11
पतरस यरुसलेम घुइर आय कहन मंडली केर अगुवा गिला के हाल खबर सुनालक
1 प्रेरित गिला आर बिसासी भाइ गिला जे गोटा यहूदिया राइज मेहेन रहयँ, उमन सुनलयँ कि अनजाइत लोग गिलाउ जे यहूदी नाई लागयँ, परमेसर केर बचन के माइन लेलयँ। 2 आर जखन पतरस यरुसलेम आलक, तखन खतना करल यहूदी बिसासी भाइ गिला उके दोसाय लागलयँ, 3 आर उके कहलयँ, "तोयँ जे खतना करल ना लागयँ, उमनेक ताहाँ जाय कहन खावा-दावा कइर कहन छुइत कइर देले।a" 4 तखन पतरस उमने के सही मेहेन जेटा होय रहे सेटाके एकधार लेक कइह कहन समझाय लागलक। 5 उ कहलक,“मोयँ याफा नगर मेहेन प्राथना करत रहँ, आर एकटा दरसन देखलँ। मोयँ देखलँ कि एकटा बोड़े चादर निहार कोनो जिनिस चाइरो कोना बान्धल आकास लेक नाभोत के मोर पासे आलक। 6 जखन मोयँ उटा के धेयान लेक देखलँ, तो उकर मेहेन धरती केर चाइर गोड़िया जानवार, बोनेक जानवार, रेंगोइया जीव आर आकास केर चरइ गिला के देखलँ। 7 फिन एकटा आवाजो सुने पालँ, ‘ए पतरस उठ, इमन के मोराइन आर खाइन।’ 8 मोयँ कहलँ, 'नाही परभु, नाही, काहेकि मोयँ कोनो अपबित्र आर असुध जिनिस के कबोउ नाई खाय आहँ।’ 9 तखन दोसर धंव फिन आकास लेक आवाज सुने पालँ, ‘जोन जिनिस के परमेसर सुध ठहराय आहे, उटाके तोयँ असुध ना कहिन।’ 10 तीन धंव एसनेइ होलक, तेकर बादे सउब जिनिस टाके फिन आकासे उठाल गेलक।
11 ठीक ओहे खोने तीनटा लोग मोयँ जाहाँ रहत रहँ सेइ घर पासे आय कहन ठाड़ होलयँ, जेके कैसरिया सहर लेक मोर ताहाँ पइठाल जाय रहयँ। 12 तखन पवित्र आत्मा टा मोके उमनेक संग बेधड़क चइल जायेक तेहें कहलक, आर ई छ झन बिसासी भाइ गिलाउ मोर संग गेलयँ, आर हामरे कुरनेलियुस केर घर गेली। 13 ऊ अदमी हामरे के कइह देलक कि मोयँ एकटा सरग दूत के आपन घरे दरसन मेहेन ठाड़ होल देखलँ, आर ऊ सरग दूत टा कहलक, ‘केकोउ याफा सहर पइठाय कहन सिमोन के जे पतरस कहायला, उके डाइक आनिन। 14 ऊ तोके बचन सुनाइ जेकर दाराय तोर आर तोर घरेक सउब लोग पाप केर दन्ड लेक छुटकारा पाबयँ।' 15 जखन मोयँ उमन के सुसामाचार सुनायेक सुरु करलँ, तखन पबित्र आत्मा उमनेक उपरे ओहे निहारे नाभलक, जे निहार सुरु मेहेन हामरेक उपरे नाइभ रहे।b 16 सेखन मोके परभु केर कहल बचन टा इयाद आलक, जेसन ऊ कइह रहे, ‘योहन तो पानी लेक बपतिस्मा देलक, किन्तु तोहरे के पबित्र आत्मा लेक बपतिस्मा देल जाई।' 17 जदि परमेसर उमन कोउ पबित्र आत्मा केर दान देलक, जेटा के हामरे परभु ईसु मसीह माहने बिसास करल लेक पाय रही, तो मोयँ के रहँ जे परमेसर केर काम के रोके पारतँ?”
18 इटा सुइन कहन उमने सउब चुप होलयँ, आर परमेसर केर बडा़ई कइर कहन कहे लागलयँ, “तबे तो परमेसर अनजाइत गिला कोउ जीबन पायेक खातिर पाप लेक पसताय कहन मन बदलेक बरदान दे आहे।"
अन्ताकिया मेहेन सुसामाचार परचार
19 एबार थोड़ेक बिसासी गिला उ सताहट केर चलते जेटा स्तिफनुस केर मोराल चलते होय रहे जोन्दे-कोन्दे छितराय जाय रहयँ। उमन फीनिके राइज, साइप्रस टापू आर अन्ताकिया सहर तक पहँचोलयँ। उमन केबल यहूदी गिलाकेइ सुसामाचार सुनात रहयँ, दोसर गिला के नाही। 20 किन्तु उमनेक लेक थोडे़क लोग गिला अन्ताकिया सहर आय कहन युनानी गिला कोउ परभु ईसु केर सुसामाचार सुनाय लागलयँ। ई लोग गिला जे सुसमाचार सुनात रहयँ साइप्रस टापू आर कुरेन सहर केर बसिन्दा रहयँ। 21 आर परभु केर सक्ति उमनेक संगे रहे। ढेइर लोग गिला परभु माहान बिसास कइर कहन उकर डहरे चले लागलयँ।
22 इटा केर खबर जखन यरुसलेम केर मंडली तक पहँचोलक, तखन उमने बरनाबास के अन्ताकिया सहर पइठालयँ। 23 जखन बरनाबास हुआँ पहुँइच कहन परमेसर केर किरपा के देखलक, तो रिझे होलक आर उमन सउब के बढ़ावा दे लागलक कि उमन गोटा हिरदय लेक परभु केर सिछा मोताबिक जीबन बिताउन। 24 बरनाबास एकटा बेस लोग रहे, आर बिसास आर पबित्र आत्मा लेक भोरल रहे। आर बेजाइन लोग गिला के परभु केर पासे आनल गेलयँ।
25 तखन बरनाबास साऊल के खोजेक तेहें तरसुस सहर चइल गेलक। 26 आर जखन उके पालक तो अन्ताकिया सहर लेते आनलक। एसन होलक कि एक बछर तक साऊल आर बरनाबास मंडली केर लोग गिला संगे भेंट-घाट करते रहयँ, आर बेजाइन लोग गिला के सिछा देते रहयँ। आर चेला गिला सउब लेक पहिल अन्ताकिया माहनेइ "मसीही" कहालयँ।
27 ओहे समये थोड़ेक भबिस्यबक्ता गिला यरुसलेम लेक अन्ताकिया आलयँ। 28 उमनेक मइधे अगबुस नामेक एक झन ठाड़ होय कहन पवित्र आत्मा केर हुचकाल लेक भबिस्यबानी करलक कि गोटा संसार मेहेन बोड़े आकाल होई। (इ आकाल टा रोमी समराट क्लौदियुस केर समय मेहेन होलक।) 29 तखन आकाल केर चलते परभु केर चेला गिला बिचार करलयँ कि हर एक झन आपन-आपन सक्ति केर मोताबिक यहूदिया राइज माहने रहोइया बिसासी गिलाक तेहें कोनो मदइत करल जाउक। 30 उमने ओसनेइ करलयँ, आर बरनाबास आर शाऊल केर हाथ लेक आपन-आपन दान के यहूदिया केर पंच गिलाक ताहाँ पइठाय देलयँ।