21
पौलुस यरुसलेम जायेक तेहें ठाइन लेलक
1 जखन हामरे उमन लेक बिदा होय कहन जाहाज लेक जाय लागली तो सोझ डहर लेक चोइल कहन कोस टापू पहँचोली। आर दोसर दिन बिहाने रुदुस टापू आर हुआँ लेक पतरा सहर पहँचोली। 2 हुँआ फीनीके सहर जावइया एकटा जाहाज पाली आर हामरे उटाय चाइप कहन चइल देली। 3 जखन हामरे साइप्रस टापू के देइख पाली तो उटा के लेंगा बाटे छोइड़ कहन सीरिया राइज बाटे बाढ़ली आर सूर सहर मेहेन नाभली, काहेकि हुआँ जाहाज लेक माल के नाभायेक रहे। 4 सूर मेहेन परभु केर चेला गिला के पाय कहन हामरे उमनेक संगे सात दिन तक रहली। आर उमन पबित्र आत्मा केर हुचकाल मेहेन पौलुस लेक अरजी करलयँ कि ऊ यरुसलेम सहर ना जाउक। 5 जखन हुआँ हामरेक ठहरेक दिन टा पुरा होलक तो हामरे हुआँ लेक चइल देली। सउब चेला गिला छुवा-पुता सहित सहर लेक बाहिर तक पहँचाय राखलयँ। आर समुन्दर धारे हाँठु गाइड़ कहन हामरे प्राथना करली। 6 आर एक-दोसर लेक बिदा होय कहन हामरे तो जाहाज मेहेन चेढ़ली आर उमन आपन-आपन घर घुइर गेलयँ।
7 सूर सहर लेक पानी जाहाजे हामरे पतुलिमयिस सहर मेहेन पहँइच कहन नाभली। हुआँ बिसासी भाइ गिला संग भेंट-घाट करली आर उमनेक संगे एक दिन रहली। 8 दोसर दिन हामरे हुआँ लेक कैसरिया सहर पहँइच गेली। आर फिलिप्पुस सुसामाचार परचारक केर घर जाय कहन उकर संगे रहली। फिलिप्पुस खास चुनल सात सेबक मइधे एक झन रहे। 9 उकर चाइर टा बेटी डिंड़ाय रहयँ, जे सउब भबिस्यबानी करत रहयँ।
10 हामरे के हुआँ ढेइर दिन रहल बादे यहूदिया राइज लेक अगबुस नामेक एकटा भबिस्यबक्ता आलक। 11 हामरेक पासे आय कहन ऊ पौलुस केर डाँड़ा बान्धेक गामछा के लेलक आर आपन हाथ गोड़ के बांइध कहन कहलक, “पबित्र आत्मा एसन कहेला, 'जेकर ई डाँड़ा बान्धेक गामछा टा हेके, उके यरुसलेम मेहेन यहूदी गिला एसनेइ बांधबयँ आर अनजाइतेक हाथे जिमा देबयँ।' 12 जखन हामरे इ काथा के सुनली तो हामरे आर हुआँ केर लोग गिला सउब पौलुस के यरुसलेम नाई जायेक गोहाइर करली। 13 किन्तु पौलुस जबाब देलक, “तोहरे इटा का कोरोताहा, काइन्द-काइन्द कहन मोर दिल के टुटाताहा? मोयँ तो परभु ईसु केर नामेक खातिर यरुसलेम मेहेन केबल बान्धायेक तेहेंइ नाहीं किन्तु मोरेक तेहेंउ तेयार आहँ।” 14 जखन हामरे उके माना नाई करे पारली तखन हामरे एसन कइह कहन चुपे रहली, “परभु केर हिंछा पुरा होउक।”
पौलुस यरुसलेम आलक
15 तेकर बादे आपन मोटरी-झोटरी बाइन्ध कहन हामरे तेयार करली आर यरुसलेम बाटे चइल देली। 16 कैसरिया सहर लेको थोड़ेक चेला गिला हामरेक संगे आय रहयँ। उमन हामरे के साइप्रस टापू .केर मनासोन नामेक एकटा पुरना चेला ताहाँ ले आनलयँ, जेकर संग हामरे के रहेक रहे। 17 जखन हामरे यरुसलेम पहँचोली तो बिसासी भाइ गिला रीझे हामरेक संग भेंट करलयँ। 18 दोसर दिन पौलुस हामरेक संगे याकूब के देखे गेलक। जाहाँ सउब पंच गिला जामा होल रहयँ। 19 पौलुस उमन के जोहार सलाम करलक आर उ सउब काम गिलाक बारे एकधार लेक कइह सुनालक, जे परमेसर उकर दाराए अनजाइत गिलाक मांझे कइर रहे। 20 पौलुस केर इ काथा के सुइन कहन उमन परमेसर केर स्तुति करलयँ। आर फिन कहलयँ, “ए भाइ, तोयँ तो देखते आहिस कि यहूदी गिला लेक हजार लेको बेसी लोग गिला बिसास करलयँ आर उमन सउब मूसा केर नियम के मानेक धुन मेहेन आहयँ। 21 उमन के तोर बारे कहल जाय आहे कि तोयँ अनजाइत गिलाक मांझे रहइया यहूदी गिला के सिखाइसला कि मूसा भबिस्यबक्ता केर नियम के छोइड़ देवा आर आपन छुवा गिला केर खतना ना करुवाबा आर पुरखा गिलाक रीति रीवाज केर मोताबिक ना चला। 22 तो फिन का करल जाई? उमन तो इटा सुनबे करबयँ कि तोयँ आयहिस। 23 सेतेहें जेटा हामरे कहोति सेटा के कर, हामरेक हियाँ चाइर झन आहयँ जे गिला मानान कइर आहयँ। 24 उमन के ले जाहिन आर उमनेक संगे निजे के सुद्ध करीन आर उमन के खरचा देहिनa कि उमन आपन मुड़ कामुवाय लेउन। इटा लेक सउब लोग जाइन जाबयँ कि उमन जेटा तोर बारे सुइन आहयँ, सेटा सत काथा ना लागे, बरन्चो तोयँ तो खुद मूसा केर नियम के मानत के उकर मोताबिक चलिसला। 25 किन्तु अनजाइत गिलाक बारे जे गिला परभु ईसु माहान बिसास कइर आहयँ, उमनेक तेहें हामरे इटा फयसला कइर कहन लिख पइठाय आही कि उमन मुरति गिलाक तेहें बलि चेढ़ाल माँस लेक आर लोहू लेक, आर मोचइड़ कहन मोराल कोनो जानवर केर मांस लेक आर भेबिचार लेक बाँचून।”
पौलुस के बंदी बनाल गेलक
26 दोसर दिन पौलुस ऊ चाइरो लोग के ले कहन गेलक आर उमनेक संगे खुद कोउ सुद्ध कइर कहन मन्दिर मेहेन गेलक। आर ऊ मन्दिर माहने जाय कहन इटा घोसना करलक कि सुद्ध होयेक दिन कोबे सिराई आर सउब झन केर तेहें बलि चेढ़ायेक दिन कोबे पुरा होई। 27 जखन उमनेक सुद्ध होयेक सात दिन पुरा होइया रहे, तो आसिया केर यहूदी गिला पौलुस के मन्दिर मेहेन देइख कहन थोड़ेक लोग गिला के बहकाय देलयँ आर पौलुस के धोइर लेलयँ, 28 आर आँटे-आँटे गुइल कइर कहन कहे लागलयँ, “ए इसराइल केर भाइ बन्धु गिला, हामरे के साहेता करा! इ ओहे मानुस हेके जे सउब ताहाँ हामरेक लोग गिला के आर मूसा केर देल नियम आर इ मन्दिर केर बिरोध माहने परचार करेला। एतनाइ नाहीं ई यूनानी लोग गिला कोउ मन्दिर मेहेन आइन कहन पबित्र जायगा के अपबित्र कइर दे आहे।” 29 इ काथा के उमन एहे तेहें कहलयँ, काहेकि इकर लेक पहिले त्रुफिमुस नामेक इफिसुस केर रहइया लोग के पौलुस संगे सहर मेहेन देइख रहयँ आर उमन बुझलयँ कि पौलुस उके मन्दिर मेहेन लेगाय होई। 30 गोटा सहर केर लोग गिला भड़इक गेलयँ आर सउब कुइद आय कहन जामा होलयँ आर उमन पौलुस के धोइर कहन मन्दिर लेक बाहिर घिसराय बाहरालयँ आर तुरंत मन्दिर केर दुरा के बन्द कइर देल गेलक।
31 जखन उ सउब पौलुस के माइर मोरायेक खोजत रहयँ, सेहे खोने रोमी पालटन केर सरदार ताहाँ इ खबर पहँइच गेलक कि गोटा यरुसलेम सहर मेहेन हुड़दंग फइल जाय आहे। 32 तखन ऊ तुरंत सिपाही गिला के आर पालटन केर सरदार गिला के ले आइन कहन उमन बाटे कुदले गेलक, आर जखन लोग गिला सिपाही गिला के देखलयँ तो पौलुस के पिटेक होंका करलयँ। 33 तखन पालटन केर सरदार पौलुस पासे आय कहन उके धोइर लेलक, आर उके दुइटा बेड़ी लेक बाँधेक हुकुम देलक, फिन ऊ लोग गिला के पुछे लागलक कि ऊ के हेके आर का कइर आहे? 34 किन्तु भीड़ लेक थोड़ेक लोग गिला कोनो कहतयँ तो दोसर गिला आरो कोनो गुइल करते रहलयँ, इ निहार भीड़ केर गुइल केर चलते ऊ कोनो सत काथा टा के जाने नाई पारलक तो उके छावनी मेहेन ले जायेक हुकुम देलक। 35 जखन ऊ सीढ़ी पासे पहँचलक तो एसन होलक कि हिंसक भीड़ केर चलते सिपाही गिला के उके उठाय कहन लेगेक होलक। 36 काहेकि भीड़ उकर पेछु-पेछु आत के गुइल करते रहयँ, “इके खतम कइर देवा।”
पौलुस काथा कहेक तेहें अनुमति माँगलक
37 जखन उमन पौलुस के छावनी भीतर लेजाइया रहयँ, तो ऊ पालटन केर सरदार के कहलक, “का मोयँ तोर लेक कोनो कथा कहे पारँ?” ऊ कहलक, “तोयँ यूनानी भासा जानिसला? 38 का तोयँ ऊ मिसर देस केर रहइया तो ना लागीस! जे थोड़ेक दिन पहिले बिद्रोह करुवालक आर चाइर हजार उगरवादी गिला के सुनसान बोन मेहेन लेगाय रहे?" 39 किन्तु पौलुस कहलक, “मोयँ यहूदी हेकँ आर किलकिया राइज केर नामी सहर तरसुस केर बासिन्दा हेकँ। मोयँ तोके आरजी करोतहँ कि मोके लोग गिला संगे काथा करेक अनुमति देहिन।” 40 जखन ऊ अनुमति दे देलक तो पौलुस सीढ़ी उपरे ठाड़ होय कहन आपन हाथ लेक लोग गिला के इसारा करलक आर जखन उमने चुप होय गेलयँ तो ऊ लोग गिला संग इब्रानी भासाय कहे लागलक।