13
बरनाबास आर साउल के परमेसर सेबा कामेक तेहें बाछलक
1 अन्ताकिया सहर केर मंडली मेहेन ढेइरे भबिस्यबक्ता आर उपदेस देवइया रहयँ- जेसन बरनबास आर सिमौन जे कोरिया कहायला आरो कुरेन सहर केर रहइया लूकियुस आर मनाहेम जे चौथाई देस केर राजा हेरोदेस केर संगे लालन पालन होय रहे आर साऊल। 2 जखन उमन उपास करत रहयँ आर परभु केर अराधाना करत रहयँ, तखन पबित्र आत्मा कहलक, “बरनबास आर साऊल के जोन कामेक तेहें मोयँ डाइक आहँ उ काम के करेक तेहें उमन के भिनु करा।” 3 जखन उमन उपास आर प्राथना कइर चुकलयँ, तखन बरनाबास आर साऊल केर उपरे हाथ राखलयँ आर उमन के बिदा करलयँ।
परचार-परसार मेहेन पौलुस केर पहिल जातरा
4 पबित्र आत्मा केर कहल मोताबिक बरनाबास आर साउल सिलूकिया सहर गेलयँ आर हुँआ लेक पानी जाहाज चाइप कहन साइप्रस टापू गेलयँ। 5 जखन उमन सालमिस सहर पहँचोलयँ तो यहूदी गिलाक आराधनालय गिलाय जाय कहन परमेसर केर बचन के सुनालयँ। उमनेक संगे साहेता करेक तेहें योहन जेकर दसर नाम मारकुसो रहे।
6 उमन गोटा टापूये एक सहर लेक दोसर सहर होत के पाफुस सहर पहँचोलयँ। हुँआ उमन के बार-ईसु नामेक एकटा यहूदी भेंटालक जे जादूगर आर मिछा काथा कहइया भबिस्यबक्ता रहे। 7 जादूगर हुआँ केर राइजपाल सिरगियुस-पौलुस केर संगी रहे। राइजपाल जे बुद्धिमान अदमी रहे, ऊ बरनबास आर साऊल के आपन पासे डाइक कहन परमेसर केर बचन के सुने खोजलक। 8 किन्तु जादूगर टा जेकर नाम यूनानी भासा मेहेन इलिमास रहे, ऊ उमनेक बिरोध करलक आर राइजपाल के बिसास करेक तेहें रोकेक चेस्टा करलक। 9 तखन साऊल जे पौलुसो कहायला, पबित्र आत्मा लेक भोइर कहन एलिमास जादूगर के थिथाय कहन देखलक आर कहलक, 10 "ए सैतान केर छुवा! तोयँ सउब रकमेक भालाई केर दुस्मन हेकिस आर सउब रकम केर धोखा-धड़ी आर बेइमानी लेक भोरल आहीस। का तोयँ परभु केर सोझ डहर के बाँका करेक नाई छोड़बे? 11 एबार देइख ले, परभु केर हाथ तोर बिरोध माहने उइठ आहे। तोयँ आँधरा होय जाबे आर थोड़ेक समय तक बेरा केर आलो कोउ देखे नाई पाबे।" तखन ऊ तुरते धुन्धरे देइख पालक आर उकर तेहें गोटाय आँधार होय गेलक आर गोटाय टोमड़े लागलक ताकि केउ उके हाथे धोइर कहन ले जाउन। 12 ई घटना के राइजपाल देखलक आर परभु केर उपदेस सुइन कहन बेजाइन अचम्बित होलक आर परभु मेहेन बिसास करलक।
13 फिन पौलुस आर उमनेक संगी गिला पाफुस लेक पानी जाहाज चाइप कहन पम्फूलिया राइज केर पिरगा सहर मेहेन आलयँ। योहन उमन के छोइड़ कहन यरुसलेम घुइर आलक। 14 किन्तु पौलुस आर बरनाबास पिरगा सहर लेक आघू बाइढ़ कहन पिसिदिया राइज केर अन्ताकिया सहर मेहेन पहँइच गेलयँ। फिन पबित्र दिने आराधनालय माहने जाय कहन बोइसलयँ। 15 हुआँ मूसा केर नियम आर भबिस्यबक्ता गिला केर लिखल किताब लेक पाठ पढ़लयँ। तेकर बादे यहूदी गिलाक आराधनालय केर साहेब गिला उमनेक ताहाँ कइह पइठलयँ, "ए भाइ सउब, जदि तोहरे लोग गिला के बाढ़ावा देक तेहें कोनो उपदेस देक चाहाला, होले उटा के सुनावा।"
पौलुस केर उपदेस
16 तखन पौलुस ठाड़ होलक आर हाथ लेक इसारा कइर कहन कहे लागलक, "ए इसराइल केर लोग गिला आर परमेसर केर डर-भय मानोइया लोग गिला, जे यहूदी ना लागा, तोहरे सउब मोर काथा सुना! 17 इ इसराइली लोगेक परमेसर हामरेक पुरखा गिला के बाइछ रहे, जखन उमन मिसर देस माहने बासा कइर रहयँ, सेखन परमेसर उमन के हुआँ बाढ़ालक। उमन के ऊ निजेक सक्तिसाली हाथ लेक मिसर देस लेक बाहिर बाहरालक। 18 आर करीबन चालीस बछर तक बोन माहने उमनेक बेबहार के सहलक। 19 तखन कानान देस केर सात टा जाइतेक लोग गिला के नस्टो कइर कहन ऊ देस के इसराइली गिलाक अधिकारे दे देलक।
20 इ सउब काम करत के करीबन साढ़े चाइर सअ बछर लागलक। इकर बादे परमेसर उमनेक तेहें सामूएल भबिस्यबक्ता केर आयेक तक फयसला करइया गिला के देलक। 21 फिन इसराइली गिला एकटा राजा माँग करलयँ, तखन परमेसर बिन्यामीन केर गोतर लेक कीस केर बेटा साऊल के उमनेक तेहें राजा बनालक, जे चालीस बछर तक राइज करलक। 22 फिन साऊल के धार कइर कहन परमेसर दाऊद के उमनेक तेहें राजा बनालक। दाऊद केर बारे ऊ गोहा देलक, ‘मोयँ यिसै केर बेटा दाऊद के पालँ, ऊ मोर मन पसन्द लोग हेके, ऊ मोर हिंछा टाके पूरा करी।
23 एहे अदमी टाकरे बंस लेक परमेसर आपन वादा करल बचन केर मोताबिक इसराइली गिलाक तेहें एकटा उद्धार करइया यानी ईसु के पइठालक।' 24 ईसु केर आयेक लेक पहिले योहन इसराइली लोगेक मांझे परचार करलक कि निजेक पाप लेक मन बदइल कहन बपतिस्मा लेवा ताकि इटा लेक साबित होउक कि तोहरेक पाप छमा होलक। 25 जखन योहन आपन सेबा काम के पूरा करइया रहे, तखन ऊ कहलक, ‘तोहरे सउब मोके का बुइझ पा ताहा? मोयँ ऊ ना लागँ, जेकर तोहरे आसरा करोताहा! किन्तु देखा, मोर बादे एक झन आवइया आहे, उकर जूता केर फीता के मोयँ खोलेक लाइख नेखँ।’ 26 “ए भाइ सउब, तोहरे जे अब्राहम केर छुवा-पूता गिला आर परमेसर केर डर-भय मानोइया अनजाइतेक लोग गिला, इ सुसामाचार टा पाप केर दन्ड लेक छुटकारा देक तेहें तोहरेक ताहाँ पहँचाल जाय आहे। 27 यरुसलेम केर रहइया गिला आर उमनेक धारमिक नेता गिला ईसु के नाई चिन्हलयँ आर ना तो उमने भबिस्यबक्ता गिलाक काथा के बुझे पारलयँ, जेटा के हरेक पबित्र दिने आराधनालय माहने पढ़ल जायला। तेउ उमन उके दोसीदार बनाय कहन भबिस्यबक्ता गिला केर भबिस्यबानी के पूरा करलयँ। 28 उमन उके माइर मोरायेक निहार कोनो दोस नाई पालयँ, तेउ माइर मोरायेक तेहें पिलातुस लेक माँग करलयँ कि ऊ मोराल जाउकका। 29 जखन उकर बारे पहिलेक लिखल काथा सउब उमनेक दाराए पूरा होलक, तेकर बादे उके कुरुस उपर लेक नाभाय कहन मुरदा गाड़हाय राखलयँ। 30 किन्तु परमेसर उके मोरल लेक फिन जियँत कइर देलक। 31 आर जे गिला उकर संगे गलील लेक यरुसलेम आय रहयँ, उमनेक संगे ऊ बेजाइन दिन तक देखा होते रहलक। एबार उमन सउब लोगेक मांझे उकर गोहा हेकयँ।
32 "हामरेक पुरखा गिला संग परमेसर जे वादा कइर रहे कि ऊ ईसु मसीह के जीयँत कइर घुराइ, सेइ सुसामाचार टाके हामरे तोहरे के सुनायेक तेहें आय आही। 33 परमेसर ईसु के मोरल लेक जीयँत कइर कहन ओहे वादा टाके हामरेक तेहें जे उमनेक सन्तान हेकी पूरा करलक। जेसन कि दोसर भजन संहिता मेहेन ढेइर पहिले लिखल रहे,
‘तोयँ मोर बेटा हेकिस,
आइज मोयँ तोर बाप बनलँ।’
34 ऊ ईसु के मोरल लेक जीयँत कइर उठालक ताकि ऊ कबोउ ना सड़ुक। एहे काथा टा धरम सास्तर माहने लिखल आहे,
‘मोयँ तोहरे के उ पबित्र आर अटल आसिरबाद टा देमूँ, जोन बचन टा दाऊद के देल जाय रहे।'
35 सेतेहें भजन संहिता माहने एकटा आरो दोसर ताहाँ लिखल आहे,
‘तोयँ आपन पबित्र लोग के सड़े नाई देबे।’a
36 काहेकि दाऊद तो आपन समय माहने परमेसर केर हिंछा केर मोताबिक सेबा काम के पूरा कइर कहन मोइर गेलक। आपन पुरखा गिलाक मासना मेहेन उके माटी देल गेलक आर उकर गात टाउ सइड़ गेलक। 37 किन्तु जेके परमेसर मोरल लेक जीयँत करलक, उकर गात टा नाई सड़लक। 38 सेतेहें ए भाइ सउब, तोहरे जाइन लेवा कि ईसु केर दाराए पाप छमा केर सुसामाचार तोहरे के देल जायला। 39 एहे ईसु केर दाराए जे केउ उकर उपरे बिसास करी ऊ पाप लेक छुटकारा पाय पारी, जेटा मूसा केर देल नियम टा पाप लेक छुटकारा दे नाई पारत रहे। 40 सेतेहें हुसियारे रहबा! एसन ना होउक कि जेटा भबिस्यबक्ता गिला कइह रहयँ सेटा तोहरेक उपरे होउक- 41 कहेकि उमन कहलयँ,
‘ए हाँसी उड़ाइया गिला, सउब सुना! अचम्बित होवा आर नास होय जावा,
काहेकि मोयँ तोहरेक समय मेहेन एकटा काम करोतहँ,
एसन काम कि जदि केउ तोहरेक लेक उकर चरचा करबयँ,
तो तोहरे उकर बिसास नाई करबा।‘"
42 पौलुस आर बरनाबास जखन आराधनालय लेक जात रहयँ तखन लोग गिला उमने के कहे लागलयँ कि आगला पबित्र दिने एहे काथा गिला के हामरे के आरो सुनाल जाउक। 43 जखन सभा सिरालक तो यहूदी गिला आर अनजाइतेक भक्त गिला जे यहूदी धरम के अपनाय रहयँ, उमनेक मइधे बेजाइन लोग गिला पौलुस आर बरनबास केर पेछुवे होय गेलयँ। पौलुस आर बरनबास उमनेक संगे गोल्फो कइर कहन समझालयँ कि परमेसर केर किरपा मेहेन बनल रहा।
44 आगला पबित्र दिने सहर केर करीबन सउब लोग गिला परभु केर बचन के सुनेक तेहें जामा होय गेलयँ। 45 जखन यहूदी गिला लोगेक भीड़ के देखलयँ तो हिंसिगाय भोइर गेलयँ, आर पौलुस केर बदनाम करत के उकर काथा केर बिरोध करे लागलयँ। 46 तखन पौलुस आर बरनाबास दुइयो निडर होय कहन उमन के कहलयँ, "दोरकार तो रहे कि परमेसर केर बचन के पहिले तोहरे के सुनातली, किन्तु तोहरे उटा के नाई मानोताहा आर अनन्त जीबन पायेक लाइख नाई बुझोताहा, होले हामरे अनजाइत गिला बाटे जा तिही। 47 काहेकि परभु हामरे के एसन हुकूम दे आहे, ‘मोयँ तोके अनजाइत गिलाक तेहें आलो बनाय आहँ, ताकि तोयँ संसार केर आखरी कोना तक लोगेक पाप केर दन्ड लेक छुटकारा केर जरिया बनिन।” 48 इटा सुइन कहन अनजाइतेक लोग गिला रीझे होलयँ, आर परमेसर केर बचन केर बड़ाई करे लागलयँ, आर जे गिला अनन्त जीबन केर तेहें ठहराल जाय रहयँ, उमन बिसास करलयँ। 49 इ निहार परभु केर बचन उ इलाका मेहेन पसरोते गेलक। 50 किन्तु यहूदी लोग गिला खास बेटी छुवा गिला के आर सहर केर मुखिया गिला के हुचकालयँ, आर पौलुस आर बरनबास के सतायेक तेहें सउब के भड़कायेक सुरु करलयँ। आर उमन के जबरन आपन सिमान लेक बाहिर कइर देलयँ। 51 सेखन पौलुस आर बरनाबास उमनेक पासेइ आपन गोड़ेक धूरा के झाइर कहन इकुनियुम सहर चइल गेलयँ। 52 आर चेला गिला खुसी आर पबित्र आत्मा लेक लागातार भरपुर होते गेलयँ।