20
पौलुस मकिदुनिया राइज आर यूनान देसे भरमन करलक
1 जखन हुड़दंग थाइम गेलक, तखन पौलुस चेला गिला के डाकलक आर उमन के बिसास मेहेन आघू बाढ़ेक तेहें बाढ़ावा दे कहन उमनेक लेक बिदा होलक आर मकिदुनिया राइज बाटे चइल देलक। 2 आर ऊ गोटा इलाकाय होय कहन भरमन करलक आर हुआँ केर बिसासी गिला के ढेइर निहारेक काथा कइह कहन बाढ़ावा देलक। फिन ऊ यूनान देस चइल गेलक। 3 हुआँ ऊ तीन महीना तक रहल बादे पानी जाहाजे सीरिया जावइया रहे। से खोन उके पाता चललोक कि यहूदी गिला उके मोरायेक तेहें जोहे लाइग आहयँ, सेतेहें ऊ फिन मकिदुनिया होय कहन जायेक फयसला करलक। 4 उकर संगे बिरिया लेक पिरुस केर बेटा सोपत्रुस, थिस्सलुनिकी केर रहइया अरिस्तर्खुस आर सिकुन्दुस, दिरबे सहर केर गयुस, तिमुथियुस आर आसिया राइज केर तुखिकुस आर त्रोफिमुस रहयँ। 5 ई संगी गिला पहिले जाय कहन त्रोआस सहर मेहेन हामरेक आयेक आसरा देखत रहयँ। 6 फसह परबa केर बादे हामरे फिलिप्पी सहर लेक जाहाजे चाइप कहन गेली। आर पाँच दिन मेहेन त्रोआस पहँइच कहन उमनेक संगे भेंटाली। हुआँ हामरे सात दिन तक रहली।
त्रोआस मेहेन चमत्कार काम
7 हाप्ता केर पहिल दिन हामरे बिसासी गिला संगे जखन रोटी खेंचा करेक तेहें एक ताहाँ जामा होली, तखन पौलुस उमनेक संगे गोल्फो करे लागलक आर आधा राइत तक गोल्फो करते रहलक, काहेकि उके बिहान होत केइ बिदा होयेक रहे। 8 जोन उपरेक कोठरी मेहेन जाहाँ हामरे जामा होय रही, ताहाँ गोटाय लोम्फो बारोत रहे। 9 आर हुआँ युतुखुस नामेक एकटा जुवान खिड़की माहने बोइसल रहे। ऊ पौलुस केर काथा के सुनत-सुनत के झूपे लागलक। जखन ऊ भोरखर निंदाय गेलक सेखन ऊ तीन तल्ला लेक हेंठे गिर गेलक। जखन उके उठालयँ तो ऊ मोइर चुइक रहे। 10 पौलुस हेंठ नाभलक आर उके पटरोलक। आर छातिये लागाय कहन कहलक, "ना अकबोकाबा! काहेकि इकर जीव नाई जाय आहे।" 11 फिन पौलुस उपर जाय कहन पीठा खेंचा करलक आर खालयँ आर लोग गिला संग बिहान तक गोल्फो करते रहलक आर बिदा होय कहन चइल गेलक। 12 लोग गिला जुवान टाके जियंत घर लेले गेलयँ आर बेजाइन सान्ति पालयँ।
पौलुस केर मिलतुस भरमन
13 हामरे जाहाज माहने पहिलेइ चाइप कहन असुस सहर गेली, हुआँ पौलुस के जहाजे संगे चापायेक रहे। पौलुस खुद पोयदल जावइया रहे सेतेहें ऊ हामरे के एसन कइह रहे। 14 ऊ जखन असुस सहर माहान हामरेक संग भेंटालक तो उके जाहाज माहने चापाली आर मितुलेन सहर आली। 15 दोसर दिन हामरे हुआँ लेक बिदा होय कहन खियुस टापू केर पासे पहँचोली आर दोसर दिन सामोस टापू तक आली। फिन बासी दिन मिलेतुस सहर पहुँइच गेली। 16 काहेकि पौलुस इफिसुस सहर धार लेक जायेक ठाइन रहे, ताकि असिया सहर माहने देरी ना होउक। होय पारे उके पेन्तिकुस्त परब केर दिन तक यरुसलेम पहँचेक रहे, सेतेहें ऊ चाँड़े करत रहे। 17 पौलुस मिलेतुस सहर लेक इफिसुस सहर मेहेन कइह पइठालक, आर मन्डली केर पंच गिला के डाइक आनुवालक।
पौलुस इफिसुस मन्डली केर पंचो गिला संगे भेंट करलक
18 जखन उमन उकर पासे आलयँ तो उमने के कहलक, "तोहरे जानबे कोराला कि पहिल दिन लेकेइ जखन मोयँ आसिया मेहेन पहँचोलँ, मोयँ का रकम तोहरेक संगे सउब समय रहँ। 19 मोयँ परभु केर सेबा बेजाइन नमर होय कहन आर लोर पानी गिराय गिराय कहन करते रहलँ। उ कोस्टो केर समय मेहेन जे यहूदी गिला केर जाल फाँस कामेक चलते मोर उपरे आय रहे, मोयँ परभु केर सेबा करते रहलँ। 20 आर जोन काथा गिला तोहरेक फयदाक तेहें रहे, उटाके लोगेक पासे कइह देक माहने आर घर-घर जाय कहन सिखायेक माहानोउ नाई हिचकिचालँ। 21 मोयँ यहूदी आर यूनानी लोग गिला के सिछा देते रहलँ कि आपन पाप काम के छोइड़ कहन परमेसर बाटे घुइर आवा आर परभु ईसु मसीह माहान बिसास करा। 22 आर एबार देखा, यरुसलेम जायेक तेहें पबित्र आत्मा मोर उपरे दाबाव डालो तेहे। मोयँ नाई जानोलाँ कि हुँआ मोर का बिती। 23 मोयँ एतनाय जानतहँ कि पबित्र आत्मा मोके हर सहर मेहेन चेतावनी देत रहे कि बन्धन आर कोस्टो तोर आसरा मेहेन आहे। 24 तेउ मोयँ निजेक प्रान टाके कोनो नाई बुझोंला, केबल एहेटा कि निजेक कुदेक आर उ सेबा काम के पूरा करेक, जे मोके परमेसर केर दयाय सुसामाचार टाकेर गोहाइ देक तेहें परभु ईसु लेक पावायहे। 25 आर एबार देखा, मोयँ जानोतहँ कि तोहरे सउब केर माझे परमेसर केर राइज केर सुसामाचार केर परचार कइर बुललँ, आवइया दिने मोके आरो देखे नाई पाबा। 26 सेतेहें मोयँ तोहरेक पासे गोहाइ दे कहन कहोतँ, जदि तोहरे सउब लेक केउ नास होय जाई तो उकर जिमेदार मोयँ नाई होमुँ। 27 काहेकि मोयँ परमेसर केर सउब हिंछा के कइह देक मेहेन नाई हिचकिचालँ। 28 सेतेहें तोहरे निजेक आर गोटा मन्डली केर खेयाल राखबा, जेकर तेहें पबित्र आत्मा तोहरे के अध्यक्ष बनाय आहे। तोहरे परमेसर केर बिसासी मन्डली केर रइखा करा, जेके ऊ आपन बेटा केर लहू लेक किन आहे 29 मोयँ जानँला कि मोर हियाँ लेक गेल बादे फाड़ोइया हुन्ड़ार गिला तोहरेक माझे आबयँ आर भेड़ी गिला के जे मन्डली केर बिसासी गिला हेकयँ, नाई छोड़बयँ। 30 आर तोहरेक माझ लेकोउ एसन लोग गिला बाहराबयँ, जे चेला गिला के आपन बाटे करेक तेहें उल्टा सीधा काथा कहबयँ। 31 सेतेहें तोहरे सावधान रहा आर इयाद करा कि मोयँ तीन बछर दिन आर राइत एकेक झन के कान्दते के चेतायेक नाई छोड़लँ, सेटा के तोहरे इयाद करते रहबा। 32 आर एबार, मोयँ परमेसर केर आर उकर किरपा केर बचन मेहेन तोहरे के जिमा देतहँ, जे तोहरे के आघु बाढ़ाय पारेला आर उ सउब के जे पबित्र करल जाय आहयँ, उमनेक संग हिस्सा दे पारी।
पौलुस इफिसुस मंडली लेक बिदा होयेक
33 मोयँ केकरो सोना,चाँदी चाहे लूगा केर लालच नाई करलँ। 34 तोहरे खुदेइ जानाला कि मोर इ हाथ लेक मोर आर मोर संग गिला केर दोरकार गिला के पूरा करलक, इटाके तोहरे खुदे जानाला। 35 मोयँ तोहरे के सउब टाइ कइर कहन देखाय आहँ कि एहे रकम मेहनइत करत के जे कमजोर आहयँ से गिला के समढ़ावा आर परभु ईसु केर काथा के जड़ूर इयाद रखेक आहे, काहेकि ऊ खुदे कइह आहे 'लेक ले देक टा धन्य हेके।' 36 आर इटा कइह सिराल बादे ऊ उमनेक संगे मिल कहन हेंठू माड़लक आर प्राथना करलक। 37 तखन उ सउब बेजाइन कान्दे लागलयँ आर पौलुस के पोटइर कहन चुमे लागलयँ। 38 खास कइर कहन उमन सउब इ काथा लेक बेसी दुखी होलयँ जेटा ऊ कइह रहे कि तोहरे मोर चेहरा आरो देखे नाई पाबा। आर फिन उमन उके पानी जाहाज चापेक ताहाँ पहँचाय राखलयँ।