23
यहूदी गिलाक बोड़े सभा मेहेन पौलुस
1 पौलुस यहूदी गिलाक बोड़े साभा बाटे थिथाय कहन देखलक आर कहलक, "ए भाइ-बन्धु गिला, मोयँ सउब दिन परमेसर केर नजइरे सत मने जीबन बिताय आहँ।" 2 एहे टा मेहेन हनन्याह महायाजक, पौलुस पासे ठाड़ होल लोग गिला के उकर मुँहे थापड़ मारेक तेहें हुकुम देलक। 3 तखन पौलुस उके कहलक, "ए चुना पोतोल पाँचेइर, परमेसर तोके मारी! तोयँ हियाँ नियम केर मोताबिक मोर फयसला करेक बोइस आहिस आर का तोयँ नियम केर बिरोध माहने मोके मारेक तेहें हुकूम देइसला?" 4 जे लोग गिला पौलुस पासे ठाड़ होल लोग गिला कहलयँ, "परमेसर केर महायाजक केर अपमान करेक का निहर सहास होलक।" 5 पौलुस जबाब देलक, "ए भाइ सउब, मोके पाता नाई रहे कि इ महायाजक हेके, काहेकि धरम सास्तर मेहेन लिखल आहे, 'तोयँ आपन लोग गिलाक हाकीम के खाराब काथा ना कहबे।'"a
6 जखन पौलुस जानलक कि जामा होल लोग गिलाक मइधे थोड़ेक सदूकी दलेक आर दोसर फरीसी दलेक हेकयँ, तो यहूदी गिलाक बोड़े सभा मेहेन आँटे कहे लागलक, "ए भाइ सउब, मोयँ फरीसी हेकँ आर फरीसी गिलाक बंस लेक हेकँ। मोरल गिलाक आसा आर फिन बाँइच उठेक मोर बिसास आहे, सेटाक चलते मोर उपरे मोकदमा होतेहे।" 7 जखन ऊ एसन कहलक तो फरीसी आर सदूकी गिला मेहेन बिबाद होय गेलक आर सभा दूई भाग होय गेलक। 8 काहेकि सदूकी गिला कहयँला कि ना मरल गिलाक बाँइच उठेक आहे आर ना सरगदूत आर ना तो आत्मा आहे, किन्तु फरीसी गिला इ सउब मेहेन बिसास करयँला। 9 तखन हुआँ बेजाइन गुइल होय लागलक। आर जे फरीसी दलेक धरम सास्तरी गिला रहयँ, उमनेक लेक थोड़ेक गिला ठाड़ होय कहन झागड़ा लड़े लागलयँ कि "हामरे इ लोग मेहेन कोनो बुराई नाई पातिहि। जदि कोनो आत्मा चाहे कोनो सरगदूत इकर लेक काथा कइर आहे, तो इटा लेक का होई?" 10 जखन झागड़ा बेजाइन बाढ़लक तो पालटन केर सरदार डाराय गेलक कि काहाँउ उमन पौलुस के खाँड़ा-खाँड़ा ना कइर देउन। सेतेहें ऊ सिपाही गिला के हुकुम देलक कि हेंठे नाइभ कहन भीड़ लेक उके जबरजस्ती निकलाय कहन छाउनी मेहेन ले कहन आना। 11 ओहे राइते परभु पौलुस केर पासे ठाड़ होय कहन कहलक, "सांहास कर, काहेकि जेसन तोयँ यरुसलेम मेहेन मोर गोहाइ देहिस, ओसनेइ रोम मेहेनउ तोके मोर गोहाइ देक होई।"
पौलुस के मोरायेक जोजना
12 दोसर दिन होलक तखन यहूदी गिला पौलुस के मोरायेक तेहें जोजना बनालयँ, आर किरिया खालयँ कि जखन तक हामरे उके नाई मोराब तखन तक ना तो कोनो खाबिक आर ना तो कोनो पीबिक। 13 इ जोजना बनाइया गिला चालिस झन लेक बेसी रहयँ। 14 उमन माहायाजक आर पुरना पंच गिला ताहाँ गेलयँ आर कहलयँ, " हामरे इटा ठाइन ले आही कि जखन तक हामरे पौलुस के नाई माइर मोराबिक तखन तक हमारे कोनो नाई खाबिक-पीबिक। 15 सेतेहें एबार तोहरे बोड़े सभा सहित सउब पालटन केर सरदार के समझावा कि उके तोर पासे आनल जाउक, माइनले कि तोयँ उकर बारे बढ़ियाँ लेक जाँच करे चाहिसला। आर हामरे हुन्दे हियाँ पहुँचेक लेक पहिलेइ उके माइर मोरयेक तेयार रहबिक।" 16 किन्तु पौलुस केर भगिना टा सुनलक कि उमन उके मोरयेक ताके आहयँ, तखन ऊ छावनी माहने जाय कहन पौलुस के ई काथा कइह देलक। 17 पौलुस पालटन मइधे एक झन के पासे डाइक कहन कहलक, "इ जुवान के तोयँ सरदार पासे ले के जाहिन, काहेकि ई उके कोनो कहे चाहेला।" 18 तखन ऊ उके पालटन केर सरदार पासे लेगाय कहन कहलक, "बन्धुवा पौलुस मोके डाइक कहन अरजी करलक कि इ जुवान टाके सरदार पासे लेगावा, काहेकि ऊ उकर संगे कोनो कहे चाहेला।" 19 पालटान केर सरदार टा जुवान केर हाथ धोरलक आर धार बाटे लेगाय कहन पुछलक, "कइह दे तोयँ मोके का कहे चाहोतिस?" 20 ऊ कहलक, "यहूदी गिला एक राय कइर आहयँ, कि उमन पौलुस के आरो बेस निहार पुछताछ करेक बाहनाय, तोर लेक अरजी करबयँ कि उके बोड़े सभा मेहेन आनिन। 21 किन्तु उमन केर काथा के तोयँ ना सुनबे, काहेकि उमन चालिस झन लेक बेसी लोग गिला उके माइर मोरायेक फेरा मेहेन आहयँ। उमन किरिया खाय आहयँ कि जखन तक हामरे पौलुस के नाई मोराबिक तखन तक कोनो नाई खाबिक-पीबिक, एखन उमन सउब तेयार आहयँ खाली तोर हुकुम पायेक आसरा देखोतयँ।" 22 पालटान केर सरदार टा जुवान टाके हुकुम देलक, "तोयँ इ काथा टाके केकोउ ना कइह देबे कि तोयँ मोके इ खबर दे आहिस।"
पौलुस के कैसरिया राइज पइठायेक
23 फिन पालटन केर सरदार दुइ टा पालटन के डाइक कहन कहलक, "दुइ सअ सिपाही गिला के आर सतर टा घोड़ सवार आर दुइ सअ बलमधारी गिला के राइत नो बाजे तक कैसरिया राइज जायेक तेहें तेयार कइर कहन राखा। 24 आर पौलुस खातिरो घोड़ सवारी तेयार कइर राखा, ताकि उके फेलिक्स राइजपाल पासे बेस रकम पहुँचाल जाउक।" 25 ऊ राइजपाल खातिर इ रकम चिठीयो लिखलक, 26 "सिरिमान माहामहिम राइजपाल फेलिक्स के क्लौदियुस लूसियास केर सादर परनाम। 27 इ अदमी के यहूदी गिला धोइर आहयँ आर इके मोरायेक फेरा मेहेन लागल आहयँ, किन्तु मोयँ जानलँ कि इ रोमी नागरिक हेके, सेखन इके मोयँ सिपाही गिला के पइठाय कहन उमनेक हाथ लेक छोड़ालँ। 28 आर मोयँ जानेक चाहलँ कि आखिर उमन उकर उपरे का चलते दोस लागातयँ, सेतेहें उके उमनेक बोड़े साभा मेहेन लेगली। 29 तखन मोयँ जानलँ कि उमन केर धारमिक नियम केर बिबाद केर चलते उमन उकर उपरे दोस लागायँला, किन्तु मिरतु दन्ड देक आर जेहेले बन्द करेक निहार कोनो दोस नाईखे। 30 आर मोके पाता चललोक कि थोड़ेक लोग गिला इ लोग टाके मोरायेक बिचार लागाय आहयँ। सेतेहें मोयँ तुरंत इके तोर ताहाँ पइठायेक बिचार करलँ। आर यहूदी गिला कोउ हुकुम देलँ कि उमन तोर पासे उकर सिकाइत करुन।"
31 सिपाही गिला पालटन केर सरदार केर हुकूम मोताबिक पौलुस के राइतो-राइत अंतिपातरिस सहर पहँचाय देलयँ। 32 फिन दोसर दिन घोड़ सवारी पलटन गिला के उकर संगे जायेक तेहें छोइड़ देलक आर उमन खुद छावनी मेहेन घुइर गेलयँ। 33 जखन उमन कैसरिया पहँचोलयँ, तो उमन राइजपाल के उ चिठी दे कहन पौलुस के उके जिमा देलयँ।