12
बिसासी गिला के हेरोदेस राजा सताय लागलक
1 ओहे समय मेहेन हेरोदेस राजा मंडली केर थोड़ेक बिसासी गिला के सातायेक सुरु करलक। 2 ऊ योहन केर भाइ याकूब के तालवाइरे मोरुवाय देलक। 3 जखन राजा देखलक कि ई घटना लेक यहूदी गिला रिझे होयँला, तखन ऊ पतरस कोउ धोरूवालक। इटा यहूदी गिलाक फसह परब केर समय केर काथा हेके। 4 ऊ पतरस के धोइर कहन जेहेल माहने बन्द कइर देलक आर उके चाचाइर टा सिपाही केर पाहरा करइया के चाइर दलेक पाहरा मेहेन राखलक। हेरोदेस राजा केर विचार रहे कि फसह परब केर बादे पतरस के लोगेक मांझे फयसलाक तेहें आनल जाउक। 5 जखन पतरस जेहेल भीतरे बन्द रहे, तखन मंडली केर बिसासी गिला पतरस केर खातिर एक मन होय कहन परमेसर लेक प्राथना करत रहयँ।
जेहेल लेक पतरस अचम्बित रुपे छुटकारा पालक
6 जोन दिन हेरोदेस राजा पतरस के लोगेक पासे आनेक बिचार कइर रहे, उकर पहिल राइते पतरस दुइटा सिकड़ लेक बान्धल, दुइटा सिपाही केर मांझे निदात रहे। आरो दुरा मेहेन पाहरा देवइया जेहेल केर पाहरा करत रहयँ। 7 परभु केर एकटा सरग दूत आचकाय आय कहन ठाड़ होलक, आर जेहेल केर कोठरी टा गोटाय आलो होय गेलक। सरगदूत पतरस के ठेइल कहन जागालक आर उके कहलक, “चाँड़े उठ,” आर तुरंत उकर हाथ लेक सिकड़ गिला खुइल कहन गिर गेलक। 8 तखन सरग दूत उके कहलक, “सोंपड़ आर निजेक जूता पिंध लेहिन।” ऊ ओसनेइ करलक। आर उके आरो कहलक, “निजेक लूगा पिंध कहन मोके गुड़ियाइन।” 9 ऊ हुँआ लेक निकइल कहन उके गुड़ियालक, किन्तु उ इटा नाई जानत रहे कि जेटा सरग दूत करतेहे सेटा सत हेके, किन्तु ऊ इटा समझलक कि मोयँ कोनो सपन देखोतँ। 10 आर जखन उमन पहला आर दूसरा पहरा करइया लेक निकइल कहन लोहा केर उ फाटक पासे पहँचोलयँ जेटा सहर बाटे लेगायला, तो उटा उमनेक तेहें आपनेइ खुललक। उमन बाहिरे निकइल कहन एकेटा कोचा डहर केर टुँड़ु तक संगेइ गेलयँ, आर तुरतेइ सरगदूत उके छोइड़ कहन चइल गेलक। 11 तखन पतरस चेठा होय कहन कहलक, “एखन मोयँ पक्का जाइन गेलँ कि परभु निजेक सरग दूत के पोइठाय कहन मोके हेरोदेस केर हाथ लेक छोड़ालक, आर यहूदि गिला केर सउब आसा के तोइड़ दे आहे।’’ 12 ऊ इटा जाइन कहन योहन जे मरकुस कहात रहे, उकर माय मरियम केर घर गेलक। हुँआ बेजाइन लोग जामा हय कहन प्राथना करत रहयँ। 13 जखन ऊ फाटक केर दुवाइर के ठक-ठकालक, तो रुदे नामेक धांगरिन देखेक तेहें आलक। 14 पतरस केर आवाज के चिन कहन एतिक रीझे होलक कि ऊ फाटक केर दुवाइर कउ नाई खोल्लक, किन्तु कुइद कहन भीतर समालक आर कइह देलक, "पतरस दुवाइर पासे ठाड़ हय आहे।" 15 उमन उके कहलयँ, “तोयँ पगली हेकिस!” किन्तु ऊ आरो जोर दे कहन कहलक कि एसने हेके। तखन उमन कहलयँ, “उकर रइखा करइया सरग दूत होई।”a 16 लेकिन पतरस ठक-ठकाते रहलक, आर जखन उमन दुवाइर खोललयँ तो उके देइख कहन भकुवाय गेलयँ। 17 तखन ऊ उमन के चुप रहेक तेहें हाथ लेक इसारा करलक आर उमन के कइह देलक, "परभु मोके जेहेल लेक निकलाय कहन ले आइन आहे।" फिन कहलक, "याकूब आर बिसासी भाइ गिला के इ काथा टाके कइह देबा।" तेकर बादे ऊ हुँआ लेक निकोइल कहन दोसर जायगाय चइल गेलक।
18 दोसर दिन बिहाने सिपाही गिलाक अकबकी छुइट गेलक कि पतरस का होलक। 19 हेरोदेस राजा पतरस केर खोज बीन करेक हुकुम देलक, किन्तु ऊ नाई पावालक, तखन सिपाही गिला के पुछ-ताछ कइर कहन उमन के मिरतु केर साजा देक तेहें हुकुम देलक। तेकर बादे हेरोदेस राजा यहूदिया राइज के छोइड़ कहन कैसरिया राइज माहने जाय कहन रहे लागलक।
हेरोद राजा केर मिरतु
20 हेरोदेस राजा सूर आर सैदा सहर केर लोग गिला संग बेजाइन खिंसाल रहे। सेतेहें सूर आर सैदा केर लोग गिला सलाह कइर कहन थोड़ेक लोग हेरोदेस ताहाँ आलयँ, आर बलास्तुस के जे राजा केर एकटा देवान रहे, सेकर दाराए राजा संग माना-मानी होय खोजलयँ, काहेकि राजा केर देस लेकइ उमनेक देस केर पालन-पोसन होत रहे। 21 धोरल दिन टा पहँचोलक तखन हेरोदेस राजा राज पोसाक पिंध कहन राजगद्दी माहने बोइसलक आर भासन दे लागलक। 22 लोग गिला उकर भासन के सुइन कहन आँटे-आँटे कहे लागलयँ, “इटा तो मानुस केर ना लागे बल्कि देवँता केर बचन हेके।” 23 ओहे खने परभु केर एकटा सरग दूत उके मारलक काहेकि ऊ परमेसर केर महिमा नाई करलक। आर उकर माहान पोका लाइग गेलयँ आर ऊ मोइर गेलक। 24 किन्तु परमेसर केर बचन गोटाय पसरोते गेलक आरो लोगेक मांझे उकर असर बाढ़ते गेलक। 25 जखन बरनाबास आर पौलुस आपन सेबा काम के पुरा कइर कहन यरुसलेम लेक घुरलयँ, तखन योहन के जेकर दोसर नाम मरकुस हेके आपन संगे लेले आनलयँ।