24
ईसु मइर कहन बाँइच उठलक
1 हाप्ता केर पहिल दिन एतवार के भिन्सारेइ ऊ बेटी छुवा गिला जेड़ी-बुटी लेक बेस बासायेक मासला गिला के तेयार करलयँ आर उटा के उकर गाते देक तेहें ले कहन मुरदा गाढ़ा ठीन आलयँ। 2 तो उमने जे पाखना टाय मुरदा गाढ़ा के ढाँपल रहे, ऊ पाखना टाके गुचाल पालयँ। 3 सेखन भीतरे सामाय कहन देखलयँ, तो हुवाँ परभु ईसु केर मुरदार टाके नाइ पालयँ। 4 इटा देइख कहन सउब भकुवाय गेलयँ, ठीक ओहे खने देखा, दुई टा आदमी चारका झलकदार लुगा पिन्धल रहयँ, उमनेक पासे आय कहन ठाड़ होलयँ। 5 तखन ऊ बेटी छुवा गिला दोमे डारालयँ आर हेंठ मुड़ कइर राखलयँ। तखन ऊ अदमी गिला कहलयँ, कि “तोहरे जीयँत अदमी टाके मुरदार गाढ़ाय काहे खोजो ताहा? 6 ऊ हियाँ नेखे, काहेकि ऊ तो बाँइच उइठ आहे। इयाद करा कि जखन तोहरे गलील प्रदेस माहने रहा सेखन तोहरे के का कइह दे रहे। 7 कि मोयँ जे मानुस केर बेटा हेकँ, मोके पापी लोगेक हाँथे धरुवाल जाई आर कुरुसa माहने चेढ़ाल जाई, आर तीसरा दिने फिन बाँइच उठमूँ, इटा होयेक दरकार आहे।” 8 तखन उमन के ईसु केर कहल काथा टा मने होलक। 9 जखन उमने मुरदा गाढ़ा लेक घुरलयँ तखन ईसु केर गारो टा चेला गिला के आर दोसर गिला कोउ सभे के ई घटना केर बारे सुनालयँ। 10 जे गिला ईसु केर प्रेरितb गिला के कइह दे रहयँ, उमने मरियम मगदलीनी, योअन्ना, आर याकूब केर मांय मरियम, आर उमन संगे आरो बेटी छुवा गिलाउ रहयँ। 11 किन्तु बेटी छुवा गिला केर काथा टाके प्रेरित गिला के कोहनी निहार लागलक, आर उमनेक काथा टाके बिसास नाइ करलयँ। 12 लेकिन पतरस उइठ कहन मुरदार गाढ़ा कुइद कहन गेलक, आर निहरी कहन देखलक तो केबल उकर कफन टाके देइख पालक। जे घटना होय रहे उटा लेक ऊ अचम्भित होय कहन घर चइल गेलक।
दुई टा चेला संगे ईसु देखा होलक
13 ओहे दिन चेला गिला मइधे दुई झन इम्माउस गाँव जात रहयँ, जे यरुसालेम लेक लगभग सात कोस धूरे रहे। 14 ऊ दुइयो झन जे ईसु केर संगे घटना होय रहे, उकर बारे आपस माहने गोल्फो करते के जात रहयँ। 15 आर जखन उमने आपस माहने गोल्फो आर पूछा-पूछी होत रहयँ, तो ईसु निजे उमनेक ठीन आय कहन उमनेक संगे संगे चले लागलक। 16 किन्तु उमने ईसु के आपन आँइखे देखत कोउ उके चिन्हे नाइ पारलयँ। 17 ईसु उमन के पूछलक, “आपस माहने चलते चलते का गोल्फो करेक लाइग आहा?” तो उमने उदास होय कहन ठड़ुवालयँ। 18 इटा सुइन कहन एक झन जेकर नाम क्लियोपास रहे, ऊ कहलक, “का तोयँ नाइ जानिसला कि काइल परसु का का घटना होलक, का यरुसालेम माहने तोहें एकला प्रदेसी हेकिस?” जे तोयँ नाइ जानिसला, आरो गिला तो सउब जानयँला। 19 सेखन ईसु उमने के पूछलक, “का एसन घटना होलक?” उमने उके कहलयँ, “नासरत गाँवेक ईसु केर बारे जे परमेसर आर सउब लोगेक नजइरे निपुन भबिस्यबक्ता रहे। ऊ चमत्कार केर काम आर उपदेस देत रहे। 20 किन्तु उके हामरेक प्रधान याजक आर नेता गिला धरुवालयँ, कि उके मिरतु दंड़ केर आग्यां देल जाउक, आर उके कुरुस माहने चेड़ुवाय देलयँ। 21 ई घटना टा तीन दिन पहिले होय रहे, हामरेक तो आसरा रहे कि ओहे इसराइली के छुटकारा देई, किन्तु एसन नाइ होलक, 22 आर एसनो होलक जे हामरेक मइधे कयटा बेटी छुवा गिला भिनसारे मुरदार गाढ़ा ठीन जाय रहयँ, उमनेक काथा गिला सुइन कहन हामरे के ताजूब होलक। 23 उमने मुरदार गाढ़ा लेक घुइर कहन हामरे के कहे लागलयँ कि हामरे ईसु केर मुरदार टाके नाइ पाली, किन्तु सरग दूत केर दरसन पाली, आर सरग दूत गिला हामरे के कहलयँ, ईसु जीयँत आहे! 24 तखन हामरेक थोड़ेक संगी गिलाउ मुरदार गाढ़ाय देखे गेलयँ, आर जेसन बेटी छुवा गिला कइह रहयँ ओसने पालयँ किन्तु ईसु के नाइ देखे पालयँ।” 25 तखन ऊ उमने के कहलक, “ए मुरुख सउब! तोहरे भबिस्यबक्ता गिला मसीह केर बारे जे कोनो लिख आहयँ उके बिसास करेक तेहें काहे तेयार नाइ होवाला? 26 का तोहरे नाइ जानाला कि मसीह के आपन महिमा पायेक पहिले दुःख उठायेक दरकार रहे?” 27 ईसु केर बारे जे मूसा आर दोसरा भबिस्यबक्ता गिला धरम शास्त्र माहने लिख आहयँ, सेटाक अर्थ उमने के समझालक। 28 सेइ करत के उमने इम्माउस गाँव केर पास पहँचोलयँ, जाहाँ उमने जात रहयँ, उकर हाव-भाव देइख कहन उमने के एसन लागलक कि ऊ आघु बाटे जाय खोजत रहे। 29 किन्तु उमने उके जायेक माना करलयँ आर कहलयँ, “हामरेक संगे रइह लेहिन, काहेकि साँझ होय जा तेहे आर बेराउ डुबो तेहे।” तखन ईसु उमनेक घर गेलक। 30 जखन ऊ उमनेक संगे खाय बइसलक, तखन ऊ रोटी ले कहन परमेसर के धन्यबाद देलक आर रोटी टा खेंचा कइर कहन उमने के देक लागलक। 31 सेखन उमने ईसु के चिन्हे पारलयँ। लेकिन ऊ उमनेक नजइर लेक छन होलक। 32 उमने आपस मेहेन कहलयँ, “जखन ऊ डहर माहने हामरेक संगे गोल्फो करत रहे आर धरम शास्त्र केर अर्थ के समझात रहे, तखन का हामरेक मन खुसीये नाइ भरलक?” 33 उमने ओहे समय यरुसालेम घुइर आलयँ, आर ऊ गारो टा चेला आर उमन केर संगी गिला के जामा होल पालयँ। 34 चेला गिला ऊ दुइयो झन के बातालयँ, “सते परभु बाँइच उइठ आहे, सिमन संगोउ देखा होय आहे।” 35 तखन उमने डहरेक सउब काथा गिला के जे इम्माउस गाँव लेक आत खने होय रहे, आर रोटी खेंचा कइर कहन बाटेक खने का रकम ईसु के चिन्हे पारलयँ, सेइ काथा टाके चेला गिला के कइह देलयँ।
ईसु आपन चेला गिला संगे देखा होलक
36 आर उमने ई काथा टा कहते रहयँ, कि ईसु निजेइ उमनेक मांझे आय कहन ठाड़ होलक आर उमने के कहलक, “तोहरे के परमेसर सान्ति देउक।” 37 किन्तु चेला गिला उके भूत समझलयँ आर डरे आकबाकालयँ। 38 सेखन ईसु उमने के कहलक, “तोहरे, काहे डारावाला? आर तोहरे मने काहे संदेह कराला? 39 मोर हाँथ, गोड़ेक चिन्हा देखा, मोयँ ओहे ईसु हेकँ। मोके छूई कहन देखा, काहेकि भूत केर हाड़-माँस नाइ रहेला, मोर गाते तो आहे, जेटा तोहरे देखाला।” 40 एसन कइह कहन ऊ आपन हाँथ-गोड़ गिला उमने के देखाय देलक। 41 तखन रीझे बेयाकुल होलयँ, होलोउ उमने के बिसास नाइ होलक, आर उमने भाकुवाय गेलयँ, तो ऊ उमने के पूछलक, “का तोहरेक ठीन कोनो खायेक आहे?” 42 तखन उमने उके एक खाँड़ा पोड़ाल माछ देलयँ। 43 तो ईसु ले कहन उमनेक पासेइ खालक। 44 ईसु उमने के कहलक, “तोहरे के इयाद नाइखे! जखन मोयँ पहिले तोहरेक संगे रहँ, तखन मोयँ तोहरे के कइह दे रहँ कि मूसा भबिस्यबक्त आर दोसर भबिस्यबक्ता गिला केर किताब माहने आर भजन संहिता माहने मोर बारे जतना लिखल आहे, ऊ आबइसो सउब पूरा होई।” 45 तखन ईसु उमने के धरम शास्त्र केर लिखल काथा के समझेक तेहें बुध्दि देलक। 46 आर उमने के कहलक, “धरम शास्त्र माहने एसन लिखल आहे कि मसीह दुःख उठाई, आर तीसर दिने ऊ मरल लेक फिन बाँइच उठी, 47 आर इटाउ लिखल आहे कि ईसु केर चेला गिला यरुसालेम सहर लेक संसार केर सउब जाइते परचार करबयँ, ‘सुना सउब लोग गिला जे आपन पाप लेक मन बदलोबा सेकर पाप के परमेसर छमा करी।’ 48 मोर संगे जेटा होय आहे सेटा तोहरे देइख आहा। सेइ तेहें इटा तोहरे सउब के बातावा। 49 आर देखा, जेकर वादा मोर बाप परमेसर कइर आहे, सेटा के मोयँ तोहरे के पूरा कइर देमूँ आर जखन तक सरग लेक साक्ति नाइ पाबा, तखन तक तोहरे एहे नगर माहने रहबा।”
ईसु के सरग उठाल गेलक
50 तेकर बादे ईसु उमने के यरुसालेम लेक बाहिर बैतनियाह गाँव धार लेगालक, आर आपन हाँथ उठाय कहन उमने के आसिरबाद देलक, 51 आर उमने के आसिरबाद देत देत केइ उमन लेक ऊ अलग होय गेलक, आर उके सरग उठाल गेलक। 52 तखन उमने माथा टेइक कहन उके गोड़ लागलयँ आर बेजाइन रीझे यरुसालेम घुइर गेलयँ। 53 आर उमने सउब दिन मंदिर माहने जामा होय कहन परमेसर केर इस्तुति करते रहलयँ।