 13 केउ उमनेक संगे सामिल होय केर साहास नाई करत रहयँ, तेउ लोग गिला उमनेक माइन करत रहयँ। 14 आर बेजाइन बेटा छुवा आर बेटी छुवा गिला परभु माहने बिसास करलयँ आर उमन बिसासी गिलाक मन्डली मेहेन मेइस जात रहयँ। 15 प्रेरित गिलाक चमत्कार काम के देइख कहन लोग गिला रोगी सउब के डहर माहान आइन-आइन कहन खाइट आर पटियाय ढोनगाय देत रहयँ, ताकि जखन पतरस आई होले उकर छांहिर टाइ उमनेक मइधे केकरो उपरे पड़ूक। 16 यरुसलेम सहर केर आसे-पासेक गाँव लेक बेजाइन लोग गिला रोगी आर दुस्ट आत्मा धरल लोग गिला के यरुसलेम मेहेन आइन कहन जामा होत रहयँ आर सउब के बेस करल जात रहयँ।
प्रेरित गिला के साताल गेलक
17 तखन माहायाजक आर उकर संगी सदूकी दल केर लोग गिला हिसिंगा-डाह लेक भोइर गेलयँ। 18 आर प्रेरित गिला के धोइर कहन हाजत मेहेन ढुकाय देलयँ। 19 किन्तु ओहे राइते परभु केर एकटा सरग दूत हाजत केर दुवाइर के खोइल कहन उमन के बाहिर बाहराय देलक आर कहलक, 20 "जावा मन्दिर मेहेन ठाड़ होय कहन जीबन केर बारे उ सउब काथा लोग गिला के कइह देवा जे ईसु मसीह माहान आहे।"
21 सरग दूत केर कहल मोताबिक उमन बिहान होत केइ मन्दिरे जाय कहन परचार करे लागलयँ। जखन माहायाजक आर उकर संगी गिला इसराइल केर बुर्जुग पंच गिला के डाइक कहन बोड़े सभा बोइसलयँ, तखन प्रेरित गिला के आनेक तेहें सिपाही गिला के हाजत पइठालयँ। 22 किन्तु सिपाही गिला हाजत मेहेन पहँचोल बादे उमन के नाई पालयँ। तो घुइर कहन बोड़े सभा केर लोग गिला के कइह देलयँ, 23 "हामरे हाजत घर केर दुवाइर के बेस निहार बन्द करल आर पाहरादार गिला के दुवाइर पासे ठाड़ होल पाली। किन्तु जखन ताला खोइल कहन हामरे भीतर सामाली तो केकोउ नाई पाली।" 24 इ काथा के सुइन कहन मन्दिर केर सिपाही गिला केर सरदार आर प्रधान याजक गिला अकचकाय गेलयँ कि एबार का होई? 25 सेइ समये केउ आय कहन कइह देलक, "सुना, जोन लोग गिला के तोहरे हाजत घरे राइख कहन बन्द कइर रहा, उमन एखोन मन्दिर मेहेन ठाड़ होय कहन लोग गिला के सिछा दे लाइग आहयँ।" 26 तखन सिपाही गिलाक सरदार टा सिपाही गिला संग जाय कहन प्रेरित गिला के आनलयँ, किन्तु जबरन नाही, काहेकि उमन लोग लेक डारात रहयँ कि हामरे के पाखनाय ठेंइस ना मोराउन।
27 सिपाही गिला उमन के आइन कहन बोड़े साभा मेहेन ठाड़ कइर देलयँ। तेकर बादे महायाजक उमन के पुछलक, 28 "का हामरे तोहरे के चेताय कहन हुकुम नाई दे रही, कि तोहरे ईसु केर नामे लोग गिला के सिछा ना देबा? तेउ तोहरे गोटा यरुसलेम माहने सिछा दे कहन भोइर देला आर ऊ अदमी केर खूनेक दोस टा हामरेक उपरे लागायेक तेहें मनेयाय आहा।"
29 तखन पतरस आर आरो प्रेरित गिला उमन के जबाब देलयँ कि "हामरे के मानुस केर हुकुम लेक बेसी परमेसर केर हुकुम मानेक चाही। 30 जोन ईसु के तोहरे कुरुस उपरे चेढ़ाय कहन माइर मोराला, उके हामरेक आजा-दादा केर परमेसर मोरल लेको जिन्दा करलक। 31 ओहे ईसु के परमेसर निजेक सक्ति लेक जिन्दा कइर कहन परभु आर उद्धार करइया बनाय कहन आपन दहिना हाथेक उम्दा पद देलक, ताकि ऊ इसराइल केर लोग गिला के मन बदलेक सक्ति आर पाप केर क्षमा देउक। 32 इ सउब केर तेहें हामरे सउब गोहा हेकी आर ओसने पबितर आत्मा टाउ, जेके परमेसर उ सउब लोग के दे आहे जे गिला उकर हुकुम मानोयँला।"
33 इटा सुइन कहन उमन रागे भूत होय गेलयँ आर प्रेरित गिला के मोराय खोजलयँ। 34 किन्तु फरीसी दलेक गमलिएल नामेक एकटा अदमी जे मूसा केर नियम के सिखाइया रहे आर सउब केर नजइरे बेस नामी रहे, ऊ साभा माहने ठाड़ होय कहन हुकूम देलक कि प्रेरित गिला के रचिक देरी तेहें बाहिर बाहराय देवा। 35 तेकर बादे ऊ कहलक, "ए इसराइली गिला, तोहरे ई लोग गिला संग जेटा करे खोजोताहा उटा के बेजाइन सोंइच-बूइझ कहन करा। 36 काहेकि थोड़ेक दिन पहिले थियुदास नामेक एकटा लोग टा निजे के बोड़े अदमी कहे लागलक आर करिबन चाइर सअ लोग उकर काथा के सुइन कहन उकर पेछुवे चले लागलयँ। किन्तु ऊ माराय गेलक आर जोतना लोग उके मानत रहयँ उमन सउब छितिर-बितिर होय गेलयँ आर उकर नामो निसान मेइट गेलक। 37 इकर बादे नाम लिखाई केर दिने गलील सहर केर यहूदा नामेक लोग उठलक आर थोड़ेक लोग गिला के आपन बाटे करलक, उकरो नामो निसान मेइट गेलक आर जोतना लोग उकर पेछुवे चलत रहयँ उमन सउब छितिर-बितिर होय सिरालयँ। 38 एहे तेहें मोयँ तोहरे के कहतहँ कि ई अदमी गिला के कोनो ना करा इमन के छोइड़ देवा। जदि इमनेक उदेस आर काम मानुस केर हिंछा लेक आहे होले, अपनेइ सउब खतम होय जाई। 39 आर जदि परमेसर केर हिंछा लेक आहे होले तोहरे उमने के कबोउ खतम करे नाई पारबा, एसन ना होउक कि उलटा तोहरेइ परमेसर केर बिरोध करइया बना?" 40 बोड़े साभा केर लोग गिला गमलिएल केर काथा के मानलयँ आर प्रेरित गिला के डाइक कहन पिटवालयँ आर उमन के हुकुम दे कहन छोइड़ देलयँ कि फिन ईसु केर नामे कोनो परचार ना करबा। 41 प्रेरित गिला ई काथा टा लेक बेजाइन खुसी होत के बोड़े साभा लेक बाहरालयँ, कि परमेसर हामरे के ईसु केर नामे निन्दा होयेक मोका देलक। 42 उमन रोजे मन्दिर मेहेन आर लोगेक घर-घर जाय कहन सिखाय लागलयँ आर सुसामाचार परचार करे लागलयँ कि ईसुवे मसीह हेके।