16
पौलुस तिमुथियुस के बाइछ कहन आपन संगे लेगलक
1 फिन पौलुस दिरबे आर लुस्तरा सहर गेलक। हुआँ तिमुथियुस नामेक एकटा चेला रहे, जेकर मायँ यहूदी बिसासी रहे, किन्तु उकर बाप यूनानी रहे। 2 तिमुथियुस केर लुस्तरा आर इकुनियुम सहर मेहेन बिसासी भाइ गिलाक मांझे बेस माइन रहे। 3 पौलुस तिमुथियुस के आपन संगे लेजेक चाहत रहे। सेतेहें हुआँ केर यहूदी गिलाक चलते उके लेगाय कहन उकर खातना करुवालक। काहेकि सउब काइ जानत रहयँ कि तिमुथियुस केर बाप यूनानी रहे। 4 जखन उमन एक सहर लेक दोसर सहर जात रहयँ तो हुआँ केर बिसासी गिला के उ नियम टाके सीखाते गेलयँ जे यरूसलेम केर प्रेरित आर मंडली केर पंच गिला मानेक तेहें फयसला कइर रहयँ। 5 इ रकम मंडली केर लोग गिला बिसास मेहेन मजगूत होते गेलयँ आर मंडली मेहेन बिसासी केर संख्या रोज दिन बाढ़ते गेलक।
पौलुस के पबित्र आत्मा असिया राइज लेक मकिदुनिया राइज पइठालक
6 पौलुस आर उकर संगी गिला फ्रुगिया आर गलतिया इलाका होय कहन गेलयँ, काहेकि पबित्र आत्मा पौलुस आर उकर संगी गिला के असिया राइज मेहेन बचन के सुनायेक तेहें माना करलक। 7 फिन जखन उमन मूसिया राइज केर सिमान मेहेन पहँचोलयँ तो उमन बितूनिया राइज जायेक तेहें कोसिस करलयँ , किन्तु ईसु केर आत्मा टा उमने के हुआँ नाई जाय देलक। 8 सेतेहें उमन मूसिया राइज बाटे लेक त्रोआस सहर पहँचोलयँ। 9 आर राइते पौलुस एकटा दरसन देखलक, कि मकिदूनिया राइज केर एकटा अदमी ठाड़ होलक आर उके गोहाइर करत के कहोतेहे, "हुआँ लेक इ पार मकिदुनिया राइज मेहेन आय कहन हामरेक साहेता कर!” 10 ई दरसन टाके देखल बादे हामरे मकिदुनिया राइज जायेक तेहें तेयारी करे लागली इ समइझ कहन कि परमेसर हामरे के मकिदुनिया राइज केर लोग गिला के सुसामाचार सुनायेक तेहें हुकुम देतेहे।
लुदिया केर मन बदलेक
11 हामरे त्रोआस सहर के छोइड़ कहन पानी जाहाजे सोझे सुमात्राके टापू गेली आर दोसर दिन नियापुलिस a चइल गेली। 12 फिन हुआँ लेक फिलीप्पी सहर पहँचोली जे मकिदूनिया राइज केर एकटा खास सहर हेके, इ रोमी गिलाक बासाल सहर हेके। हामरे कोय दिन तक हुआँइ रहली। 13 फिन परमेसर केर पबित्र दिने हामरे सहर केर फाटक लेक बाहिर नदी धारे इटा सोंइच कहन गेली कि हुँआ प्राथना करेक कोनो जायगा होई। आर हामरे जाय कहन बोइस गेली आर हुआँ जामा होल बेटी छुआ गिला संग काथा करे लागली। 14 हुआँ उ बेटी छुवा गिलाक मइधे लुदिया नामेक थुआथीरा सहर केर एकटा बेटी छुआ रहे। ऊ किमती रंग-बिरंग लूगा केर बेपार करइया एकटा परमेसर केर भक्त रहे। परभु उकर मन के खोललक कि ऊ पौलुस केर काथा के धेयान देउक। 15 ऊ आपन पूरा परिबार संगे बपतिस्मा लेलयँ, आर हामरे के बिनती कइर कहन कहे लागलक “जदि तोयँ मोके परभु केर बिसासी मानोतिहिस होले, चल, मोर घरे रहीन।” आर ऊ हामरे के मानाय कहन आपन घर लेगलक।
पौलुस आर सिलास के जेहेले बन्द करेक
16 फिन एक दिन जखन हामरे प्राथना करेक जायगा ताहाँ जात रही तो डहरे हामरे एकटा धांगरिन के पाली, जेकर मेहेन भबिष्य केर काथा के कइह देवइया दुस्ट आत्मा रहे। ऊ लोग गिला के भाइगेक काथा कइह कहन आपन मालिक गिलाक तेहें बेजाइन धन कामाय आनत रहे। 17 ऊ पौलुस आर हामरेक पेछु-पेछु आय कहन गुइल करे लागलक, “ई अदमी गिला परम प्रधान परमेसर केर धांगर हेकयँ, इमन तोहरे के पाप केर दन्ड लेक छुटकारा पायेक डहर केर बारे सुनायँला।” 18 ऊ ढेइर दिन तक एसनेइ करते रहलक। आखरी मेहेन पौलुस तंग होय कहन उकर बाटे देइख घुराय कहन ऊ दुस्ट आत्मा के कहलक, “मोयँ तोके ईसु मसीह केर नामे हुकुम देतहँ, तोयँ इकर लेक बाहराव!” आर ओहे खोने दुस्ट आत्मा टा उकर लेक बाहराय गेलक।
19 जखन धांगरिन केर मालिक गिला देखलयँ कि हामरेक कामायेक आसा टाई खतम होय गेलक, तखन उमन पौलुस आर सीलास के धोरलयँ आर उमन के घिसराय कहन चौक मेहेन साहेब गिला पासे लेगलयँ, 20 आर उमन बोड़े हाकीम गिला पासे आइन कहन कहलयँ, “इमन यहूदी हेकयँ, हामरेक सहर मेहेन बेजाइन गड़बड़ी कोरोतयँ, 21 इमन एसन नियम गिलाक परचार कोरोतयँ, जेटा के अपनायेक आर मानेक हामरे रोमी गिला के कानून केर मोताबिक माना आहे।” 22 भीड़ केर लोग गिला पौलुस आर सिलास केर बिरोध मेहेन जामा होय कहन उमनेक उपरे मारेक तेहें कुइद छुटलयँ, हाकीम गिला उमनेक लूगा के फाइड़ कहन खोइल देलयँ, आर उमन के बेंत लेक मारेक तेहें हुकुम देलयँ । 23 आर उमन के दोमे बेंत लेक पिटवाय कहन जेहेले बन्द कइर देलयँ आर जेहेल केर दारोगा के हुकुम देलयँ कि उमनेक बेस निहार पाहरा कर। 24 इ हुकुम के पाय कहन जेहेल केर दारोगा टा उमन के जेहेल केर भीतर कोठरी मेहेन राखलक, आर उमनेक गोड़ के काठी मेहेन सकताय कहन बाइन्ध देलक।
जेहेले अचम्भा काम
25 करीबन आधा राइते पौलुस आर सीलास प्राथना करत रहयँ आर परमेसर केर भजन गीतकात रहयँ, उमनेक प्राथना आर गीत के आरो दोसर कैदी गिला सुनत रहयँ। 26 सेहे खोने आचकाय एकटा एसन बोड़े भूँईडोल होलक कि जेहेल केर नेव हिल गेलक। तुरते जेहेल केर सउब दुरा गिला खुइल गेलक आर सउब कैदी केर बान्धल बेरी टाउ खुइल गेलक। 27 जखन जेहेल केर दारोगा निन्द टा लेक जागलक तो जेहेल केर सउब दुरा गिला के खुलल देइख कहन इटा सोंचलक कि सउब कैदी गिला पारालयँ। सेतेहें ऊ आपन तालवाइर के बाहरालक आर निजे के काटोयाइ रहे, 28 किन्तु सेहे खोने पौलुस आँटे डाइक कहन कहलक, “निजे के कोनो नुकसान ना कर, हामरे सउब हिंयाइ आही।”
दारोगा केर परभु माहान बिसास करेक
29 इटा सुनत के दारोगा टा दीया माँगाय कहन चाँड़े-चुँड़ु भीतर सामालक। ऊ पौलुस आर सीलास ताहाँ डरे काँपत के जाय कहन गोड़े गिरलक। 30 आर उमन के बाहिर बाहराय कहन ऊ कहलक, “ए साहेब गिला, पाप केर दन्ड लेक छुटकारा पायेक तेहें मोयँ का करमूँ?” 31 उमन उके जबाब देलयँ, "परभु ईसु माहान बिसास कर होले तोयँ आर तोर परिबारेक सउब लोग गिला पाप केर दन्ड लेक छुटकारा पाबयँ" 32 फिन उमन उके आर उकर परिबार केर सउब लोग गिला के परभु केर बचन सुनालयँ। 33 राइत के ओहे खोने दारोगा टा उमन के लेगाय कहन उमनेक घाव के धोय देलक, तेकर बादे तुरंत ऊ आर उकर परिबार केर सउब लोग गिला बपतिस्मा लेलयँ। 34 फिन ऊ पौलुस आर सिलास के आपन घर ले आनलक आर उमने के खियालक। ऊ गोटा परिबार संग परमेसर माहान बिसास करेक चलते बेजाइन खुसी मानालक।
पौलुस आर सिलास के जेहेल लेक छोइड़ देल गेलक
35 जखन बिहान होलक तो फयसला करइया हाकीम गिला इ हुकुम दे कहन सिपाही गिला के जेहेल केर दारोगा ताहाँ पइठालयँ, “ऊ दुइयो झन के छोइड़ देवा।” 36 जेहेल केर दारोगा इ काथा टा पौलुस के कइह देलक, “फयसला करइया हाकीम गिला तोहरे के छोइड़ देक तेहें कइह पइठाय होयँ। सेतेहें एबार तोहरे बाहराय कहन सान्ति लेक चइल जावा।” 37 किन्तु पौलुस ऊ दारोगा गिला के कहलक, “हामरे रोमी नागरिक हेकी। होलोउ उमन हामरे के बिना दोसे सउब केर सामने मारलयँ आर जेहेले बन्द कइर देलयँ। आर एबार उमन हामरे के चुपे-चुपे बाहराय कहन पइठाय खोजोतयँ? नाहीं! एसन नाई होय पारे, उमन खुदेइ आय कहन हामरे के बाहराउन।” 38 सिपाही गिला इ काथा के जाय कहन फयसला करइया हाकीम गिला के कइह देलयँ। जखन उमन सुनलयँ कि उमन रोमी हेकयँ, तखन उमन दोमे डाराय गेलयँ। 39 आर उमन आय कहन पौलुस आर सिलास के मानाय लागलयँ आर बाहिर लेगाय कहन उमन के सहर लेक चइल जायेक गोहाइर करलयँ। 40 पौलुस आर सिलास जेहेल लेक बाहराय कहन लुदिया केर घर गेलयँ आर हुँआ बिसासी भाइ गिला संग मिल कहन उमन के बाढ़ावा देलयँ आर फिन उमन हुआँ लेक बिदाइ होलयँ।