लूका 22

ईसु के धरेक तेयारी

¹ यहूदी गिला केर बिना खमीर रोटी केर परब जेके फसह परब कहल जायला, पहँचत रहे। ² प्रधान याजक आर सास्‍तर ग्‍यानी गिला ई ताक माहने रहयँ, कि ईसु के का निहार मोराब, किन्‍तु उमने लोग गिला लेक डारात रहयँ। ³ तखन बारो चेला गिला केर मइधे यहूदा इस्‍करियोती केर मने सैतान सामाय कहन उकर बिचार के बदइल देलक। ⁴ ऊ प्रधान याजक गिला आर मंदिर केर पाहरादार केर सारदार गिला केर पासे भेंट करेक तेहें गेलक। आर ईसु के उमनेक हाँथे धरुवायेक केर तेहें गुटू करलक। ⁵ उमने बेजाइन रिझे होय कहन यहूदा इस्‍करियोति के टाका-पयसा देक वादा करलयँ। ⁶ तखन ऊ उमनेक काथा के मानलक, आर मोका केर ताक माहने रहे लागलक कि जखन लोग गिला केर भीड़ नाइ रही तो ईसु के उमनेक हाँथे धरुवाय देमूँ।

फसह परब केर तेयारी

⁷ बिना खमीर रोटी केर परब केर दिन रहे, आर ऊ दिन फसह परबेक भोज केर तेहें भेड़ी केर पठरु छुवा के बलिदान देक जरुरी रहे। ⁸ ईसु एसन कइह कहन पतरस आर योहना के पइठालक, “यरुसालेम जाय कहन हामरेक खायेक तेहें फसह परब केर भोज तेयार करुन।” ⁹ तखन उमने ईसु के पूछलयँ, “तोयँ इटा हामरे के काहाँ तेयार करेक कह तिस?” ¹⁰ ऊ उमन के कहलक, “देखा, तोहरे के सहर माहने सामात केइ एक टा बेटा छुवा पानी हाँड़ी बहल पावाई। जोन घर टाय ऊ जाइ हुँवा तोहरउ उकर पेछु-पेछु जाबा, ¹¹ आर तोहरे ऊ घरेक मालिक के कहबा, गुरु तोके पुइछ आहे, ऊ कुठरी टा काहाँ आहे? जहाँ ऊ आपन चेला गिला केर संगे फसह परब मानाई। ¹² ऊ तोहरे के तेयार करल एक टा दोलान केर ऊपरे बोड़े निहार कुठरी के देखाय देई, हुँवाइ तोहरे तेयार करबा।” ¹³ उमने जाय कहन जेसन ईसु कइह रहे, ओसनेइ पालयँ, आर फसह परब मानेक खातिर तेयार करलयँ।

परभु भोज

¹⁴ जखन खायेक समय होलक, तो ईसु आपन चेला गिला केर संगे खायेक तेहें बइसलक। ¹⁵ आर ऊ उमने के कहलक, “मोके बेजाइन हिंछा रहे, कि दुःख भोगेक लेक पहिले तोहरेक संगे फसह परब मानामूँ। ¹⁶ सुना! मोयँ तोहरे के कहँला, मोर संगे होइया घटना केर दाराय फसह परब केर उद्देस टा उमनेक जीबन माहने पूरा होई, जे परमेसर के आपन राजा मानयँला। ई निहार पूरा होयेक तक मोयँ आरो फसह परब नाइ मानामूँ।” ¹⁷ एसन कइह कहन आँगूर केर रस भरल डुभी टाके लेलक, आर परमेसर के धन्यबाद देलक आर चेला गिला के कहलक, “इटा के लेवा, आर सउब पीया।” ¹⁸ मोयँ तोहरे के कहँला, जखन तक परमेसर केर राइज नाइ आई, तखन तक मोयँ आँगूरेक रस नाइ पीमूँ। ¹⁹ फिन ऊ रोटी लेलक, आर परमेसर के धन्यबाद कइर कहन खेंचा करलक, आर ऊ चेला गिला के देत के कहलक, “कि ई टा मोर गात हेके, जेके तोहरेक खातिर देल जायला, आर मोर इयाद करेक खातिर एसनेइ करते रहबा।” ²⁰ आर एहे निहारे रोटी खाल बादे ऊ डुभी लेलक, आर देत के कहलक, “ई डुभी टाय जे आँगूर केर रस आहे उटा मोर लोहू केरे रुप हेके, जेके तोहरेक तेहें बहाल जाई। इकर लेक परमेसर आर मानुस केर माझे एक टा नावा संबंध बनी। ²¹ किन्‍तु देखा, मोके धरुवाइया लोग टा मोर संगेइ खायेक बइस आहे। ²² काहेकि मोयँ मानुस केर बेटाक तेहें तो जेसन परमेसर लिख आहे ओसनेइ मोर मिरतु होई। किन्‍तु हाय! ऊ लोग केर खातिर जे मोके धरुवायला।” ²³ तखन चेला गिला आपस मेहने पुछा-पुछी होय लागलयँ, हामरेक मइधे के टा एसन काम करी।

बोड़े होयेक केर बारे बाद-बिबाद

²⁴ उमनेक मांझे बिबाद उइठ गेलक, कि हामरेक मइधे केके बोड़े मानल जायला। ²⁵ तखन ईसु उमन के कहलक, “दोसर जाइत गिला केर राजा तो आपन लोग गिला केर ऊपरे राइज करेला, आर अधिकार राखेला, तेऊ उमन के भालाई करइया कहयँला। ²⁶ किन्‍तु तोहरे एसन ना बना, बरन्‍चो तोहरेक लेक जे बोड़े लोग आहे ऊ छोटे लोग केर बराबइर बनूक, आर जे प्रधान हेके ऊ एक टा धांगर केर बराबइर बनूक का। ²⁷ एबार तोहरे कहा बोड़े के आहे? जे खायेक तेहें बइसल आहे सेटा न सेबा-सुसार करइया टा? लोगेक नजर माहने का ऊ बोड़े ना लागे जे खायेक तेहें बइस आहे? लेकिन मोयँ तोहरेक मइधे एक टा धाँगर केर बराबइर आहों। ²⁸ तोहरे जे आहा, मोर सुख आर दुःख माहने हामेसा संगे रहाला। ²⁹ जेसन मोर बाप मोके एक टा राइज करेक हक दे आहे, सेइ निहारे मोयँ तोहरे कोउ राइज करेक हक देमूँ, ³⁰ ताकि मोर राइज माहने तोहरोउ मोर संगे खाबा-पिबा, आर राइजगद्दी माहने बइस कहन इसराइल केर बारो गोत्र गिला केर न्याय करबा।”

पतरस केर इन्‍कार करेक भबिस्‍यबानी

³¹ “सिमन, ए सिमन, देख! सैतान तोहरे के गहम निहार पछइर कहन भिनु करेक तेहें परमेसर लेक माँइग आहे। ³² किन्‍तु मोयँ तोर खातिर बिनती कइर आहों कि तोर बिसास टा ना सिराउक। आर जखन तोर बिसास टा घुइर जाई तो तोयँ आरो चेला गिला कोउ बिसास माहने इसथिर करबे।” ³³ तखन पतरस उके कहलक, “ए परभु, मोयँ तोर संगे जेहेल खाना जायेक तेहें तेयार आहों, बरन्‍चो मोयँ तो तोर संगे संगे मोरेक तेहोंउ तेयार आहों।” ³⁴ तखन ईसु उके कहलक, “पतरस, मोयँ तोके कहँला, कि आइजे तोयँ खुखड़ी डाकेक लेक पहिलेइ मोके लोगेक पासे तीन धंव इन्‍कार करबे कि ईसु के नाइ जानँला।”

³⁵ फिन ईसु चेला गिला के कहलक, “जखन मोयँ तोहरे के पयसा राखेक बटुआ, थोइला, आर पिन्‍धेक खातिर दुदुई जोड़ा जुता लेगेक तेहें माना कइर कहन पइठाय रहों, सेखन का तोहरे के कोनो जिनिस केर घटी होय रहे?” उमने कहलयँ, “नाहीं! कोनो जिनिस केर घटी नाइ होय रहे।” ³⁶ तखन ईसु उमने के कहलक, किन्‍तु एबार मोयँ तोहरे के कहँला, “जेकर पासे पयसा राखेक बटुआ आर थोइला आहे, उके ले लेवा, आर जेकर ठीन तालवाइर नेखे ऊ आपन कोट बेंइच कहन एक टा तालवाइर कीन लेउक का। ³⁷ काहेकि मोयँ तोहरे के कहँला, कि धरम शास्‍त्र माहने जे लिखल आहे, उके अपराधी गिला केर संगे गिनल गेलक, ई लिखल काथा टा मोर माहने पूरा होयेक जरुरी आहे। काहेकि मोर बारे लिखल काथा टा पूरा होयेक वाला आहे।” ³⁸ तखन चेला गिला ईसु के कहलयँ, “ए परभु, देख, हियाँ दुइटा तालवाइर आहे।” सेखन ईसु कहलक, “बस बहुत होलक! मोयँ ई तालवाइर केर बारे नाइ कहतँ।”

जैतून पाहाड़े ईसु केर प्राथना

³⁹ तेकर बादे ईसु हुँआ लेक निकोइल कहन सउब दिनेक रकम जैतुन पाहाड़े गेलक, आर चेला गिलाउ उके गुड़ियालयँ। ⁴⁰ पाहाड़ माहने पहँइच कहन ईसु उमने के कहलक, “बिनती प्राथना करते रहा, ताकि परीच्छा माहने ना फाँसा।” ⁴¹ आर ईसु उमनेक लेक छिनेइग कहन रोचिक धुरे हेंठू माइड़ कहन इ रकम प्राथना करे लागलक, ⁴² “ए बाप, जदि तोर हिंछा आहे, तो ई दुःखेक डुभी टाके मोर पास लेक हटाय देहिन, सेटाउ मोर हिंछाय नाहीं! बल्‍की तोर हिंछा टाइ पूरा होवुक का।” ⁴³ तबे सरग लेक एक टा दूत आय कहन उके सक्‍ति देलक। ⁴⁴ तो आत्‍मा माहने बेयाकुल होय कहन ऊ आरो मन लगाय कहन प्राथना करे लागलक, आर उकर पसिना टा लोहू केर बोड़े-बोड़े बुन्‍द निहार भूईंये टिपकत रहे। ⁴⁵ जखन ईसु प्राथना कइर कहन उठलक, आर आपन चेला गिला केर पासे आलक तो उमने के उदास केर चलते निदाल पालक। ⁴⁶ तखन ईसु उमने के कहलक, “तोहरे काहे निंदा ताहा? उठा, प्राथना करा कि तोहरे परीक्खा माहने ना फाँसा।”

ईसु के दुसमन केर हाँथे धरुवाल गेलक

⁴⁷ ईसु चेला गिला के एसन कहत रहे, ओहे खने एक टा दोमे लोगेक भीड़ आलक, आर ईसु केर बारो टा चेला गिला लेक एक झन यहूदा इस्‍करियोति उमनेक संगे आघु-आघु आत रहे, ऊ ईसु के धरइया के चिन्हवायेक चलते चूमा करेक तेहें उकर पास आलक। ⁴⁸ सेखन ईसु उके कहलक, “ए यहूदा, का तोयँ चूमा कइर कहन मोके मानुस केर बेटा के धरुवाय चाहिसला?” ⁴⁹ उकर चेला गिला जखन जाइन गेलयँ कि एबार का होयेक वाला आहे, तो उके पुछलयँ, “ए परभु, हामरे तालवाइर चलाबिक?” ⁵⁰ एसन कहत-कहत केइ एक टा चेला महायाजक केर धाँगर ऊपरे तालवाइर चलाय कहन उकर दहिना कान टाके उड़ाय देलक। ⁵¹ एसन देइख कहन ईसु चेला गिला के कहलक, “ई सउब बन्‍द करा।” आर उकर कान के छूइ कहन बेस करलक। ⁵² आर ईसु, प्रधान याजक आर मंदिर केर पाहरादार गिला केर सारदार आर पंच लोग गिला जे उके धरेक तेहें आय रहयँ, उमने के कहलक, “का तोहरे, मोके चोर आर डाकू जाइन कहन तालवाइर आर ठेंगा ले कहन मोके धरेक तेहें आय हा? ⁵³ जखन मोयँ मंदिर माहने रोजे तोहरेक संगे रहँ, सेखन मोके धरेक नाइ पारला? किन्‍तु एखन तोहरेक समय हेके, आर अन्‍धकार केर सक्‍ति केर राइज आहे।”

पतरस ईसु के इन्‍कार करेला

⁵⁴ ईसु के उमने धइर कहन महायाजक केर घर लेगलयँ। सेखन पतरस रोचिक धूरे-धूर उकर पेछु-पेछु गुड़ियाले जात रहे। ⁵⁵ आर जखन थोड़ेक लोग गिला आनगा माहने आइग तापत रहयँ, तो पतरस टाउ उमनेक संगे आइग तापेक तेहें बइसलक। ⁵⁶ तखन एक टा धाँगरीन बेटी छुवा टा आइगेक आलो लेक पतरस के बइसल देइख कहन कहलक, “इहो तो ईसु केर संगे रहे।” ⁵⁷ किन्‍तु पतरस एसन कहत के ईसु केर इन्‍कार करलक, “ए नारी, मोयँ उके नाइ जानँला।” ⁵⁸ थोड़ेक समय केर बादे आरो एक झन उके देइख कहन कहलक, “तोयों तो उकरे संगी हेकिस।” पतरस उके कहलक, “ए हो, मोयँ ना लागों।” ⁵⁹ एकाध घंटा केर बादे आरो एक झन पक्‍का चिन्‍ह कहन कहे लागलक, “एकदम इहो उकरे संगे रहे, काहेकि ई लोग टाउ गलील प्रदेस केर हेके।” ⁶⁰ तखन पतरस उके कहलक, “ए हो, मोयँ नाइ जानँला कि तोयँ का कहिसला।” पतरस एसन कहते रहे, आर तुरंत खुखड़ी डाकलयँ। ⁶¹ तबे परभु पलइट कहन पतरस बाटे देखलक, तो पतरस के परभु केर कहल काथा टाके इयाद आलक। कि “आइजे खुखड़ी डाकेक लेक पहिलेइ लोगेक पासे मोके तीन धंव इन्‍कार करबे।” ⁶² तखन पतरस बाहिर बाहराय कहन ठुसइक-ठुसइक कहन काँदे लागलक।

ईसु केर अपमान आर महासाभाय पुछ ताछ

⁶³ जे लोग गिला ईसु के धइर रहयँ, उमने उके माजाक उड़ाय कहन माइर पीट करे लागलयँ, ⁶⁴ आर उकर आँइख ढांपलयँ आर थापड़ माइर कहन पुछलयँ, “एबार तोयँ कहिन के टा तोके मारलक।” ⁶⁵ आर उमने बेजाइन बेसी आरो निन्‍दा केर काथा उकर बिरोध माहने कहलयँ। ⁶⁶ जखन बिहान होलक, तो पंच लोग गिला, आर प्रधान याजक आर शास्‍त्र ग्यानी गिला जामा होलयँ, आर ईसु के बोड़े सभा माहने लाइन कहन उके पुछलयँ, ⁶⁷ “जदि तोयँ परमेसर केर पइठाल मसीह हेकिस, होले हामरे के कइह दे।” सेखन ईसु उमने के कहलक, “जदि मोयँ तोहरे के कहमूँ, तो तोहरे बिसास नाइ करबा, ⁶⁸ आर जदि मोयँ तोहरे के पुछमूँ, तो तोहरे जबाब देक नाइ पारबा। ⁶⁹ किन्‍तु एधंव लेक मोयँ जे मनुस केर बेटा हेकँ सर्वसक्‍तिमान परमेसर केर दहिना बाटे बइसल रहमूँ।” ⁷⁰ एसन सुइन कहन सउब लोग गिला कहलयँ, “का तोयँ परमेसर केर बेटा हेकिस?” ईसु उमने के कहलक, “तोहरे निजेइ कहाला, कि मोयँ परमेसर केर बेटा हेकँ।” ⁷¹ तखन बोड़े साभा केर अधिकारी गिला कहलयँ, “एबार गोवाही केर कोनो दरकार नेखे काहेकि हामरे निजेइ उकर मुँह लेक सुनली।”