19
मासूल लेवइया जक्कई केर मन बदलेक
1 जखन ईसु यरीहो नगर बाटे लेक जात रहे। 2 तो ऊ नगर माहने जक्कई नाम केर एक टा लोग रहे। ऊ लोग टा मासुलदार गिला केर सारदार आर धनिमान रहे। 3 ऊ देखे चाहोत रहे कि ईसु के हेके। किन्तु ऊ टेपरा रहे आर भीड़ केर चलते देखे नाइ पारत रहे। 4 तखन ऊ ईसु के देखेक तेहें आघुवे कुइद कहन गेलक, आर एक टा डुम्बेइर गाछे चेढ़लक, काहेकि ईसु ओहे डहरे जावइया रहे। 5 जखन ईसु उठिन पहँचोलक तो गाछ ऊपरे उके देइख कहन कहलक, “ए जक्कई चाँड़े नाभिन, आइज मोके तोर घरे रोहेक दरकार आहे।” 6 सेखन ऊ चाँड़े-चुँड़ू नाइभ कहन रिझे उके आपन घर लेगलक। 7 ई देइख कहन सउब लोग गिला कुरकुराय कहन कहे लागलयँ, कि ईसु तो एक टा पापी केर घरे जाय आहे।
8 जक्कई ठाड़ होय कहन परभु के कहलक, “ए परभु देख, मोयँ आपन आधा सम्पति के गरिब गिला के एखनेइ दे तहों, आर जदि केकरो लेक कोनो आन्याय कइर कहन ले आहों होले उके चाइर गुना घुराय देमूँ।” 9 तखन ईसु उके कहलक, “इहो अब्राहम केर खानदान मइधेक हेके, सेइ तेहें आइज ई घरे उद्धार आय आहे। 10 काहेकि मोयँ जे मानुस केर बेटा भेंसे आय आहों, पाप आर बुराई माहने हेजाल लोग गिला के खोजेक आर उमने केर उद्धार करेक तेहें आय आहों।”
दस टा सोनाक सिक्का केर उदाहरन
11 जोन लोग गिला ईसु केर काथा के सुनत रहयँ, सेइ लोग गिला सोंचत रहयँ कि एबार परमेसर केर राइज परगट होयेक वाला आहे, काहेकि उमने यरुसालेम नगर केर सामने पहँइच रहयँ। 12 सेतेहें ईसु उमने के एक टा कहबी काथा कहलक, “एक टा ऊँचा खानदान केर लोग रहे ऊ राजा केर पद पाय कहन घुइर आमूँ सोंइच कहन दूर देस गेलक। 13 जायेक लेक पहिले ऊ आपन धाँगर गिलाक मइधे दस टाके डाकलक, आर उमने के दस टा सोना केर सिक्काa दे कहन कहलक, मोर घुरेक तक लेन देन करबा। 14 किन्तु ऊ नगर केर रहइया गिला जे उके खिंसात रहयँ, उमने दूतb गिला केर दाराय कइह पइठालयँ, कि हामरे उके राजा नाइ मानब।
15 जखन ऊ राजा केर पद पाय कहन घुरलक, तखन ऊ आपन धाँगर गिला के जेके सोना केर सिक्का दे रहे उमने के डाकलक, आर उमने के पुछलक, कि तोहरे लेन देन कइर कहन कोतना नाफा करला? 16 तखन एक झन आय कहन कहलक, ‘ए मालिक, तोर देल सोना केर सिक्का लेक मोयँ आरो दसटा सोना केर सिक्का कामाय आहों।’ 17 मालिक टा उके कहलक, ‘बहुत बढ़ियाँ करले! तोयँ बेस धांगर हेकिस, तनिके टाय बिसास करेक निहार काम करले, एबार तोयँ दस टा नगर केर ऊपरे अधिकार राखिन।’ 18 दोसरा टा आय कहन कहलक, ‘ए मलिक तोर देल सोना केर सिक्का लेक पाँच टा आरो कामालों। 19 तो मालिक टा उकोउ कहलक, ठीक आहे! तोयों पाँच टा नगर केर ऊपरे अधिकार राखिन। 20 तेकर बादे तीसरा टा आय कहन कहलक, ए मालिक, ई देख तोर देल सोना केर सिक्का टाके मोयँ गामछाय बाँइध राइख रहों। 21 काहेकि तोयँ केकरो ऊपरे दया नाइ करिसला, जेटा के तोयँ नाइ राखिसला सेटा कोउ तोयँ ले लेइसला, आर दोसर केर रोपल टाकोउ काटिसला, सेइ तेहें मोयँ तोर संगे डारात रहों।’ 22 तखन मालिक टा उके कहलक, ‘ए बेकामा धाँगर, मोयँ तोरे मुँह केर कहल काथा लेकइ तोके दोसी दे तहों। जदि तोयँ मोके जानत रहिस कि जेटा मोयँ नाइ राखोंला, सेटा के मोयँ लेवँला आर पोरेक रोपल टाके काटोंला आर मोयँ केकरो ऊपरे दया नाइ करोंला।c 23 तो मोर देल सोनाक सिक्का टाके तोयँ बैंके काहे नाइ राइख देले, मोयँ आय कहन सूद मूल ले लेतँ?’ 24 आर जे लोग गिला पासे ठाड़ रहयँ उमने के कहलक, ‘उकर ठीन लेक सोना केर सिक्का टाके ले लेवा, आर जेकर पासे दस टा सोनाक सिक्का आहे उके दे देवा।’ 25 तबे उमने मालिक के कहलयँ, ‘ए मलिक, उकर पासे दस टा सोनाक सिक्का तो आहे।’ 26 ‘मोयँ तोहरे के कहतँ कि, जेकर पासे आहे, उके आरो देल जाई, आर जेकर पासे नेखे उकर लेक उटा कोउ लेल जाई जेटा उकर पासे आहे। 27 किन्तु ऊ दुसमन गिला जे मोके नाइ मानत रहयँ कि मोयँ उमनेक ऊपरे राइज करमूँ, सेइ गिला के हियाँ आना आर मोर पासे उमने के माइर मोरावा।’”
यरुसालेम नगर माहने ईसु केर स्वागत
28 इ काथा टाके कहल बादे ईसु यरुसालेम बाटे उमनेक आघु-आघु चललोक। 29 जखन ऊ जैतुन नामेक पाहाड़े बैतफगे आर बैतनिय्याह गाँव केर सामने पहँचोलक तो आपन दुइटा चेला गिला के पइठालक। 30 आर उमन के कहलक कि आस-पासेक गाँवे जावा, हुँआ तोहरे पहँचत केइ एक टा गाधा छुवा के बाँधल पाबा। जेकर ऊपरे केउ कबोउ नाइ चाइप होंय, उके तोहरे खोइल कहन ले आना। 31 आर जदि केउ तोहरे के पुछबयँ कि काहे खोलो ताहा, तो तोहरे एसन कहबा कि परभु के इकर दरकार आहे।
32 जे गिला के पइठाय रहे, उमने जाय कहन जेसने ऊ उमने के कइह रहे, ओसनेइ पालयँ। 33 जखन उमने गाधा छुवा टाके खोलत रहयँ, तो मालिक टा उमने के पूछलक, ई गाधा छुवा टाके काहे खोलो ताहा? 34 सेखन उमने कहलयँ, “परभु केर इकर दरकार आहे”। 35 तेकर बादे उमने खोइल कहन उके ईसु केर पासे ले आनलयँ, आर आपन लुगा के गाधा छुवा केर पीठे डिसाय कहन ईसु के बइसालयँ। 36 आर जखन ऊ जात रहे, तो लोग गिला आपन लुगा के डहरे डिसाले जात रहयँ।
37 जखन ईसु जैतुन पाहाड़ केर नाभान माहने पहँचोलक, तो चेला गिला केर दलd उकर अदभुत काम केर खातिर जेटा उमने देइख रहयँ, रिझे सउब दोमे आंटे-आंटे परमेसर केर इस्तुति करे लागलयँ। 38 आर कहे लागलयँ,
ऊ राजा टा धन्य हेके, जे परभु केर नामे आयला,
सरग माहने सान्ति आर आकास मन्डल माहने महिमा होवुक का।
39 भीड़ मइधे थोड़ेक फरिसी गिला उके कहे लागलयँ, “ए गुरू, आपन चेला गिला के धमकाइन न, चुप रहून।
40 तखन ईसु उमने के जबाब देलक, मोयँ तोहरे के कहँला, जदि इमन चुप रहबयँ होले पाखना गिला परमेसर केर इस्तुति करते के उठबयँ।”
यरुसालेम नगर केर बिनास केर भबिस्यबानी
41 जखन ईसु यरुसालेम नगर केर सामने आलक तो नगर के देइख कहन काँदलक। 42 आर कहलक, “ए यरुसालेम! यदि तोयँ जानतोले कि, आइज केर दिने सांति का निहार पावाई, होले कोतना बढ़ियाँ होतक? किन्तु एबार तोर आँइख लेक उटा ओलत होय गेलक। 43 काहेकि तोर ऊपरे एसन दिन आई कि तोर दुस्मन गिला सउब एक जुट होय कहन तोके घेरबयँ आर चाइरो बाटे लेक तोके दबाबयँ, 44 आर तोके आर तोर भीतरे रहयँला सेइ लोग गिला के सउब के माटिये मेसाय देबयँ, आर तोर तेंगराल पाखना कोउ धोंसाय देबयँ एको टाके नाइ छोड़बयँ, काहेकि तोयँ एसन मोका टाके जे तोर ऊपरे दया करल जाय रहे सेटा के नाइ चिन्हले।”
मंदिर लेक बेपरिया गिला के निकलायेक
45 तेकर बादे ईसु आराधनालय माहने गेलक आर बेचोइया गिला के बाहिर बाहराय लागलक, 46 आर उमने के कहलक, “पबित्र शास्त्र माहने लिखल आहे, कि मोर घर प्राथना केर घर होई, किन्तु इटा के तोहरे चोर आर डाकू गिला केर आड्डा बनाय दे आहा।”