18
राँड़ी बेटी छुवा आर बिचार करइया केर कोहनी
1 फिन ईसु चेला गिला के साराखन बिनती-प्राथाना करुनका आर निरास ना रहुन कइह कहन उमन के इ कहबी काथा टा कहलक, 2 कि एक टा नगर माहने एक टा बिचार करइया रहत रहे। ऊ ना तो परमेसर के डरात रहे आर ना कोनो लोग के बदत्त रहे। 3 ओहे नगर माहने एक टा राँड़ी बेटी छुवाउ रहत रहे। ऊ साराधंव उकर ताहाँ आय-आय कहन कहत रहे, कि मोर बिचार कइर कहन मोके मुदई लेक बाचाव। 4 थोड़ेक समय तक तो ऊ नाइ मानलक, किन्तु आखीर मेहेन ऊ आपन मने बिचार कइर कहन कहलक, “मोयँ ना तो परमेसर लेक डाराँवला, आर ना तो कोनो लोग केर पारवाह करँला, 5 तेऊ ई राँड़ी बेटी छुवा टा मोके तंग करेला, सेइ तेहें मोयँ उकर बिचार कइर कहन फयसला कइर देमूँ, एसन ना होवुक कि साराधंव ऊ आय कहन मोके तंग कइर कहन धोइर देई।”a
6 तखन परभु कहलक, “सुना, ई दुस्ट बिचार करइया टा का कहेला? 7 तो का परमेसर आपन चुनल लोग गिला केर बिचार नाइ करी, जे राइत-दिन उकर दोहाई देते रहेन्ला? का ऊ उमनेक तेहें देरी करी? 8 मोयँ तोहरे के कहँला कि ऊ तुरतेइ उमनेक बिचार करी। तेऊ जखन मोयँ मानुसेक बेटा आमूँ, तो का ऊ ई धरती माहने बिसास देखे पामूँ?”
फरीसी धरम गुरु आर मासुल लेवेइया
9 ईसु उमने के जे आपन ऊपरे भोरसा राखत रहयँ कि हामरे धरमी हेकी, आर दोसर गिला के पापी समझोत रहयँ, सेतेहें ई कहबी काथा टा कहलक: 10 “दुई टा लोग मंदिर माहने प्राथना करेक तेहें गेलयँ, एक टा फरीसी धरम गुरु रहे आर दोसरा मासुलदार रहे। 11 फरीसी धरम गुरु टा ठाड़ुवाय कहन आपन मने एसन प्राथना करे लागलक कि ‘ए परमेसर, मोयँ तोर धन्यवाद करँला, कि मोयँ आरो दोसर लोग गिला निहार भोंटइया, अन्याय करइया आर बेभिचार करइया ना लागँ आर ना तो ई मासुलदार रकम आहों। 12 मोयँ हाप्ता मेहेन दुई दिन उपास रखोंला, आर आपन सउब कामाई केर दसवाँ हिस्साb देवँला।’”
13 “किन्तु मासुलदार टा धूरेइ ठाड़ होय कहन, सरग बाटे आँइख उठायो नाइ चाहलक, बरन्चो आपन छाती पीट-पीट कहन कहलक, ‘ए परमेसर, मोर एसन पापी ऊपरे दया करिन।’ 14 मोयँ तोहरे के कहँला कि ऊ फरीसी धरम गुरु टाके नाहीं, किन्तु एहे मासुलदार टाके धरमी बनाल गेलक, आर ऊ आपन घर गेलक। काहेकि जदि केउ आपन के बोड़े समझेला, तो उके छोटे करल जाई, आर जदि केउ आपन के छोटे समझेला, उके बोड़े बनाल जाई।”
ईसु छुवा गिला के आसिरबाद देला
15 फिन लोग गिला आपन-आपन बालक छुवा गिला के ईसु पासे आने लागलयँ कि ऊ उमनेक ऊपरे हाँथ राइख कहन आसिरबाद देउक का, किन्तु चेला गिला देइख कहन उमने के धमकालयँ कि छुवा गिला के ना आना! 16 सेखन ईसु छुवा गिला के आपन पासे डाइक कहन कहलक, “छुवा गिला के मोर ठीन आयेक देवा, आर उमने के माना ना करा: काहेकि परमेसर केर राइज एसने गिलाक तेहें हेके। 17 मोयँ तोहरे के सते कहतँ, जे गिला परमेसर केर राइज के छोटे छुवा केर समान गरहन नाइ करी, ऊ सरग माहने कबोउ ढुके नाइ पारी।”
धनिमान अदमी आर अनन्त जीबन
18 एक टा धार्मिक नेता ईसु के सवाल पूछलक, “ए उत्तम गुरु, अनन्त जीबन के पायेक तेहें मोयँ का करमूँ?” 19 सेखन ईसु उके कहलक, “तोयँ मोके उत्तम काहे कहोतिस? केउ उत्तम निखयँ, किबल परमेसर उत्तम आहे। 20 तोयँ परमेसर केर आग्यां के तो जानिसला कि बेभिचार नाइ करेक, हात्या नाइ करेक, आर चोरी नाइ करेक, मिछा गवाही नाइ देक, आरो आपन बाप-मांय केर आदर करेक।” 21 ऊ नेता टा कहलक, “ई गिला के तो मोयँ छोटे लेकइ मानते आ तहँ।” 22 एसन सुइन कहन ईसु उके कहलक, “तोर मेहेन एखनोउ एक टा काम बाकी आहे, आपन सउब कुछ बेंइच कहन गरीब गिला के बाँइट देहिन, तबे तोयँ सरगे धन पाबे, आर आय कहन मोके गुड़ियाव।”
23 एसन सुइन कहन नेता टा दोमे उदास होलक, काहेकि ऊ बोड़े धनिमान रहे। 24 सेखन ईसु उके देइख कहन कहलक, धनिमान गिला के परमेसर केर राइजे ढूकेक तेहें कतना कठिन आहे? 25 परमेसर केर राइजे धनिमान गिला के ढूकेक लेक ऊँट के सुई केर छेन्दाय पार होयेक सहज आहे। 26 तखन सुनइया गिला उके कहलयँ, तो केकर उद्धार होय पारेला? 27 ईसु उमने के कहलक, जेटा मानुस लेक नाइ होय पारेला सेटा परमेसर लेक होयला।
28 सेखन पतरस कहलक, देख, हामरे तो घर-दुरा छोइड़ कहन तोके गुड़ियाय आही। 29 ईसु उमने के कहलक, मोयँ तोहरे के सते कहतँ, कि जे गिला परमेसर केर राइज केर खातिर घर-दुरा, भाई-बन्धु, मांय-बाप चाहे आपन सउब छुवा-पुता के छोइड़ दे होयँ। 30 उमने कोय गुना बेसी ई जीबने पाबयँ, आर आई सेइ जुगे अनन्त जीबन पाबयँ।
आपन मिरतु केर बारे ईसु केर तीसरा भविष्यवाणी
31 फिन ईसु आपन बारो टा चेला गिला के संगे लेगाय कहन उमने के कहलक, “देखा, हामरे सउब यरुसालेम नगर जाइला, आर जतना काथा मोर मानुसेक बेटाक तेहें भबिस्यबक्ता गिला केर दाराय लिखल जाय आहे, ऊ सउब पूरा होय जाई। 32 काहेकि ऊ दोसरा जाइत गिला केर हाँथे जिमा देल जाई, आर उमने उकर माजाक उड़ाबँय, आर उके अपमान करबयँ, आर उकर ऊपरे थूकबयँ, 33 आर उके कोड़ाय पिटबयँ, आर माइर मोराबयँ, आर ऊ तीसर दिने फिन बाँइच उठी।” 34 लेकिन चेला गिला इ सउब काथा के एक टाउ बुझे नाइ पारलयँ, काहेकि ई काथा टा उमन लेक छिपल रहलक। सेतेहें उमने बुझे नाइ पारलयँ, कि ऊ का टाकेर बारे कहत रहे।
आँधरा भीख माँगा के देखेक सक्ति पायेक
35 जखन ऊ यरीहो नगर केर पासे पहँचोलक, तो एक टा आँधरा लोग टा संड़क धारे बइस कहन भीख मांगत रहे। 36 आर ऊ भीड़ केर लोग गिला केर चलेक साहड़ा सुइन कहन, लोग गिला के सुधियाय लागलक, ई का हो तेहे? 37 उमने उके बातालयँ कि ईसु नासरी जा ते। 38 तखन ऊ दोमे आंटे हाँकालक, “ए ईसु, पुरखा दाऊद केर सान्तान, मोर ऊपरे दया करिन।” 39 भीड़ केर लोग गिला ऊ आँधरा टाके धमकाय कहन चुप रहेक तेहें कहलयँ। किन्तु ऊ आरो आंटे-आंटे कहे लागलक, “ए पुरखा दाऊद केर सान्तान मोर ऊपरे दया करिन।” 40 तखन ईसु ठाड़ुवाय कहन चेला गिला के आग्यां देलक कि उके मोर पासे लाना, आर जखन ऊ सामने पहँचोलक, तो ईसु उके पूछलक। 41 “कि तोयँ का चाहो तिस, कि मोयँ तोर खातिर करमूँ?” तखन आँधरा टा कहलक, “ए परभु, मोयँ देखेक सक्ति पावँका।” 42 ईसु उके कहलक, “तोयँ देखेक सक्ति पाइन, तोर बिसास टाइ तोके बेस कइर देलक।” 43 आर तुरतेइ देखे लागलक, आर ऊ परमेसर केर बड़ाई करते के उकर पेछुवे चइल गेलक, आर सउब लोग गिला उके देइख कहन परमेसर केर इस्तुति करलयँ।