18
पौलुस एथेंस सहर लेक कुरिन्थुस सहर मेहेन आलक
1 अरियुपगुस केर अदालत लेक बाहराल बादे पौलुस एथेंस सहर के छोइड़ कहन कुरिन्थुस सहर गेलक। 2 कुरिन्थुस सहर मेहेन अक्विला नामेक एकटा यहूदी लोग भेंटालक। जेकर जनम पुन्तुस राइज मेहेन होय रहे, ऊ आपन घरइया प्रिस्किल्ला, संगे इटली देस लेक हाली मेहेन आय रहे। काहेकि क्लौदिया समराट यहूदी गिला के इटली देस केर राजधानी रोम सहर लेक बाहिर जायेक हुकूम दे रहे। हुँआ पौलुस उमनेक ताहाँ भेंट करेक तेहें गेलक, 3 काहेकि उहो उमनेक रकमे तम्बू बनायेक काम करोइया रहे, एहेतेहें ऊ उमनेक संगे रइह कहन काम करे लागलक। 4 ऊ हर हाप्ता पबित्र दिने आराधनालय मेहेन बाद-बिबाद कइर कहन यहूदी आर यूनानी गिला के समझायेक कोसिस करत रहे, ताकि उमन बिसास करुन। 5 जखन सीलास आर तीमुथियुस मकिदुनिया सहर लेक आलयँ, तो पौलुस आपन समय बचन सुनायेक माहनेइ बिताय लागलक। ऊ यहूदी गिला के गोवाही देते रहे कि ईसुवे अभिसेक करल लोग हेके। 6 किन्तु जखन यहूदी गिला उकर बिरोध आर हँसी उड़ाय लागलयँ तखन ऊ आपन लुगा झाइड़ कहन कहलक, "तोहरेक दोस केर भार तोहरेक उपरेइ होउक! मोयँ निरदोस आहँ! एबार लेक मोयँ जे यहूदी ना लागयँ उमनेक पासे जामूँ।"
7 तखन पौलुस आराधनालय लेक बाहरालक आर तीतुस युस्तुस नामेक एकटा परमेसर केर भक्त केर घर गेलक, जेकर घर टा आराधनालय लेक सटल रहे। 8 आर क्रिसपुस जे आराधनालय केर सरदार रहे, ऊ आपन गोटा घरेक-परिबार संग परभु माहान बिसास करलक, आरो कुरिन्थियुस केरो ढेइर लोग गिला पौलुस लेक परभु केर बचन सुइन कहन बिसास करलयँ, सेटा के देखायेक तेहें बपतिस्मा लेलयँ। 9 एक राइत पौलुस के परभु दरसन मेहेन देखा होय कहन कहलक, “ना डाराइन! परचार करते रहिन चुपे ना रहिन। 10 काहेकि मोयँ तोर संगे आहँ, केउवे तोके हानि पोंहचायेक तेहें तोर उपरे हामला नाई करबयँ, काहेकि ई सहर मेहेन ढेइरे मोर लोग आहयँ।” 11 सेतेहें पौलुस उमनेक मांझे परमेसर केर बचन के सिखात के डेढ़ बच्छर तक रहलक।
पौलुस के गल्लियो केर पासे लानल गेलक
12 जखन गल्लियो अखाया राइज केर राइजपाल रहे, तखन यहूदी गिला एक जुट होय कहन पौलुस केर बिरोध करलयँ आर धोइर कहन राइजपाल पासे फयसला करेक तेहें आनलयँ। 13 आर कहे लागलयँ, "ई लोग टा मूसा केर नियमेक बिरोध मेहेन परमेसर केर आराधना करेक तेहें लोग गिला के भढ़कायला।" 14 जखन पौलुस कहे खोजत रहे, सेहे खोने गल्लियो पौलुस केर बिरोध करइया यहूदी गिला के कहलक, "ए यहूदी गिला! जदि ई लोग टाकेर कोनो बेसिये गलती चाहे खाराब काम केर मामला होतक, होले मोयँ तोहरेक इ काथा के सुनेक तेहें तेयार होतँ। 15 किन्तु इटा केबल तोहरेक बाद-बिबाद केर काथा आर नाम आर तोहरेक नियम केर बारे आहे, होले इटाके तोहरेइ जाना। मोयँ ई काथा गिलाक फयसला नाई करमूँ।" 16 आर ऊ उमन के कछइरी लेक बाहिर बाहराय देलक। 17 तखन सउब लोग गिला आराधनालय केर सारदार सोस्थेनेस के धोइर लेलयँ, आर उके कछइरी पासेइ पीटे लागलयँ। किन्तु गल्लियो इ काथा गिलाक कोनो पारवाह नाई करलक।
पौलुस आपस यरुसलेम आय घुरलक
18 पौलुस कुरिन्थियुस सहर मेहेन ढेइर दिन तक रहल बादे हुँआ केर बिसासी भाइ गिला लेक विदा लेलक। आर हँआ लेक पानी जाहाजे चाइप कहन सिरिया राइज जाय लागलयँ। उकर संगे प्रिस्किल्ला आर अक्विला उमनोउ रहयँ, जायेक लेक पहिले पौलुस कोनो मानान कइर रहे सेतेहें किंख्रिया सहर मेहेन मुड़ मुन्डन करुवालक। 19 फिन उमन इफिसुस सहर मेहेन पहँचोलयँ। आर पौलुस प्रिसकिल्ला आर आक्विला के हुआँ छोइड़ कहन अपने एकलाइ आराधनालय मेहेन जाय कहन यहूदी गिला संगे बाद-बिबाद करे लागलक। 20 जखन लोग गिला उके आरो थोड़ेक दिन तक रहेक तेहें गोहरालयँ तो ऊ नाई मानलक। 21 किन्तु उमन लेक बिदा लेत के कहलक, “जदि परमेसर चाही होले मोयँ तोहरेक पासे आरो आय घुरोम।" एसन कइह कहन इफिसुस लेक पानी जहाज मेहेन चाइप कहन चइल गेलक। 22 जखन ऊ कैसरिया सहर पहँइच कहन नाभलक। तो हुआँ लेक यरुसलेम जाय कहन मन्डली केर बिसासी गिला संग भेंट करलक, तेकर बादे सीरिया राइज केर अन्ताकिया सहर चइल गेलक। 23 फिन थोड़ेक दिन रइह कहन हुआँ लेक बिदाई लेलक। आर ऊ गलातिया आर फ्रुगिया केर गोटा इलाका मेहेन जाय कहन चेला गिला के बिसास मेहेन मजगूत करते रहलक।
इफुसुस सहर मेहेन अपुल्लोस
24 इफिसुस सहर मेहेन अपुलोस नामेक एकटा यहूदी आलक, जे सिकंदरिया केर बसिन्दा रहे। ऊ कहेक माहने माहिर आर धरम सास्तर केर गेयानी रहे। 25 इके परभु केर डहर केर बारे सिछा देल जाय रहे। ऊ बेजाइन रीझे मन लागाय कहन ईसु केर बारे सही-सही सुनात रहे आर सीखात रहे। किन्तु ऊ केबल योहन केर बपतिस्मा केर बारेइ जानत रहे। 26 ऊ आराधनालय मेहेन निडर होय कहन कहे लागलक। किन्तु जखन प्रिस्किल्ला आर अक्विला उकर काथा के सुनलयँ तो उमने अपुलोस के आपन संगे घर लेगलयँ आर उके परमेसर केर डहर केर बारे आरो बेसी सही-सही समझालयँ।
27 जखन अपुलोस समुन्दर केर उपार अखाया राइज जायेक तेहें ठाइन लेलक तखन बिसासी भाइ गिला उके बाढ़ावा दे कहन हुआँ केर चेला गिला के चिट्ठी लिख पइठालयँ कि उकर बेस निहार माइन करुन। जखन ऊ हुँआ पहँचोलक, तो हुँआ केर ऊ बिसासी गिला के बेजाइन साहेता करलक जे गिला परमेसर केर किरपा लेक बिसास कइर रहयँ। 28 ऊ धरम सास्तर लेक इटा साबित करत रहे कि ईसुवे अभिसेक करल लोग हेके। ऊ जबरजस सउब केर सामने यहूदी गिला केर मुहँ बन्द कइर देत रहे।