25
पौलुस के नावा राइजपाल केर पासे लानल गेलक
1 फेस्तुस यहूदिया राइज मेहेन राइजपाल बनेक लेक तीन दिनेक बादे, ऊ कैसरिया सहर लेक यरुसलेम सहर गेलक। 2 हुआँ माहायाजक गिला आर यहूदी नेता गिला उकर पासे आलयँ आर पौलुस केर बिरोध माहने सिकाइत करलयँ । 3 आर उकर लेक अरजी करलयँ कि पौलुस के यरुसलेम आनुवाउक। काहेकि उमन के हामला करेक जोजना रहे कि पौलुस के आनत खोने डहरेइ माइर मोराब, 4 किन्तु फेस्तुस जबाब देलक, “पौलुस कैसरिया केर जेहेल मेहेन बन्द आहे आर मोयँ खुद हुँआ चाँड़ेइ जातहँ।” 5 फिन कहलक, “तोहरेक मइधे थोड़ेक बोड़े नेता गिला के मोर संगे पइठावा आर जदि पौलुस कोनो गलत काम कइर आहे, होले उमन उकर बिरोध माहने दोस लागाउन।” 6 उमनेक संगे आठ दस दिन रहल बादे फेस्तुस कैसरिया सहर घुइर आलक। आर दोसर दिन ऊ कोट मेहेन बोइस कहन पौलुस के हाजिर करेक हुकूम देलक। 7 जखन पौलुस कोट माहने हाजिर होलक, तखन यरुसलेम लेक आल यहूदी गिला उकर चाइरो धार ठाड़ होय कहन ढेइर झन जबर दोस लागालयँ जेटा के उमन साबित करे नाई पारत रहयँ। 8 किन्तु पौलुस निजे के बाँचायेक तेहें कहलक, “मोयँ ना तो यहूदी गिलाक नियम केर बिरोध मेहेन, ना तो मन्दिर केर बिरोध मेहेन आर न तो रोमी सम्राट केर बिरोध मेहेन कोनो गलत काम कइर आहँ।” 9 तखन फेस्तुस यहूदी गिला के खुस करेक हिंछाय पौलुस के पुछलक, “का तोयँ चाहबे कि यरुसलेम मेहेन जाय कहन मोर पासे तोर इ काथा गिलाक फयसला टा करल जाउक। 10 किन्तु पौलुस कहलक, “एखन मोयँ रोमी सम्राट केर कोट मेहेन ठाड़ आहँ, मोर केंस केर फयसला हियाँइ होयेक चाही। मोयँ यहूदी गिला केर कोनो गुनाह नाई कइर आहँ, इटा के तोयँ बेस निहार जानिसला। 11 जदि मोयँ दोसीदार हेकँ आर मिरतु दन्ड पावायेक निहार कोनो गलत काम कइर आहँ, होले मोयँ मोरेक तेहें तेयार आहँ। किन्तु जदि जेटा उमन मोर उपरे दोस लागातयँ, सेटा सत साबित नाई होलक, होले केउ मोके उमनेक हाथे जिमा नाई करे पारे। मोयँ रोमी सम्राट केर दोहाई देतहँ।” 12 फेस्तुस आपन सलाहकार गिलाक साभा मेहेन सलाह कइर कहन जबाब देलक, “तोयँ रोमी सम्राट के दोहाई देहिस, सेतेहें तोयँ रोमी सम्राट पासेइ जाबे।”
राजा अग्रिप्पा केर सामने पौलुस
13 थोड़ेक दिन बितल बादे राजा अग्रिप्पा आर उकर बहिन बिरनीके दूइयो झन फेस्तुस संग भेंट करेक तेहें कैसरिया सहर मेहेन आलयँ। 14 हुआँ उमन केर ढेइर दिन रहल बादे फेस्तुस पौलुस केर बारे राजा के कइह देलक, “हियाँ एकटा लोग आहे जेके फेलिक्स जेहेल मेहेन बन्दे छोइड़ आहे। 15 जखन मोयँ यरुसलेम गेलँ, सेखन माहायाजक आर यहूदी पुरना पंच गिला हामरेक ताहाँ आय कहन उकर उपरे दोस लागालयँ आर उमनेक मांग रहे कि पौलुस के मिरतु दन्ड देल जाउक। 16 किन्तु मोयँ उमने के जबाब देलँ, रोमी गिला केर कानून मोताबिक नेखे कि जखन तक कोट के आपन मुदाई केर पासे ठाड़ होय कहन निजे के बाँचायेक तेहें जबाब देक मोका नाइ मिली, तखन तक कोनो लोग के साजा देक तेहें जिमा नाई देल जायला। 17 सेतेहें जखन महायाजक आर पुरना पंच गिला हियाँ जामा होलयँ तो मोयँ तनिको देरी नाइ करलँ आर दोसर दिने अदालत मेहेन बोइसलँ आर उ लोग टाके हाजिर करेक हुकुम देलँ।
18 जखन उकर मुदाई दोस लागाय तेहें ठाड़ होलयँ, तो जेसन मोयँ सोंचत रहँ ओसन उमन कोनो एसन बोड़े दोस नाई लागालयँ। 19 किन्तु उमनेक दोस तो निजेक धरम केर थोड़ेक काथा आर ईसु नाम केर एकटा लोग केर बारे रहे, जे मोइर जाय रहे लेकिन पौलुस उके जियँत होयेक दावा करोतेहे। 20 मोयँ बुझे नाइ पात रहँ कि इ मामला केर छान बीन का निहार करमुँ। सेतेहें मोयँ पौलुस के पुछलँ, ‘का तोयँ यरुसलेम जायेक खोजबे ताकि हुँआ मोयँ तोर उपरे लागल मोकदमा के फयसला करे पारँ?’ 21 किन्तु जखन पौलुस दोहाइ देलक कि उकर मोकदमा केर फयसला सम्राट पासेइ होउक, सेखन मोयँ हुकुम देलँ कि जबतक उके सम्राट ताहाँ नाइ पोइठाम तब तक उके बेस निहार पाहरा मेहेन राखल जाउक।” 22 तखन अग्रिप्पा फेस्तुस के कहलक, “मोयों ऊ लोग टाकेर काथा उकर मुँह लेक सुने चाहोलाँ।” फेस्तुस कहलक, “तोयँ काइल उकर काथा सुइन लेबे।” 23 सेतेहें दोसर दिन जखन अग्रिप्पा आर बिरनीके सपइर कहन धूम-धाम लेक आलयँ तो पालटन केर सरदार आर नगर केर गनमान्य लोग गिला संग सभा घरे सामालयँ। तखन फेस्तुस हुकुम देलक आर पौलुस के हुआँ आनल गेलक। 24 फेस्तुस कहलक, "ए राजा अग्रिप्पा आर हियाँ आवल सउब लोग गिला, ई लोग टाके तोहरे देखोतहा, जेकर बारे गोटा यहुदी समाज आर यरुसलेम सहर मेहेन आर हियाँउ आँटे गुइल कइर कहन मांग करते आहयँ कि ई लोग टाके आरो जियँत रहेक दोरकार नेखे। 25 किन्तु मोयँ पुछताछ कइर कहन कोनो एसन दोस नाइ पालँ कि इके मिरतु दन्ड देल जाउक, लेकिन ऊ निजेइ माहाराजा के अरजी करलक, सेखन मोयँ उके उकर ताहाँ पइठायेक तेहें फयसला करलँ। 26 किन्तु माहाराजा के लिखेक तेहें मोयँ उकर बारे कोनो खास काथा नाइ पालँ। सेतेहें मोयँ उके तोर पासे आर खास कइर कहन ए राजा अग्रिप्पा तोर पासे आइन हँ कि पुछताछ करल बादे मोके कोनो लिखेक काथा पावाउक। 27 काहेकि जोन दोस टा उकर उपरे लागाल गेलक, सेटाके ना कइह दे कहन माहाराजा ताहाँ पइठायेक मोके ठीक नाई लागलक।''