6
सेबा करेक तेहें सात टा अदमी के चुनलयँ
1 उखोने जखन बिसासी गिला केर संख्या बेजाइन साँगी बाढ़े लागलक, तो यूनानी भासा कहोइया यहूदी गिला इब्रानी भासा कहोइया यहूदी गिलाक उपरे कुरकुराय लागलयँ। काहेकि रोज दिन हामरेक राँड़ी बेटी छुवा गिला के दोरकारेक जिनिस बाँटोत खोने धेयान नाई देल जायला। 2 सेतेहें बारो प्रेरित गिला सउब बिसासी के डाकलयँ आर कहलयँ, "इटा ठीक ना लागे कि हामरे परमेसर केर बचन के सुनायेक छोइड़ कहन खियायेक-पीयायेक सेबा-सुसार माहने लागल रहबिक। 3 सेतेहें ए भाइ बहिन सउब, इ काम करेक तेहें तोहरेक मइधे सात झन के चुइन लेवा, जेकर लोगेक माझे बेस नाम आहे आर जे पबित्र आत्मा आर बुद्धि लेक भोरल आहयँ, इमन के हामरे सेबा-सुसार केर कामे लागाय देबिक। 4 आर हामरे तो प्राथना करेक आर परमेसर केर बचन के सीखायेक माहनेइ लागल रहबिक।" 5 ई काथा टा सउब बिसासी गिला के बेस लागलक, आर उमन स्तिफनुस के चुइन लेलयँ जे बिसास मेहेन पोकता आर पबित्र आत्मा लेक भोरल रहे। आरो फिलिपुस, आर प्रुखुरुस, नीकानोर, तीमोन, परमिनास, आर आन्ताकिया सहर केर नीकुलाउस जे यहूदी धरम के अपनाय रहे, इमन कोउ चुइन लेलयँ। 6 आर इमन के प्रेरित गिलाक पासे लाइन कहन ठाड़ करल गेलक आर प्राथना करलयँ आर उमनेक उपरे हाथ राइख कहन सेबा-सुसार केर कामे राखल गेलक।
7 परमेसर केर बचन गोटाय पसरते गेलक आर यरुसलेम मेहेन चेला गिला बेजाइन सांगी बाढ़ते गेलयँ आर याजक गिलाक एकटा बोड़े दल बचन के माइन कहन बिसास करलयँ।
इस्तिफनुस धोराल गेलक
8 इस्तिफनुस परमेसर केर किरपा आर पवित्र आत्मा केर सामर्थ लेक भोरल रहे आर लोगेक माझे बोड़े-बोड़े अचम्भा आर चमत्कार केर काम गिला के देखात रहे। 9 तखन उ आराधनालय जे "छुटकारा करल धांगर केर कहात रहे, "उमनेक मइधे थोड़ेक कुरेनी, सिकनदरया सहर, किलिकिया आर एसिया राइजेक बसिन्दा रहयँ, उमन इस्तिफनुस संगे बाद-बिबाद करे लागलयँ। 10 किन्तु पबित्र आत्मा स्तिफनुस के कहेक समये एसन बढ़ियाँ बुद्धि देलक कि उमन उकर सामने ठोठे नाई पारलयँ। 11 तखन उमन चुपे-चुपे थोड़ेक लोग गिला के कहेक तेहें हुचकालयँ कि "हामरे इके मूसा भबिस्यबक्ता आर परमेसर केर बिरोध माहने निन्दा काथा कहतके सुइन आही।"
12 इ निहार उमन लोग गिला के आर बुजुर्ग पंच आर धरम सास्तर ग्यानी गिला कोउ हुचकालयँ, उमन सउब मिल कहन स्तिफनुस के धोरलयँ आर बोड़े सभा मेहेन आनलयँ। 13 आर मिछा कहोइया गोहा सउब के कहुवालयँ, "ई मानुस टा सउब समय पबित्र मन्दिर आर मूसाक नियम केर बिरोध माहने कहेला। 14 हामरे तो इके एसन कहत के सुइन आही कि एहे नासरत सहर केर ईसु इ मन्दिर के गिराय देई आर मूसा भबिस्यबक्ता केर रीति-रीवाज टाकोउ जे हामरे के देल जाय आहे, बदइल देई।" 15 इटा सुइन कहन सउब लोग गिला जे बोड़े सभाय बोइसल रहयँ, उमन स्तिफनुस के थिथाय कहन देखलयँ, तो उकर चेहरा टा सरग दूत निहारे देइख पालयँ।