17
पौलुस आर सिलास थिस्सलुनिके सहर माहने
1 फिन पौलुस आर सिलास अम्फिपुलिस आर अपुल्लोनिया सहर होत के थिस्सलुनीके सहर पहँचोलयँ, जाहाँ यहूदी गिलाक एकटा आराधनालय रहे। 2 पौलुस के आराधनालय जायेक आदत रहे सेतेहें हियाँउ ऊ आराधनालय गेलक आर तीन हापता तक पबित्र दिने उमनेक संगे धरम सास्तर लेक बाद-बिबाद करलक। 3 आर उमन के धरम सास्तर खोइल कहन साबित करत रहे कि परमेसर केर दाराए अभिसेक करल लोग के दुख उठायेक आर मोरल ले जियँत होयेक दोरकार रहे। आर ऊ कहलक, “एहे ईसु जेकर बारे मोयँ तोहरे के कइह देतहँ, अभिसेक करल लोगa हेके।” 4 ई काथा सुइन कहन यहूदी मइधे थोड़ेक लोग गिला बिसास करलयँ आर परमेसर केर भक्त ढेइरे युनानी गिला आर सामाज मेहेन माइन राखोइया बेटी छुआ गिलाउ बिसास कइर कहन पौलुस आर सिलास संगे मेइस गेलयँ। 5 किन्तु यहुदी गिला ई देइख कहन हिंसगाय जले लागलयँ आर उमन ढेइरे लोग गिला के आर बाजारु ठेठ फुटिया गुन्डा गिला के जामा करलयँ आर सहर मेहेन हुड़दंग कइर देलयँ। आर यासोन केर घर मेहेन हामला कइर कहन पौलुस आर सिलास के लोगेक पासे आनेक तेहें कोसिस करलयँ। 6 किन्तु हुँआ उमन के नाई पालयँ, तो यासोन आर थोड़ेक बिसासी भाइ गिला के सहरेक हाकीम गिला पासे घिसराय कहन ले आनलयँ आर डोबल आँटे कहे लागलयँ, “ई लोग गिला जे संसार मेहेन उलटा-पुलटा कइर दे आहयँ, एबार हिंयाउ पहँइच जाय होयँ। 7 आर यासोन उमन के आपन घरे गोतिया राइख आहे। इमन सउब समराट केर हुकुम गिला केर बिरोध करयँला आर कहयँला कि ईसु नामेक एकटा दोसर राजा आहे।” 8 जखन लोग गिला आर सहर केर साहेब गिला इ काथा टाके सुनलयँ तो अकचकाय गेलयँ। 9 फिन साहेब गिला यासोन आर दोसर लोग गिला के जामानत लेलयँ, सेइ तखन उमन के छोइड़ देलयँ।
पौलुस आर सिलास बिरिया सहर मेहेन
10 ओहे राइते बिसासी भाइ गिला पौलुस आर सीलास के बिरीया सहर पइठाय देलयँ। हुँआ पहँइच कहन उमन यहूदी गिलाक आराधनालय मेहेन गेलयँ। 11 बिरिया सहर केर यहूदी गिला थिस्सलुनीके सहर केर यहूदी गिला लेक बेसी साफा मनेक लोग रहयँ। काहेकि उमन बेजाइन रीझे परभु केर बचन के गरहन करलयँ आर रोज दिन धरम सास्तर केर लिखल काथा के परखत रहयँ, कि पौलुस केर काथा इटा लेक जुमेला न नाहीं। 12 सेतेहें उमन लेक ढेइर यहूदी गिला बिसास करलयँ। आर सामाज मेहेन माइन राखोइया ढेइरे यूनानी बेटी छुआ गिला आर बेटा छुआ गिलाउ बिसास करलयँ।
13 किन्तु जखन थिस्सलुनीके सहर केर यहूदी गिला के पाता चललक कि बिरीया सहर माहनोउ पौलुस परमेसर केर बचन सुनातेहे, तो उमन हुँआउ जाय कहन लोग गिला के बहकाय लागलयँ आर हुड़दंग करे लागलयँ। 14 तखन बिसासी भाइ गिला पौलुस के तुरंत समुन्दर धार बाटे पइठाय देलयँ, किन्तु सीलास आर तिमुथियुस बिरिया सहर माहनेइ रइह गेलयँ। 15 जे लोग गिला पौलुस के पहँचाय राखेक जाय रहयँ उमन एथेंस सहर तक लेगाय राखलयँ। फिन उमन हुआँ लेक बिरिया सहर घुइर आलयँ, आयेक समय पौलुस उमन के हुकूम देलक कि सिलास आर तिमुथियुस के चाँड़ेइ आउन कइह देबा।
पौलुस एथेंस सहर मेहेन परचार करेला
16 जखन पौलुस एथेन्स सहर मेहेन सीलास आर तिमुथियुस केर आसरा देखत रहे, तो गोटा सहर मूरती गिला लेक भरल देइख कहन ऊ मन मेहेन बेजाइन दुखी होलक। 17 सेतेहें ऊ रोज दिन यहूदी गिलाक आराधनालय मेहेन एहे टाकेर बारे यहूदी गिला संग आर परमेसर के मानोइया यूनानी गिला संग चरचा करत रहे आरो हाट-बाजार चाहे चौक मेहेन जेकर संग भेंटात रहे उमनेक संगे रोजे चरचा करत रहे। 18 थोड़ेक इपीकूरी आर स्तोइकीb बिचारधारा गेयानी गिलाउ उकर संग चरचा करे लागलयँ। उमनेक मइधे थोड़ेक लोग गिला कहलयँ, “इ बकवास करइया टा का कोहे खोजेला?” दोसर गिला कहलयँ, “इ तो कोनो दोसर देसेक देवँता गिलाक परचार करइया निहार बुझायला” उमने एहे तेहें एसन कहलयँ, काहेकि पौलुस ईसु केर आर फिन जी उठेक बारे परचार करत रहे।
19 तखन पौलुस के अरियुपगुस केर सभाc मेहेन संगे लेले गेलयँ आर पुछे लागलयँ, “का हामरे इ नावा सिछा केर बारे जाने पारब जेकर तोयँ परचार करीसला? 20 काहेकि तोयँ हामरे के अजीब काथा सुनातिहिस, सेतेहें हामरे जानेक चाहिला कि इटाक माने का हेके?” 21 एथेन्स सहर केर सउब रहइया गिला आर परदेसी गिला जे हुँआ रहयँला, सेइ गिला सउब आपन काम-धंधा छोइड़ कहन ई नावा-नावा काथा गिला के सुनेक माहनेइ समय बितायँला आर सउब केर मुँहे ओहे चरचा आहे।
22 तखन पौलुस अरियुपगुस केर मांझे ठाड़ होय कहन कहलक, “ए एथेन्स केर लोग गिला, मोयँ देखोतहँ कि तोहरे सउब किसिमे बेजाइन धरमी हेका। 23 काहेकि मोयँ गोटाय घुइर भुलत के तोहरेक पूजा करेक जिनीस गिला के धेयान लेक देखत रहँ, तो मोयँ एकटा बेदी पालँ, जेटा मेहेन लिखल रहे, ‘अनजान ईस्वर केर तेहें।’ तो जेके तोहरे बिना जाइन के पूजा कराला, मोयँ तोहरे के उकरे बारे सुसामाचार सुनातहँ।
24 जोन परमेसर, गोटा संसार आर संसार केर सउब जिनिस गिला के बनायहे, ओहे सरग आर धरती केर परभु हेके। ऊ हाथेक बनाल मन्दिर मेहेन नाई रहेला। 25 परमेसर खुदेइ सउब के जीबन, निनास आर सउब टाई देला। काहेकि उके कोनो जिनिस केर घटी नाइखे सेतेहें मानुस उकर सेबा सुसार करेक तेहें का दे पारयँ। 26 ऊ एकेटा मानुस लेक सउब जाइत केर लोग गिला के गोटा धरतिये रहेक तेहें सिरजाय आहे आर एहे तेहें ऊ एकटा धरल समय आर उकर रहेक सिमान के बाइन्ध देलक। 27 परमेसर एहे तेहें एसन करलक कि मानुस उके खोजुन आर होय पारे टोमइड़ कहन पाउन, तेउ ऊ हामरे लेक धुरे नेखे। 28 काहेकि उकर ले कहनेइ हामरे जिन्दा आही, आर उकर ले कहनेइ चइल-बुलतिहि आर टिकल आही। जेसन कि तोहरेक कबि गिलाउ कइह आहयँ, ‘हामरे उकरे छुवा-पूता हेकी।’
29 ई निहार हामरे सउब परमेसर केर सन्तान हेकी। सेतेहें हामरे के एसन कबोउ नाहीं सोंचेक चाही कि परमेसर सोना, चाँदी चाहे पाखना केर मूरति निहार आहे, जेके मानुस आपन कारीगर आर कल्पना कइर कहन बनायँला। 30 बितल समय मेहेन परमेसर अबुइधेक दन्ड के छमा करलक, किन्तु एबार उकर हुकूम हेके, कि सउब ताहाँ मानुस गिला आपन पाप लेक पस्ताउन आर मन बदलून। 31 काहेकि ऊ एकटा दिन धोइर आहे, उ दिन ऊ आपन चुनल अदमी केर दाराय उचित नियम केर मोताबिक संसार केर फयसला करी, एहे अदमी के मोरल लेक जियँत कइर कहन सउब अदमी केर पासे इटा के साबूत दे आहे।”
32 जखन उमने मोरल गिला केर बाँइच उठेक काथा के सुनलयँ तो थोड़ेक लोग गिला ठठा करे लागलयँ, किन्तु आरो लोग गिला कहलयँ, “हामरे इ काथा टाकेर बारे फिन कोनो दिन तोर लेक सुनबिक।” 33 इटा सुइन कहन पौलुस साभा लेक चइल गेलक। 34 किन्तु थोड़ेक लोग गिला बिसास करलयँ आर पौलुस संगे संग होलयँ। इमनेक मइधे दियुनुसियुस जे अरियुपगुस केर सदस्य रहे आर दमरिस नामेक एकटा बेटी छुआ रहे, आर उमनेक संगे आरो दोसर लोग गिलाउ रहयँ।