23
पिलातुस केर पासे ईसु के लेगाल गेलक
1 साभा केर लोग गिला ईसु के राइजपाल पिलातुस केर पासे लेगलयँ। 2 आर उमने उकर ऊपरे दोस लागाय कहन कहलयँ, “हामरे इके यहूदी लोग गिला के हुचकात के पाय आही, आर सामराट के मासुल देक लेक माना करत के, आर आपन के मसीह यानि राजा कहत के सुइन आही।” 3 तखन राइजपाल पिलातुस ईसु के पूछलक, “का तोयँ यहूदी गिला केर राजा हेकिस?” सेखन ईसु उके जबाब देलक, “तोयँ निजेइ कहतिस।” 4 तखन राइजपाल पिलातुस टा प्रधान याजक आर लोग गिला के कहलक, “मोयँ ई मानुस केर ऊपरे कोनो दोस नाइ पा तहँ।” 5 लेकिन उमने आरोइ जोर दे कहन कहे लागलयँ, “ईसु गलील प्रदेस लेक यरुसालेम सहर तक गोटा यहूदिया राइज माहने उपदेस दे कहन लोग गिला के भड़कायला।” 6 एसन काथा टाके सुइन कहन राइजपाल पिलातुस उमने के पूछलक, “का ई मानुस टा गलील प्रदेस केर हेके?” 7 आर ऊ जानलक, कि ईसु हेरोदेस राजा केर रइयत हेके, तो उके हेरोदेस राजा ठीन पइठाय देलक। जे उखने यरुसालेम आल रहे।
हेरोदेस केर पासे ईसु के लेगाल गेलक
8 राजा हेरोदेस ईसु के देइख कहन बेजाइन खुस होलक। काहेकि उकर चमत्कार काम केर बारे सुइन रहे, सेइ तेहें उके ईसु के ढरेइर दिन पहिल लेक देखेक केरउ हिंछा रहे। आर ऊ चाहत रहे कि कोनो चमत्कार काम कइर कहन देखाउक। 9 राजा हेरोदेस ईसु के ढेइर रकम केर सवाल करलक, किन्तु ईसु चुपेइ रहलक, उके कोनो जबाब नाइ देलक। 10 प्रधान याजक आर शास्त्री ग्यानी गिला उकर ऊपरे जबरजस्ती दोस लागाते रहलयँ। 11 तखन राजा हेरोदेस आपन सिपाही गिला केर संगे ईसु केर बेजति कइर कहन माजाक उड़ालयँ, आर उके राज पोसाक पिन्धाय कहन राइजपाल पिलातुस ठीन वापस घुराय देलयँ। 12 राइजपाल पिलातुस आर राजा हेरोदेस केर मांझे पहिल लेक दुस्मनी रहे, किन्तु ऊ दिन लेक उमने संगी बइन गेलयँ।
पिलातुस दाराय ईसु के मिरतु दंड़ केर आग्यां
13 राइजपाल पिलातुस प्रधान याजक आर यहूदी नेता आर लोग गिला के डाइक कहन कहलक, 14 “तोहरे इके लोग गिला के हुचकाइया हेके कइह कहन मोर पासे लाइन आहा, आर देखा, मोयँ तोहरेक पासेइ इकर जाँच पड़ताल करलँ, लेकिन इकर ऊपरे तोहरे जेटा दोस दे ताहा, सेइ दोस टा एकोटा नाइ पालँ। 15 राजा हेरोदेसो इकर ऊपरे कोनो दोस नाइ पालक, आर मोर ठीन आरो पइठाय देलक, आर देखा, ईसु केर कोनो दोस नेखे कि उके मिरतु दंड़ देल जाई। 16 सेइ तेहें मोयँ उके पिटवाय कहन छोइड़ दे तहँ।” 17 (फसह परबेक मोका माहने एक टा अपराधी के छोड़ेक नियम रहे।)a 18 तखन सउब मिल कहन दोमे आंटे कहलयँ, “इके खतम कइर दे, आर हामरेक खातिर बारअब्बा के छोइड़ देहिन।” 19 ऊ लोग टा यरुसालेम माहने सरकार केर बिरोध करत खने माइर पीट आर हत्या केर केंस माहने जेहेले बन्द करल रहे। 20 राइजपाल पिलातुस ईसु के छोड़ेक खातिर आरो एक धंव लोग गिला के बुझामता करलक, 21 किन्तु केउ उकर काथा टाके नाइ मानलयँ, आर आँटे आँटे नारा लागाय लागलयँ, “कि ईसु के कुरुस माहने चेढ़ावा, कुरुस माहने चेढ़ावा!” 22 राइजपाल पिलातुस उमने के तीसरा धंव कहलक, “काहे, ऊ का एसन बुराई कइर आहे? मोयँ उकर ऊपरे मिरतु दंड़ दे केर कोनो एसन दोस नाइ पालँ! सेइ तेहें उके मोयँ पीटवाय कहन छोइड़ दे तहँ।” 23 किन्तु उमने मिल कहन आरो गुइल करे लागलयँ, “ईसु के कुरुस माहने चेढ़ाल जाउक का। उमनेक गुइल जोरदार होते गेलक, तखन राइजपाल पिलातुस के उमनेक माँग टा मानेक पड़लक।” 24 आर हुकूम देलक कि उमनेक माँग केर मोताबिक करल जाउक। 25 राइजपाल ऊ बरअब्बा के जे माइर-पीट आर हत्या केर केंस माहने जेहेले बन्द करल रहे, उके उमनेक माँग केर चलते छोइड़ देलक, आर ईसु के उमनेक हिंछा केर मोताबिक करेक तेहें उमन के जिमा देलक।
ईसु के कुरुसे चेढ़ाल गेलक
26 जखन पिलातुस केर सिपाही गिला ईसु के लेगात रहयँ, तो उमने कुरेनी सहर केर एक टा समौन नाम केर लोग टाके डहरे पालयँ। तो उमने उके धइर कहन कुरुस टा बहुवालयँ, ताकि ऊ ईसु केर पेछुवे-पेछुवे लेगुक। 27 आर दोमे लोग गिला ईसु केर पेछुवे गुड़ियालयँ, उमनेक संगे ढेइर बेटी छुवाउ रहयँ, जे उकर तेहें छाती पीट-पीट कहन काँदत रहयँ। 28 सेखन ईसु उमनेक बाटे देइख कहन कहलक, “ए गो! यरुसालेम केर बेटी सउब, मोर खातिर ना काँदा, बल्के आपन आर आपन छुवा पुता केर खातिर काँदा!” 29 काहेकि देखा, एसन बिपइत केर दिन आ तेहे, जखन लोग गिला कहबयँ, “जेकर छुवा पुता नेखयँ, आर छुवा गिला के पोसेक नाइ पड़लक। एसन बेटी छुवा गिला नसीबिया हेकयँ। 30 उखने लोग गिला पाहाड़ के कहबयँ हामरेक ऊपरे गिरीन, आर टुँगरी के कहबयँ, हामरे के ढाँइप देहिन। 31 ईसु उमन के कहलक, मोयँ जे हरिहर गाछ केर समान आहों मोर संगे एसन करयँला, तो तोहरेक संगे जे सुखल गाछ केर समान आहा का नि करबयँ?” 32 ईसु केर संगे आरो दुई टा दोसीदार कोउ मिरतु दंड़ देक खातिर लेगलयँ। 33 आर जखन उमने मिरतु दंड़ देक जायगा टा खोपड़ी कहयँला, हुवाँ पँहचालयँ। आर ईसु केर संगे ऊ दुइयो दोसीदार के, एक टाके लेंगा बाटे आर दोसरा टाके दहिना बाटे कुरुस माहने चेढ़ाय देलयँ। 34 तखन ईसु कुरुस ऊपर लेक कहलक, “ए बाप, इमने के छमा कइर देहिन, काहेकि इमन नाइ जानयँला कि हामरे का करिला।” आर सिपाही गिला परची डाललयँ आर जेकर-जेकर नामे ऊ परची टा उठलक, उमने उकर लुगा के बाँइट लेलयँ। 35 लोग गिला ठाड़ होय कहन देखत रहयँ, आर यहूदी नेता गिला ईसु केर माजाक उड़ाय कहन कहत रहयँ, “ई तो दोसर गिला के बाँचालक, जदि ई परमेसर केर पइठाल मसीह हेके, आर उकर चुनल हेके तो आपन टाके बांचाय लेउक का।” 36 आर सिपाही गिलाउ पासे आय कहन चेंका आँगूर रस उके दे कहन उकर माजाक उड़ात रहयँ, 37 “जदि तोयँ यहूदी गिला केर राजा हेकिस, तो निजेइ बाँचाय ले।” 38 आर उकर मुड़ केर ऊपरे कुरुस माहने पिलातुस लिखवाय देलक, “ई यहूदी गिला केर राजा हेके!”
एक टा दोसीदार केर मन बदइल गेलक
39 जोन दोसीदार गिला के कुरुसे चेढ़ाय रहयँ, उमनेक मइधे एकझन ईसु के निन्दा करत के कहलक, “का तोयँ परमेसर केर पइठाल मसीह ना लागिस? तो फिन आपन के आर हामरे दुयो झन के बाँचाय लेहिन!” 40 एसन सुइन कहन दोसरा दोसीदार टा उके धमकाय कहन कहलक, “का तोयँ परमेसर लेकोउ नाइ डाराइसला? तोयों तो ओहे दंड़ पा तिस, 41 हामरे तो न्याय केर मोताबिक साजा पा तिहि, काहेकि गलत काम केर तेहें हामरे साजा ठीकेइ पा तिहि, किन्तु ई तो कोनो गलत काम नाइ कइर आहे।” 42 आर दोसरा दोसीदार टा ईसु के कहलक, “ए ईसु! जखन तोयँ राइज करबे, सेखन मोकोउ इयाद राखबे।” 43 तखन ईसु उके कहलक, “सुन मोयँ तोके सँते केरेइ कह तहँ कि आइजे लेक तोयँ मोर संगे सरग माहने रहबे।”
ईसु आपन प्रान तेयाग देलक
44 आर मोटा-मोटी दिन केर बारो बाइज रहे उखोन लेक तीन बाजे तक ऊ इलाका माहने गोटाय आंधार होय गेलक। 45 सुरुज केर आलो सिराते गेलक, आर देखा, यरुसालेम केर मंदिर केर पारदा टा ऊपर लेक हेंठ तक मांझे-मांझे फाइट कहन दुई भाग होय गेलक। 46 आर ईसु दोमे आँटे डाइक कहन कहलक, “ए बाप! मोयँ आपन आत्मा के तोर हाँथे जिमा देवँला!” एसन कइह कहन ईसु आपन जीबन के तेयाग देलक। 47 ई घटना के देइख कहन रोमी सिपाही गिला केर अधिकारी टा परमेसर केर बड़ाई करलक आर कहलक, “सतेइ ई मानुस टा धरमी रहे।” 48 भीड़ केर लोग गिलाउ जे देखेक खातिर जामा होय रहयँ, उमने ई रकम घटना के देइख कहन दुःखी होलयँ, आर छाती पिटत के वापिस घुइर गेलयँ। 49 किन्तु ईसु केर जान चिन्हार, आर जे बेटी छुवा गिला गलील प्रदेस लेक उकर पेछुवे-पेछुवे गुड़ियाय कहन आय रहयँ, उमन धुरेइ ठाड़ होय कहन देखते रहयँ।
ईसु के तोपल गेलक
50-51 हुँआ एक टा युसुफ नाम केर लोग रहे, जे यहूदी राइज केर अरिमतिया गाँव केर रहे, ऊ धरमी लोग रहे, जे परमेसर केर राइज केर आयेक आसरा देखत रहे, ऊ एक टा बोड़े सभा केर सदस्य रहे तेऊ ईसु के मारुवायेक फयसला लेक खुस नाइ रहे। 52 युसुफ राइजपाल पिलातुस केर पासे जाय कहन ईसु केर मुरदा टाके तोपेक तेहें माँगलक। 53 आर ईसु के कुरुस लेक उतराय कहन कफन लुगाय ढाँइप कहन चाटाइन माहने जे लाता रकम बनाल रहे सेइ मुरदा गाढ़ाय राखलक, जेकर माहने कोनो मुरदार के पहिले नाइ राइख रहयँ। 54 आराम करेक दिन सुरु होइया रहे सेकर तेयारी केर दिन रहे। 55 ईसु केर संगे गलील लेक आल बेटी छुवा गिलाउ युसुफ केर पेछुवे-पेछुवे जाय कहन मुरदा गाढ़ा टाके देखलयँ, आर मुरदा टाके का निहार राखल गेलक सेटा कोउ देखलयँ। 56 उमने देइख कहन वापिस घुइर आलयँ आर बेस बसायेक मासला आर आँतर तेल तेयार करलयँ, आर नियम केर मोताबिक उमने परमेसर केर पबित्र दिने आराम करलयँ।