10
कुरनेलियुस सिपाही केर दाराए पतरस के डाकुवालक
1 कैसरिया सहर मेहेन कुरनेलियुस नामेक एकटा लोग रहे। ऊ रोमी सेना मेहेन "इटालियन पालटान नामेक" सरदार रहे। 2 ऊ यहूदी नाई रहे होलोउ उकर पूरा परिबार परमेसर केर डर-भय मानोइया भक्त रहयँ। ऊ यहूदी गिलाक गरीब लोग गिला के बेजाइन दान देत रहे आर सउब समय परमेसर लेक प्राथना करत रहे। 3 एक दिन ऊ तीन बजे एकटा दरसन देखलक। दरसन मेहेन साफा साफी परमेसर केर एकटा सरग दूत के देखलक आर उकर ताहाँ आय कहन उके कहलक, "ए कुरनेलियुस!"
4 कुरनेलियुस उके थिथाय कहन देखलक आर डरे-डरे सरग दूत के कहलक, "ए परभु, का काथा हेके?" सरग दूत उके जबाब देलक, "तोर प्राथना के परमेसर सुइन आहे आर गरीब गिला के देल दान टाकोउ खेयाल कइर आहे। 5 एबार तोयँ थोड़ेक लोग के याफा सहर पइठाय कहन सिमोन के जेकर दोसर नाम पतरस हेके, डाइक आनुवाय ले। 6 ऊ एकटा चामेक काम करइया सिमोन केर घरे रहेला, जेकर घर समुन्दर धारे आहे।"
7 जखन सरग दूत टा जे उकर संग काथा करत रहे ऊ चइल गेलक, तो ऊ दुइटा धांगर के आर उकर पासे रहत रहयँ उमनेक मइधे एकटा भक्त सिपाही के डाकलक। 8 उमन के ऊ दरसन माहान देइख रहे सेइ सउब काथा के कइह कहन याफा सहर पइठालक। 9 दोसर दिन उमन चलते-चलते सहर केर नजीक पहँचा पहँची मेहेन रहयँ, सेइ समय करीबन दुपहरे पतरस प्राथना करेक तेहें घर केर उपरेक छत मेहेन गेलक। 10 उके भूख लागलक तखन कोनो खायेक खोजत रहे। किन्तु जखन उमन उकर तेहें खायेक तेयारी करते रहयँ, से करत के ऊ एकटा दरसन देखलक। 11 आर ऊ देखलक कि आकास खुइल गेलक आर एकटा बोड़े चादर निहार कोनो जिनिस, चाइरो कोनाय बान्धल डँलगात के धरती बाटे नाभोतेहे। 12 ऊ चादर मेहेन धरती केर सउब रकम केर चाइर गोड़िया जानवार, रेंगोइया जीव आर आकासेक चरइ गिलाउ रहयँ। 13 तखन पतरस एकटा एसन आवाज सुनलक, “ए पतरस उठ, इमन के मोराइन आर खाइन।” 14 किन्तु पतरस कहलक, "नाही परभु, नाही! मोयँ कोनो अपबित्र आर असुध जिनिस के कबोउ नाई खाय आहँ।" 15 फिन दोसर धंव एसन सुने पालक, "जोन जिनिस के परमेसर सुध ठहराय आहे, उटाके तोयँ असुध ना कहिन।" 16 तीन धंव एसने होलक, तखन तुरतेइ ऊ चादर टा आकासे उठाल गेलक।
17 जखन पतरस के मने दुविधा होलक कि ई दरसन टाकेर मतलब का होय पारे, तो ठीक ओहे समये कुरनेलियुस केर पइठाल अदमी गिला सिमोन केर घर के खोजते-खोजते दुवाइर केर बाहिरे आय कहन ठाड़ होलयँ। 18 आर डाइक कहन पुछे लागलयँ, "का सिमोन हिंयाइ रहेला, जेके पतरस कहयँला?" 19 पतरस तो इ दरसन केर बारे सोंचते रहे कि पबित्र आत्मा उके कहलक, "सिमोन! तीनटा लोग तोके खोजोतहयँ। 20 एबार उइठ कहन हेंठ नाभिन, तोयँ उमनेक संग बेधड़क चइल जा कोनो संका ना करबे काहेकि उमने के मोएँ पइठाय आहँ।" 21 तखन पतरस छत लेक हेंठ नाइभ कहन उ लोग गिला के कहलक, "देखा, जेके तोहरे खोजोताहा, ऊ मोएँ हेकँ। तोहरे केसन कामे आय आहा? 22 उमन पतरस के कहलयँ, "हामरे के कुरनेलियुस सरदार पइठाय आहे। ऊ धरमी आर परमेसर केर भय मानोइया लोग हेके, जे गोटा यहूदी जाइत मेहेन बेस नामी लोग हेके। उके एकटा पवित्र सरगदूत हुकुम दे आहे कि तोके आपन घर डाइक कहन तोर लेक बचन सुनुक।" 23 तखन पतरस उमने के गोतिया राइख कहन माइन-गाइन करलक। दोसर दिन पतरस उठलक आर उमनेक संगे गेलक आर याफा केर थोड़ेक बिसासी भाइ गिलाउ उकर संगे गेलयँ। 24 दोसर दिन उमन कैसरिया सहर पहँचोलयँ। कुरनेलियुस निजेक गोतिया आर संग साथी गिला के जामा कइर कहन उमनेक आयेक आसरा देखत रहे। 25 जखन पतरस घर सामात रहे, तो कुरनेलियुस पतरस संग भेंट करलक आर उकर गोड़े गिर कहन परनाम करलक। 26 किन्तु पतरस उके उठाय कहन कहलक, "उठ, मोयों तो मानुसे हेकँ।"
27 आर उमन गोल्फो करत के भीतर गेलयँ, हुआँ ढेइरे लोग के जामा होल देखलक। 28 पतरस उमने के कहलक, "तोहरे खुदे जानाला कि यहूदी गिलाक तेहें जे यहूदी ना लागयँ उमनेक संग मेल जोल राखेक या तो उमनेक ताहाँ जायेक यहूदी नियम केर बिरुध हेके। किन्तु परमेसर मोके कइह आहे कि कोनो मानुस के अपबित्र चाहबे असुध नाई कहँका। 29 सेइ तेहें जखन मोके डाकल गेलक तो मोयँ बिना कोनो तकलिफ माइन कहन चइल आलँ। एबार तोहरे कहा, मोके केसन कामेक तेहें डाकल जाय आहे।"
30 कुरनेलियुस उके जबाब देलक, "चाइर दिन पहिल तीन बजे मोयँ प्राथना करत रहँ। आचकाय एकटा झलकुवा लुगा पिंधोल अदमी मोर पासे आय कहन ठाड़ होलक। 31 ऊ मोके कहलक, 'ए कुरनेलियुस, तोर प्राथना टा सुनल जाय आहे आर तोर देल दान टाकोउ परमेसर केर पासे याइद करल जाय आहे। 32 एबार तोयँ थोड़ेक लोग के याफा सहर पइठाय कहन सिमौन के जे पतरस कहायला, डाइक आनुवाय ले। ऊ समुन्दर धारे चामेक काम करइया सिमौन केर घरे गोतिया आहे।' 33 सेतेहें मोयँ तुरते तोके डाइक आनुवालँ आर तोयँ बेजाइन दया करले कि आय गेले। एबार हामरे सउब परमेसर केर पासे आही कि जेटा परभु तोके कइह आहे सेटा के सुनब।"
कुरनेलियुस केर घरे पतरस बचन सुनालक
34 तखन पतरस कहे लागलक, "एबार मोयँ बुइझ गेलँ कि सही मेहेन परमेसर सउब के एक सामन देखेला। 35 बरन्चो सउब जाइत मेहेन जे परमेसर केर डर-भय मानेला आर उचित काम करेला, परमेसर उके अपनायला। 36 तोहरे जानाला कि परमेसर इसराइली गिलाक मांझे सुसामाचार पइठाय रहे, सेइ सान्ति केर सुसामाचार टाके ईसु मसीह केर दाराए सुनालक, जे सउब केर परभु हेके। 37 तोहरे इटाउ जानाला कि योहन केर दाराए मन बदलेक आर बपतिस्मा केर परचार होयेक कारने गलील राइज लेक गोटा यहूदिया राइज मेहेन का का होलक। 38 आर तोहरे इटाउ जानाला कि परमेसर का रकम नासरत सहर केर ईसु के पबित्र आत्मा लेक आर सामर्थ लेक भोइर देलक।a ऊ गोटाय दाइन-भुइल कहन भालाई केर काम करलक आर सैतान लेक साताल लोग गिला के बेस करलक, काहेकि परमेसर उकर संगे रहे। 39 हामरे उ सउब कामेक गोहा हेकी, जे ऊ यहूदिया राइज आर यरुसलेम सहर माहने करलक, लोग गिला उके कुरुस उपरे चेढ़ाय कहन माइर मोराय देलयँ। 40 किन्तु परमेसर उके तीसर दिने मोरल लेक जीयंत करलक आर देखायो देलक। 41 किन्तु सउब लोग गिला के नाही, ओहे गोहा गिला के जेके परमेसर पहिल लेकेइ चुइन रहे। ऊ गोहा गिला हामरे सउब हेकी, जे उकर मोरल लेक जियंत होल बादे उकर संगे खावा-पीयाउ कइर आही। 42 आर ऊ हामरे के हुकुम देलक कि लोग गिलाक मांझे परचार करा आर गोवाही देवा कि ई ओहे हेके जेके परमेसर जीयँत आर मोरल गिला केर फयसला करइया ठहराय आहे। 43 सउब भबिस्यबक्ता गिला उकरे गोवाही देन्ला कि जे केउ उकर उपरे बिसास करी, उके उकर नामे पाप छमा पावाई।
परमेसर केर पबित्र आत्मा नाभलक
44 पतरस जखन ई काथा टा कहते रहे, सेहे खोने जोतना उकर बचन के सुनत रहयँ, उ सउब केर उपरे पबित्र आत्मा नाभलक। 45 जोतना खतना करल बिसासी गिला पतरस केर संगे आय रहयँ, सउब अचम्बित होलयँ कि अनजाइतेक लोग गिलाक उपरोउ पबित्र आत्मा केर दान उझलल गेलक। 46 काहेकि यहूदी गिला उमन के भिनु-भिनु भासा कहत के आर परमेसर केर बाडा़ई करत के सुनलयँ। 47 तखन पतरस कहे लागलक, "इमन तो हामरेक निहारे पबित्र आत्मा पालयँ, का केउ इमने के पानीये बपतिस्मा लेक तेहें रोके पारी?" 48 आर पतरस हुकुम देलक कि उमन के ईसु मसीह केर नामे बपतिस्मा देल जाउक। तखन कुरनेलियुस पतरस के आरो तनिक दिन उकर संगे रहेक तेहें गोहरालक।