26
राजा अग्रिप्पा केर पासे पौलुस
1 तखन राजा अग्रिप्पा पौलुस के कहलक, “तोके निजेक बचाव खातिर कहेक मोका देल जातेहे।" इटाय पौलुस हाथ लेक इसारा कइर कहन कहे लागलक: 2 "ए राजा अग्रिप्पा, यहूदी लोग गिला मोर उपरे जोतना दोस लागा तहयँ, आइज तोर पासे उटा केर जबाब देक तेहें मोयँ निजे के भाइगमान बुझे पातहँ। 3 खास कइर कहन एहे तेहें कि तोयँ यहूदी गिला केर रीति-रिवाज आर बिबाद गिला के बेस निहार जानिसला, मोयँ तोर लेक अरजी करोतहँ कि धीरज धइर कहन मोर काथा टाके सुनल जाउक।
4 सउब यहूदी गिला बेस निहार जानयँला, कि मोयँ का रकम छोटे खोन लेक आपन जाइत भाइयेक मांझे यरुसलेम मेहेन जीबन बितावँला। 5 मोयँ सउब लेक बेसी खांटी यहूदी धरम के मानोइया फरीसी हेकँ आर ओहे निहारे जीबन बिताय आहँ। उमन मोके सुरु लेकेइ जानयँला। जदि उमन इटाक तेहें गोहा दे चाहबयँ, होले दे पारयँ। 6 आर एखन मोर ओहे आसा टाकेर चलते फयसला करल जातेहे, जे वादा परमेसर हामरेक आजा दादा गिला संगे कइर रहे। 7 एहे वादा टा पूरा होयेक आसा करिला आर हामरेक यहूदी केर बारो गोतरेक लोग गिला पूरा मन लागाय कहन परमेसर केर सेबा दिन राइत करते आ तहयँ। आर ए राजा, इटा केरे बारे यहूदी गिला मोर उपरे दोस लागा तहयँ। 8 तोहरे इ काथा टाके काहे बिसास नाई कोरोताहा कि परमेसर मोरल लोग को जीयँत करेला?
9 मोयों मन मेहेन सोंइच रहँ कि नासरत सहर केर ईसु केर नामे बिरोध मेहेन मोके बेजाइन बेसी काम करेक चाही। 10 आर मोयँ यरुसलेम मेहेन एसने काम करलँ, आर माहायाजक लेक अधिकार पाय कहन मोयँ बेजाइन बिसासी लोग गिला के जेहेले बन्द कइर देलँ। आर जखन उमन माइर मोराल जात रहयँ तखन मोयों उमनेक बिरोध माहनेइ सलाह देत रहँ। 11 आर मोयँ कोयो धंव आराधनालय गिलाय जाय-जाय कहन सातालँ आर मोठजबरी निन्दा करुवात रहँ। एतना तक कि मोयँ खिंसे पागलाय जाय रहँ कि दोसर सहर माहनोउ जाय कहन बिसासी गिला के सातात रहँ।
पौलुस केर निजेक जीबन बदलेक बखान करेक
12 एहे धुने जखन मोयँ एक दिन महायाजक लेक अधिकार पाय कहन दमिस्क सहर जात रहँ, 13 सेखन ए राजा, करीबन दुपहर केर समये डहरे मोयँ आकास लेक सुरुज केर आलो लेक बेसी एकाटा आलो देखलँ जे मोर आर मोर संगी गिलाक चाइरो धार चमकत रहे। 14 आर हामरे सउब झन भुँये गिर गेली। फिन मोयँ इब्रानी भासाय एकटा आवाज सुने पालँ, 'ए साऊल, ए साऊल, तोयँ मोके काहे सताइसला? मोर बिरोध माहने कदम उठाय कहन तोयँ निजे के कोस्टो मेहेन डालोतिस।' 15 सेखने मोयँ पुछलँ, 'ए परभु, तोयँ के हेकिस?' परभु कहलक , 'मोयँ ईसु हेकँ, जेके तोयँ सताइसला।' 16 किन्तु एबार उठ, आपन गोड़े ठाड़ होइन, मोयँ तोर संगे एहे तेहें देखा होलँ कि जेटा तोयँ देखले आर बादे आरो मोयँ देखाय देमूँ, सेटा केर सेबा करइया आर गोहा बनामुँ। 17 मोयँ तोके तोर लोग लेक आर अनजाइत लेको बचाते रहमुँ। मोयँ तोके उमनेक पासे एहे तेहें पइठातहँ, 18 कि तोयँ उमनेक आत्मिक आँइख के खोइल दे ताकि उमन आन्धार लेक आलो बाटे आर सैतान के छोइड़ कहन परमेसर बाटे घुइर आउन तोबे गानी उमन पाप लेक छमा पाबयँ आर जे गिला मोर उपरे बिसास कइर कहन पबित्र करल जाय आहयँ उमनेक संगे अधिकार पाबयँ।'
पौलुस केर निजेक कामेक बारे बखान करेक
19 सेतेहें ए राजा अग्रिप्पा, मोयँ उ देखल काथा टाके जेटा सरग लेक मोके मिल रहे, उटा के अना कानी करेक उचित नाई बुझलँ। 20 मोयँ सउब लेक पहिल दमिस्क सहर मेहेन, फिन यरुसलेम आर गोटा यहूदिया राइजे आर अनजाइतेक लोग गिला के समझाते रहलँ, कि पाप काम के छोइड़ कहन परमेसर बाटे घुइर आवा आर इटा के आपन कामेक दाराए साबित करा। 21 एहे चलते यहूदी गिला मोके मन्दिर मेहेन धोइर कहन मोरायेक चेस्टा करत रहयँ। 22 किन्तु परमेसर केर साहेता लेक आइज तक जियँत आहँ, आर मोयँ छोटे बोड़े सउब लोगेक पासे ठाड़ होय कहन हियाँ गोहाइ देवँला आर जेटा के मूसा भबिस्यबक्ता आर परमेसर केर दोसर भबिस्यबक्ता गिला कइह आहयँ सेटा के छोइड़ कहन कोनो नाई कहँला। 23 भबिस्यबक्ता गिला कइह आहयँ कि परमेसर केर अभिसेक करल लोग के दुख उठायेक होई आर उहे सउब लेक पहिल मोरल लोग गिला लेक बाँइच उठी आर आपन लोगेक मांझे आर अनजाइतेक लोग गिला मांझे पापे केर दन्ड लेक छुटकारा केर सामाचार परचार करी।"
24 जखन पौलुस निजे के बचाव केर खातिर एसन कहत रहे, तखन फेस्तुस दोमे आँटे कहलक, “ए पौलुस, तोयँ पागला हेकिस! तोर सीख टा सांगी होलक सेतेहें तोयँ पागलाय जायहिस।" 25 किन्तु पौलुस जबाब देलक, "ए महामहिम फेस्तुस, मोयँ पागला ना लागँ, मोयँ सत काथा कहँला आर इटा केर पाका मतलब आहे।' 26 इ काथा के राजा निजेइ जानेला, जेकर पासे मोयँ खुलमखुला काथा कहे पारोतँ, मोके बिसास आहे आर ई काथा गिला एकोटा उटा लेक गुपुत नेखे, काहेकि इ सउब घटना कोनो एकटा कोनाय नाई होय आहे।" 27 "ए राजा अग्रिप्पा, का तोयँ भबिस्यबक्ता गिलाक काथा के बिसास करिसला? हों, मोयँ जानँला कि तोयँ बिसास करिसला।” 28 तखन अग्रिप्पा पौलुस के जबाब देलक, “तोयँ रचिक टा काथा समझाय कहन मोके मसीही बनाय खोजिसला।" 29 पौलुस कहलक, "रचिक टा लेक चाहे बेसी लेक, परमेसर लेक मोर इटा बिनती आहे कि केबल तोयँ नाहीं बल्कि जोतिक लोग गिला आइज मोर काथा के सुनयँला, उमने सउब इ बेड़ी टा लेक छुइट कहन मोर रकम होय जाउन।"
30 पौलुस केर इ काथा टा सुइन कहन राजा ठाड़ होलक, तखन राइजपाल, बेरनिके आर उकर संगे जोतिक लोग बोइसल रहयँ सउब ठाड़ होय गेलयँ। 31 उमन सभा सिराल बादे एक दोसर लेक गोल्फो करे लागलयँ आर कहलयँ, "इ लोग टा मिरतु दन्ड चाहे जेहेले बन्द करेक निहार कोनो एसन काम नाई कइर आहे।" 32 अग्रिप्पा राजा फेस्तुस के कहलक, "जदि इ लोग टा कैसर केर दोहाइ नाई देतलक होले, हियाँ लेकेइ छुटतक होतक।"