15
अन्ताकिया सहरेक मंडली मेहेन बाद-बिबाद
1 फिन थोड़ेक लोग गिला यहूदिया राइज लेक आय कहन बिसासी भाइ गिला के सिखाय लागलयँ, “जदि परमेसर केर नियम जे मूसा भबिस्यबक्ता केर दाराए देल जाय रहे सेइ नियम मोताबिक तोहरेक खातना नाई होय आहे, होले तोहरेक उद्धार नाई होय पारे।” 2 इटाक बारे पौलुस आर बरनाबास केर उमनेक संगे दोमे झागड़ा आर बाद-बिबाद होलक। सेतेहें इटा तय करल गेलक कि पौलुस आर बरनाबास आर थोड़ेक बिसासी भाइ गिला इ काथा टाकेर बारे चरचा करेक तेहें यरुसलेम केर प्रेरित आर पंच गिला ताहाँ जाउन।
3 सेतेहें मंडली केर बिसासी गिला उमन के पइठालयँ, आर उमन फिनीके इलाका आर सामरिया जिला गेलयँ आर हुआँ केर बिसासी गिला के खबर सुनालयँ कि अनजाइतेक लोग गिलाउ बिसास करलयँ। इ खबर के सुइन कहन सउब बिसासी गिला बेजाइन खुस होलयँ। 4 जखन उमन यरुसलेम पहँचोलयँ, तो मंडली केर बिसासी गिला आर प्रेरित गिला आर पंच गिला उमन संगे रिझे भेंट करलयँ। उमन के उ सउब काथा के कइह देलयँ, जे परमेसर उमनेक दाराए काम कइर रहे। 5 किन्तु फरिसी दल केर थोड़ेक बिसासी गिला ठाड़ होयँ कहन कहे लागलयँ, “अनजाइत गिला जे बिसास कइर आहयँ उमन के खतना करुवायेक दोरकार आहे आर परमेसर केर नियम जे मूसा भबिस्यबक्ता केर दाराए देल जाय रहे, सेटा के मानेक हुकुम देक चाही।”
पतरस यरुसलेम केर प्रेरित आर पंच गिला संग काथा करेक
6 एहे काथा टाकेर बारे बिचार करेक तेहें प्रेरित आर मंडली केर पंच गिला जामा होलयँ। 7 आर आपस मेहेन ढेइर खोन लेक बकझक होल, बादे पतरस ठाड़ होय कहन उमन के कहलक, “ए भाइ गिला, तोहरे जानबे कराला कि ढेइर दिन पहिले परमेसर तोहरेक मइधे मोके चुनलक कि अनजाइतेक लोग गिला मोर मुँह लेक सुसामाचार सुनुन आर बिसास करुन। 8 परमेसर जे मनेक काथा के जानोइया हेके, ऊ हामरेक निहारे उमन कोउ पबित्र आत्मा दे कहन साबित करलक कि ऊ उमन कोउ अपनालक। 9 हामरे जे यहूदी हेकी आर उमने जे अनजाइत हेकयँ, दुइयो मेहेन परमेसर कोनो भेद-भाव नाई राखलक, काहेकि बिसास केर दाराए उमनेक मन के सुइध करलक। 10 तो एबार तोहरे यहूदी केर नियम धरम के जे जुँआइट केर समान हेके, सेटाके चेला गिलाक खाँधे राइख कहन परमेसर के काहे बिड़ोताहा? जेटाके ना तो हामरेक पुरखा गिला उठाय पाइर रहयँ आर ना तो हामरे उठाय पारिला। 11 हामरेक तो इटा बिसास आहे कि जेसन परमेसर केर किरपा लेक हामरेक पाप केर दन्ड लेक छुटकारा होलक, ओसने उमन केरो छुटकारा होलक। "
अनजाइतेक तेहें नियम केर फयसला
12 तखन सभा केर सउब लोग गिला चुप होय गेलयँ, आर बरनाबास आर पौलुस केर काथा के सुने लागलयँ, कि परमेसर उमनेक दाराए अनजाइतेक लोग गिलाक मांझे केसन बोड़े-बोड़े चिन्हा आर अचम्भा केर काम देखाय आहे। 13 जखन पौलुस आर बरनाबास कोहेक सिरालयँ, सेखन याकूब कोहे लागलक, “ ए भाइ गिला, मोर काथा के सुना! 14 एखन सिमौन कइह दे रहे, कि परमेसर सुरु खोने अनजाइतेक लोग गिलाक उपरे दया कइर कहन उमनेक मइधे थोड़ेक के आपन लोग बनाय लेलक। 15 इ काथा टा भबिष्यवक्ता गिलाक काथा लेक मेल खायला। जेसन लिखल आहे-
16 ‘इकर बादे मोयँ फिन घुइर आमुँ,
आर राजा दाऊद केर गिरल तम्बू के ठाड़ करमुँ,a
आर उकर उजड़ाल गिला के आरो बनाय घुरामुँ,
आर उटा के ठाड़ करमुँ।
17 ताकि बाकि बाँचल मानुस यानि
अनजाइतेक लोग गिला जे मोर कहायँला,
परभु के खोजुन,
18 इ काथा टाके ओहे परभु कहेला जे दुनिया के सिरजायेक खोन लेक
इ सउब केर बारे सामाचार देते आय आहे।’
19 सेतेहें मोर बिचार इटा हेके, अनजाइत गिला जे परमेसर माहान बिसास कइर आहयँ उमन के हामरे कोस्टो नाई देबिक। 20 किन्तु उमन के लिख पइठाब कि तोहरे मुरति गिलाक तेहें चेढ़ाल जिनिस के ना खाबा आर भेबिचार काम लेक बाँचा आर मोचइड़ कहन मोराल कोनो जानवर केर मांस के ना खाबा आर लोहू कोउ ना खाबा। 21 काहेकि पुरखा समय लेक परमेसर केर नियम जे मूसा भबिस्यबक्ता केर दाराए देल जाय रहे, सेटा केर परचार सहर-सहर माहने होते आ तेहे, आर हर पबित्र दिने आराधनालय माहने पढ़ल जायला।”
अनजाइतेक बिसासी गिलाक तेहें चिट्ठी
22 तखन प्रेरित गिला आर पंच गिला, मंडली केर सउब बिसासी गिला मिल कहन पौलुस आर बरनाबास संगे अन्ताकिया सहर जायेक तेहें केकोउ चुइन कहन पइठायेक फयसला करलयँ। आर उमन मंडली लेक यहूदा के जे बरसब्बा कहायला आर सीलास के चुनलयँ। इमन दुईयो बिसासी भाइ गिलाक मांझे आघुवा रहयँ। 23 इमनेक हाथे इ चिठी लिख कहन पइठालयँ:
"अन्ताकिया सहर आर सीरिया राइज आर किलकिया राइजेक बसिन्दा बिसासी भाइ गिला के, जे अनजाइत लेक बिसास माहने आय आहा, तोहरे सउब के हामरे प्रेरित आर मंडली केर पंच बाटे लेक परनाम! 24 हामरे के सुनेक माहने आय हे कि हामरेक मइधे थोड़ेक लोग गिला हामरेक बिना हुकूमे तोहरेक ताहाँ जाय कहन निजेक बनाल काथा लेक तोहरे के डरुवाय दे होयँ, आर तोहरेक मन के डावाँडोल कइर दे आहयँ। 25 सेतेहें हामरे एक ताहाँ जामा होय कहन फयसला करली, कि ई दुई झन के तोहरेक ताहाँ हामरेक दुलार भाइ पौलुस आर बारनाबास केर संगे पइठाय दे आही। 26 पौलुस आर बरनाबस एसन एसन लोग हेकयँ, जे हामरेक परभु ईसु मसीह केर नामेक तेहें निजेक पारान टाकोउ जोखिम मेहेन डाइल दे रहयँ। 27 सेतेहें हामरे यहूदा आर सीलास के तोहरेक ताहाँ पइठा तिही, इमन तोहरे के आपन मुँह लेकोउ इ काथा गिला के कइह देबयँ। 28 पबित्र आत्मा के आर हामरे के इटा बेस बुझालक कि जेटा हामरे लिख कहन पइठाय आही सेइ काथा के छोइड़ कहन आरो कोनो बोझा तोहरेक उपरे नाई लादब। 29 तोहरे मूरति गिलाक तेहें चेढ़ाल जिनिस के नाई खाबा आर मोचइड़ कहन मोराल कोनो जानवर केर मांस के ना खाबा आर लोहू कोउ ना खाबा आर भेबिचार लेक बाँचा। ई गिला लेक तोहरे धूरे रहबा होले तोहरे केर भालाई होई आर आसिरबाद।"
30 मंडली केर लोग गिला उमन के बिदा करलयँ, आर उमन अन्ताकिया पहँइच कहन हुँआ केर बिसासी गिला के डाइक जाम करलयँ आर उमन के चिट्ठी टाके दे देलयँ। 31 जखन बिसासी गिला चिट्ठी टाके पढ़लयँ तो बेजाइन रीझे होलयँ आर सांहास पालयँ। 32 यहूदा आर सीलास उमनोउ खुद भबिस्यबक्ता रहयँ। उमन बिसासी भाइ बहिन गिला के ढेइर निहारेक काथा लेक बिसास माहने मजगूत करलयँ आर उमनेक हिमत बाढा़लयँ। 33 यहूदा आर सिलास थोड़ेक दिन अन्ताकिया मेहेन रहलयँ। तेकर बादे उमन के यरुसलेम घुरेक तेहें बिसासी गिला बिदाई करलयँ। 34 [किन्तु सीलास के हुँआ रहेक बेस लागलक।] 35 पौलुस आर बरनाबास थोड़ेक दिन अन्ताकिया मेहेन रइह गेलयँ, आर उमन ढेइर दोसर लोग गिला संग परभु केर बचन केर सिछा देलयँ आर परचार करलयँ।
पौलुस केर दोसर धंव परचार कामे जायेक
पौलुस आर बारनाबास मेहेन मन मुटाव
36 थोड़ेक दिन केर बादे पौलुस बारनाबास के कहलक, “जोन जोन सहर माहने हामरे परभु केर बचन सुनाय रही, हुँदे चल, घुइर कहन बिसासी भाइ गिला के देखब उमन केसन आहयँ।” 37 बरनाबास आपन संगे योहन जेके मारकुस कहत रहयँ सेके लेगेक हिंछा रहे। 38 किन्तु पौलुस ई काथा टाय राजी नाई होलक, काहेकि योहन पम्फुलिया राइज मेहेन उमन के छोइड़ दे रहे आर परभु केर सेबा काम मेहेन संग नाई देलक, सेके आपन संगे लेगेक नाई खोजलक। 39 इटा मेहेन दुइयो झन मन-मुटाव होलयँ आर अलग होय गेलयँ। बारनाबास मारकुस के ले कहन पानी जाहाज लेक साइप्रस टापू चइल गेलक। 40 किन्तु पौलुस सीलास के चुइन लेलक। तेकर बादे अन्ताकिया सहर केर बिसासी भाइ गिला उमन के परभु केर हाथे जिमा दे कहन बिदा कइर देलयँ। आर ऊ चइल देलक। 41 पौलुस सीरिया आर किलकिया राइज मेहेन जाय-जाय कहन मंडली के बिसास माहने मजगूत करत के आघु बाइढ़ गेलक।