21
धनिमान आर राँड़ी बेटी छुवा केर दान
1 मंदिर माहने धनिमान लोग गिला दान पेटिये आपन दान देत रहयँ सेइ गिला के ईसु देखे लागलक। 2 तखन एक टा गरीब राँड़ी बेटी छुवा कोउ दुइटा ताँबा केर पयसा दान देत के देखलक। 3 ई देइख कहन ईसु कहलक, “सुना! मोयँ तोहरे के कहतँ कि ई गरीब राँड़ी बेटी छुवा टा सउब लेक बेसी दान दे आहे। 4 काहेकि आरो गिला तो आपन खरचा करल बादे बाँचल पयसा टा लेक रोचिक टा दान दे आहयँ, मिन्तुक ई राँड़ी बेटी छुवा टा आपन सउब टाकेइ दान दे देलक, उकर पासे आरो एको टा पयसा नाइखे।”
मंदिर केर बिनास केर भबिस्यबानी
5 जखन थोड़ेक लोग गिला मंदिर केर बारे कहत रहयँ कि ई मंदिर टा कतना सुन्दर पाखनाय आर दान देल जिनिसे साजाल जाय आहे! सेउ खने ईसु कहलक, 6 मंदिर केर जोन जिनस गिला के तोहरे देखो ताहा, ई सउब एसन धंसाल जाई कि तेंगराल पाखना गिला एको टा नाइ रही, एसन दिन आई।
संकट आर मुसिबत
7 तखन उमने ईसु के पुछलयँ, “ए गुरु, ई सउब कबे होई? आर ई काथा टा पूरा होयेक पहिले का चिन्हा होई?” 8 ईसु उमने के कहलक, “साबधान रहबा, बेजाइन लोग आय कहन कहबयँ, ‘मोयँ मसीह हेकँ’, आर एसन समय टाउ सामने पहँइच जाय आहे, सेइ तेहें तोहरे केकरो बहकाल काथाय ना चलबा। 9 जखन तोहरे संसार माहान लड़ाई-झागड़ा आर विद्रोह केर चरचा सुनबा तो ना घबड़ाबा, काहेकि दुनिया केर अंत होयेक लेक पहिले ई सउब होयेक जरुरी आहे। लेकिन इकर बादे तुरते दुनिया केर अंत नाइ होई।” 10 आरो ईसु उमने के कहलक, “एक जाइत दोसर जाइत केर संगे आर एक राइज दोसर राइज केर संगे लड़ाई करबयँ, 11 आर बोड़े बोड़े भूईं कम्पो होई, आरो जाहाँ-ताहाँ आकाल होई आरो महामारियो होय जाई, आर आकासे भयंकर घटना सउब होई आरो बोड़े-बोड़े आस्चर्य केर चिन्हा देखाई। 12 किन्तु ई सउब घटना होयेक लेक पहिले लोग गिला तोहरे के धरबयँ आर साताबयँ, आर यहूदी धरम पंचाइत गिलाये जिमा देबयँ, आर जेहेल खानाय बंद कराबयँ। आरो तोहरे के राजा गिला केर पासे, आर राइजपाल केर पासे लेगाबयँ, 13 लेकिन इटा तोहरेक तेहें उमनेक पासे मोर बारे कहेक बेस मोका होई। 14 हामरे का जबाब देबिक सेटा केर चिन्ता नि करब, इटा आपन मने सोंइच राखा। 15 काहेकि मोयँ तोहरे के ओहे खने एसन जबाब देक तेहें बुध्दी देमूँ, कि तोहरेक सउब बइरी गिला तोहरेक पासे टेके नाइ पारबयँ आर ना तो तोहरेक काथा के काटे पारबयँ। 16 तोहरेक मांय-बाप, आर भाई-बन्धु, आर हित-कुटुम्ब गिला, आरो संगी गिलाइ तोहरे के धरुवाबयँ, आर एतना तक कि तोहरेक मइधे कोय झन के मारुवाय देबयँ। 17 तोहरे मोर ऊपरे बिसास कराला सेइ तेहें सउब लोग तोहरेक संगे घिरना करबयँ। 18 तेऊ तोहरे केर कोनो बगड़ाय नाइ पारबयँ। 19 तोहरे बिसास माहने थाती रहा, तोहरेक आत्मिक जीत होई आर आपन आत्मा के बाचाय पारबा।”
यरुसालेम केर बिनास केर भबिस्यबानी
20 “जखन तोहरे यरुसालेम सहर के चाइरो बाटे लेक फौजी गिला के घेरल देखबा तो जाना कि ऊ सहरेक बिनास केर समय पहँइच जाय आहे। 21 तखन जे गिला यहूदिया राइज माहने आहयँ सेइ गिला पाहाड़े पाराउन का, आर जे गिला यरुसालेम सहरे आहयँ सेइ गिला बाहिर निकलुन का, आर जे गिला गाँवे आहयँ उमन सहरे ना जाउनका। 22 काहेकि ई सहर केर लोग गिला के परमेसर दंड़ देवाइया आहे इटा लेक जेटा धरम शास्त्र माहने लिखल आहे, सेटा पूरा होय जाई। 23 उखने जे भारी गाते आहे आर दुध पियाउ छुवारी मांय हेके, उमनेक तेहें हाय, हाय! काहेकि देस माहने भारी बिपइत आई आर लोग गिलाक तेहें परमेसर केर खिंस भड़इक उठी। 24 उमने बइरी गिलाक हाथियार लेक मारुवाल जाबयँ, आर संसार केर देस-देस माहने बन्दी बनाय कहन पइठाल जाबयँ, आर उमन के ऊ खन तक बइरी गिला दाबाय कहन राखबयँ जखन तक यरुसालेम माहने बइरी केर राइज रही।”
मानुस केर बेटा ईसु केर दुबारा आयेक
25 “उखने आकासे सुरुज, चान्द, आर तइरगन गिलाय नाना किसिम केर बिनासेक घटना होई, आर धरती माहने सउब देस केर लोग गिला केर ऊपरे संकट होई, काहेकि उमने समुन्दरेक लहर केर गरजन सुइन कहन घबड़ाय जाबयँ। 26 संसार माहने होवइया नाना रकम केर घटना के सुइन कहन, डरे लोग गिला केर गाते जीबन टाइ नाइ रही। काहेकि आकास माहने सुरुज, चान्द, आर तइरगन गिला के हिलाल जाई। 27 तबे मानुस केर बेटा ईसु के सक्ति आर बोड़े महिमा केर संगे बादइरे आत के देखबयँ। 28 जखन ई सउब घटना होयेक लागी, तो तेयार होय कहन आसरा देखबा, काहेकि तोहरेक छुटकारा चाँड़ेइ होई।”
आँजीर गाछ केर कहबी काथा
29 ईसु चेला गिला के एक टा कहबी काथा कहलक, “आंजीर केर गाछ के चाहे आरो कोनो गाछ गिला के देखा। 30 जखन ऊ गाछ गिलाय पात नजगेला, तो तोहरे देइख कहन निजेइ जाइन पावाला कि जेठ मास पहँइच गेलक। 31 एहे रकमेइ आकासे सुरुज, चाँद, आर तइरगन गिलाय नाना किसिम केर बिनास होयेक घटना के देखबा, तो जाइन जाबा कि परमेसर केर राइज पहँइचो तेहे। 32 सुना! मोयँ तोहरे के कहँला, जखन तक ई सउब घटना पूरा नाइ होई, तखन तक ई जुगेक कोबउ अंत नाइ होई। 33 आकास आर धरती घोसइक जाई, किन्तु मोर कहल काथा टा एको तनिकोउ बेरथा नाइ जाई।”
हमेसा तेयार रहा
34 सेइ तेहें हुँसियारे रहा! तोहरेक मन ठाट-बाट, मद-माताल आर एहे जीबन केर चिन्ता माहने लोभाल ना रहुक का। काहेकि मोर आयेक दिन टा आचकाय फाँसी केर निहार आई। 35 एहे निहारे ई दिन टा गोटा संसार माहने सउब केर ऊपरे आई। 36 सेइ तेहें तोहरे हमेसा जागल रहा आर बिनती प्राथना करते रहा, ताकि ई सउब आवइया घटना लेक बांचेक, आर मानुस केर बेटा ईसु केर पासे ठाड़ होय पारा। 37 उखने ईसु मंदिर माहने दिने उपदेस देत रहे आर राइते जैतुन नामेक पाहाड़े राइत बितात रहे। 38 बिहाने धुंधुरेइ सउब लोग गिला मंदिर माहने उपदेस के सुनेक तेहें उकर पास आत रहयँ।