19
पौलुस केर तीसर धंव परचार काम मेहेन जायेक
1 जखन अपुल्लोस कुरिन्थियुस सहर मेहेन रहे , सेखन पौलुस भीतर बाटेक सउब इलाका होय कहन इफिसुस मेहेन आलक। हुँआ थोड़ेक बिसासी गिला पावालयँ। 2 आर उमन के पुछलक, “का तोहरे जखन ईसु माहने बिसास करला, तखन पबित्र आत्मा पाय रहा?” उमने उके कहलयँ, “नाहीं, हामरे तो सुनबो नाइ कइर आही कि पबित्र आत्मा आहे।” 3 तखन ऊ पुछलक, "फिन तोहरे केकर बपतिस्मा ले आहा?" उमन कहलयँ, “बपतिस्मा देवइया योहन केर बपतिस्मा।” 4 फिन पौलुस उमन के कहलक, “योहन केर बपतिस्मा तो मन बदलेक बपतिस्मा रहे। ऊ तो लोग गिला के कइह दे रहे कि मोर बादे आवइया आहे, सेइ ईसु मेहेन बिसास करा।" 5 उमन इ काथा के सुइन कहन परभु ईसु केर नामे बपतिस्मा लेलयँ। 6 आर जखन पौलुस उमनेक उपरे हाथ राखलक तो पबित्र आत्मा उमनेक उपरे आलक आर उमन दोसर-दोसर भासा मेहेन कहे लागलयँ आर भबिस्यबानी करे लागलयँ। 7 इमन करिबन बारो झन रहयँ।
इफिसुस मेहेन पौलुस केर परचार करेक
8 पौलुस तीन महिना तक यहूदी गिलाक आराधनालय मेहेन जाय कहन बिना डर-भये परचार करत रहे। आर परमेसर केर राइज केर बारे बाद-बिबाद कइर कहन यहूदी गिला के बिसास करुवात रहे। 9 किन्तु थोड़ेक लोग गिला बेजाइन ढीठ रहयँ, उमन सुसामाचार माहान बिसास नाई करलयँ; उमन सउब लोग गिलाक मांझे परभु केर डहर केर बारे बेस-बेकार कहे लागलयँ। तो पौलुस उमन के छोइड़ देलक। आर चेला गिला के आपन संगे ले कहन तुरन्नुस नामेक एकटा अदमी केर इस्कुल घरे रोजेइ चरचा करत रहे। 10 दूई बछर तक एसनेइ होते रहलक, इ रकम आसिया राइज केर रहइया यहूदी आर यूनानी सउब परभु केर बचन के सुइन लेलयँ।
11 परमेसर पौलुस केर दाराए अचम्बित चमत्कार केर काम के करत रहे। 12 एतना तक कि लोग गिला जदि पौलुस केर गाते उरमाल आर गामछा के छुवाल बादे रोगी गिलाक उपरे राइख देत रहयँ, होले रोगी गिला बेस होय जात रहयँ आर दुस्ट आत्मा गिला उमनेक लेक बाहराय जात रहयँ ।
13 किन्तु झाड़-फूँक करइया थोड़ेक यहूदी गिला जे हिन्दे-हुन्दे घुइर-बुलत रहयँ, उमन दुस्ट आत्मा लागल लोग गिला के एसन कइह कहन बाहरायेक कोसिस करत रहयँ, “जोन ईसु केर परचार पौलुस करेला, ओहे ईसु केर नाम लेक तोके हुकुम दे तहँ।” 14 स्किवा नामेक एकटा यहूदी माहायाजक केर सातटा बेटा रहयँ, उमन एसनेइ काम करत रहयँ। 15 किन्तु एक दिन दुस्ट आत्मा जबाब देलक, “ईसु के मोयँ जानँला आर पौलुस कोउ चिनहँला, किन्तु तोयँ के हेकिस?” 16 फिन ऊ लोग टा जेकर मेहेन दुस्ट आत्मा रहे, झपइट कहन उमन के धोइर टेकालक आर एसन पटकलोक कि उमन लांगटाय आर लहू-लुहान होय कहन उ घर लेक परालयँ। 17 इ काथा टाके इफिसुस मेहेन रहइया सउब यहूदी आर यूनानी गिला जाइन गेलयँ आर ऊ सउब लोग गिलाय डर समाय गेलक आर परभु ईसु केर नाम केर बेजाइन आदर होय लागलक। 18 आर जे गिला परभु मेहेन बिसास कइर रहयँ, उमन लेक ढेइर लोग गिला आय कहन सउब केर पासे आपन गलत काम के माइन लेलयँ। 19 आर बेजाइन लोग गिला जे गिला जादू टोन्हा करत रहयँ उमने आपन-आपन पोथी गिला के जामा करलयँ आर सउब केर पासे उटाके डुँड़काय देलयँ आर जखन उ किताब गिलाक दाम जोड़ल गेलक तो करीबन पचास हजार चाँदीक सिक्का केर बराबइर होलक। 20 इ रकम परभु केर बचन ढेइरे पसरोते गेलक आर उटाक असर बाढ़ते गेलक।
21 इ सउब घटना गिलाक होल बादे पौलुस आपन मने मकिदुनिया आर अखाया राइज होत के यरुसलेम सहर जायेक तेहें फयसला करलक। ऊ कहलक "हुआँ पहँचोल बादे मोके रोम सहर टाकोउ देखेक दोरकार आहे।" 22 तखन ऊ आपन संगे काम करइया तिमुथियुस आर इरासतुस दुइयो झन के मकिदुनिया राइज पइठालक आर खुद आरो थोड़ेक दिन तक आसिया राइज मेहेन रहलक।
इफिसुस सहर मेहेन हुड़दंग
23 ओहे समय मेहेन परभु केर डहर केर बारे ले कहन इफिसुस मेहेन बेजाइन हुड़दंग होलक। 24 काहेकि देमेत्रियुस नामेक एकटा सोनार रहे, जे अरतिमिस देबी केर खातिर चाँदी केर छोटे-छोटे मंदिर बनुवात रहे, जेटा लेक कारिगर गिला के बेजाइन काम पावात रहे।
25 ऊ उमन के आर इ काम लेक जुड़ल दोसर कारिगर गिला के जामा करलक आर कहलक, "देखा हो! तोहरे जानाला कि इ काम लेक हामरे के दोमे बढ़ियाँ कामाई होयला। 26 आर तोहरे देखे सुने पारा कि इ पौलुस टा खाली इफिसुस माहनेइ नाहीं करिबन एसिया राइज केर सउब जायगाय बेजाइन लोग गिला के समझाय-बुझाय कहन बहकाय दे आहे। ऊ कहेला कि मानुस केर हाथेक बनाल देवँता सत देवँता ना लागे। 27 इटा लेक खाली एहे टाइ डर नेखे कि हामरेक बेपार केर बदनाम होई बल्कि हामरेक अरतिमिस महान देबी केर मंदिर टाउ तुछ मानल जाई, जेके गोटा एसिया आर संसार केर लोग गिला पूजा करयँला, सेइ देबी केर माइन टाइ खतम होय जाई।"
28 इटा सुइन कहन उमन बेजाइन रागे होलयँ आर आँटे-आँटे कहे लागलयँ, "इफिसुस गिलाक अरतिमिस देबी महान हेके!" 29 हुँदे गोटा सहरे हाल्ला होय गेलक। लोग गिला मकिदुनिया केर रहइया गयुस आर अरिस्तर्खुस के जे पौलुस संगे बुलत रहयँ, उमन के धोरलयँ आर एक जुट होय कहन धुमकुड़िया बाटे कुइद के गेलयँ। 30 पौलुस लोगेक पासे जाय खोजत रहे, लेकिन चेला गिला उके जाय नाई देलयँ। 31 एसिया केर थोड़ेक बोड़े साहेब गिला जे पौलुस केर दोस्ती रहयँ, उमन पौलुस ताहाँ कइह पइठालयँ कि ऊ धुमकुड़िया बाटे आयेक कोसिस ना करुक। 32 हुआँ केउ कोनो कहत रहयँ तो केउ कोनो, काहेकि सभा मेहेन सउब गड़बड़ाय जाय रहयँ। भीड़ माहान ढेइर लोग गिला इटा जानबो नाई करत रहयँ कि हामरे का करे जामा होय आही। 33 तखन यहूदी गिला सिकन्दर के आघुवे ढेकेइल कहन ठाड़ कइर देलयँ आर भीड़ केर थोड़ेक लोग गिला उके उसकाय लागलयँ। सेखन ऊ चुप रहेक तेहें हाथ लेक इसारा करलक आर लोग गिला के बुझाय लागलक। 34 किन्तु जखन लोग गिला के पाता चललोक कि ऊ एकटा यहूदी हेके तो करिबन दुई घन्टा तक गुइल करते रहलयँ कि "इफिसुस गिलाक अरतिमिस देबी महान हेके।"
35 तखन सहर केर मन्त्री भीड़ केर लोग गिला के सान्त करलक आर कहलक, "ए इफिसुस केर लोग गिला! का संसार माहान केउ एसन अदमी आहे जे इटा नाई जानेला कि इफिसुस सहर केर अरतिमिस महान देबी केर मंदिर आर सरग लेक गिरल पबित्र पाखना केर रइखा करइया हेके? 36 जखन कि ई काथा टा काटकूट होय नाई पारे तो तोहरे के सान्त रहेक चाही आर बिना सोंचे-बुझे कोनो नाई करेक चाही। 37 काहेकि तोहरे ई मानुस गिला के लाइन आहा जे ना तो मंदिर के लुटोइया हेकयँ आर ना तो हामरेक देवी केर निन्दा करइया हेकयँ। 38 तेउ जदि देमुत्रियुस आर उकर संगी गिला के केकरो बिरोध माहने कोनो सिकाइत आहे, होले कछइरी खुलाइ आहे हुआँ हाकीम गिला आहयँ, हुआँ उमन एक दोसर केर नालिस करुन। 39 किन्तु जदि तोहरे कोनो आरो दोसर काथा पुछे खोजो ताहा, होले नियम मोताबिक सभा मेहेन फयसला करल जाई। 40 एखन हामरे के डर आहे कि आइज केर हुड़दंग केर दोस हामरेक उपरे ना लागाल जाउक, काहेकि ई हुड़दंग केर कोनो कारन नेखे आर इ हुड़दंग करइया भीड़ केर जामा होयेक कारन के हामरे कोनो जबाब नाई दे पारब।" 41 एतना कहल बादे ऊ सभा के भंग कइर देलक।