9
साऊल ईसु केर चेला बोइन गेलक
1 साऊल जे एखनो तक परभु केर चेला गिला के धमकायेक आर माइर मोरायेक धुने लागल रहे, महायाजक ताहाँ गेलक। 2 आर दमिस्क केर आराधनालय गिलाक नामे एकटा चिट्ठी लिख कहन आदेस माँगलक कि हुआँ केर सउब बेटी छुवा आर बेटा छुवा गिला के जे ईसु माहान बिसास करत रहयँ, उमन के बाइन्ध कहन यरुसलेम आनम। 3 जखन साऊल जात जात के दमिस्क नगर केर नजीक पहँचोलक, तो आचकाय आकास लेक उकर चाइरो बाटे आलो चमकोलक। 4 आर ऊ भुइँये गिर गेलक, आर एकटा आवाज सुने पालक, "ए साऊल, ए साऊल, तोयँ मोके काहे सतातिहिस?" 5 साऊल पुछलक, "ए परभु, तोयँ के हेकिस?" परभु कहलक, "मोयँ ईसु हेकँ, जेके तोयँ सतातिहिस। 6 किन्तु उइठ कहन नगर मेहेन जा आर जेटा तोके करेक होई, सेटा के तोके कहल जाई।" 7 जे लोग गिला साऊल केर संगे रहयँ, उमन डरे भाकुवाय कहन ठाड़ेइ रइह गेलयँ, काहेकि आवाज टाके तो सुनत रहयँ, किन्तु केकउ देखे नाई पात रहयँ। 8 तखन साऊल भूईं लेक उठलक, किन्तु जखन आँइख खोललक तो ऊ कोनो देखे नाई पालक। आर उमन उके हाथ धोइर कहन दमिस्क नगर लेगलयँ। 9 ऊ तीन दिन तक देखे नाई पारलक आर कोनो खावा-दावाउ नाई करलक।
10 दमिस्क सहर मेहेन हनन्याह नामेक एकटा परभु केर चेला रहे। परभु उके दरसन माहने कहलक, "ए हनन्याह!" ऊ कहलक, "हँ परभु!" 11 परभु उके कहलक, "उइठ कहन तोयँ 'सीधा' नामेक हटिया मेहेन जाहिन आर यहूदा केर घर खोइज ले, हुआँ तरसुस केर साऊल बारे पुइछ ले, ऊ एखन प्राथना करोतेहे। 12 ऊ दरसन मेहेन देइख आहे कि हनन्याह नामेक एकटा लोग उकर पासे आलक आर उकर उपरे हाथ राखलक ताकि फिन देखे पारुक।" 13 हनन्याह जबाब देलक, "ए परभु, मोयँ तो ई लोग टाकेर बारे ढेइर लोगेक मुँहे सुइन आहँ कि ई यरुसलेम केर तोर धरमी लोग गिला के बेजाइन साताय आहे। 14 आर हियाँउ इ प्रधानयाजक गिला बाटे लेक अधिकार पावाय आहे कि जतिक लोग गिला तोर नाम लेन्ला, उमन के धोइर बाँइध लेम।" 15 किन्तु परभु उके कहलक, "तोयँ जाहिन, ऊ मोर चुनल जन हेके। काहेकि ऊ अनजाइत गिला के जे यहूदी ना लागयँ आर राजा आर इसराइली गिलाक मांझे मोर नामेक परचार करी। 16 मोयँ उके कइह देमूँ कि मोर नामेक चलते उके कतिक कोस्टो सहेक होई" 17 तखन हनन्याह उइठ कहन उ घर माहान गेलक आर उकर उपरे हाथ राइख कहन कहलक, "ए भाइ साऊल, परभु ईसु जे तोके डहर मेहेन आत के दरसन दे रहे, उहे मोके पइठाय आहे कि तोयँ फिन देखे पारिन आर पबित्र आत्मा लेक भोइर जाइन।" 18 सेहे खोने तुरते उकर आँइख लेक बाकला रकम गिरलक आर ऊ देखे लागक आर उइठ कहन बपतिस्मा लेलक।" 19 तेकर बादे भात खाय कहन तागत पालोक।
साऊल दमिस्क माहान परचार करे सुरु करलक
साऊल ढेइर दिन तक दमिस्क नगर केर चेला गिला संग रहलक। 20 आर ऊ तुरत आराधनालय गिलाय जाय कहन परचार करे लागलक कि ईसु परमेसर केर बेटा हेके। 21 जे गिला उकर परचार के सुनलयँ सउब अचम्भा करे लागलयँ आर कहलयँ, "का ई लोग टा उहे तो ना लागे, जे यरुसलेम मेहेन ईसु केर नामे बिसास करइया लोग गिला के सातात रहे? आर ऊ हियाँउ जे गिला ईसु माहान बिसास करयँला उमन के प्रधानयाजक गिला पासे धोइर बाँइध कहन लेगेक तेहें आय नाई रहे?" 22 किन्तु साऊल आरो बेसी परचार काम मेहेन मजगूत होते गेलक। आर दमिस्क मेहेन रहइया यहूदी गिला के ईसुवे मसीह हेके सेटा केर साबूत देखाय-देखाय कहन उमनेक मुँह के बन्द कइर देत रहे।
23 जखन ढेइर दिन बितलक तो यहूदी गिला साऊल के माइर मोरायेक तेहें जोजना बनालयँ। 24 किन्तु उमनेक जोजना टाकेर बारे साऊल के पता चललोक। आर उमन दिन-राइत उके मोरायेक तेहें सहर केर फाटक ताहाँ जोहत रहयँ। 25 किन्तु उकर चेला गिला राइत पहर उके खाँचीये बोइसाय कहन सहर केर छारदिवारी बाटे लेक उपार करलयँ। 26 यरुसलेम पहँइच कहन ऊ चेला गिला संगे मिलेक चेस्टा करलक, किन्तु उमने उकर लेक बेजाइन डारात रहयँ, उमन के बिसास नाई होत रहे कि सही मेहेन उहो ईसु मसीह केर चेला बइन गेलक। 27 किन्तु बरनाबास उके ले कहन प्रेरित गिला ताहाँ लेगलक आर उमने के कहलक कि साऊल दमिस्क केर डहर मेहेन परभु के का निहार देखलक आर का निहार परभु इकर संग काथा करलक, फिन दमिस्क माहान का निहार हिमइत कइर कहन परभु ईसु केर परचार करलक। 28 तखन साऊल प्रेरित गिला संग रहे लागलक आर यरुसलेम माहान दाइन-भुइल कहन गोटाय बिना डर-भये परभु केर परचार करलक। 29 ऊ यूनानी भासा कहइया यहूदी गिला संग काथा आर बाद-बिबाद करे लागलक, किन्तु उमने उके माइर मोरायेक कोसिस करे लागलयँ। 30 इ काथा टाके जखन बिसासी भाइ गिला जानलयँ, सेखन उके कैसरिया लेगाय कहन हुआँ लेक तरसुस पइठाय देलयँ। 31 इ रकम यहूदिया, गलील आर सामरिया राइज केर मंडली माहान साताल जात रहयँ, सेटा लेक सान्ति पालयँ। आर बिसासी गिला परभु केर भय आर पबित्र आत्मा केर हुचकाल मेहेन मजगूत होते गेलयँ आर उमनेक संख्या बाढ़ते गेलक।
एनियास रोग लेक बेस होलक
32 फिन एसन होलक कि पतरस उ गोटा इलाका मेहेन चोलते-चोलते लुद्दा गाँव केर पवित्र लोग ताहाँउ पहँचोलक। 33 लुद्दा मेहेन एनियास नामेक एकटा लकवा मारल लोग भेंटालक, जे आठ बछर लेक खाइटे पड़ल रहे। 34 पतरस उके कहलक, "ए एनियास! ईसु मसीह तोके बेस करेला, तोयँ उठ, आर आपन बिछना टाके बेस निहार समठाव।" तखन ऊ तुरते उइठ कहन ठाड़ होलक। 35 लुद्दा आर सारोन केर सउब रहइया लोग गिला एनियास के बेस होल देइख कहन परभु ईसु माहान बिसास करलयँ।
तबिता मोरल लेक जियँत होलक
36 याफा नगर मेहेन 'तबीता'a नामेक एकटा बिसासी बेटी छुवा रहत रहे। ऊ बेजाइन भालाई केर काम करत रहे आर गरीब गिला के साहेता करत रहे। 37 सेइ दिने ऊ रोगी होय कहन मोइर गेलक, उकर मुरदार के नाहाय धोय कहन उपरेक कोठरी माहान राइख देलयँ। 38 लुद्दा याफा लेक बेसी धुरे नाई रहे, सेतेहें जखन बिसासी गिला सुनलयँ कि पतरस लुद्दा मेहेन आहे, तखन उमने दुइटा लोग के उकर ताहाँ इटा अरजी करेक पइठालयँ, "हामरेक ताहाँ आयेक तेहें देरी ना करुक।" 39 पतरस उइठ कहन उमनेक संगेइ चइल गेलक। जखन ऊ पहँचोलक तो उमने उके उपरेक कोठरी माहान लेगलयँ। सउब राँड़ी बेटी छुवा गिला कान्दत के आलयँ आर चाइरो बाटे ठाड़ होय कहन तबिता केर बनाल कुरता आर लुगा के देखाय लागलयँ, जेके ऊ मोरेक लेक पहिले बनाय रहे। 40 तखन पतरस सउब के कोठरी लेक बाहिर कइर देलक आर हाँठू गाइड़ कहन प्राथना करलक। तेकर बादे मुरदार बाटे देइख कहन कहलक, "तबीता उठिन!" तखन ऊ आपन आँइख खोइल देलक आर पतरस के देइख कहन बोइसलक। 41 पतरस उकर हाथ धोइर कहन ठाड़ करलक, तखन धरमी लोग आर राँड़ी बेटी छुवा गिला के डाकलक आर उमने के जियँत जिमा देलक। 42 इ काथा टा गोटा याफा सहर मेहेन पसइर गेलक। आर बेजाइन लोग गिला परभु मेहेन बिसास करलयँ। 43 पतरस याफा सहर मेहेन चामेक काम करइया सिमौन नामेक लोग केर घरे ढेइर दिन तक रहलक।