प्रेरित 7

बोड़े सभा मेहेन इस्‍तिफनुस केर बेयान

¹ तखन माहायाजक स्तिफनुस के पुछलक, "का ई काथा गिला सत हेके?" ² स्तिफनुस कहलक, "ए भाइ बन्‍धु आर बुजुर्ग गिला, मोर काथा के सुना, महिमा लेक भोरल परमेसर हामरेक पुरखा अब्राहम के उ खोने देखा होलक जखन ऊ हारान देस मेहेन बासा करेक लेक पहिले मेसोपोटामिया मेहेन रहे। ³ सेखन परमेसर उके कहलक, "तोयँ आपन जन्मो स्थान आर हित-कुटुम गिला के छोइड़ कहन उ देस मेहेन चइल जा जेटा के मोयँ तोके देखामूँ।" ⁴ तखन ऊ कसदी जाइतेक देस के छोड़लक आर हारान देस मेहेन जाय कहन बसलक। उकर बाप केर मोरल बादे परमेसर हुआँ लेक उके ई देस मेहेन ले आनलक जाहाँ तोहरे एखन रहोताहा। ⁵ परमेसर उके हियाँ कोनो बापोउति हिस्‍सा नाई देलक, एतना तक कि गोड़ राखेक जायगाउ नाई देलक। हालांकि उखोने अब्राहम केर छुवा-पुताउ नाइ रहयँ, तेउ परमेसर वादा करलक कि मोयँ ई देस टाके तोके आर तोर बादे तोर बंस केर अधिकारे दे देमूँ। ⁶ आर परमेसर एसन कहलक, 'तोर सन्तान गिला दोसर देस मेहेन परदेसी होबयँ आर उ देस केर लोग गिला उमन के धांगर बनाबयँ, आर चाइर सअ बछर तक उमनेक संगे खराब बेबहार करबयँ।' ⁷ फिन परमेसर कहलक, 'जोन देस केर लोग गिला उमन के धांगर बनाबयँ उ देस के मोयँ साजा देमूँ , इकर बादे उमन उ देस लेक निकलोबयँ आर एहे जायगाय आय कहन मोर आराधना करबयँ।' ⁸ तखन परमेसर अब्राहम संगे खास रिस्‍ता बनायेक तेहें उके निसानी केर रुपे खातना केर नियम सुरु करुवालक। एहे तेहें जखन उकर बेटा इसहाक केर जनम होलक तो आठ दिने उकर खातना करुवालक। बादे इसहाक केर बेटा याकूब, आर याकूब लेक बारो टा गोतरेक पुरखा बाप गिला जनम लेलयँ।

⁹ "एहे पुरखा बाप गिला निजेक भाइ यूसुफ के हिसिंगाय मिसर देस जावोइया गिलाक हाथे बेंइच देलयँ। किन्तु परमेसर उकर संगे रहे, ¹⁰ आर उके सउब दुख-बिपइत लेक छोड़ाय कहन उके बढ़ियाँ बुद्धि आर राजा केर नजइरे किरपा देलक। आर मिसर देस केर राजा युसुफ के मिसर देस केर प्रधानमंत्री बनालक आर आपन घरेक राइज-पाइट केर सउब अधिकार उकर हाथे दे देलक।

¹¹ तखन गोटा मिसर देस आर कनान देस मेहेन बोड़े अकाल होलक। आर हामरेक आजा दादा गिला के बेजाइन कोस्‍टो होलक, उमन के कोनो खायेक नाई पावात रहे। ¹² ओहे खोने जखन याकूब सुनलक कि मिसर देस मेहेन आनाज आहे, तखन ऊ हामरेक आजा दादा गिला के पहिल बार आनाज लानेक तेहें हुँआ पइठालक। ¹³ उमन फिन जखन दोसर धंव आनाज किनेक तेहें गेलयँ, तखन युसुफ उमन के निजेक बारे कइह देलक, मोयँ तोहरे केरे भाइ युसुफ हेकँ। आर फिरोन राजा कोउ युसुफ केर परिबार केर बारे जानकारी होलक। ¹⁴ इकर बादे यूसुफ आपन बाप याकूब आर आपन सउब भाइ आर उमनेक छुवा-पुता गिला के जे तीन कोरी पन्दरह झन रहयँ, डाइक अनुवालक। ¹⁵ तखन याकूब मिसर देस मेहेन गेलक। हुआँ याकूब आर हामरेक आजा-दादा गिला मोइर गेलयँ। ¹⁶ उमनेक मूर्दा के मिसर देस लेक सेकेम नामेक जायगा मेहेन लेगलयँ आर ओहे मासना माहने गाड़लयँ जेटा के अब्राहम हमोर केर छुवा गिला लेक चाँदी दे कहन किन रहे।

¹⁷ जेसे-जेसे उ बचन टा पूरा होयेक समय आलक जे परमेसर अब्राहम के कइह रहे, तेसे-तेसे हामरेक पुरखा अब्राहम केर छुवा-पुता गिला मिसर देस मेहेन बेजाइन सांगी बाढ़ते गेलयँ। ¹⁸ सेइ समय मिसर देस मेहेन एकटा दोसर राजा आलक, जे युसुफ केर बारे नाई जानत रहे। ¹⁹ ऊ राजा हामरेक जाइतेक लोग गिला के छल-कपट कइर कहन हामरेक पुरखा गिला के बेजाइन बेसी दुख देलक आर उमनेक बालक छुवा गिला के जिन्‍दा ना रहुन कइह कहन फेंकुवाय देलक। ²⁰ एसन समये मूसा केर जनम होलक आर ऊ परमेसर केर नजइरे दोमे सुन्‍दर रहे, उकर माय बाप उके तीन महीना तक घरे लुकाय कहनजतन करलयँ। ²¹ किन्‍तु जखन आरो बेसी दिन तक लुकाय नाई पारलयँ, सेखन उके पानीये बहाय देलँय। तखन राजा फिरौन केर बेटी उके पालक आर निजेक बेटा रकम पोसलक। ²² सेतेहें मूसा के मिसर देस केर सउब किसीमेक सीछा देल गेलक, ऊ काथा कहेक मेहेन आर काम मेहेन सक्तिसाली रहे।

²³ जखन मूसा चालीस बछर केर होलक तखन ऊ मने सोंचलक कि आपन इस्राएली भाइ गिला संग भेंट-घाट कइर लेमूँ। ²⁴ सेइ समय ऊ एकटा मिसरी लोग के देखलक कि उकर जाइत भाइ इस्राएली लोग केर उपरे अत्याचार करो तेहे, तखन मूसा आपन भाइ के बचालक आर मिसरी लोग के माइर मोराय कहन साताल टाकेर बदला लेलक। ²⁵ आर मूसा सोंचलक कि उकर इसराइली भाइ गिला समइझ जाबयँ कि परमेसर उके उमने के छोड़ायेक तेहें पइठाय आहे, किन्‍तु उमन नाई बुझलयँ। ²⁶ दोसर दिन जखन दुइटा इसराइली गिला के आपस मेहेन झागड़ा लड़त के देखलक, तो मूसा उमनेक ताहाँ पँहचोलक। आर दुइयो झन बना-बनी होउन कइह कहन समझायेक तेहें कहलक, 'ए भाइ, तोहरे भाइ-भाइ मेहेन काहे लोड़ो ताहा?' ²⁷ किन्‍तु ऊ लोग टा जे आपन भाइ के मारत रहे मूसा के एक बाटे ढेकइल कहन कहलक, 'तोयँ आपन के देख, के तोके हामरेक उपरे हाकीम आर फयसला करइया बनाय आहे? ²⁸ का तोयँ जेसन काइल मिसरी लोग टाके मोराले, ओसनेइ मोकोउ मोराय खोजिसला?' ²⁹ ई काथा टाके सुइन कहन मूसा मिसर देस लेक पारालक, आर मिद्यान देस माहने परदेसी बइन कहन रहे लागलक, हुआँ उकर दुइटा बेटा जनमोलयँ।

³⁰ मिद्यान देस मेहेन चालिस बछर बितल बादे सीनै पाहाड़ केर पासे सुनसान बोने एकटा सरग दूत डुँड़कत झूँड़ केर लौ माहने मूसा संग देखा होलक। ³¹ मूसा इटा के देइख कहन अचम्‍बित होय गेलक। जखन ऊ उटा के देखेक तेहें पास गेलक तखन परभु केर आवज सुने पालक, ³² 'मोयँ तोर पुरखा अब्राहम, इसाहक आर याकूब केर परमेसर हेकँ।' इटा सुइन कहन मूसा डरे काँपे लागलक आर उके देखेक साहांस नाई होलक। ³³ तखन परभु उके कहलक, 'आपन गोड़ लेक जूता खोलिन, काहेकि जाहाँ तोयँ ठाड़ आहीस उटा पबित्र भूईं हेके। ³⁴ मोयँ सही मेहेन मिसर देसे आपन लोगेक खराब दसा के देइख आहँ कि हुआँ आपन लोग गिला के का निहार साताल जा तेहे। मोयँ उमनेक कुहँरेक आर काँदेक सुइन आहँ। सेतेहें मोयँ उमन के छोड़ायेक तेहें सरग लेक नाइभ आहँ। एबार आव, तेयार होय जा, मोयँ तोके मिसर देस पइठातँ।'

³⁵ एहे मूसा के लोग गिला नाई माइन कहन उके कहलयँ, 'तोके हामरेक उपरे हाकीम आर फयसला करइया के राइख आहे?' उकेइ परमेसर उ सरग दूत केर दाराए हाकीम आर छोड़ाइया बनाय कहन पइठाय देलक, जे डुँड़कत झूँड़े देखा होय रहे। ³⁶ उकेइ परमेसर हाकीम आर छोड़ाइया बनाय कहन ऊ सरग दूत केर दाराए पइठाय देलक जे उकर संगे डुँड़कत झूँड़े देखा होय रहे। एहे लोग टाइ मिसर देस आर लाल समुन्दर आर सुनसान बोने चालिस बछर तक चमत्‍कार केर काम आर चिन्‍हा गिला देखात के इसराएली गिला के मिसर देस लेक बाहिर बाहरालक।

³⁷ ई ओहे मूसा हेके जे इसराएली गिला के कहलक, 'परमेसर तोहरेक मइधेइ मोर निहार एकटा भबिस्यबक्ता के तोहरेक तेहें पइठाइ।' ³⁸ ई ओहे हेके, जे सुनसान बोने हामरेक पुरखा गिलाक मंडली मांझे रहलक, जेकर संगे सरग दूत सीनै पाहाड़ माहने काथा करलक, उकेइ जियोंत बचन देल गेलक ताकि उटा हामरेक तक पहँचुक।

³⁹ किन्तु हामरेक आजा-दादा गिला मूसा केर काथा के नाई मानलयँ, बल्‍कि बिरोध करलयँ आर फिन मिसर देस घुरेक चाहत रहयँ। ⁴⁰ उमन हारुन के कहलयँ, ‘हामरेक खातिर एकटा एसन देवँता बनाइन जे हामरे के आघु बाटेक डहर देखाउक। काहेकि ई मूसा जे हामरे के मिसर देस लेक बाहराय कहन लानलक उके का होलक हामरे नाई जानिला। ⁴¹ तखन उमन एकटा बाछा केर मूरती बनाय कहन उकर आघुवे बलि चेढ़ालयँ। उमन निजेक हाथ लेक बनाल मुरति खातिर खुसी मानाय लागलयँ। ⁴² सेतेहें परमेसर उमन लेक मुँह मोइड़ लेलक आर आकासेक सुरुज, चाँद आर तरीगन गिला केर पूजा करेक तेहें छोइड़ देलक। एहे टाकरे बारे भबिस्यबक्ता गिलाक किताबे लिखल आहे,

'ए इसराइल केर लोग गिला,

तोहरे सउब सुनसान बोने चालीस बछर तक

का मोरे तेहें जानवर आर अनाज केर बली चेढा़त रहा़?

⁴³ तोहरे तो मोलेक देवँता केर तम्बू आर रिफान देवँता केर तरिगन के ले कहन घुराय बुलत रहा

यानी जेकर मूरती तोहरे पूजा करेक तेहें बनाय रहा,

सेटा के ले कहन बोने घुरत रहा।

सेतेहें मोयँ तोहरे के बन्दी बनाय कहन बाबूल देस केर उपार पइठाय देमूँ।'

⁴⁴ सुनसान बोने हामरेक पुरखा गिलाक पासे 'गोहा केर तम्बू' रहे। इ तम्‍बू टा जे निहार परमेसर मूसा के नमुना देखाय दे रहे, ओहे निहारे बनाल जाय रहे। ⁴⁵ ओहे तम्‍बू के हामरेक पुरखा गिला पहिले पालयँ, उकर बादे जखन यहोसू इसराइली गिलाक आघुवा रहे तखन तम्‍बू टाके इ देस माहान आनलयँ। परमेसर उमन के हामरेक पुरखा केर पास लेक कुदाय कहन बाहराय देलक आर उ तम्‍बू टा राजा दाऊद केर समय तक रहलक। ⁴⁶ राजा दाऊद केर उपरे परमेसर केर किरपा रहे, सेखन दाऊद याकूब केर परमेसर के रहेक खातिर मंदिर बनायेक तेहें बिनती करलक। ⁴⁷ किन्तु राजा सुलेमान परमेसर केर खातिर मन्दिर के बनालक। ⁴⁸ तेउ परमेसर मानुस केर हाथेक बनाल मन्दिरे नाई रहेला, जेसन कि भबिस्‍यबक्‍ता कइह आहे,

⁴⁹ 'सरग मोर राजगद्दी हेके,

आर धरती मोर गोड़ राखेक पिंढा़ हेके।

परभु कहेला, तोहरे मोर तेहें केसन भाभेक घर बनाबा?

मोर रहेक जायगा कहाँ होई।

⁵⁰ का ई सउब जिनिस मोर हाथेक बनाल ना लागे?'

⁵¹ ए टेढ़ियाल लोग गिला, तोहरे ना तो अनजाइतेक निहार सुने चाहाला आर ना तो बुझे खोजाला। तोहरे सउब दिन पबित्र आत्‍मा केर बिरोध कराला, जेसन तोहरेक पुरखा गिला करत रहयँ ओसनेइ तोहरोउ कराला। ⁵² तोहरेक पुरखा गिला भबिस्यबक्ता गिलाक मइधे केके नाई सातालयँ? उमन ऊ भबिस्‍य्‍बक्‍ता गिला के माइर मोरालयँ, जे गिला परमेसर केर धरमी अदमी मसीह केर आयेक बारे भबिस्‍यबानी कइर रहयँ, एबार तोहरे सउब, ओहे धरमी लोग टाके धोरला आर उके मोराय देला। ⁵³ तोहरे सरगदूत केर हाथ लेक मूसा केर नियम के तो पाला, किन्तु तोहरे उटा केर पालन नाई करला।

इस्‍तिफनुस के पाखनाय ठेंस मोरालयँ

⁵⁴ यहूदी आगुवा गिला इस्तिफनुस केर इ काथा के सुइन कहन रागे भूंत होय गेलयँ आर खिंसे दाँत चाबे लागलयँ। ⁵⁵ किन्तु इस्तिफनुस पबित्र आत्मा लेक भोइर कहन सरग बाटे आँइख उठाय कहन देखलक आर परमेसर केर महिमा के आर ईसु मसीह के परमेसर केर दाहिना धारे ठाड़ होल देखलक। ⁵⁶ आर कहलक, "देखा, मोयँ सरग के खुलल देइख पातहँ आर मानुस केर बेटा के परमेसर केर दाहिना बाटे ठाड़ होल देखो तहँ।" ⁵⁷ तखन बोड़े सभा केर लोग गिला इटा सुइन कहन कान बन्‍द करलयँ आर गुइल करत के सउब उके धोइर जातलयँ, ⁵⁸ आर उके घिसरातके सहर लेक बाहिर लेइग कहन पाखनाय ठेंसे लागलयँ। आर गोहा गिला निजेक लूगा के खोइल कहन साऊल नामेक लोग केर गोड़ पासे राइख देलयँ। ⁵⁹ जखन उमन पाखनाय ठेंसत रहयँ, सेइ समय स्तिफनुस ई रकम प्राथना करलक, ए परभु ईसु, मोर आत्मा टाके गरहन कर। ⁶⁰ फिन ऊ हेंठू गाइड़ कहन आँटे-आँटे कहे लागलक, "ए परभु, इ पाप के उमनेक उपरे ना लागाइन।" एतना कहत के ऊ निजेक प्रान टाके छोइड़ देलक।"