20
ईसु संगे सवाल जबाब
1 एक दिन जखन ईसु मंदिर माहने लोग गिला के सिच्छा देत रहे आर सुसामाचार सुनात रहे, तो प्रधान याजक आर शास्त्र ग्यानी गिला, यहूदी पंच लोग गिला केर संगे, उकर पासे आय कहन ठाड़ होलयँ। 2 आर ईसु के कहे लागलयँ, “तोयँ का अधिकारे ई सउब काम गिला के करिसला आर इ अधिकार टा तोके के दे आहे? हामरे के कइह दे।” 3 तखन ईसुओ उमन के एक टा सवाल पूछलक, कि मोयों तोहरे के एक टा बात पुछतँ, मोके कइह देवा। 4 योहन के बपतिस्मा देक अधिकार टा परमेसर बाटे लेक पाय रहे, न लोग बाटे लेक? 5 सेखन उमने आपस मेहेन कहा-कही होय लागलयँ, “जदि हामरे कहब ‘परमेसर बाटे लेक’, होले ऊ हामरे के कही, ‘तोहरे उकर बिसास काहे नाइ करला?’ 6 जदि हामरे कहब, ‘मानुस बाटे लेक’, होले सउब लोग गिला हामरे के पाखनाय ठेंइस मोराबयँ, काहेकि उमने सउब जानयँला, कि योहन एक टा भबिस्यबक्ता रहे।” 7 तखन उमने जबाब देलयँ, हामरे नाइ जानिला, कि उके केकर बाटे लेक अधिकार मिल रहे। 8 सेखन ईसु उमने के कहलक, तो मोयों तोहरे के नाइ कइह देमूँ कि ई काम टा केकर आधिकारे करँला।
बयमान किसान केर उदाहरन
9 तेकर बादे ईसु लोग गिला के एक टा उदाहरन कहे लागलक, “एक टा लोग रहे, ऊ आँगूर गाछ केर बागान लागालक, आर किसान गिला के साझा दे कहन ढेइर दिनेक तेहें परदेस चइल गेलक। 10 जखन फर तरेक समय आलक तो ऊ लोग टा बागान लेक फर केर हिस्सा लेक तेहें एक टा धांगर के किसान गिला केर पासे पइठालक, किन्तु उमने उके पिट-पाइट कहन छुछा हाँथ पइठाय देलयँ। 11 फिन ऊ आरो एक टा दोसर धाँगर के पइठालक, लेकिन उमने उकोउ पिटलयँ आर बेइजति कइर कहन छुछा हाँथ घुराय देलयँ। 12 फिन ऊ तीसरा धाँगर टाके पइठालक, किन्तु उमने उकोउ दमतक माइर-पीट कहन कूदालयँ। 13 तखन आँगूर बागानेक मालिक टा कहलक, ‘मोयँ का जे करमूँ? मोयँ आपन दुलारा बेटा केइ पइठामूँ, होय पारे उके माइन करबयँ आर मोर भाग टाउ देबयँ।’ 14 जखन किसान गिला मालिक केर बेटा के देखलयँ तो आपस माहने बिचार करे लागलयँ, ‘एहे टाइ तो हकदार हेके, चला हामरे इके मोराय देबिक, होले आँगूर केर बागान टा हामरेक होय जाई।’ 15 एसन कइह कहन उमने उके आँगूर केर बागान लेक बाहिर बाहराय कहन मोराय देलयँ। एबार आँगूर केर बागान मालिक टा उमने के का करी सेटा सुना? 16 मालिक टा आय कहन ऊ किसान गिला के मोराय देई, आर आँगूर केर बागान के दोसर गिला के जिमा दे देई।” एसन कथा सुइन कहन सभे कहलयँ, “परमेसर एसन दासा ना होय देउक।” 17 ईसु उमनेक बाटे देइख कहन कहलक, “फिन इटा धरम शास्त्र माहने का लिख आहे सेटा सुना? ‘जोन पाखना टाके राजमिस्तिरी गिला बेकामा बुइझ रहयँ, ओहे टाइ कोना केर कामे आलक।’ 18 जदि केउ ऊ पाखनाय गिरी, ऊ गेंजला होय जाई, आर जेकर ऊपरे ऊ पाखना टा गिरी, ऊ पीसाय जाई।”
ईसु संगे मासूल देक बारे सवाल-जबाब
19 शास्त्र ग्यानी आर प्रधान याजक गिला समइझ गेलयँ कि ईसु उदाहरन केर दाराय हामरे के दुस्ट किसान गिला केर संगे जोखो तेहे। सेइ तेहें ईसु के ओहे खने धरे चाहलयँ, किन्तु लोग गिला बिरोध करबयँ सेइ डरे उमने नाइ धरलयँ। 20 लेकिन उमने उके धरेक मोका खोजे लागलयँ, आर उमने भेदिया पइठालयँ, ताकि उके उकर कोनो-मनो गलत काथाय फाँसाउन, आर रोमी सरकार आर अधिकारी गिला के जिमा देल जाउक। 21 उमने उके पुछलयँ, ए गुरू! हामरे सउब जानिला कि तोयँ जेटा कहिसला आर सिखाइसला ऊ सउब सही आहे, आर केकरो मुँह चिन कहन काथा नाइ करिसला, बरन्चो परमेसर केर हिंछा मोताबिक चलेक तेहें बहुत बढ़ियाँ सिच्छा देइसला। 22 तो हामरे के एक टा बात कइह दे कि रोमी सामराट के मासूल देक उचित आहे न नाहीं? 23 लेकिन ईसु उमनेक चालाकी टाके जाइन कहन कहलक, 24 “मोके एक टा सिक्का देखावा, इकर माहने केकर चिन्हा आर केकर नाम आहे?” तो उमने कहलयँ, “सामराट केर।” 25 ईसु उमने के कहलक, तो जेटा सामराट के देक हेके, उटा सामराट के देवा, आर जेटा परमेसर के देक हेके, उटा परमेसर के देवा। 26 भेदिया गिला ईसु केर ई काथा टाके सुइन कहन लोगेक पासे भकुवाय कहन चुपे रइह गेलयँ, आर उकर कोनो गलती धरे नाइ पारलयँ।
बिहा-सादी आर मुरदा लेक बाँइच उठेक
27 तेकर बादे सदूकी दल केर लोग गिलाकa मइधे कोय झन निहार ईसु ठीन आलयँ। ई सदूकी गिला के मानुस केर मोइर कहन बाँइच उठेक ऊपरे बिसास नाइ रहे। उमन उके पुछलयँ, 28 “ए गुरू, मूसाb हामरेक तेहें एसन नियम लिख आहे, कि जदि केकरो भाई आपन घरइया रहत के बिना छुवा-पुताय मोइर जाई तो उकर भाई उकर भउजाई के बिहा करुक, आर आपन दादाक तेहें एक टा बेटा जनमाउक जे टाय उकर पीढ़ी चलूक। 29 तो एसने सात भाई रहयँ, सउब लेक बोड़े भाई टा बिहा करलक आर बिना छुवा पुताय मोइर गेलक। 30 तेकर बादे उकर लेक छोटे भाई टा उकर घरइया के बिहा करलक आर उहो मोइर गेलक, 31 तेकर बादे तीसरा भाई टाउ उकेइ बिहा करलक, आर उहो मोइर गेलक। एहे निहारे सातो भाई गिला बिना छुवा पुता जनमालेइ मोइर गेलयँ। 32 आखिरी माहने एक दिन ऊ बेटी छुवा टाउ मोइर गेलक। 33 एबार सउब मोरल गिला दुबारा बाँइच उठल बादे ऊ केकोर घरइया होई, काहेकि सातो भाई उकर संगे बिहा कइर रहयँ।” 34 ईसु उमने के कहलक, “बिहा-सादी तो इ जुग माहने मानुस केर होयला। 35 लेकिन जे लोग गिला आयेक वाला जुग के पायेक लाइख होबयँ उमने मोरल लेक दुबारा बाँइच उठबयँ, सेइ लोग गिला ना तो बिहा कइर कहन आनबयँ आर ना तो केकउ बिहा देबयँ। 36 उमने आरो मोरबो नाइ करबयँ, काहेकि उमने सरग दूत केर समान होबयँ जे कोबउ नाइ मोरयँला, उमने दुबारा बाँइच उठेक चलते परमेसर केर सान्तान बइन जायँला। 37 हरियर झूँड़ टा डुँड़कत खने परमेसर मूसा के दरसन दे रहे, सेटाक बारे जेटा मूसा लिख आहे उटा लेक पाता चलेला कि मोरल लोग गिला दुबारा बाँइच उठबयँ। मूसा परमेसर के ‘अब्राहम केर परमेसर, आर इसाहक केर परमेसर, आर याकूब केर परमेसर’ कहेला।c 38 आर परमेसर तो मोरल गिला केर ना लागे, किन्तु जियंत गिला केर परमेसर हेके, काहेकि उकर पासे सउब जीयंत आहयँ।”d 39 तखन ई काथा टाके सुइन कहन थड़ेक शास्त्र ग्यानी गिला कहलयँ “ए गुरु, तोयँ बहुत बेस काथा कइह आहिस।” 40 तेकर बादे उमने के ईसु संगे आरो कोनो सवाल पूछेक सांहास नाइ होलक।
मसीह केकर बेटा हेके
41 ईसु ऊ शास्त्र ग्यानी गिला के पूछलक, “मसीह के राजा दाऊदेक खानदान केर बेटा का करे कहयँला। 42 काहेकि दाऊद राजा निजेइ धरम शास्त्र माहने भजन संहिता केर किताबे कहेला, ‘कि परमेसर मोर परभु मसीह के कहलक: 43 मोर दहिना बाटे बइस, जखन तक कि मोयँ तोर बइरी गिला के तोर गोड़ धारे नाइ करमूँ।’ 44 दाऊद तो मसीह के परभु कहेला, फिन ऊ उकर सान्तान का रकम होलक?”
ढोंगी शास्त्र ग्यानी लेक साबधान
45 जखन सउब लोग गिला सुनत रहयँ, तो ईसु आपन चेला गिला के कहलक: 46 “ढोंगी शास्त्र ग्यानीe गिला लेक साबधान रहा, जेके लोग लेक माइन पायेक तेहें लाम्बा-लाम्बा धरम पोसाक पिंध कहन घुइर बुलेक बेस लागेला, आर उमने चाहयँला कि लोग हाट-बाजारे परनाम करुन, आर आराधनालय माहने, आर भोज घरे उमने के आघुवे खास जायगा देल जाऊक। 47 उमने राँड़ी बेटी छुवा केर घर टाके हड़इप लेनला, आर देखाउटी केर तेहें बेजाइन देरी तक प्राथना करते रहयँला। उमने के परमेसर बहुत बेसी दंड़ देई।”