14
इकुनियुम सहर मेहेन पौलस आर बरनाबास
1 आपन नियम केर मोताबिक इकुनियुम सहर माहनोउ पौलुस आर बरनाबास यहूदी गिला केर आराधनालय माहान गेलयँ। आर हुँआ उमन एसन जोरदार परचार करलयँ कि ढेइरे यहूदी गिला आर अनजाइतेक लोग गिला बिसास करलयँ। 2 किन्तु जोन यहूदी गिला बिसास नाई करे खोजलयँ उमन अनजाइतेक लोग गिला के बहकालयँ आर उमनेक मने बिसासी गिला संग दुस्मनी के सिरजालयँ। 3 पौलुस आर बरनाबास ढेइर दिन तक हुँआ रहलयँ आर निडर होय कहन परभु ईसु केर जबरजस्त परचार करते रहलयँ। परभुओ उमनेक दाराए अचम्भा आर चमत्कार काम के देखाय कहन आपन किरपा केर बचन के सत साबित करत रहे। 4 किन्तु सहर केर लोग गिलाक मांझे फुट होय गेलक, थोड़ेक लोग गिला यहूदी गिला बाटे आर थोड़ेक लोग गिला प्रेरित गिला बाटे होय गेलयँ। 5 जखन अनजाइत गिला आर यहूदी गिला आपन साहेब गिला संग मिल कहन प्रेरित गिला के बेजइति करेक आर पाखनाय लेबदाय कहन मोरायेक तेहें आलयँ, 6 उमन इ काथा के जाइन गेलयँ आर तुरते लुकाउनिया इलाका केर लुस्तरा आर दिरबे सहर मेहेन आर आसपासेक इलाका मेहेन पारालयँ। 7 आर उमन ऊ इलाकाय सुसामाचार सुनाते रहलयँ।
लुस्तरा आर दिरबे सहर माहने पौलुस
8 लुस्तरा सहर मेहेन एकटा लोग बोइसल रहे, उकर गोड़ जनम लेकेइ लाँगड़ा रहे, आर कबोउ नाई चइल रहे। 9 ऊ लोग टा पौलुस केर काथा के सुनत रहे। पौलुस उकर बाटे थिथाय कहन देखलक कि इके बेस होयेक बिसास आहे, 10 पौलुस उके आँटे कहलक, “आपन गोड़ेक बोले सीधा ठाड़ होय जा।” तखन ऊ कुइद उइठ कहन चले बुले लागलक। 11 इ काम टाके देइख कहन लोग गिला लुकाउनिया भासाय आँटे-आँटे कहे लागलयँ, “देवँता हामरेक ताहाँ मानुस बोइन कहन नाइभ आहयँ!” 12 आर उमन बरनाबास के यूनानी देवँता 'ज्युस'a आर पौलुस के 'हिरमेस' देवँता कहे लागलयँ, काहेकि पौलुस काथा कहेक माहने माहिर रहे। 13 सहर केर बाहिरे ज्युस देवँता केर मन्दिर रहे, उ मंदिर केर पूजारी टा ढेइरे बरद आर फुल केर माला के आइन कहन सहर केर फाटक ताहाँ आलक, काहेकि ऊ लोगेक भीड़ मांझे पौलुस आर बरनाबास केर खातिर बलि चेढ़ायेक चाहोत रहे।
14 किन्तु जखन बरनाबास आर पौलुस इ काथा के सुनलयँ, तो आपन लूगा के फाड़लयँ आर भीड़ मांझे कुइद कहन गेलयँ, आर डोबल आँटे कहे लागलयँ, 15 “तोहरे इ सउब का करो ताहा? हामरोउ तो तोहरेक निहारे मानुस हेकी। हामरे तोहरे के इ सुसामाचार सुनायेक तेहें आय आही, कि तोहरे इ सउब बे मतलबेक जिनिस गिला के मानेक छोइड़ कहन जीयँत परमेसर माहान बिसास करा, जे सरग आर धरती आर समुन्दर आर उटा मेहेन जे कोनो आहे सउब के बनालक। 16 बितल समय मेहेन परमेसर सउब जाइतेक लोग गिला के आपन-आपन डहरे चले देलक। 17 किन्तु ऊ आपन भालाई काम केर दाराए सउब दिन निजेक के साबित करलक। ऊ तोहरे सउब के आकास लेक पानी आर ठीक समय मेहेन ऊपज दे ला आर ओहे तोहरे के खायेक जिनिस दे ला आर तोहरेक मन के खुसीये भोइर दे ला।" 18 एतना कहल बादोउ उमन लोग गिला के बेजाइन कोस्टोय माना करे पारलयँ कि हामरेक तेहें बलि ना चेढ़ाबा।
19 किन्तु अन्ताकिया आर इकुनियुम लेक थोड़ेक यहूदी गिला आय कहन लोग गिला के आपन बाटे करलयँ। उमन पौलुस के पाखनाय लेबदालयँ आर उके मोरल जाइन कहन सहर लेक बाहिर घिसराय कहन लेगलयँ। 20 लेकिन जखन बिसासी गिला उकर चाइरो बाटे जामा होलयँ तो उके होंस आय गेलक आर ऊ उइठ कहन सहर मेहेन चइल गेलक। आर दोसर दिन बरनाबास संगे दिरबे सहर चइल गेलयँ।
पौलुस आर बरनाबास सिरिया राइज केर अन्ताकिया सहर घुइर आलयँ
21 उ सहर मेहेन उमन लोग गिला के सुसामाचार सुनालयँ आर ढेइर झन के चेला बनालयँ। फिन लुस्त्रा, इकुनियुम आर अन्ताकिया सहर घुइर आलयँ। 22 आर चेला गिला के उपदेस दे कहन उमनेक मन के इस्थिर करलयँ आर बिसास मेहेन मजगूत रहेक तेहें बाढ़ावा देते रहलयँ। आर उमन के इटा कहत रहयँ, “हामरे के बेजाइन कोस्टो उठाय कहन परमेसर केर राइज मेहेन ढुके होई।” 23 आर पौलुस आर बरनाबास सोभे मंडली मेहेन बिसासी गिला के देख रेख करेक तेहें पंच राखलयँ। फिन उपास प्राथना कइर कहन ई पंच गिला के परभु केर हाथे जिमा दे देलयँ जे गिला परभु उपरे भोरसा राइख रहयँ। 24 सेकर बादे उमने पिसिदिया जिला बाटे लेक पंफुलिया जिला पहँचोलयँ। 25 फिन पिरगा सहर मेहेन परभु केर बचन सुनाय कहन अतालिया सहर मेहेन आलयँ।
26 अतालिया सहर लेक उमन जहाज मेहेन चाइप कहन अन्ताकिया सहर घुइर आलयँ। जाहाँ बिसासी सउब पौलुस आर बरनाबास केर तेहें पहिले प्राथना कइर कहन परमेसर केर किरपाय ओहे कामेक तेहें जिमा देल जाय रहे, जेटा के उमन एखन पूरा करलयँ। 27 अन्ताकिया सहर पहँइच कहन मंडली केर बिसासी गिला के जामा करलयँ आर उमन बिसासी गिला के कइह देलयँ कि का निहार परमेसर उमनेक दाराए बोड़े-बोड़े काम आर अनजाइत गिलाक तेहें बिसास केर दुरा के खोइल देलक ताकि उमन बिसास करुन। 28 पौलुस आर बरनाबास अन्ताकिया सहर मेहेन चेला गिलाक संगे ढेइर दिन तक रहलयँ।