24
यहूदी दाराए राइजपाल फेलिक्स पासे पौलुस केर सिकाइत
1 पाँच दिनेक बादे हनन्याह नामेक महायाजक थोड़ेक पुरना पंच गिला के आर तिरतुल्लुस नामेक एकटा वकील के संगे ले कहन कैसरिया सहर आलक। उमन राइजपाल फेलिक्स केर पासे पौलुस केर बिरोध माहने सिकाइत करलयँ। 2 जखन पौलुस के हाजिर करल गेलक, तखन तिरतुल्लुस उके दोस लागात के कहलक, "ए महामहिम फेलिक्स, तोर चलते हामरेक देस मेहेन बेजाइन समय तक सान्ति बनल आहे, तोर बेस सोंच बिचार केर चलते देस मेहेन बेजाइन सुधार केर काम होय आहे। 3 इ सउब काथा के हामरे सउब ताहाँ आर सउब रकम लेक बेजाइन धन्यबाद सहित मानिला। 4 मोयँ तोहरेक बेसी समय नाई ले चाहँला, बल्कि मोयँ अरजी करँला कि किरपा कइर कहन हामरेक दुइ-चाइर सब्द सुइन लेवा। 5 काथा एसन हेके कि इ लोग टा बेजाइन हुड़दंग करइया हेके आर गोटा दुनियाक यहूदी लोग गिला मेहेन फुट करेला आर ईसु नासरी नामेक कुपन्थेक नेता हेके। 6 आर एतनाइ नाहीं ई लोग टा मन्दिर कोउ भोस्टो करेक चेस्टा करलक, सेतेहें हामरे इके धोरली। [हामरे इकर फयसला आपन नियम मोताबिक करे चाहिला। 7 किन्तु सिपाही गिलाक सरदार लूसियास हामरेक हाथ लेक मोठ जबरी उके लुइट लेलक 8 आर मुदइ गिला के तोर ताहाँ आनेक तेहें हुकूम देलक।]a इ सउब काथा गिलाक तेहें हामरे उकर उपरे दोस लागात रही, तोयँ निजेइ उके पूछ-ताछ कइर कहन इ सत टाके जाइन लेबे।" 9 यहूदी गिलाउ इ केंस माहान उकर संग दे कहन दावा करलयँ, हों, इ काथा टा एसनेइ हेके।
पौलुस निजे के बाँचायेक तेहें राइजपाल पासे काथा कहेक
10 जखन राइजपाल पौलुस के काथा कहेक तेहें कहलक, तखन पौलुस कहे लागलक, "मोयँ जानँला कि तोयँ बेजाइन बछर लेक इ देसेक लोग गिलाक फयसला करते आहीस, सेतेहें मोयँ निजेक बचाव केर तेहें कहेक मेहेन खुस आहँ। 11 तोयँ खुदे पाता लागाय पारिस, कि जखन लेक मोयँ यरुसलेम मेहेन आराधना करेक तेहें आय आहँ, सेटा मोर बारो दिन लेक बेसी दिन नाई होय आहे। 12 इमन मोके ना तो मन्दिर मेहेन , ना तो आराधनालय मेहेन, ना तो सहर मेहेन केकरो संगे बाद बिबाद करत के चाहे लोग गिला के हुड़दंग खातिर भड़कात के पाय आहयँ। 13 आर ना तो इमन जोन काथा लेक मोके एखन दोस लागातयँ, उटा के सत साबित करे पारबयँ।
14 किन्तु मोयँ तोर पासे माइन लेतहँ कि मोयँ ओहे डहर केर मोताबिक परमेसर केर सेवा करोतहँ, जेटाके इमन खराब डहर कहोतयँ। आर जोन काथा गिला मूसा केर नियम आर भबिस्यबक्ता गिलाक किताबे लिखल आहे, सेटाक उपरे मोयँ बिसास करँला। 15 आर जेसन इमन बिसास करयँला ओसने मोयों परमेसर उपरे बिसास करँला कि धरमी आर अधरमी सोभे केरेइ जी उठेक होई। 16 सेतेहें मोयों एसन जीबन बितायेक चेस्टा करँला जेटा लेक परमेसर आर मानुस केर नजेइरे दोसीदार नाई रहँका। 17 मोयँ ढेइर बछर बादे आपन लोग गिला के मदइत करेक तेहें दान पयसा पहँचायेक आर परमेसर केर खातिर बलि चेढ़ाय यरुसलेम आय रहँ। 18 जखन मोयँ बलि चेढ़ात रहँ, सेखन मोर दोस लागाइया गिला मोके मंदिर मेहेन देखलयँ। मोयँ उमनेक नियम मोताबिक सुद्ध होयेक नियम पूरा कइर रहँ। मोर संगे बेसी लोगेक भीड़ नाई रहे आर कोनो हुड़दंग नाई होत रहे। 19 किन्तु आसिया लेक आल थोड़ेक यहूदी गिला रहयँ, जदि उमनेक पासे मोर बिरोध मेहेन कोनो काथा आहे, होले उमन तोर पासे आतयँ आर मोर उपरे दोस लागातयँ। 20 चाहे इमन निजेइ कहुन, जखन मोयँ बोड़े सभा मेहेन ठाड़ होय रहँ, सेखन उमन मोर माहान कोन टा दोस पालयँ? 21 केबल मोयँ एकेटा काथा उमनेक मांझे ठाड़ होय कहन आंटे कइह रहँ कि आइज मोर तोहरेक पासे मोरल गिला केर बाँइच उठेक बारे फयसला करल जातेहे।"
22 लेकिन फेलिक्स राइजपाल परभु केर डहर केर बारे बेस निहार जानत रहे। सेतेहें ऊ एसन कइह कहन मोकदमा केर सुनवाई टाके टाइल देलक, "जखन पालटन गिलाक सरदार लूसियास आई, तखन इटा केर फयसला करमूँ।" 23 ऊ कप्तान टाके हुकूम देलक कि पौलुस के थोड़ेक छूट दे कहन उकर पाहरा करबा। आर उकर संगी गिला के उकर सेबा सुसार करेक तेहें माना ना करबा।
फेलिक्स आर द्रुसिल्ला केर पासे पौलुस के डाकल गेलक
24 थोड़ेक दिन बादे फेलिक्स आपन घरइया द्रुसिल्ला के जे यहूदी जाइतेक रहे, उके संगे लेले आनलक आर पौलुस के डाइक आनुवाय कहन उकर काथा के सुनलयँ। पौलुस उमन के ईसु मसीह माहान बिसास करेक बारे कइह देलक। 25 आर जखन पौलुस धारमिकता, निजे के काबुवे राखेक आर भबिस्य मेहेन होवइया फयसला केर बारे कहत रहे, तखन फेलिक्स डरे उके कहलक, "एखन तोयँ जा, मोका पावाइ होले मोयँ तोके फिन डाकमूँ।" 26 फेलिक्स पौलुस लेक घूस पायेक आसराउ करत रहे, सेतेहें ऊ पौलुस के समय-समय मेहेन डाइक कहन उकर संगे गोल्फो करत रहे। 27 दुइ बछर बितल बादे फेलिक्स केर जायगाय पुरकियुस फेस्तुस राइजपाल केर पद पाय कहन आलक। फेलिक्स यहूदी गिला के खुस करेक हिंछाय पौलुस के जेहेल माहनेइ छोइड़ कहन गेलक।