22
पौलुस केर निजे के बाँचायेक तेहें काथा कहेक
1 "ए भाइ-बन्धु आर बुजुर्ग गिला, मोयँ निजे के बाँचायेक चलते काथा कहे खोजोतँ सेटा के सुना।" 2 लोग गिला जखन उके इब्रानी भासा मेहेन कहेक सुनलयँ, सेखन सउब आरोइ चुपे होय गेलयँ। पौलुस आरो कहे लागलक, 3 "मोयँ यहूदी हेकँ, किलिकिया राइज केर तरसुस सहर माहने मोर जनम होय रहे, किन्तु मोर लालन-पालन एहे सहर यरुसलेम माहने होलक। आर इ सहर माहने गमालिएल केर गोड़ धारे बोइस कहन सिछा पाय रहँ, हामरेक पुरखा केर नियम मोताबिक बेस निहार सीखाल जाय रहँ। आर मोयँ परमेसर केर खातिर एहे निहारे जोर-सोर माहने लागल रहँ, जेसन आइज तोहरे सउब लागल आहा। 4 मोयँ इ डहर माहान बिसास करइया बेटा छुवा आर बेटी छुवा सउब के बाइन्ध-बाइन्ध कहन जेहेले डालुवात रहँ। मोयँ एतना तक सताय आहँ कि उमन के मारुवाबो कइर आहँ। 5 इ काथाक तेहें माहायाजक आर सउब पंच गिला गोहा आहयँ। आर उमनेक लेक दमिस्क सहर केर यहूदी भाइ गिलाक नामे मोयँ चिठी लेलँ, ताकि दमिस्क सहर जाय कहन बिसासी गिला के बाइन्ध कहन यरुसलेम सहर आनम आर उमन के दन्ड देवाय पारँ।
पौलुस आपन मन बदलेक बारे कइह देक
6 फिन एसन होलक कि जखन मोयँ डहरे जात रहँ तखन दमिस्क सहर पहँचा पहँची करीबन बारो बाजे आचकाय मोर चाइरो धार एकटा बोड़े आलो चमकोलक। 7 मोयँ भूईंये गिर गेलँ आर मोयँ एकटा आवाज एसन सुने पालँ, 'ए साऊल, ए साऊल, तोयँ मोके काहे सातातिहिस?' 8 मोयँ उके पुछलँ, 'ए परभु, तोयँ के हेकिस?' ऊ मोके जबाब देलक, 'मोयँ ईसु नासरी हेकँ, जेके तोयँ सातातिहिस।' 9 जे गिला मोर संगे रहयँ उमनोउ उ आलो टाके देखलयँ, किन्तु जे मोर संगे काथा कहत रहे उकर आवाज के नाई सुनलयँ।
10 मोयँ पुछलँ, 'ए परभु एबार मोयँ का करमूँ?' परभु मोके कहलक, 'उइठ कहन दमिस्क जाहिन आर जेटा तोके करेक तेहें राखल आहे सेटा के हुआँइ तोके कहल जाई' 11 ओहे बोड़े आलो केर चलते मोर आँइख अँधरा होय गेलक, सेतेहें मोर संगी गिला मोके हाथे धोइर कहन दमिस्क लेगलयँ।
12 "हुआँ हनन्याह नामेक एकटा अदमी रहे। ऊ मूसा केर देल नियम के मानोइया एकटा भक्त रहे। हुआँ केर बसिन्दा सोभे यहूदी गिला मेहेन उकर बढ़ियाँ नाम रहे। 13 ऊ मोर पासे आलक आर ठाड़ होय कहन कहलक 'ए भाइ साऊल, फिन देखे लागिन!' ओहे खोने तुरते मोर आँइख खुइल गेलक आर मोयँ उके देखे पालँ।
14 सेखन हनन्याह मोके कहलक, 'हमरेक पुरखा गिलाक परमेसर तोके बाइछ ले आहे, कि तोयँ उकर हिंछा के जानिन आर उकर धरमी सेबक ईसु के देखिन आर उकर काथा के सुनिन। 15 काहेकि तोयँ जे देइख आहिस आर सुइन आहिस, सेटाक तेहें सउब लोगेक सामने तोयँ उकर गोहा होबे। 16 आर एबार तोयँ काहे देरी करोतिहिस? उठ, परभु ईसु केर नामे बिनती कर आर बपतिस्मा ले कहन निजेक पाप के धोय लेहिन।'
पौलुस मंदिर मेहेन दरसन पायेक
17 फिन जखन मोयँ यरुसलेम घुइर कहन मन्दिर माहने प्राथना करत रहँ, सेखन मोयँ एकटा दरसन पालँ। 18 मोयँ परभु के इ कहत के देखलँ, 'चाँड़े कर! तुरंत यरुसलेम लेक बाहिर चइल जा, काहेकि मोर बारे उमन तोर गोहाइ नाई मानबयँ।' 19 सेखन मोयँ कहलँ, 'परभु उमन तो निजेइ जानयँला कि आराधनालय गिलाय जाय-जाय कहन तोर उपरे बिसास करइया गिला के मोयँ धोइर बाइन्ध कहन पिटवात रहँ आर जेहेले बन्द कइर देत रहँ। 20 आर जखन तोर गोहा इस्तिफनुस केर लहू बोहाल जात रहे सेखन मोयँ हुआँ ठाड़ रहँ, उके मोरायेक माहने मोयों राजी रहँ आर लहू बहाइया गिलाक लुगा अगरत रहँ।
पौलुस आर पालटन केर सरदार
21 "तखन परभु मोके कहलक, 'तोयँ जाहिन, काहेकि मोयँ तोके अनजाइत ताहाँ धूर-धूर पइठामूँ।'" 22 एतना तक उमन उकर काथा के सुनते रहलयँ, किन्तु जखन उमन इ काथा के सुनलयँ, कि मोयँ तोके अनजाइतेक मांझे पइठामूँ, तो दोमे आँटे-आँटे गुइल करे लागलयँ, "इके खतम कइर देवा! एसन अदमी के धरती माहान जिन्दा रहेक दोरकार नेखे।" 23 उमन गुइल करत के आपन लुगा के खोइल कहन फेंकत रहयँ आर आकास माहने धूरा उड़ात रहयँ। 24 तखन पालटन केर सरदार हुकुम देलक, "इके छाउनी माहने लेगावा, आर कोड़रा माइर कहन पुछल जाउक, ताकि मोयँ जाने पारम कि लोग इकर बिरोध माहने काहे एसन गुइल करोतहयँ।" 25 किन्तु जखन उके कोड़रा मारेक तेहें बांधोत रहयँ, सेखन हुआँ ठाड़ होल कप्तान के पौलुस कहलक, "का कानून केर मोताबिक इटा उचित हेके कि एकटा रोमी नागरिक के बिना दोसी साबित करलेइ उके कोड़राय मारबे?" 26 कप्तान टा इ सुइन कहन पालटन केर सरदार ताहाँ जाय कहन कइह देलक, "तोयँ इ का करोतिहिस? ई अदमी टा तो रोमी नागरिक हेके!"
27 इटा सुइन कहन पालटन केर सरदार पौलुस ताहाँ आय कहन पुछलक, "मोके कइह दे, का तोयँ रोमी नागरिक हेकिस?" पौलुस जबाब देलक, 'हँ।' 28 तखन पालटन केर सरदार कहलक, "मोके तो रोमी नागरिकता के पायेक तेहें बेजाइन पयसा खरचा करेक पइड़ आहे। पौलुस कहलक, "किन्तु मोयँ तो जनम लेकेइ रोमी नागरिक हेकँ।" 29 तखन जे लोग गिला उके पुछ-ताछ करत रहयँ, उमन तुरंत उकर पास लेक फाराक होलयँ। आर पालटन केर सादार टाउ इटा बुइझ कहन कि उ एकटा रोमी नागरिक हेके आर उके मोयँ बाइन्ध आहँ, दोमे डारालक। 30 दोसर दिन कप्तान एहे काथा टाके बेस निहार पाता लागायेक चाहोत रहे, कि यहूदी गिला पौलुस केर उपरे काहे दोस लागातहयँ, उकर बान्धल खोइल देलयँ आर महायाजक आर यहूदी गिलाक बोड़े सभा बोइसेक तेहें डाके पइठालक आर पौलुस के हेंठ लेगाय कहन उमनेक सामने ठाड़ कइर देलयँ।