8
1 इस्तिफनुस के मोरायेक मेहेन साऊलो राजी रहे।
मंडली केर बिसासी के सातायेक
ओहे दिन यरुसलेम केर मंडली केर बिरोध मेहेन बेजाइन सातावट सुरु होलक, आर प्रेरित गिला के छोइड़ कहन सउब बिसासी गिला यहूदिया आर सामरिया केर इलाका गिलाय छितिर-बितिर होय गेलयँ। 2 आर भक्त गिला इस्तिफनुस के तोइप देलयँ आर उकर खातिर बेजाइन सोक मानालयँ। 3 किन्तु साऊल मंडली के नास करेक सुरु करलक, आर ऊ घर-घर जाय कहन बेटा छुवा आर बेटी छुवा गिला के घिसराय के निकलाय कहन जेहेल मेहेन बन्द कइर देत रहे।
4 जे बिसासी गिला छितिर-बितिर होय रहयँ सेइ गिला जाहाँ जात रहयँ हुआँ परमेसर केर बचन के सुनाते गेलयँ। 5 फिलिप्पुस सामरिया राइज केर एकटा सहर मेहेन जाय कहन लोग गिला के मसीह केर बारे बाताय लागलक। 6 फिलिप्पुस केर काथा के सुइन कहन आर अचम्भा काम जेटा ऊ करत रहे सेटा के देइख कहन लोग गिला उकर बचन के बेजाइन धेयाने सुनत रहयँ। 7 आर ढेइर लोग लेक दुस्टात्मा गिला आँटे चिचियाय कहन बाहरालयँ आर ढेइर लाकवा मारल लोग आर लांगडा़ लोग गिला कोउ बेस करल गेलक। 8 सेतेहें उ सहर मेहेन लोग बेजाइन रीझे होलयँ।
जादूगर सिमोन
9 थोड़ेक दिन पहिले उ सहर मेहेन सिमोन नामेक एकटा लोग रहे। ऊ जादू-टोना कइर कहन सामरिया केर लोग के अचम्बित कइर देत रहे आर निजे के बोडे़ अदमी होयेक दावा करत रहे। 10 आर सउब छोटे लेक बोडे़ तक उके बेजाइन मानत रहयँ आर कहत रहयँ कि "ई अदमी टा परमेसर केर सक्ति हेके जे सउब लेक बोडे़ कहायला।" 11 ऊ बेजाइन दिन लेक हुआँ केर लोग के जादू-टोना केर काम लेक सउब के अचम्बित कइर कहन राइख रहे, सेतेहें लोग उके बेजाइन मानत रहयँ, 12 किन्तु जखन लोग गिला फिलिप्पुस केर बिसास करलयँ, जे परमेसर केर राइज केर सुसामाचार आर ईसु मसीह केर नाम केर परचार करत रहे, तो का बेटा छुवा आर बेटी छुवा सउब बपतिस्मा लेत रहयँ। 13 तखन सिमौनो खुद उकर माहान बिसास करलक आर बपतिस्मा लेलक। ऊ फिलिप्पुस केर संग-संग जात रहे। आर जखन ऊ चिन्हा आर बोडे़-बोडे़ चमत्कार केर काम के देखत रहे तो ताजूब होय जात रहे।
सामरिया राइज केर लोग गिला के पबित्र आत्मा पायेक
14 जखन यरुसलेम केर प्रेरित गिला सुनलयँ कि सामरिया राइज केर लोग गिला परमेसर केर बचन के माइन लेलयँ, तखन पतरस आर योहन के उमनेक ताहाँ पइठालयँ। 15 दुइयो झन हुआँ पहुँइच कहन लोग गिलाक तेहें प्राथना करलयँ कि उमन पबित्र आत्मा पाउन। 16 काहेकि एखन तक उमनेक लेक केकरो उपरे पबित्र आत्मा नाइ नाइभ रहे, उमन तो केबल परभु ईसु केर नामे बपतिस्मा ले रहयँ। 17 तखन पतरस आर योहना उमनेक उपरे हाँथ राइख कहन प्राथना करलयँ आर उमन पबित्र आत्मा पालयँ।
सिमौन केर लोभ
18 जखन सिमौन निजेइ देखलक कि प्रेरित गिला लोगेक मूडे़ हाथ राखले पबित्र आत्मा पावयला, तो ऊ उमनेक पासे किनेक बिचारे टाका आइन कहन कहलक, 19 "मोकउ ई सक्ति टा देवा, ताकि जेकरे उपरे मोयँ हाथ राखम, ऊ पबित्र आत्मा पाउक।" 20 पतरस उके जबाब देलक, "तोर टाका-पयसा तोर संगेइ नास होय जाउक, काहेकि तोयँ परमेसर केर बरदान के टाकाय किनेक तेहें बिचार करले। 21 इ सेवा काम मेहेन तोर कोनो हिस्सा बँटवारा नेखे, काहेकि तोर मन परमेसर केर नजइरे सीधा नेखे। 22 सेतेहें तोयँ आपन दुस्ट बिचार लेक मन बदइल ले आर परभु लेक छमा माँगीन, होय पारे ऊ तोर ई बिचार के छमा कइर देइ। 23 काहेकि मोयँ देखँला कि तोर मन पित्त निहार तीता आहे आर तोयँ पाप केर जाल माहने पड़ल आहीस।" 24 सेखन सिमौन उमन के कहलक, "मोर खातिर परभु लेक प्राथना करा कि जे काथा गिला के तोयँ कहले, उ सउब मोर संगे ना होउक।" 25 तेकर बादे पतरस आर योहन सामरिया राइज केर गाँव-गाँव मेहेन गोवाही देत के आर परभु ईसु केर बचन के परचार करत के यरुसलेम घुरलयँ।
फिलिपुस आर इथोपिया केर खाजान्ची
26 फिन परमेसर केर एकटा सरग दूत फिलिपुस के कहलक, "उठीन, आर दक्खिन बाटे उ सुनसान डहर मेहेन जाहिन, जे यरुसलेम लेक गाजा सहर जायला।" 27 तखन ऊ उइठ कहन चइल देलक, आर देखा, डहर मेहेन एकटा खोजाa भेंटालक। ऊ खोजा टा इथोपिया केर रानी कन्दाके केर खाजान्ची रहे। ऊ परमेसर केर आराधना करेक तेहें यरुसलेम जाय रहे। 28 ऊ घुरत के निजेक रँथ उपरे बोइस कहन यसायाह भबिस्यबक्ता केर किताब के पढ़त रहे। 29 तखन पबित्र आत्मा फिलिपुस के कहलक, "रँथ केर पास जाहिन आर उकर संग होय लेहिन।" 30 फिलिपुस कुइद कहन रँथ केर पासे गेलक आर उके यसायाह भबिस्यबक्ता केर किताब के पढ़त के सुनलक। तखन उके पुछलक, "का तोयँ जेटा पढ़ो तिहिस सेटा के बुझे पारो तिहिस?" 31 ऊ कहलक, "जब तलक केउ मोके नाई समझाबयँ तो का निहार बुझम?" आर फिलिपुस के अरजी करलक कि रँथ मेहेन चापिन आर मोर संग बोइस। 32 धरम सास्तर केर जोन भाग टा ऊ पढ़त रहे सेटा एसन रहे,
“उके बलि करेक तेहें भेंड़ी निहार लेगलयँ,
आर जे निहार भेंड़ी केर छुवा ऊन काटोइया केर पासे चुपचाप रहयँला,
ठीक ओसनेइ ऊ आपन मुँह नाइ खोललक।
33 खामोसी टाकेर दसा मेहेन उकर उचित फयसला नाई होय पावालक,
उकर पीढ़ी केर लोग गिलाक बाखान के करी? काहेकि इ धरती लेक उकर जीबन टाके उठाल जातेहे।”b
34 खोजा टा फिलिपुस के पुछलक, "दया कइरके मोके कइह दे, भबिस्यबक्ता केकर बारे कहो तेहे, निजेक बारे न कोनो दोसर केर बारे कहो तेहे?" 35 तखन फिलिपुस आपन मुहँ खोललोक, आर एहे सास्तर लेक कहेक सुरु कइर कहन ईसु केर बारे सुसामाचार सुनालक। 36 जखन डहर मेहेन जात-जात के उमन पानी ताहाँ पहँचोलयँ, तखन खोजा कहलक, "देखिन, हियाँ पानी आहे, एबार मोयँ काहे बपतिस्मा नाई लेमूँ?" 37 (फिलिपुस उके कहलक, "जदि तोयँ गोटा मने बिसास करिसला होले तो होय पारे।" ऊ जबाब देलक, "मोयँ बिसास करँला कि ईसु मसीह परमेसर केर बेटा हेके।")c 38 आर ऊ रँथ टाके ठाड़ करेक हुकूम देलक, तखन दुइयो झन फिलिपुस आर खोजा पानी मेहेन नाभलयँ आर फिलिप्पुस उके बपतिस्मा देलक। 39 जखन उमन पानी भीतर लेक बाहिर बाहरालयँ, तो आचकाय परभु केर आत्मा फिलिप्पुस के उठाय लेगलक, आर खोजा उके फिन देखोउ नाई पारलक, किन्तु खोजा टा खुसी मानात के आपन डोहरे चइल गेलक। 40 किन्तु फिलिप्पुस निजे के असदोद सहर मेहेन पालक। ऊ सउब सहर-सहर सुसामाचर परचार करत के कैसरिया सहर तक पहँचोलक।